ᐊᒋᑯᓴᑲᐃᑲᓂ ᐅᐡᑲᑎᓴᐠ ᑭᑕᑲᐧᐦᐊᑐᐊᐧᐠ ᑲᐃᐦᑯᐱᐳᓂᒥᑲᓇᐊᐧᓂᐠ ᑕᐣᑐᕑ ᐯ ᐁᐃᓇᐦᐊᑐᐊᐧᐨ 1,000 ᑭᓫᐊᒥᑐᕑᐢ ᐊᐱᓯᓇᑲᐧᓂ ᐅᐳᒧᓭᐃᐧᓂᐊᐧ ᐁᐃᐧᔓᓂᔭᑫᑐᐊᐧᐨ ᐅᐁᐧᓂ ᐁᐱᒧᓴᑌᐠ ᐅᐡᑭᒪᒋᑕᐦᐃᑯᐃᐧᓇᐣ ᑲᑭᐃᔑᓂᑲᑕᒧᐊᐧᐨ.
“ᐊᐱ ᑲᐊᓂᐊᐱᑕᑭᔑᑲᐠ ᑲᓇᐊᐧᑫᐧᓂᐠ ᓂᑭᐱᑲᓄᓂᑯᐠ ᐊᔕ ᐁᑭᒪᑌ ᐅᑎᑕᐦᐊᑐᐊᐧᐨ ᐁᐧᑎ ᐃᐧᐣᑎᑯ ᒥᑲᓇᐠ,” ᑭᐃᑭᑐ ᑎᐣ ᐱᕑᑎ, ᑲᐅᒋᐱᒥ ᓇᓇᑲᒋᐦᐊᐨ ᐅᑯᐁᐧᓂᐊᐧᐠ ᒥᑕᓱ ᐅᐳᒧᓭᐠ, ᒣᑲᐧᐨ ᐃᐁᐧ ᓂᑭᐱᓯᒧᐣ 8 ᑲᐃᓇᑭᓱᓂᐨ. “ᓂᐦᓱᑯᐣ ᐅᑕᓇᐠ ᒥᑐᓂ ᐱᑯ ᑭᐸᐸᔑᐊᐧᐠ ᐁᒪᐧᔦ ᐊᓂᓄᑌᒪᒐᑕᒧᓂᐠ ᑲᐃᔑᐱᒧᓭᐊᐧᐨ ᐱᐳᓂᒥᑲᓇᐠ.”
ᐅᑯᐁᐧᓂᐊᐧᐠ ᑲᐱᒧᓭᐊᐧᐨ, ᐊᔑᐨ ᑲᑭᐱᐃᐡᑯᓄᐊᐧᐸᐣ ᑌᓂᐢ ᑲᕑᐊᒧᕑᑎ ᐦᐊᔾ ᐣᑯᓫ ᕑᐊᐣᑐ ᐸᕑᐠᒪᐣ, ᓫᐊᐢᓫᐅ ᑲᒥᓇᐊᐧᐡ, ᑫᐱᐣ ᓯᒥᐟ, ᐃᐧᓕᔭᑦ ᐅᑦᐸᐡ, ᔕᕑᒣᔾᐣ ᐸᕑᐠᒪᐣ, ᒉᓇᐱ ᐱᕑᑎ ᒥᓇ ᑌᐱᐣ ᑕᐣᑐᕑ ᐁᑲᐧ ᒥᓇ ᐃᑭᐁᐧᓂᐊᐧᐠ ᐁᑲ ᒪᔑ ᐦᐊᔾ ᐢᑯᓫ ᑲᐃᑯᐡᑲᐊᐧᐨ ᑲᕑᒪ ᐸᕑᒪᐣ, ᑭᕑᐊ ᐸᕑᐠᒪᐣ, ᒥᓇ ᒉᓂᓴ ᐸᕑᐠᒪᐣ, ᐊᒋᑯᓴᑲᐃᑲᓂᐠ ᒋᐅᐣᒋᒪᒋᐦᐊᑐᐊᐧᐠ ᓂᑭᐱᓯᑦ 5 ᑲᐃᓇᑭᓱᓂᐨ ᐁᑲᐧ ᐃᐧᑲᑫᐧᑕᑲᐧᐦᐊᑐᐊᐧᐠ ᑕᐣᑐᕑ ᐯ ᓂᑭᐱᓯᒧᐣ 22 ᐃᓇᑭᓱᓂᐨ. ᐅᐃᐧ ᑲᑫᐧᓇᓇᑕᐃᐧ ᔓᓂᔭᑫᑐᓇᐊᐧ ᓄᑯᒥᑫ ᑲᑭᐃᐧᐣᒋᑲᑌᑭᐸᐣ ᑌᓇᐢ ᑊᕑᐊᐣᐠᓫᐃᐣ ᑲᕑᐊᒧᕑᑎ ᑭᑭᓄᐦᐊᒪᑎᐃᐧᑲᒥᐠ ᑲᐯᔑᐃᐧᑲᒥᐠ ᑲᐃᐧᐅᔑᒋᑲᑌᐠ, ᑭᐃᑭᑐᓇᓂᐊᐧᐣ ᒋᑕᐊᐧᑯᓯᐠ 2015-16 ᐊᐦᑭᐊᐧᐠ.
“ᐃᐧᓇᐊᐧ ᑲᑭᐃᓀᐣᑕᒧᐊᐧᐨ ᒋᒪᒋᔭᓄᑲᑕᒧᐊᐧᐨ ᔓᓂᔭᑫᐃᐧᓂ,” ᑭᐃᑭᑐ ᑕᐧᑦ ᑲᒥᓇᐊᐧᑕᒥᐣ, ᐊᐧᓭᔭ ᐱᒥᐃᐧᒋᑫᐃᐧᐣ ᑲᐅᑭᒪᐃᐧᐨ “ᔕᑯᐨ ᑕᐡ ᒪᔭᑦ ᐃᔑᑲᑫᐧᐊᐧᐸᑕᐦᐃᐁᐧᐊᐧᐠ ᐁᐃᐧᑭᑫᐣᑕᑯᑐᐊᐧᐨ ᑲᐃᐧᐃᔑᑫᒋᑫᔭᐠ. ᐅᑯᐁᐧᓂᐊᐧᐠ ᐅᐡᑲᑎᓴᐠ ᑲᑫᐧᓇᑯᑕᒪᑫᐊᐧᐠ ᐅᑎᔑᒋᑫᐃᐧᓂᐊᐧᐠ ᒥᓇ ᐁᓄᒋ ᑭᑭᓇᐊᐧᑕᐸᑕᐦᐊᐊᐧᐨ ᐃᐧᒋᐅᐡᑲᑎᓴᐣ.”
ᐊᐧᓭᔭ ᐱᐃᐧᒋᑫᐃᐧᐣ ᐅᑭᐃᐧᐣᑕᓇᐊᐧ ᐅᓇᒋᑫᐃᐧᐣ ᒋᐅᔑᒋᑲᑌᐠ $15 ᒥᓫᐃᔭᐣ ᑕᓴᐧᐱᐠ, ᒋᐊᑭᑎᑲᒥᑯᐊᐧᐠ, 55,000 ᑕᓱᑲᑲᒥᓯᐟ ᒋᐃᓂᑯᑲᐧᒋᑲᑌᐠ ᑌᓇᐢ ᑊᕑᐊᐣᑭᓫᐃᐣ ᑲᕑᐊᒧᕑᑎ ᑭᑭᓄᐦᐊᒪᐊᐧᑲᓇᐠ ᑲᐯᔑᐃᐧᑲᒥᐠ ᒣᑲᐧᐨ ᐊᐱ ᒥᑭᓯᐃᐧᐱᓯᑦ 27 ᐊᔑᐨ ᐁᑭᐱᔕᐊᐧᐨ ᑲᐅᑭᒪᐃᐧᐊᐧᐨ ᑭᐁᐧᑎᓄᐠ ᐊᓂᔑᓇᐯ ᑭᑭᓄᐦᐊᒪᑫᐃᐧᐣ ᑲᑲᓇᐊᐧᐸᑕᒧᐊᐧᐨ, ᑲᐧᐣᐯᑐᕑᐁᔑᐣ ᑲᐧᓫᐃᐨ ᒥᓇ ᑕᐣᑐᕑ ᐯ.
