ᑭᑭᐱᐡᑭᑲᓂᐊᐧᐣ ᐃᐃᐁᐧ ᒣᑲᐧᐨ ᐊᓴᐸᐱᐡᑯᓯᐊᐧᑲᐣᐠᐅᐡᑲᑎᓴᐠ ᑲᑭᒪᐊᐧᑐᐡᑲᐊᐧᐨ

ᐁᑲᐧ ᐃᐃᐁᐧ ᒣᑲᐧᐨ ᐅᐸᐅᐃᐧᐱᓯᑦ 22 ᑲᐃᓇᑭᓯᐨ ᑭᑭᐱᐡᑭᑲᓂᐊᐧᐣ ᒥᑲᓇᐠ ᐊᐦᐃ ᐅᑕ ᑲᑭᐅᒋᑐᒋᑲᑌᐠ ᑲᐧᔭᐠ ᒋᑲᓇᐁᐧᐣᒋᑲᑌᑭᐣ ᑲᑭᒋᓀᐣᑕᑲᐧᑭᐣ ᐃᐃᒪ ᐊᐦᑭᑲᐠ ᑲᐊᔭᒪᑲᑭᐣ ᐁᑲᐧ ᐃᐃᒪ ᑭᐢ ᓴᑲᐦᐃᑲᓂᐠ ᔕᐊᐧᓄᐣᐠ ᐊᓴᐸᐱᐡᑯᓯᐊᐧᑲᐣᐠ ᐃᔑᑕᑲᐧᐣ ᐊᒥᐅᐁᐧ ᑲᑭᑭᒋᑐᒋᑲᑌᐠ ᒣᑲᐧᐨ ᐊᓴᐸᐱᐡᑯᓯᐊᐧᑲᐣᐠ ᐅᐡᑲᑎᓯᐃᐧ ᒪᐊᐧᒋᐦᐃᑐᐃᐧᐣ ᑲᑭᑐᒋᑲᑌᐠ᙮
“ᐁᑲᐧ ᐅᐅᐁᐧ ᓴᑲᐦᐃᑲᐣ ᐱᑲᐧᑕᑭᐊᐧᐳ ᐃᐃᒪ ᑲᐊᔭᐠ ᐁᑲᐧ ᓇᐱᐨ ᐊᑲᓯᒋᐊᐧᐣ ᐊᐦᐃᐠ ᓴᑲᐦᐃᑲᓂᐠ ᑲᐃᔑᒋᐊᐧᐠ ᐁᑲᐧ ᒥᓇ ᒪᐊᐧᐨ ᐊᐧᔐᔭᑲᒥᐣ,” ᐃᑭᑐ ᐁᐟᒪᐣᐟ ᒐᐠ, ᐊᐦᐊᐧᐁᐧ ᐊᓴᐸᐱᐡᑯᓯᐊᐧᑲᐣᐠ ᐅᐡᑲᑎᐢ ᑲᑭᐃᐧᒋᐦᐃᐁᐧᐨ ᐁᑲᐧ ᑲᔭ ᐊᔕ ᒥᔑᓇᐧ ᐃᐧᒋᐦᐃᐁᐧ ᑲᐃᔑᑭᐸᑯᐡᑭᑲᓂᐊᐧᐠ ᐱᐅᑕᓇᐠ ᐁᑲᐧ ᓂᐡᑕᑦ ᑲᑭᐅᒋᒪᒋᐃᐧᒋᐦᐃᐁᐧᐨ ᓂᓴᐧᓱᔕᑊ ᑕᓴᑭᐃᐧᓀᐸᐣ᙮ “ᐁᑲᐧ ᑕᓱᓂᐱᐣ ᐃᐃᒪ ᓂᑎᔕᒥᐣ ᐁᑲᐧ ᓇᐱᐨ ᐊᐦᑯ ᒧᑕᔭᐱᑯᐣ ᐁᑲᐧ ᐁᐧᐱᓂᑫᐃᐧᓇᐣ ᒥᔑᓇᑎᓄᐣ᙮ ᐁᑲᐧ ᑲᐧᓂᐣ ᐊᐃᐧᔭᐠ ᒋᑭᒋᓀᐣᑕᒧᐊᐧᐨ ᐅᐅᐁᐧ ᓴᑲᐦᐃᑲᓂᓂ ᐁᑲᐧ ᓇᐱᐨ ᐅᐅᒪ ᒋᓀᐣᑕᑲᐧᐣ ᐁᐦᐊᐠ ᐅᑕ ᓂᑕᓂᔑᓂᓂᒥᓇᓇᐠ ᑫᑭᑕᔑᑫᐊᐧᐸᐣ ᐊᒥᐅᒪ ᑲᔭ ᑲᐅᑎᓇᒧᐊᐧᐸᐣ ᓂᐱᓂ᙮ ᐊᒥᐅᒪ ᑲᔭ ᑲᑭᐅᑎᓇᒧᐊᐧᐨ ᒪᐊᐧᐨ ᑲᒥᓇᐧᑲᒥᐠ ᓂᐱ᙮”
ᒐᐠ ᐃᑭᑐ ᒪᐊᐧᐨ ᐁᑭᐡᑲᔭᐊᐧᐠ ᐅᐅᐁᐧ ᓴᑲᐦᐃᑲᐣ ᐁᑲᐧ ᒥᓇ ᓇᐱᐨ ᐁᓇᒣᑲᐠ᙮ “ᒪᐊᐧᐨ ᑭᒋᓀᐣᑕᑯᓯ ᓇᒣ ᑲᐃᓇᑲᓄᐃᐧᐨ ᐃᐃᒪ ᑲᔭ ᓇᒣ ᐅᑌᐦᐃᑲᐠ ᓇᑲᐧᐣ ᐊᓂᐣ ᒪᔭᑦ ᐃᐁᓇᐧᓯᐨ ᐃᐃᒪ ᑭᑭᓇᐊᐧᒋᒋᑲᓂᐠ,” ᒐᐠ ᐃᑭᑐ᙮ “ᓇᑕᐁᐧᐣᑕᑲᐧᐣ ᐅᔕ ᑭᓄᔐ ᒋᑭᒋᓀᓂᒪᑲᓄᐃᐧᐨ ᑕᐱᓇᑲ ᐃᐧᐣ ᒪᐊᐧᐨ ᒐᐸᔑᐡ ᐊᐦᑭᓂ ᐅᑐᒋᐯᔕᐊᐧᐸᑕᐣ ᐊᐱᒋᐃᐧᐣ ᑭᓇᐃᐧᐟ᙮”
ᐁᑲᐧ ᑲᐧᓂᐣ ᒋᒪᓂᐠ ᑲᐸᐸᒥᔭᐊᐧᐨ ᒋᐅᒋᐊᒪᓂᓯᑕᑯᓯᐊᐧᐨ ᒣᑲᐧᐨ ᑲᑭᑭᐱᐡᑭᑲᓂᐊᐧᐠ ᒥᓇ ᑲᑭᒪᐊᐧᒋᐦᐃᑐᓇᓂᐊᐧᐠ ᐁᑲᐧ ᒐᐠ ᐃᑭᑐ ᐁᐦᐊᐟ ᐁᑕ ᐅᐸᐸᒪᑲᐧᔑᐁᐧᐠ ᑭᓇᑯᓯᐊᐧᐠ ᐁᑲᐧ ᓂᑭᐱᑭᐱᒋᐣᑕᑯᒥᐣ ᐃᐃᒪ ᑲᑭᐃᔑᒪᐊᐧᑐᐡᑲᔭᐠ᙮
“ᒥᑎᓂ ᐱᑯ ᒥᑲᓇ ᓂᑭᑭᐱᐡᑲᒥᐣ ᒥᓇ ᐱᑯ ᐊᐃᐧᔭᐠ ᑫᑯᓇᐣ ᐅᑭᑕᑯᓇᓇᐊᐧ ᐃᐃᒪ ᒥᑲᓇᐠ ᐁᑲ ᒥᐡᑯᐨ ᐊᐃᐧᔭ ᒋᑭᔕᐳᐡᑲᐨ,” ᒐᐠ ᐃᑭᑐ᙮ “ᐁᑲᐧ ᐅᐅᐁᐧ ᑲᑭᐅᒋᑐᒋᑲᑌᐠ ᐁᐃᐧᐊᐧᐸᑕᐦᐊᑲᓄᐊᐧᐨ ᐊᐃᐧᔭᐠ ᑭᔭᐱᐨ ᐁᑎᐯᐣᑕᒪᐠ ᑭᑕᑭᓇᐣ ᒥᓇ ᐱᑯ ᑭᔭᐱᐨ ᐁᐊᐸᒋᑐᔭᐠ᙮”
ᐊᓴᐸᐱᐡᑯᓯᐊᐧᑲᐣᐠ ᑭᕑᐃᓯ ᓯᐁᐧᐣ ᑲᐅᒋᐨ ᐃᑭᑐ ᑭᐢ ᓴᑲᐦᐃᑲᐣ ᒪᐊᐧᐨ ᑭᒋᓀᐣᑕᑲᐧᐣ ᐃᐃᒪ ᓂᑕᔑᑫᐃᐧᓂᓇᐠ ᑲᐃᔑᑕᑲᐧᐠ᙮
“ᓂᒥᔓᑦ ᓂᑭᐃᐧᑕᒪᑯᐸᐣ ᐃᐃᒪ ᑲᐃᔑ ᐊᐃᐡᐸᐱᑲᐠ ᐊᐃᐧᔭᐠ ᐁᐡᑲᑦ ᑭᑕᔑᓇᑐᐸᐊᐧᒧᐊᐧᐠ,” ᓯᐁᐧᐣ ᐃᑭᑐ᙮ “ᐁᑲᐧ ᐃᐃᒪ ᐯᔑᑲᐧᔦᐠ ᐁᐦᐊ ᑭᒋᒥᑭᓇᐠ ᓇᑯᓯ ᐁᑲᐧ ᐃᐃᒪ ᐊᔓᑲᒣ ᓴᑲᐦᐃᑲᐣ ᑭᒋᒥᑭᓇᐠ ᑭᐃᔑᓄᐃᐦᑫᐨ ᐊᒥᐁᐧᑎ ᓀᑫ ᐊᐦᐃ ᒥᑌᐃᐧᑲᒥᐠ ᐁᐃᔑᑕᑲᐧᑭᐸᐣ᙮”
ᓯᐁᐧᐣ ᐃᑭᑐ ᐅᒪᒪᐣ ᐁᑲᐧ ᐅᑯᓯᓴᐣ ᐃᔓᐊᐧᓂᐦᐃᑫᐃᐧᓂᓂᐊᐧᐣ ᐃᐃᒪ ᓴᑲᐦᐃᑲᓂᐠ᙮
“ᓂᑕᔑᓂᓂᒥᓇᓇᐠ ᑭᔭᐱᐨ ᐅᑕᐸᒋᑐᓇᐊᐧ ᐅᐅᐁᐧ ᐊᐦᑭᓂ ᐁᑲᐧ ᑲᔭ ᓂᑎᓀᐣᑕᐣ ᒪᐊᐧᐨ ᐁᑭᒋᓀᐣᑕᑲᐧᐠ ᒥᓇ ᒪᐊᐧᐨ ᐁᐸᔦᑲᐠ ᒥᓇ ᐱᑯ ᓂᐱ ᐁᒥᓇᐧᑲᒥᐠ ᐊᐦᐃᐠ ᐅᑕ ᐊᐦᑭᑲᐠ ᑲᐅᑕᔑᑲᐃᐧᐠ ᐁᑲᐧ ᒥᓇ ᑭᔑᑲᑕᑯᐠ ᒥᔑᓄᐊᐧᐠ ᐅᐅᒪ ᓴᑲᐦᐃᑲᓂᐠ,” ᓯᐁᐧᐣ ᐃᑭᑐ᙮ “ᒥᓇ ᐱᑯ ᑲᑲᐸᔑᒧᓇᓂᐊᐧᐠ ᑭᑫᐣᑕᑲᐧᐣ ᒪᐊᐧᐨ ᐁᐅᒋᐱᒪᑎᓯᐊᐧᑫᓂᒧᓇᓂᐊᐧᐠ ᒥᓇ ᐱᑯ ᐁᒥᓇᐧᑲᒥᐠ ᓂᐱ᙮”
ᐁᑲᐧ ᐊᓴᐸᐱᐡᑯᓯᐊᐧᑲᐣᐠ ᐅᐡᑲᑎᓯᐃᐧ ᒪᐊᐧᑐᐡᑲᐃᐧᐣ ᑲᑭᐃᔑᒋᑲᓂᐊᐧᐠ ᐃᐃᐁᐧ ᒣᑲᐧᐨ ᐅᐸᐅᐃᐧᐱᓯᑦ 20-22 ᑲᐃᓇᑭᓯᐨ ᓇᓇᑲ ᑫᑯᓇᐣ ᑭᑐᒋᑲᑌᐊᐧᓄᐣ ᐊᐦᐃ ᑲᔭ ᑭᒪᑯᔕᓂᐊᐧᐣ, ᑭᓂᒥᓇᓂᐊᐧᐣ, ᑭᐊᔭᒥᓇᓂᐊᐧᐣ, ᑭᒪᒣᑕᐊᐧᓂᐊᐧᐣ ᐁᑲᐧ ᑲᔭ ᒪᑌᐦᐃᑲᐣ ᑲᑕᑯᓇᑲᓄᐃᐧᐨ ᑭᒪᑌᐧᐦᐃᑲᑲᓂᐊᐧᐣ᙮
ᒣᐡᑭᑲᐧᑲᒪᐠ ᐁᕑᐃᐣ ᐸᐧᑐᓫ ᑲᐅᒋᐨ ᑫᐃᐧᐣ ᑭᐊᐣᑕᐃᐧᐃᐧᒋᐦᐃᐁᐧ ᐁᑲᐧ ᐁᑭᐊᐧᐸᑕᐦᐃᐁᐧᐨ ᑐᕑᐃᑎ 3 ᐁᑲᐧ 9 ᐊᐃᐧᔭᐠ ᑲᐃᔑᑲᐯᔑᐊᐧᐨ ᑲᐧᔭᐠ ᒋᐃᐧᑕᓄᑭᒥᑎᐊᐧᐨ᙮
“ᓂᑭᐃᐧᒋᑲᐸᐃᐧᑕᐣ ᐊᐦᐃ ᐊᓴᐸᐱᐡᑯᓯᐊᐧᑲᐣᐠ ᑕᔑᑫᐃᐧᐣ ᑲᑐᑕᒧᐊᐧᐨ ᐊᐦᐃᐠ ᒥᓴᐊᐧᐨ ᐊᓂᔑᓇᐯ ᐊᐢᑭ ᐊᓇ ᐁᐅᒋᑎᐯᐣᑕᑯᓯᔭᐣ ᒥᓇ ᐱᑯ ᐁᑲ ᐊᐊᐧᔑᒣ ᑭᑕᑭᓇᐣ ᒋᓂᔑᐊᐧᓇᒋᒋᑲᑌᐠ,” ᐸᐧᑐᓫ ᐃᑭᑐ᙮ “ᐁᑲᐧ ᐅᐅᐁᐧ ᓄᑯᑦ ᑲᑭᔑᑲᐠ ᓂᐃᐧᒋᑲᐸᐃᐧᑕᐣ ᒥᓇ ᐁᐊᐧᐸᑕᐦᐊᑲᐧ ᐊᐃᐧᔭᐠ ᐃᐃᒪ ᐊᓂᔑᓇᐯ ᐊᐢᑭ ᑲᑲᐯᔑᐊᐧᐨ ᐊᓇ ᐅᑕ ᐃᐧᐣ ᑐᕑᐃᑎ ᓇᑯᒥᑐᐃᐧᓇᐣ ᐊᐦᐃᐠ ᐊᑲᒪᑭᐠ ᐁᑭᐅᒋᓭᒪᑲᑭᐣ ᒥᓇ ᐱᑯ ᐊᑲᒪᑭᐃᐧᓂᓂᐊᐧᐠ ᑲᑭᒥᓂᑯᔭᑲᐧ ᐁᑲᐧ ᐱᐅᑕᓇᐠ ᑭᐊᐧᑯᒪᑲᓂᓇᓇᐠ ᑲᑭᒪᓯᓇᐦᐅᑎᓱᐊᐧᐨ ᐁᑲᐧ ᐅᑫᐧᓂᐊᐧᐣ ᑐᕑᐃᑎᐢ ᑲᐧᓂᐣ ᒋᐱᑭᓯᓂᑯᔭᐠ ᑭᓇᐃᐧᐟ ᑲᐊᓂᔑᓇᐯᐃᐧᔭᐠ,” ᐸᐧᑐᓫ ᐃᑭᑐ ᐊᐦᐃ ᐅᔕ ᑲᔭ ᑲᐧᓂᐣ ᐁᑕ ᑭᓇᐃᐧᐟ ᑲᐊᓂᔑᓇᐯᐃᐧᔭᐠ ᒋᓇᑕᐁᐧᐣᑕᒪᐠ ᑭᓂᐱᒥᓇᐣ ᑲᑭᓇ ᐅᔕ ᐱᑯ ᐸᐸᒥᓯᐊᐧᐠ ᐊᐃᐧᔭᐠ ᑲᐱᒪᑎᓯᐊᐧᐨ᙮
“ᑲᑭᓇ ᐅᔕ ᐱᑯ ᑲᐱᒪᑎᓯᔭᐠ ᒪᐊᐧᐨ ᒋᐃᑭᑐᔭᐠ ᑲᐧᔭᐠ ᒋᑲᓇᐁᐧᐣᑕᒪᐠ ᑲᐸᔦᑲᑲᒥᐠ ᑭᓂᐱᒥᓇᐣ,” ᐸᐧᑐᓫ ᐃᑭᑐ᙮ “ᒥᓇ ᐱᑯ ᒥᐡᑕᐦᐃ ᐱᐊᐧᐱᑯᑫᐃᐧᐣ ᒪᒋᑭᑭᑫᐃᐧᐣ ᑲᐊᓄᑲᑌᑭᐣ ᒋᑕᑲᐧᑭᐣ ᐃᐃᒪ ᑲᐃᔑᑭᒋᓀᐣᑕᑲᐧᐠ ᑭᑕᑭᒥᓇᐠ ᑐᑲᐣ ᓯᐱᐣ ᐁᑲᐧ ᓴᑲᐦᐃᑲᓇᐣ ᐁᑲᐧ ᑭᑫᐣᑕᑲᐧᐣ ᒪᐊᐧᐨ ᐅᐅᐁᐧ ᑲᑭᒋᓂᔓᓇᒋᒋᑫᒪᑲᐠ ᒥᓇ ᐱᑯ ᒋᐅᒋᐊᓂᒥᓭᐠ ᐃᐃᒪ ᑭᑕᓂᔑᓂᓂᐃᐧ ᐱᒪᑎᓱᐃᐧᓇᐣ᙮”
ᐸᐧᑐᓫ ᐃᑭᑐ ᐁᐦᐊᐠ ᐃᑫᐧᐊᐧᐠ ᐃᐧᓇᐊᐧ ᑭᐸᐸᒥᓯᐊᐧᐠ ᐁᑭᒥᓇᑲᓄᐊᐧᐨ ᓇᓇᑲ ᐱᐊᐧᐱᑯᐣ ᐊᐦᑭᑲᐠ ᑲᑭᐅᒋᓭᒪᑲᓂᓂᐠ ᑲᒪᐧᔦ ᑕᑯᔑᓄᐊᐧᐨ ᑭᒋᐊᑲᒪᑭᐃᐧᓂᓂᐊᐧᐠ᙮
“ᑲᐧᓂᐣ ᐃᐧᑲ ᐅᐅᐁᐧ ᒋᐅᒋᐸᑭᑎᓇᒪᐠ,” ᐸᐧᑐᓫ ᐃᑭᑐ᙮ “ᐃᑫᐧᓂᐊᐧᐣ ᐅᔕ ᐱᐊᐧᐱᑯᐣ ᑭᐸᔦᑭᓂᑎᓯᐊᐧᑲᓄᐊᐧᐣ ᒣᑲᐧᐨ ᑲᒪᒪᐃᐧᐡᑲᓂᐊᐧᐠ᙮”
ᐸᐧᑐᓫ ᐃᑭᑐ ᐃᑫᐧᐊᐧᐠ ᐅᑲᓄᑕᓇᐊᐧ ᐊᔕ ᒋᑭᐱᑎᓂᑲᑌᐠ ᒣᑲᐧᐨ ᑲᐱᒥᓂᔓᓇᒋᒋᑲᑌᐠ ᑭᑕᑭᒥᓇᐣ᙮
“ᐊᒥᐁᐧ ᒥᓂᑯᐠ ᓂᔓᓇᒋᒋᑫᐠ ᐃᐃᒪ ᑭᑕᑭᒥᓇᐠ,” ᐸᐧᑐᓫ ᐃᑭᑐ᙮ “ᐊᒥᐁᐧ ᒥᓂᑯᐠ ᑲᔭ ᓇᑯᒥᑐᐃᐧᓇᐣ ᑕᑯᒋᑲᑌ ᐁᑲᐧ ᑭᐡᐱᐣ ᐊᐊᐧᔑᒣ ᐊᔭᐠ ᐁᑲᐧ ᐊᓂᔑᓇᐯᐃᐧ ᓇᑯᒥᑐᐃᐧᐣ ᓂᑕᔭᐣ ᒋᓂᔓᓇᒋᒋᑫᒪᑲᐠ ᑭᑕᑭᒥᓇᐣ᙮”
ᐸᐧᑐᓫ ᒥᓇ ᐃᑭᑐ ᐃᐧᓇᐊᐧ ᐃᑫᐧᓂᐊᐧᐠ ᐊᓂᔑᓇᐯᐠ ᑫᐊᓂᐱᒪᑎᓯᐊᐧᐨ ᑕᒪᒋᓭᐊᐧᐠ ᑭᐡᐱᐣ ᒪᒐᑲᒥᒋᓇᓂᐊᐧᐠ ᐃᐃᒪ ᑭᑕᑭᒥᓇᐠ᙮
“ᐁᑲᐧ ᑲᐧᓂᐣ ᓂᐃᐧᒋᑲᐸᐃᐧᑕᓯᐣ ᑭᒋᐱᐊᐧᐱᑯᑫᐃᐧᐣ ᑲᐊᓂᒧᒋᑲᑌᐠ ᐅᓴᑦ ᒋᓂᔓᓇᒋᒋᑫᒪᑲᐠ ᐃᐃᒪ ