ᓂᐃᐧᔕᑊ ᐁᐧᐱᑫᐧ ᐅᑎᐢᑯᓂᐠ ᐅᑭᑌᐱᓇᓇᐊᐧ ᐱᐊᐧᐱᑯᑫᐃᐧᐣ ᐃᐡᑯᓄᐃᐧᑭᑭᓄᐊᒪᑫᐃᐧᐣ

Create: 12/01/2015 - 19:24

ᐊᐣᒋᓫᐃᐣ ᔑᐁᐧᐱᐠ ᐁᐧᐱᑫᐧ ᑕᔑᑫᐃᐧᓂᐠ ᑲᐅᒋᐨ ᒪᐊᐧᐨ ᐅᒥᓀᐣᑕᐣ ᐊᐦᐃᐠ ᐱᐊᐧᐱᑯᑫᐃᐧᓂᐠ ᐁᐃᐧᐦᐃᔑᒪᑕᓄᑭᐨ ᐊᐱ ᑭᔑᐡᑯᓄᐨ ᐁᑲᐧ ᒥᓇ ᒪᐊᐧᐨ ᐁᑭᓇᐦᐃᐨ ᑲᑭᑭᓄᐊᒪᐊᐧᑲᓄᐃᐧᐨ ᐃᐃᒪ ᐅᐡᑭ ᐱᒪᒋᐅᐁᐧᐣ ᐱᐊᐧᐱᑯᑫᐃᐧᐣ ᑭᑭᓄᐊᒪᑫᐃᐧᐣ ᑲᑭᐸᑭᑎᓂᑲᑌᐠ᙮
“ᒪᐊᐧᐨ ᒥᐡᑕᐦᐃ ᓂᑭᐦᐃᑭᐟ ᑲᑭᐃᐡᑯᓄᔭᐣ ᒥᐡᑯᐨ ᑲᐧᔭᐠ ᒋᑕᔑᑭᑫᐣᑕᓯᔭᐣ,” ᐃᑭᑐ ᔑᐁᐧᐱᐠ ᐁᑲᐧ ᒥᓇ ᒪᒪᑕᐃᐧᐱᐊᐧᐱᑯᐢ ᑭᒥᓇᑲᓄ ᐃᐃᐁᐧ ᒣᑲᐧᐨ ᑲᑭᑭᓇᐧᒋᐊᑲᓄᐊᐧᐨ ᑲᑭᑭᔑᐡᑯᓄᐊᐧᐨ ᐃᐃᒪ ᐁᐧᐱᑫᐧ ᑕᔑᑫᐃᐧᓂᐠ ᓂᔑᐣ ᒪᑯᐱᓯᑦ ᑲᐃᓇᑭᓯᐨ᙮ “ᔕᑯᐨ ᐱᓂᒪᑲᔭ ᓂᐃᐧᑭᔑᐡᑯᓄ ᐁᑲᐧ ᐊᐱᐣ ᐱᐊᐧᐱᑯᑫᐊᓄᑭᐃᐧᓂᐠ ᑫᐃᔑᓇᓇᑕᐊᐧᓄᑭᔭᐣ᙮ ᐊᒥᒪ ᑲᐃᐧᑕᓇᓄᑭᔭᐣ — ᐁᐅᒋ ᐱᔑᓇᑲᐧᐠ ᑲᔭ ᓂᑕᔑᑫᐃᐧᓂᐠ᙮”
ᔑᐁᐧᐱᐠ ᐃᐧᐣ ᐁᑕ ᑭᐯᔑᑯ ᐃᑫᐧᐃᐧ ᐅᐅᐁᐧ ᓂᔓᔕᑊ ᐱᒥᑯᓇᑲ ᑲᑭᐃᐡᑯᓄᐊᐧᐨ ᐁᑲᐧ ᒥᓇ ᑯᑕᑭᔭᐣ ᐃᑫᐧᐊᐧᐣ ᐅᐸᑯᓭᓂᒪᐣ ᑫᐃᐧᓇᐊᐧ
ᐱᐊᐧᐱᑯᑫᐃᐧᓂᐠ ᒋᑭᐊᓂᐦ ᑕᓇᓄᑭᐊᐧᐸᐣ᙮
“ᒪᐊᐧᐨ ᒥᐡᑕᐦᐃ ᐅᐅᐁᐧ ᓂᑭᐅᒋᐃᐧᒋᐦᐃᑯᐣ,” ᔑᐁᐧᐱᐠ ᐃᑭᑐ᙮ “ᑫᑭᓇᐊᐧ ᐅᑕᐱᓇᒧᐠ ᐁᑕ ᓂᑲᑭᑭᐟ — ᒪᐊᐧᐨ ᑭᒋᐃᐧᒋᐦᐃᐁᐧᒪᑲᐣ ᐁᑲᐧ ᒥᓇ ᒥᐡᑕᐦᐃ ᑫᑯᐣ ᓂᑭᐅᒋᑭᑫᐣᑕᐣ ᐁᑲᐧ ᑲᐧᓂᐣ ᒥᓇ ᑕᑲᐨ ᑲᓇᐯᐃᐧᓯᐣ ᐅᐅᐁᐧ ᐊᓄᑭᐃᐧᐣ ᐃᐧᐅᑕᐱᓇᒪᐣ᙮”
ᔑᐁᐧᐱᐠ ᒪᐊᐧᐨ ᐅᑭᒧᓀᐣᑕᐣ ᑕᐱᐡᑯᐨ ᐅᓂᒋᓂᐊᐧ ᑲᑭᐊᐸᒋᑐᐊᐧᐨ ᓇᓇᑲ ᑲᑭᐃᔑᑭᑭᓄᐊᒪᐊᐧᑲᓄᐊᐧᐨ ᐃᐃᒪ ᑲᑭᐅᒋᐱᒧᑌᐠ ᑲᑦᐯᕑᐃᔭᐣ ᑲᐧᓫᐊᐨ ᑭᒋᑭᑭᓄᐊᒪᑫᐃᐧᑲᒥᑯᐠ ᐁᑲᐧ ᒥᓇ ᐯᔑᑯᐱᒥᑯᓇᑲ ᐊᐦᐃᐠ ᑭᑕᐃᐧᐊᓄᑭᐊᐧᐠ ᐃᐃᒪ ᑭᓫᐃᑊᐢ ᐁᐢᑫᕑ ᑕᓇᐳᐃᐧᓂᐠ ᐊᐦᐃᐠ ᐅᑕ ᑲᐃᐧᐃᔑᐱᐊᐧᐱᑯᑲᓂᐊᐧᐠ᙮
“ᒪᐊᐧᐨ ᒥᐡᑕᐦᐃ ᓂᐦᓂᒋᓂᓇᐣ ᓂᑭᐊᐸᒋᑐᒥᐣ ᓇᓇᑲ ᑲᑭᐃᔑᑭᑭᓄᐊᒪᑯᔭᐠ ᐁᑲᐧ ᐊᒥᐅᐁᐧ ᒪᐊᐧᐨ ᑲᑭᒧᓀᐣᑕᒪᐣ,” ᔑᐁᐧᐱᐠ ᐃᑭᑐ᙮
ᐊᓫᐃᐠ ᐊᐧᐸᐢ, ᐁᒪᐢ ᒉᑲᑊ, ᐯᕑᐊᐣᑕᐣ ᔑᐁᐧᐱᐠ, ᑯᑎ ᒥᑭᓇᐠ, ᑲᐧᕑᐃ ᓂᔑᓇᐯᐢ, ᑕᓫᐊᐣ ᒉᑲᑊ, ᑌᐟᑲᐦᐊᕑ ᒉᑲᑊ, ᓫᐅᐃᐧᐢ ᓱᐱᔭ, ᓫᐃᐊᐤ ᑕᕑᐊᐟᓫᐁᐠ, ᓫᐃᐅᐠ ᒥᑭᐢ, ᓫᐊᐸᐟ ᒉᑲᑊ, ᓫᐅᑎ ᒥᑭᓇᐠ, ᐁᑲᐧ ᓴᐃᒪᐣ ᔑᐁᐧᐱᐠ ᐊᒥᐅᑫᐧᓂᐊᐧᐠ ᑲᑭᓇ ᐁᐧᐱᑫᐧ ᑲᐅᒋᐊᐧᐨ ᒥᓇ ᑲᑭᑭᔑᐡᑯᓄᐊᐧᐨ᙮
“ᓂᐦᓂᒋᓇᐣ ᑲᐊᐸᒋᑐᔭᐠ ᓇᓇᑐᐠ ᑲᑭᐃᔑᑭᑭᓄᐊᒪᑯᔭᐠ ᒪᐊᐧᐨ ᓂᑭᒥᓄᓴᐦᐃᑯᐣ ᑕᐱᓀᑲ ᐅᐅᒪ ᓇᐊᐧᐨ ᒥᐡᑕᐦᐃ ᐁᐧᒋᑭᑫᐣᑕᒪᐣ ᑫᑯᓇᐣ,” ᐃᑭᑐ ᑯᑎ ᒥᑭᓇᐠ᙮ “ᓂᑭᐃᐡᑯᓄᐦᐃᑯ ᑲᔭ ᒋᓂᑕᐊᑯᑲᓯᑫᔭᐣ ᒥᓇ ᐱᑯ ᓇᓇᑐᐠ ᑲᑐᒋᑲᑌᐠ ᑲᐊᑯᑲᓯᑲᓂᐊᐧᐠ᙮ ᓂᐸᑯᓭᓄᑦ ᑲᔭ ᐱᐊᐧᐱᑯᑫᐃᐧᓂᐠ ᒋᐊᓂᑕᓇᓄᑭᔭᐣ ᑲᔦᐱᑯ ᑭᓫᐃᑊᐢ ᑲᐃᐧᐃᔑᐊᓄᑭᐃᐧᓂᑫᐨ ᓯᔭᑫᐣ ᒪᐃᐧᐣ ᐅᐅᒪ ᐯᓱᐨ ᓇᐊᐧᐨ ᐁᐃᐧᐅᒋᐊᓄᐁᐧᐱᔭᐣ ᒥᓇ ᒍᒋᐁᐧᑎᓭᐠ ᒣᑲᐧᐨ ᐊᓄᐁᐧᐱᔭᐣ᙮”
ᑭᒋᑭᑭᓄᐊᒪᑫᐃᐧᑲᒥᐠ ᑲᑦᕑᐃᔭᐣ ᑲᐧᓫᐃᐨ ᐅᐊᐧᑲᐦᐃᑲᓂᓯᐊᐧ ᑕᑭᑕᑯᑕᐸᑌᓂᐸᐣ ᒣᑲᐧᐨ ᐱᐳᓂᒥᑲᓇ ᑲᑭᑕᑲᐧᐠ ᐊᐦᐃᐠ ᐃᐃᒪ ᐁᐧᐱᑫᐧ ᑕᔑᑫᐃᐧᓂᐠ ᐊᐦᐃ ᐅᑕ ᐁᐃᐧ ᑭᑭᓄᐊᒪᑲᑫᓇᓂᐊᐧᑭᐸᐣ ᔕᑯᐨ ᑲᐧᓂᐣ ᐱᐳᓂᒥᑲᓇ ᒍᒋᒥᓄᓭᐠ ᐊᒥᐦᐃᐁᐧ ᐊᐱᐣ ᑲᐧᐣᑕᐣᐢ ᓴᑲᐦᐃᑲᐣ ᒥᑭᓯᐃᐧ ᐊᐦᑭᐃᐧ
ᐊᐧᑲᐦᐃᑲᓂᐠ ᑲᑭᐃᔑᐊᒋᒋᑲᓂᐊᐧᐠ ᓇᐣᑕ ᐱᑯ 498 ᑕᓱᑎᐸᐦᐊᑲᐣ ᐊᐱᓯᓇᑲᐧᐣ ᐃᐃᒪ ᐊᐧᐸᓄᐠ ᐃᐧᑫᐧᑐᐣᐠ ᑭᒋᑕᐃᐧᓂᐠ ᐁᑲᐧ ᒥᓇ ᐅᑫᐧᓂᐊᐧᐠ ᐅᑎᐢᑯᓂᐠ ᒪᐊᐧᐨ ᑭᒥᓄᓭᓂ ᑲᑭᒪᒪᐃᐧ ᐃᐧᒋᐡᑯᓄᒥᑎᐊᐧᐨ᙮
“ᓂᑭᒪᒪᐃᐧ ᐃᐡᑯᓄᒥᐣ ᑲᑭᓇ ᓂᓇᐊᐧᐨ ᐅᑎᐢᑯᓂᐠ,” ᒥᑭᓇᐠ ᐃᑭᑐ᙮