“ᒥᐢᑕᐦᐃ ᑲᔦ ᐃᒪ ᑕᐅᐣᒋᒪᑲᐣ ᑫᐅᒋᐃᐧᒋᐦᐃᐁᐧᓯᒋᑲᑌᐠ ᐅᑌᓇᐠ,” ᑭᐃᑭᑐ ᑲᒥᓇᐊᐧᑕᒥᐣ. “ᐯᔑᐠ ᑭᑭᓄᐦᐊᒪᐊᐧᑲᐣ ᐅᐣᒋᑲᐡᑭᑲᓂᐊᐧᐣ $25,000 ᐊᑯᓇᐠ $30,000 ᒣᑲᐧᐨ ᑲᐱᒥ ᑭᑭᓄᐦᐊᒪᑯᓯᐨ ᐯᔑᑯᐊᐦᑭ, ᐁᑲᐧ ᑕᐡ 150 ᑭᑭᓄᐦᐊᒪᐊᐧᑲᓇᐠ ᐃᔑᒪᒪᐊᐧᑭᐣᒋᑫᔭᐣ, ᓇᐱᐨ ᐃᑯ ᒥᐢᑕᐦᐃ ᐃᓀᐣᑕᑲᐧᐣ ᒋᐃᔕᐨ ᔓᓂᔭ ᐅᑌᓇᐠ.”
ᑲᒥᓇᐊᐧᑕᒥᐣ ᐃᑭᑐ ᒪᐊᐧᐨ ᐁᐅᐡᑲᑎᓯᐨ ᑲᐱᒧᓭᐠ ᓴᑲᓱᐊᐦᑭᐃᐧᓀ ᐁᑲᐧ ᒥᓇ ᑯᑕᑭᔭᐠ ᒥᑕᓱ ᒥᓇ ᓂᐦᓱᔕᑊ ᑕᓱᐊᐦᑭᐃᐧᓀᐊᐧᐠ.
“ᐅᓇᑯᑐᓇᐊᐧ ᑭᑭᓄᐦᐊᒪᐊᐧᑲᓇᐠ ᐁᓂᐱᒥᓂᔕᐦᐊᒧᐊᐧᐨ ᑲᐃᔑᐸᑯᓭᓂᒧᐊᐧᐨ, ᒋᐊᓂᐊᐧᐸᑕᒧᐊᐧᐨ ᐊᓂᓂᑲᐣ, ᑲᐃᐧᐣ ᑲᔦ ᒋᒧᒋᐊᔭᐱᐊᐧᐨ ᒋᐱᐦᐅᐊᐧᐨ ᑫᑯᐣ ᒋᐊᓂᓯᓭᓂᐠ ᑲᐃᔑᐸᑯᓭᐣᑕᒧᐊᐧᐨ,” ᑭᐃᑭᑐ ᑲᒥᓇᐊᐧᑕᒥᐣ. “ᓇᓇᑐᓇᒧᐠ ᑕᐡ ᐃᒪ ᒋᐅᒋ ᑲᑫᐧᑲᒋᑎᓇᒪᓱᔦᐠ
ᑭᐸᑯᓭᓂᒧᐃᐧᓂᐊᐧ. ᒥᐦᐃᒪ ᑲᔦ ᒋᐊᓄᒋ ᑭᑫᐣᑕᒧᐊᐧᐨ ᐁᑲᐡᑭᐦᐁᐃᐧᓯᐊᐧᐨ ᒥᓇ ᒋᑭᒋᓀᐣᑕᒧᐊᐧᐨ ᐅᐁᐧᓂ ᑲᑐᑕᒧᐊᐧᐨ. ᑫᓂᐣ ᒪᐊᐧᐨ ᓂᑭᒋᓀᓂᒪᐠ ᐅᐁᐧ ᑲᐃᔑᐊᐧᐸᒪᑲᐧ ᐁᑐᑕᒧᐊᐧᐨ, ᐁᓇᑯᑐᐊᐧᐨ ᒋᑭᐊᓄᒋ ᑲᐡᑭᑐᐊᐧᐨ ᒋᐊᓂᔑᐸᐸᒥᓯᐊᐧᐨ ᓂᑲᓂᑕᒪᑫᐃᐧᓂᐠ ᐃᓀᑫ ᑲᐃᔑᐊᐧᐸᒪᑲᐧ ᑲᐃᔑᑲᐡᑭᑐᐊᐧᐨ.”
ᐱᕑᑎ ᐃᑭᑐ ᐅᑯᐁᐧᓂᐊᐧᐠ ᓂᔑᐣ ᑲᐅᐡᑲᑎᓯᐊᐧᐨ ᑭᑭᓄᐦᐊᒪᐊᐧᑲᓇᐠ ᐅᐃᐧᒋᓂᑕᐃᐧᑭᒪᑲᓂᐊᐧ ᑭᐱᐃᐡᑯᓄᐸᓂᐠ ᐃᒪ ᑌᓇᐢ ᑲᕑᐊᒧᕑᑎ ᐦᐊᔾ ᐢᑯᓫ ᐅᑕᓇᐠ, ᐅᑭ ᑭᑫᐣᑕᓇᐊᐧ ᑕᐡ ᑫᑯᓀᐣ ᑲᑭᐃᓇᐧᑌᓂᐠ ᐱᒧᓭᐃᐧᓂ.
“ᒪᐊᐧᐨ ᐃᑯ ᐅᒋᑫᐣᑕᒥᐦᐃᑯᓇᐊᐧ ᑲᐃᐧᐅᔑᒋᑲᑌᓂᐠ ᑭᑭᓄᐦᐊᒪᐊᐧᑲᓇᐠ ᑲᐯᔑᐃᐧᑲᒥᑯᓂ, ᐃᐧᐁ ᐅᑎ ᒪᐊᐧᐨ ᑲᑭᐃᑭᑐᓇᓂᐊᐧᐠ ᒋᐅᒋᑕᑯᐅᔑᒋᑲᑌᐠ ᐅᐡᑲᑎᓯᐃᐧᑲᒥᐠ ᐃᒪ,” ᐃᑭᑐ ᐱᕑᑎ.
ᐱᕑᑎ ᐃᑭᑐ ᐅᐳᒧᓭᐠ ᑌᐱᓇᐁᐧᓯᐊᐧᐠ ᒥᓂᑯᐠ ᑲᑭᔑᐊᐧᐸᑕᐦᐃᑕᐧ ᐁᐃᐧᒋᑲᐸᐃᐧᑕᐃᐧᑕᐧ ᑲᑭᐱᔑᐊᔭᑭᓀᐡᑲᒧᐊᐧᐨ ᑕᔑᑫᐃᐧᓇᐣ.
“ᐊᐧᒐᐡᑯᓂᒥᐠ ᓂᐢᑕᑦ ᑭᐊᓂᔑᑕᑲᐧᐦᐊᑐᐊᐧᐠ ᐁᑲᐧ ᒪᐊᐧᐨ ᐃᑯ ᑲᐧᔭᐠ ᑭᑐᑕᐊᐧᐊᐧᐠ ᒣᑲᐧᐨ ᐃᒪ ᑲᑭᐊᓂᐱᒥᔭᐊᐧᐨ,” ᐃᑭᑐ ᐱᕑᑎ. “ᐯᔑᑲᐧᐣ ᑲᔦ ᐁᐧᑎ ᐊᐧᐃᐧᔦᑲᒪᐠ — ᑭᒋᐦᐊᐠ ᐅᑭᓇᑕᐃᐧ ᓇᑭᐡᑲᐊᐧᐊᐧᐣ ᐁᑭᓇᑕᐃᐧ ᐊᐧᐊᐧᒋᔦᒪᐊᐧᐨ ᑲᐱᑕᑲᐧᐦᐊᑐᓂᐨ ᐃᐡᑯᓂᑲᓂᐠ.”
