ᓀᐡᑲᐣᑕᐣᑲ ᒪᓯᓂᐱᐦᐃᑲᓇᐣ ᑲᑭᐊᐧᐸᑕᐦᐃᐁᐧᐊᐧᐨ ᒪᐊᐧᐨ ᑭᐅᒋᑲᒋᑫᐣᑕᑲᐧᐣ

Create: 12/01/2015 - 19:23

ᐁᑲᐧ ᒪᓯᓂᐱᐦᐃᑲᓇᐣ ᐁᐦᐊ ᒐᐧᐡ ᑫᐣᑎᕑᐃᐠᐢ ᑲᑭᐊᐧᐸᑕᐦᐃᐁᐧᐨ ᐊᐦᐃᐠ ᑐᕑᐊᐣᑐ ᑭᒋᑕᐃᐧᓂᐠ ᐊᐦᐃ ᒪᒉᐣᑕᒧᐃᐧᓇᐣ ᐁᓇᑲᐧᑭᐣ᙮ ᐁᑲᐧ ᐅᐅᐁᐧ ᒪᒉᐣᑕᒧᐃᐧᐣ ᐅᑭᒧᔑᑐᐣ ᐃᐃᒪ ᐅᐱᒪᑎᓱᐃᐧᓂᐠ ᒣᑲᐧᐨ ᑲᑭᒪᓯᓂᐱᐦᐃᑫᐨ᙮ ᐁᑲᐧ ᒥᓇ ᐱᑯ ᐊᒥᐁᐧ ᑲᔭ ᑲᐃᔑᓭᓂᐠ ᐅᑕᔑᑫᐃᐧᓂᐠ ᐃᐃᒪ ᓀᐡᑲᐣᑕᐣᑲ᙮
ᐁᑲᐧ ᑫᐣᑎᕑᐃᐠᐢ ᐁᐊᓂᒧᑕᒪᐊᐧᑲᓄᐃᐧᐨ ᐅᒪᓯᓂᐱᐦᐃᑲᓇᐣ ᑲᑭᐅᔑᑐᒋᐣ ᓇᐱᐨ ᒥᐢᑕᐦᐃ ᒧᔑᐅᐃᐧᐣ ᐅᒋᑕᑲᐧᐣ ᐁᑲᐧ ᔕᑯᐨ ᐊᐯᓂᒧᐃᐧᐣ ᐊᔭᒪᑲᐣ᙮
“ᐁᑲᐧ ᐅᑫᐧᓂᐊᐧᐣ ᓂᒪᓯᓂᐱᐦᐃᑲᓇᐣ ᐊᐦᐃ ᓂᔑᑲᑌᐣᑕᒧᐃᐧᐣ ᐅᒋᓭᒪᑲᐣ ᒥᓇ ᐱᑯ ᑲᑭᓇ ᐊᐃᐧᔭᐠ ᐅᔑᑲᑌᐣᑕᒧᐃᐧᓂᐊᐧ,” ᑫᐣᑎᕑᐃᐠᐢ ᐃᑭᑐ ᐃᑫᐧᓂᐊᐧᐣ ᐅᑕ ᓂᐦᓯᐣ ᐅᒪᓯᓂᐱᐦᐃᑲᓇᐣ ᑲᑭᐊᐧᐸᑕᐦᐃᐁᐧᓇᓂᐊᐧᐠ ᐃᐃᒪ ᑐᕑᐊᐣᑐ ᑭᒋᑕᐃᐧᓂᐠ᙮ “ᑫᑲᐟ ᑲᑭᓇ ᒪᒉᐣᑕᒧᐃᐧᐣ ᓇᑲᐧᓄᐣ᙮ ᐊᒥᐅᒪ ᒪᔭᑦ ᑲᐅᒋᓭᒪᑲᑭᐣ᙮”