“ᒪᐊᐧᐨ ᑲᔭ ᓂᑭᐅᒋ ᐸᐯᔑᒋᐦᐃᑎᒥᐣ ᐁᑲᐧ ᒥᓇ ᐸᐯᔓᐨ ᓂᑭᐅᒋ ᐃᐧᒋᔭᒥᑎᒥᐣ᙮”
ᒥᑭᓇᐠ ᒪᐊᐧᐨ ᐅᐃᐧᑭᒋᐊᓄᑲᑕᐣ ᓂᔓᔕᑊ ᐃᐡᑯᓄᐃᐧᐣ ᑲᐊᑯᐡᑲᒪᑲᓂᓂᐠ ᐁᐃᐧᑭᔑᑐᐨ ᒥᓇ ᐅᐡᑭᐊᑭᐊᐧᓂᓂᐠ᙮
“ᐅᐅᐁᐧ ᑲᑭᐃᐡᑯᓄᓂᑕᒪᐣ ᒪᐊᐧᐨ ᓂᑭᐃᐧᒋᐦᐃᑯᐣ ᓂᐱᒪᑎᓱᐃᐧᓂᐠ ᐅᓴᑦ ᐁᑭᐱᐊᐧᓇᓭᔭᐣ ᐱᔪᑕᓇᐠ ᔕᑯᐨ ᐊᔕ ᓂᑲᐧᔭᑯᓇᐣ ᓂᐱᒪᑎᓯᐃᐧᐣ᙮”
ᐅᒉᒥᑲᓂᐱᓯᑦ ᓂᔑᑕᓇ ᓂᐅᔕᑊ ᓀᐃᐧᐨ ᓂᑭᐱᓯᑦ ᑲᐊᐱᑕᐊᐧᑭᓯᐨ ᑲᑭᐃᐡᑯᓄᓇᓂᐊᐧᐠ ᐁᑲᐧ ᒪᒪᐤ 240 ᑕᓴᐊᐧᑲᓭ ᐊᐧᑲᐦᐃᑲᓀᓯᐠ ᑕᔑᑭᑭᓄᐊᒪᑲᓂᐊᐧᐣ ᐁᑲᐧ ᐊᐦᐃᐠ ᑲᑦᕑᐃᔭᐣ ᑲᐧᓫᐃᐨ ᐊᐧᑲᐦᐃᑲᓀᓯᐠ 120 ᑕᓴᐊᐧᑲᓭ ᑭᑕᔑᑭᑭᓄᐊᒪᑲᓂᐊᐧᐣ᙮
“ᐁᑲᐧᓂᑯᐠ ᑭᔭᓂᒪᐣ,” ᐃᑭᑐ ᐊᓫᐃᐠ ᐊᐧᐸᐢ ᐁᑲᐧ ᐱᐅᑕᓇᐠ ᓂᐱᐃᐧᔭᐱᓂ ᐅᑭᐊᐧᐁᐧᔑᑐᐣ ᒥᓇ ᐃᐡᑯᑌᐃᐧᔭᐱᓂ ᐅᑭᓇᓇᐸᐱᑫᓇᐣ᙮ “ᒥᐡᑕᐦᐃ ᓂᑭᑭᑫᐣᑕᐣ ᐱᐊᐧᐱᑯᓇᐯᐃᐧ ᐊᓄᑭᐃᐧᐣ ᒥᓇ ᓂᐱᐃᐧᔭᑊ ᑲᐊᔭᓂᑯᓂᑲᑌᐠ ᐁᑲᐧ ᐃᐡᑯᑌᐃᐧᔭᐠ ᑲᓇᓇᐸᐱᑫᓂᑲᑌᐠ᙮”
ᐁᐧᐱᑫᐧ ᐅᑭᒪᑲᐣ ᑲᐧᕑᓀᓫᐃᔭᐢ ᐊᐧᐸᐢ ᐃᑭᑐ ᐅᑫᐧᓂᐊᐧᐠ ᑲᑭᑭᔑᑐᐊᐧᐨ ᐊᔕ ᒥᐡᑕᐦᐃ ᑫᑯᓂ ᐅᑭᑫᐣᑕᓇᐊᐧ ᐁᐧᑎ ᓂᑲᐣ ᒋᐊᓂᐊᐸᒋᑐᐊᐧᐨ᙮