ᐅᐳᒧᓭᐠ ᐅᑭᐃᔑ ᐅᓇᐸᑕᓇᐊᐧ ᒋᑕᑲᐧᐦᐊᑐᐊᐧᐨ ᐅᑲᓯᓴᑲᐃᑲᓂᐠ ᓂᑭᐱᓯᒧᐣ 11 ᐃᓇᑭᓱᓂᐨ.
“dᓂᐸᑯᓭᓂᒪᒥᐣ ᑯᑕᑭᔭᐠ ᐊᐃᐧᔭᐠ ᐸᐸᑲᐣ ᑕᔑᑫᐃᐧᓇᐣ ᒋᐅᒋ ᐊᐧᐃᐧᒋᐦᐊᐊᐧᐨ ᓇᐣᑕ ᒋᐸᑭᑎᓂᑫᑲᑕᐊᐧᐊᐧᐨ ᐅᑯᐁᐧᓂᐊᐧᐠ ᐅᐡᑲᑎᓴᐠ ᑲᐱᒧᓭᐊᐧᐨ,” ᐃᑭᑐ ᐱᕑᑎ. “ᒥᔑᓄᐊᐧᐠ ᑭᐁᐧᑎᓄᐠ ᑲᐅᒋᐊᐧᐨ ᑲᐸᑯᓭᐣᑕᒧᐊᐧᐨ ᒋᐃᔕᐊᐧᐨ ᑌᓇᐢ ᑲᕑᐊᒧᕑᑎ ᐦᐊᔾ ᐢᑯᓫ, ᑕᑭᒥᓇᐧᔑᓂᐸᐣ ᑕᐡ ᑫᐃᐧᓇᐊᐧ ᒋᑭᐅᒋ ᐊᐧᐃᐧᒋᐦᐃᐁᐧᐊᐧᐸᐣ ᐅᐁᐧᓂ ᑲᑭᒋᓀᐣᑕᑲᐧᓂᐠ ᑲᑭᒪᑕᓄᑲᑕᒧᐊᐧᐨ.”
ᐊᐃᐧᔭᐠ ᑲᐃᐧᐸᑭᑎᓂᑫᐊᐧᐨ ᒥᓇ ᐸᑭᑎᓂᑫᐃᐧᓇᐣ ᑕᑭᐃᔑᓂᔕᐦᐃᑲᑌᐊᐧᐣ ᐊᒋᑯᓴᑲᐃᑲᓂᐠ ᐅᑭᒪᑲᐣ ᒥᓇ ᐅᓇᔓᐁᐧᐃᐧᓂᓂᐊᐧᐠ ᐁᓇᑭᑕᓱᓀᐊᐧᐨ 807-595-2577.
ᐅᒐᑲᑌᔑᒥᑯᐃᐧᓂᐊᐧ ᒥᓇ ᐅᑎᐸᒋᒥᑯᐃᐧᓂᐊᐧ ᑲᐱᒧᓭᐊᐧᐨ ᑲᐊᐧᐸᑕᓇᐊᐧ ᐃᒪ ᐱᐊᐧᐱᑯᐠ ᑲᐅᐣᒋ ᒪᒪᐃᐧ ᐊᐧᐸᐣᒋᑲᑌᐠ ᒋᐃᓇᑲᐧᐦᐊᒪᐣ.
What is the first thing you look at in the morning? What is the last thing you see before you go to sleep at night?
What is the first thing you look at in the morning? What is the last thing you see before you go to sleep at night? Many of us would would hesitate in...
These past few months have been hard on my friends and family as we have lost several prominent Elders in our lives. My family was sad to see the passing of...