“ᐁᑲᐧ ᑯᑕᐠ ᐊᐦᐃ ᒋᑭᑭᓄᐊᒪᑲᓂᐊᐧᐠ ᒥᓇ ᒋᓂᑲᑌᓂᑲᑌᐠ ᔑᑲᑌᐣᑕᒧᐃᐧᐣ᙮ ᐊᒥᐁᐧ ᒥᓇ ᑯᑕᑭᔭᐣ ᑫᐃᔑᓇᑲᐧᑭᐣ ᐁᑲᐧ ᒪᐊᐧᐨ ᐱᑯ ᓂᒐᒋᑫᐣᑕᐣ ᑯᑕᑭᔭᐣ ᑲᐃᐧᐅᔑᑐᔭᓂᐣ,” ᓂᔑᑕᓇ ᓂᐦᓱᔕᑊ ᑲᑕᓱᐊᑭᐃᐧᓀᐨ ᐃᑭᑐ᙮ “ᐁᑲᐧ ᐅᐅᐁᐧ ᓂᒪᓯᓂᐱᐦᐃᑫᐃᐧᐣ ᐊᒥᐁᐧ ᐁᐃᐧᑐᑕᒪᐣ ᐊᐦᐃ ᐊᐯᓂᒧᐃᐧᐣ ᒋᓇᑯᑐᔭᐣ᙮ ᐊᔕ ᑲᔭ ᓂᑭᑫᐣᑕᐣ ᑫᐃᔑᐃᐧᒋᔭᑲᐧ ᐊᐃᐧᔭᐠ ᐊᐦᐃ ᓂᒪᓯᓂᐱᐦᐃᑫᐃᐧᓂᐠ ᐅᒋ ᒥᓇ ᐱᑯ ᐅᐡᑲᑎᓴᐠ ᒋᐃᐧᑕᓄᑭᒪᐊᐧᐨ ᑭᒋᐦᐊᔭᐣ ᐁᑲᐧ ᑲᔭ ᐅᑕᓂᔑᓇᐯᐃᐧ ᐱᒪᑎᓱᓂᐊᐧ ᒋᐅᒋᑭᑫᐣᑕᒧᐊᐧᐨ᙮”
ᑫᐣᑎᕑᐃᐠᐢ ᐅᒪᓯᓂᐱᐦᐃᑲᓇᐣ ᐊᐦᐃᐠ ᐅᐡᑲᑎᓴᐠ ᐅᑎᑭᑐᐃᐧᓂᐊᐧ ᐃᐃᒪ ᓀᐡᑲᐣᑕᐣᑲ ᐅᒪᓯᓂᐱᐦᐃᑲᓂᐊᐧᐣ ᑲᑭᐊᐧᐸᑕᐦᐃᐊᐧᓂᐊᐧᓂᓂᐠ ᐃᐃᒪ ᐯᐟ ᓱᑐᐣ ᐊᐧᑲᐦᐃᑲᓂᐠ ᐊᐦᐃᐠ ᑐᕑᐊᐣᑐ ᑲᑕᑲᐧᐠ ᐃᐃᐁᐧ ᒣᑲᐧᐨ ᑭᔑᐸᑲᐃᐧᐱᓯᑦ 26 ᐊᑯᓇᐠ ᐊᑎᑌᒥᓂᐱᓯᑦ 1 ᐁᑲᐧ ᑲᔭ ᐅᒐᑲᑌᓯᒋᑲᓂᐊᐧᐣ, ᐅᑕᒋᒧᐃᐧᓂᐊᐧᐣ ᐁᑲᐧ ᐅᓂᑲᒧᐃᐧ ᒪᓯᓇᑌᐱᒋᑲᓂᐊᐧᐣ ᑭᓇᑯᒋᑲᑌᓂᐊᐧᐣ ᐁᐦᐊᐠ ᐅᑕ ᓀᐡᑲᐣᑕᑲ ᐅᐡᑲᑎᓴᐠ ᑲᑭᐅᔑᑐᐊᐧᐨ᙮
ᐁᑲᐧ ᑭᐁᐧᑎᓄᐠ ᔕᐊᐧᓄᐠ ᐊᐊᐧᔑᔕᐠ ᐱᒧᒋᑫᐃᐧᑲᒥᐠ ᐃᐧᓇᐊᐧ ᐅᐅᐁᐧ ᑲᑭᐅᓇᑐᐊᐧᐨ ᐊᐦᐃᐠ ᐅᑕ ᑲᔭ ᐃᐃᒪ ᓀᐡᑲᐣᑕᐣᑲ ᑲᑭᐊᐧᐸᑕᐦᐃᐊᐧᓂᐊᐧᐠ ᐅᒪᓯᓂᐱᐦᐃᑲᓂᐊᐧ ᐃᐃᐁᐧ ᒣᑲᐧᐨ ᒪᑯᐱᓯᑦ ᓇᑫ ᐅᑕ ᑲᑭᐃᐡᑲᐧᓇᑐᑕᒪᐊᐧᐨ ᐃᐧᒋᐦᐃᐁᐧᐃᐧᐣ ᐅᓴᑦ ᑲᔭ ᐅᐡᑲᑎᓴᐠ ᑲᑭ ᑲᑫᐧᐅᑕᐱᓇᒧᐊᐧᐨ ᐅᐱᒪᑎᓱᓂᐊᐧ᙮
ᑫᓫᐱᐣ ᒧᓂᔭᐢ ᐅᓇᔓᐁᐧᐃᐧᓂᓂ ᐃᐃᒪ ᓀᐡᑲᐣᑕᐣᑲ ᐃᑭᑐ ᑭᐁᐧᑎᓄᐠ ᔕᐊᐧᓄᐠ ᐊᐧᐊᔑᔕᐠ ᐱᒧᒋᑫᐃᐧᐣ ᑲᐅᒋᐃᐧᒋᐦᐃᑕᐧᐨ ᐅᐅᒪ ᓂᑕᔑᑫᐃᐧᓂᓇᐣ ᒪᐊᐧᐨ ᐱᑯ ᒥᐢᑕᐦᐃ ᓂᑭᐅᒋᐃᐧᒋᐦᐃᑯᒥᐣ ᓂᑕᓂᒥᓭᐃᐧᓂᓇᐠ ᐅᒋ᙮
“ᒪᐊᐧᐨ ᓂᑐᒋᒥᓀᐧᐣᑕᐣ ᑲᑭᐱᔕᐊᐧᐨ ᐁᑲᐧ ᒥᓇ ᓂᓇᓇᑯᑦ ᑲᑭᐊᔭᐊᐧᐨ ᒥᓇ ᒋᓄᑕᑯᔭᑲᐧ,” ᒧᓂᔭᐢ ᐃᑭᑐ᙮ “ᒥᐢᑕᐦᐃ ᐅᑭᐃᐧᒋᐦᐊᐊᐧᐣ ᓂᑐᐡᑲᑎᓯᒥᓇᓇᐣ᙮”
ᒧᓂᔭᐢ ᐃᑭᑐ ᐅᐅᒪ ᐅᒪᓯᓂᐱᐦᐃᑲᓂᐊᐧᐣ ᑲᑭᐊᐧᐸᑕᐦᐃᐊᐧᓂᐊᐧᐠ ᓀᐡᑲᐣᑕᐣᑲ ᒪᐊᐧᐨ ᒥᔑᐣ ᐊᐃᐧᔭᐠ ᑭᐱᔕᐊᐧᐠ ᒥᓇ ᐱᑯ ᑭᑭᒋᓀᐣᑕᑲᐧᐣ ᐅᐅᒪ ᓀᐡᑲᐣᑕᐣᑲ ᐁᓂᓯᑕᐃᐧᓇᑲᐧᐠ ᓂᑐᐡᑲᑎᓯᒥᓇᓇᐠ ᐁᓇᑲᒋᑐᐊᐧᐨ ᑫᑯᓇᐣ᙮
ᐁᑲᐧ ᐊᒥᐁᐧ ᐁᐃᔑᓇᑲᐧᓂᓂᐠ ᐊᐦᐃᐠ ᑭᒋᑕᐃᐧᓂᐠ ᑐᑲᐣ ᑐᓫᐊᐣᑐ ᒋᑕᐃᐧᓇᑯᑐᐊᐧᐨ ᑲᐃᔑᓇᐦᐃᐊᐧᐨ ᒧᓂᔭᐢ ᐃᑭᑐ ᐁᐦᐊᐣ ᐅᑕ ᑲᐃᓇᐨ ᐅᐡᑲᑎᓴᐣ ᐃᐃᒪ ᓀᐡᑲᐣᑕᐣᑲ ᑲᐃᔑᑲᐯᔑᓂᐨ᙮
“ᑲᐧᓂᐣ ᒍᒋᑭᑫᐣᓂᒪᐠ ᑫᐣᑎᕑᐃᐠᐢ ᐃᓴᐣ ᒪᐊᐧᐨ ᐁᓂᑕ ᒪᓯᓂᐱᐦᐃᑫᑯᐸᓀᐣ ᐸᓂᒪ ᐱᑯ ᑲᑭᐊᐧᐸᑕᒪᐧᐠ,” ᒧᓂᔭᐢ ᐃᑭᑐ. “ᓯᔭᑫᐣ ᒪᐃᐧᐣ ᑕᐊᓂᐊᔭᒪᑲᓂᓂ ᐅᐅᐁᐧ ᐊᐊᐧᔑᒣ ᒋᐊᓂᑐᑕᒧᐊᐧᐨ ᐅᐡᑲᑎᓴᐠ᙮ ᓯᔭᑫᐣ ᒪᐃᐧᐣ ᐊᐧᓴ ᐅᑲᐃᔓᑐᓇᐊᐧ᙮”