“ᒪᐊᐧᐨ ᑲᐧᔭᐠ ᐅᑲᐃᐧᒋᐦᐃᑯᓇᐊᐧ ᐁᐧᑎ ᐊᓂᐦ ᓂᑲᐣ,” ᐊᐧᐸᐢ ᐃᑭᑐ᙮ “ᑭᔭᐱᐨ ᐅᔕ ᓇᑕᐁᐧᓂᑕᑲᐧᐣ ᒥᐡᑕᐦᐃ ᑭᑭᓄᐊᒪᑫᐃᐧᐣ ᒋᐸᑭᑎᓂᑲᑌᐠ ᑭᑕᔑᑫᐃᐧᓂᓇᐣ ᑐᑲᐣ ᐅᐅᒪ ᑲᑐᒋᑲᑌᐠ ᓂᑕᔑᑫᐃᐧᓂᐠ ᐊᐱᒋᐃᐧᐣ ᔕᐊᐧᓄᐠ ᑕᔑᑭᑭᓄᐊᒪᑲᓂᐊᐧᐠ ᐁᑲᐃᐧᐣ ᒥᓴᐊᐧᐨ ᑕᔑᑫᐃᐧᐣ ᐃᐧᑲ ᑫᑯᓂᓂ ᐁᐸᐸᒥᓯᐨ᙮”
ᐊᐧᐸᐢ ᐃᑭᑐ ᐅᐅᐁᐧ ᑭᑭᓄᐊᒪᑫᐃᐧᐣ ᑕᔑᑫᐃᐧᓂᐠ ᑲᑕᔑᑭᑭᓇᐧᒋᐊᑯᓄᐊᐧᐨ ᑲᑭᔑᐡᑯᓄᐊᐧᐨ ᒪᐊᐧᐨ ᐅᑐᒋᑭᒋᓀᐣᑕᓇᐊᐧ ᒥᐡᑯᐨ ᑭᔭᐱᐨ ᐊᐊᐧᔑᒣ ᑭᓇᓇᑕᐃᐧᐃᐡᑯᓄᐊᐧᐨ᙮
“ᐅᐅᐁᐧ ᓂᑎᓀᐣᑕᐣ ᐅᐅᐁᐧ ᑭᒋᐃᔑᒋᑫᐃᐧᐣ ᐅᒋ ᑕᐱᐡᑯᐨ ᐅᐡᑲᑎᓴᐠ ᐁᐅᒋᐊᐧᐸᑕᐦᐊᑲᓄᐊᐧᐨ ᐊᔕ ᐱᑯ ᐊᐊᐧᔑᒣ ᐁᐃᐧᐊᓂᒪᒐᓂᐊᐧᐠ,” ᐊᐧᐸᐢ ᐃᑭᑐ᙮ “ᐅᐡᑲᑎᓴᐠ ᑲᔭ ᐊᐊᐧᔑᒣ ᐅᑎᒋᑭᒋᓀᐣᑕᓇᐊᐧ ᒋᐊᓂᐦ ᑲᐧᔭᐠ ᑫᑯᓇᐣ ᑲᓇᐊᐧᐸᑕᒧᐊᐧᐨ ᐁᐧᑎ ᐊᓂᐦ ᓂᑲᐣ᙮ ᑭᑭᓄᐊᒪᑫᐃᐧᓇᐣ ᒪᐊᐧᐨ ᑲᔭ ᑭᒋᓀᐣᑕᑲᐧᓄᐣ ᐁᑲᐧ ᐊᒥᐁᐧ ᐱᑯ ᑫᐃᔑᐱᒥᐃᐧᒋᑲᐸᐃᐧᑕᒪᑭᐣ᙮”
ᐅᐣᑌᕑᐃᔪ ᑭᒋᐅᑭᒪᑲᐣ ᐃᐡᑕᐣ ᐯᔭᑎ ᐅᑭᓇᓇᑯᒪᐣ ᐅᐡᑭ ᐃᐃᒪ ᐁᐧᐱᑫᐧ ᐅᑎᐢᑯᓂᐠ ᑲᑭᑕᔑᑭᑭᓇᐧᒋᐊᑯᓄᐊᐧᐨ ᐅᑫᐧᓂᐊᐧᐠ ᑲᑭᑭᔑᐡᑯᓄᐊᐧᐨ᙮
“ᐅᐅᒪ ᑲᑭᐊᐧᐸᑕᐦᐃᑯᔭᐠ ᒪᐊᐧᐨ ᑭᑐᒋᑭᑭᓄᔑᓂᒥᐣ ᐊᐊᐧᔑᒣ ᒋᐊᓂᐦ ᒪᒐᔭᐠ ᑲᐧᓂᐣ ᐁᑕ ᐅᐅᒪ ᑲᐊᔭᐊᐧᐨ ᐁᑲᐧ ᑲᐧᓂᐣ ᒥᓇ ᐱᑯ ᐁᑕ ᐅᐅᒪ ᑲᑭᑭᔑᐡᑯᓄᐊᐧᐨ ᐁᑲᐧ ᒥᓇ ᐅᐅᐁᐧ ᐃᐡᑯᓂᑲᐣ ᐅᐅᐁᐧ ᔕᐱᑯ ᑲᑕᓯᔭᐠ ᑲᐊᓂᔑᓇᐯᐃᐧᔭᐠ ᒥᓯᐃᐧ ᑲᐊᔭᔭᐠ᙮” ᐯᔭᑎ ᐃᑭᑐ᙮ “ᓂᑎᓀᐣᑕᐣ ᑲᔭ ᐊᔕ ᒪᐊᐧᐨ ᐁᑭᒋᒪᒐᔭᐠ᙮”
ᐯᔭᑎ ᐃᑭᑐ ᐊᓂᔑᓇᐯᐠ ᒪᐊᐧᐨ ᒋᐃᑭᑐᐊᐧᐨ ᒥᓇ ᒋᐊᓂᐦ ᑎᐯᓂᑕᒧᐊᐧᐨ ᐅᑭᑭᓄᐊᒪᑫᐃᐧ ᐅᐱᒧᒋᑫᐊᐧᓂᐊᐧ ᐁᑲᐧ ᐊᓂᐣ ᒥᓇ ᑫᐃᔑᐱᒧᑐᐊᐧᐨ᙮
“ᒋᑭᑫᐣᓂᒥᑎᓯᐊᐧᐨ ᒪᐊᐧᐨ ᑭᒋᓀᐣᑕᑲᐧᐣ ᐁᑲᐧ ᐃᐃᒪ ᑲᐃᔑᑲᐯᔑᐊᐧᐨ ᐁᑕ ᐅᐅᐁᐧ ᑕᑭᐅᒋᐊᓄᑭᒪᑲᐣ,” ᐯᔭᑎ ᐃᑭᑐ᙮ “ᓂᑎᓀᐣᑕᐣ ᐊᔕ ᐅᐣᑌᕑᐃᔪ ᐁᑲᐧ ᑲᓇᑕ ᐅᐅᐁᐧ ᐁᐃᔑᒪᒋᐃᐧᑐᔭᐠ” ᐊᓂᔑᓇᐯ ᑭᑭᓄᐊᒪᑫᐃᐧᐣ ᐱᒧᒋᑫᐃᐧᐣ ᐃᔑᓂᑲᑌ ᐁᑲᐧ ᐊᐧᐃᐧᔭᐠ ᐅᑕᓀᐣᑕᓇᐊᐧ ᑫᑯᓀᓂᓂ ᑫᑭᑭᓄᐊᒪᐊᐧᑯᓄᐊᐧᐨ ᐊᓂᐣ ᒥᓇ ᑭᐃᔑᐱᒧᑌᐠ ᐁᑲᐧ ᒥᓇ ᑫᑯᓀᓂᓂ ᑫᐅᒋᑭᑫᐣᑕᒧᐊᐧᐨ᙮ ᐅᐅᐁᐧ ᐱᐊᐧᐱᑯᑫᐃᐧ ᐅᐱᒧᒋᑫ ᒥᓇ ᑭᐅᒋᑭᒪᑲᐣ ᐅᐱᒧᒋᑫᐃᐧᑲᒥᐠ ᐅᐅᒪ ᑲᓇᑕ ᐁᑲᐧ ᐅᐣᑌᕑᐃᔪ ᐊᓂᔑᐯᐃᐧ ᐱᒧᒋᑫᐃᐧᓂᐠ ᑲᑭᐸᑭᑕᓇᐨ ᔓᓂᔭᓇᐣ ᐅᐅᐁᐧ ᑭᑭᓄᐊᒧᑫᐃᐧᐣ ᑲᑭᐅᒋᑕᑲᐧᐠ᙮
“ᒪᐊᐧᐨ ᑲᐧᔭᐠ ᑲᑭᐊᐧᐸᑕᐦᐃᐊᐧᓂᐊᐧᐠ ᐅᐅᐁᐧ ᐃᐧᑕᓄᑭᒥᑐᐃᐧᐣ,” ᐃᑭᑐ ᑌᐱᐟ ᓯᑦᒣᕑ ᐃᐧᐣ ᒪᔭᑦ ᑲᓂᑲᓂᐡᑲᐠ ᐅᐣᑌᕑᐃᔪ ᐊᓂᔑᓇᐯ ᐱᒧᒋᑫᐃᐧᐣ᙮ “ᐱᐊᐧᐱᑯᑫᐃᐧᐣ ᐊᔕ ᒪᔭᑭᐡᑲᒪᑲᐣ᙮ ᐅᑕᓄᑭᐠ ᐊᔕ ᒥᓇ ᐊᓂᐦ ᑭᑌᐊᑎᓯᐊᐧᐠ ᐁᒥᐁᐧ ᒪᐊᐧᐨ ᐁᐧᒋᑭᒋᓀᐣᑕᑲᐧᐠ ᑲᐊᔭᐊᐧᐨ ᐊᓄᑭᐃᐧᐯᐸᓂᓂ ᒋᐊᓄᑭᐊᑲᓄᐊᐧᐨ᙮”
ᑭᓫᐃᑊᐢ ᑲᑭᐃᔓᓇᐨ ᐅᑎᐢᑯᓂᐣ ᐃᐃᒪ ᐃᐡᑫᕑ ᑕᓇᐳᐃᐧᓂᐠ ᐅᑭᐅᒋᐃᐧᒋᐦᐊᐣ ᐊᓂᐣ ᒪᔭᑦ ᐁᐃᔑᓭᐠ ᑲᐱᒧᒋᑲᑌᐠ ᐱᐊᐧᐱᑯᑫᐃᐧᐣ ᐁᐧᑎ ᑭᒋᓄᐱᒥᐠ᙮ “ᑭᓫᐃᑊ ᐅᐱᐊᐧᐱᑯᑫᐃᐧ ᐅᐱᒧᒋᑫ ᒪᐊᐧᐨ ᐅᐃᐧᐃᐧᑕᓄᑭᒪᐣ ᐊᓂᔑᓇᐯᐃᐧ ᑕᔑᑫᐃᐧᓇᐣ ᒥᓇ ᐊᐊᐧᔑᒣ ᑭᑭᓄᐊᒪᑫᐃᐧᓇᐣ ᒋᑕᑲᐧᑭᐣ ᐁᑲᐧ ᒥᓇ ᐅᐡᑭᑭᓄᐊᒪᑫᐃᐧᓇᐣ ᒋᐅᔑᒋᑲᑌᑭᐣ ᐃᐃᒪ ᒋᐊᔭᒪᑲᑭᐣ ᑲᑕᓯᑭᐣ ᑕᔑᑫᐃᐧᓇᐣ” ᐃᑭᑐ ᑕᔭᐣ ᐯᕑᐣ ᐅᐅᐁᐧ ᑭᓫᐃᑊᐢ ᐱᒧᒋᑫᐃᐧᐣ ᑲᐅᒋ ᐊᓂᑫᓂᑲᓂᐡᑲᐠ᙮ “ᐁᑲᐧ ᑭᓫᐃᑊᐢ ᐱᒧᒋᑫᐃᐧᐣ ᑲᐃᐧᐱᐊᐧᐱᑯ ᒪᒋᒋᑫᐨ ᒪᐊᐧᐨ ᓂᑲᐦᐃᑭᑐᒥᐣ ᒋᐅᒋᐃᐧᑕᓄᑭᒪᔭᑲᐧ ᐊᓂᔑᓇᐯᐃᐧ ᐅᑎᐢᑯᓂᐠ ᐃᐃᒪ ᑲᑕᓯᑭᐣ ᑕᔑᑫᐃᐧᓇᐣ᙮”
ᑭᓫᐃᑊᐢ ᐅᐃᐧᐸᑭᓇᐣ ᐅᑫᐧᓂᐊᐧᐣ ᓂᐃᐧᔕᑊ ᑲᑭᑭᔑᐡᑯᓄᓂᐨ ᒋᐊᓄᑭᐊᑲᓄᐊᐧᐨ ᐊᐱ ᐃᐧᐊᓂᐦ ᒪᒋ ᐱᐊᐧᐱᑯᑲᓂᐊᐧᐠ ᒥᑲ ᐱᑯ ᐊᓂᐦ ᒪᒋ ᐊᐧᐁᐧᑕᐦᐃᓂᑲᑌᐠ ᑲᐃᐧᑕᔑ ᐱᐊᐧᐱᑯᑲᓂᐊᐧᐠ᙮