ᐊᕑᐃᐢᓴ ᒧᓂᔭᐢ ᐊᔕ ᐯᔑᑯᔭᑭ ᐅᑐᒋᐱᒥ ᒐᒐᑲᑌᓯᑐᐣ ᐅᑕᔑᑫᐃᐧᐣ ᐁᐦᐊᐣ ᑲᔭ ᐅᑐᑌᒪᐣ ᐁᑲᐧ ᐅᐊᐧᑯᒪᑲᓇᐣ᙮ ᐁᑲᐧ ᐊᐦᐊᐧᐁᐧ ᓂᔭᓄᔕᑊ ᑲᑕᓱᐊᑭᐃᐧᓀᐨ ᒪᐊᐧᐨ ᑭᑭᒋᓀᐣᑕᑦ ᐅᒐᑲᑌᓯᒋᑲᓇᐣ ᑲᑭᐊᐧᐸᒋᑲᑌᓂᑭᐣ ᐃᐃᒪ ᑐᕑᐊᐣᑐ ᑭᒋᑕᐃᐧᓂᐠ᙮
“ᐊᒥᐁᐧ ᐊᔕ ᐁᐊᑯᐡᑲᔭᐠ ᓇᓇᑲ ᑲᐃᔑ ᓇᑲᒋᑐᔭᐠ ᓂᒪᓯᓂᐱᐦᐃᑫᐃᐧᓂᓇᓇᐣ ᐅᒋ,’ ᐃᑭᑐ᙮ “ᔕᑯᐨ ᓂᑭᒋᓀᐣᑕᒥᐣ᙮”
ᐊᕑᐃᐢᓴ ᒧᓂᔭᐢ ᐃᑭᑐ ᐅᐅᐁᐧ ᐅᑕᔑᑫᐃᐧᐣ ᒪᐊᐧᐨ ᐁᑭᒋᓀᐣᑕᒧᐊᐧᐨ ᓇᓇᑲ ᐅᑐᐡᑲᑎᓯᒥᐊᐧᐣ ᑲᐃᔑᓇᑲᒋᑐᓂᐨ ᒥᓇ ᐱᑯ ᑲᐃᔑᐃᐧᒋᔭᑲᓄᐃᐧᐨ ᐁᐦᐊᐣ ᐅᑕ ᑲᔭ ᐅᑐᑌᒪᐣ᙮
“ᐊᔕ ᑲᔭ ᓂᑕᓂᐃᐧᒋᐦᐃᑎᒥᐣ,” ᐃᑭᑐ᙮
ᐁᑲᐧ ᐃᐧᐣ ᑫᐣᑎᕑᐃᐠᐢ ᐅᐊᐧᐸᑕᐣ ᐊᐊᐧᔑᒣ ᒋᐊᓂ ᒪᓯᓂᐱᐦᐃᑫᐨ ᐁᐧᑎ ᓂᑲᐣ ᒥᓇ ᐱᑯ ᓇᓇᑲ ᒪᓯᓂᐱᐦᐃᑲᓇᐣ ᒋᐅᔑᑐᒋᐣ᙮
ᐁᑲᐧ ᑲᔭ ᐃᑭᑐ ᐊᔕ ᐊᐊᐧᔑᒣ ᐁᐊᓂᓇᐦᐃᐨ ᑲᒪᓯᓂᐱᐦᐃᑫᐨ ᐊᐦᐃ ᐅᑕ ᑲᐅᒋᔑᓭᓂᐠ ᑲᐊᓂ ᐊᐱᒋᑕᓱᐊᑭᐃᐧᓀᐨ ᒥᓇ ᐱᑯ ᑲᐊᓂ ᐊᐱᒋᓇᐦᐃᐨ ᐊᒥᐅᒪ ᑲᔭ ᐁᐧᒋᓂᑲᑌᐡᑲᒪᑲᓂᓂᐠ ᐅᔑᑲᑌᐣᑕᒥᐃᐧᐣ ᑕᐡᐱᑯᐨ ᑲᑭᐱᐊᓂᒥᐦᐃᑯᐨ ᑲᐱᐅᐱᑭᐨ᙮
“ᐊᐊᐧᔑᒣ ᑲᓂᑭᑫᐣᑕᒪᐣ ᑲᐃᓯᓭᐠ ᑫᑯᐣ ᒪᐊᐧᐨ ᐱᑯ ᐊᓂᐸᔭᑌᓇᑲᐧᐣ,” ᑫᐣᑎᕑᐃᐠᐢ ᐃᑭᑐ᙮ “ᐊᔕ ᑲᔭ ᐸᑲᐣ ᓂᑕᓂᔑᐱᐦᐃᑫ ᐁᑲᐧ ᑲᔭ ᓂᒪᓯᓂᐱᐦᐃᑲᓇᐣ ᑭᑭᓄᐊᒪᑫᐃᐧᐣ ᓇᑲᐧᓄᐣ ᒪᐊᐧᐨ ᐅᑕ ᐱᑯ ᑲᐧᔭᐠ ᐁᐃᔑᓇᑲᐧᑭᐣ᙮ ᐅᐡᑭᐊᐦᐃᐣ ᑲᔭ ᓇᓇᑲᐃᐧᓇᑲᐧᓄᐣ ᐊᐦᐃ ᑲᔭ ᐃᔑᓇᒧᐃᐧᐣ ᓇᑲᐧᐣ ᐁᑲᐧ ᐊᒥᐁᐧ ᐱᑯ ᑲᐧᔭᐠ ᐸᐢᑲᐣ ᒋᐊᓂᒪᒋᒪᓯᓂᐱᐦᐃᑫᔭᐣ᙮ ᓂᐢᑕᑦ ᐅᔕᐃᐧᓂᐦᐅ ᑲᐊᓂ ᒪᒋᐊᓄᑲᑕᒪᓂᐣ᙮”
ᐁᑲᐧ ᐅᐅᐁᐧ ᑲᑭᐃᔑᐊᐧᐸᑫᐨ ᑲᑭᐊᐧᐸᑕᐦᐃᐊᐧᓂᐊᐧᓂᓂᐠ ᐅᒪᓯᓂᐱᐦᐃᑲᓇᐣ ᐊᐦᐃᐠ ᐅᑕ ᑐᕑᐊᐣᑐ ᑭᒋᑕᐃᐧᓂᐠ ᑲᐯᔕᐱᑯ ᐅᑲᐱᒥᐃᐧᒋᐃᑯᐣ᙮ ᓂᐦᓯᐣ ᑫᐣᑎᕑᐃᐠᐢ ᑲᑭᒪᓯᓂᐱᐦᐊᐠ ᐁᑲᐧ ᓀᐡᑲᐣᑕᐣᑲ ᐅᐡᑲᑎᓴᐠ ᑲᑭᔓᐱᑲᐦᐊᒧᐊᐧᐨ᙮
“ᐁᑲᐧ ᓂᑭᐅᒋᑭᑫᐣᑕᐣ ᐁᐅᒋᐃᐧᒋᐃᐧᑎᓇᓂᐊᐧᐠ ᒪᓯᓂᐱᐦᐃᑫᐃᐧᓂᐠ ᐅᒋ,” ᑫᐣᑎᕑᐃᐠᐢ ᐃᑭᑐ᙮ “ᐁᑲᐧ ᐊᐊᐧᔑᒣ ᓂᐃᐧᐊᓄᑲᑕᐣ ᑭᔭᐱᐨ ᒋᐅᒋᐃᐧᒋᐃᐧᑎᓇᓂᐊᐧᐠ ᓂᒪᓯᓂᐱᐦᐃᑫᐃᐧᓂᐠ ᐅᒋ᙮”
“ᑲᑭᓇ ᐅᔕ ᓇᓇᑲ ᑫᑯᓇᐣ ᑭᓇᑲᒋᑐᒥᐣ ᐁᑲᐧ ᒥᓇ ᑲᑭᓇ ᐊᐃᐧᔭᐠ ᐁᐃᐧᑕᓄᑭᒥᑎᐊᐧᐨ ᐊᒥᐁᐧ ᐁᐃᔑᑌᐯᐧᑕᒪᐣ ᑕᐱᐡᑯᐨ ᓀᐡᑲᐣᑕᑲ ᑕᔑᑫᐃᐧᐣ ᒋᑭᓇᑲᐧᐠ ᐃᐃᒪ ᐊᑭᐃᐧᒪᓯᓇᐦᐃᑲᓂᐠ᙮” ᑫᐣᑎᕑᐃᐠᐢ ᐃᑭᑐ᙮ “ᑭᐡᐱᐣ ᒪᒪᐃᐧᓂᑫᔭᐠ ᑫᒋᓇᐨ ᐅᔕ ᑫᑯᐣ ᑲᑭᐅᔑᑐᒥᐣ ᐁᑲ ᐅᑕ ᑫᑯᐣ ᑕᑲᐧᐣ ᑲᐃᓀᐣᑕᒪᑭᐸᐣ᙮”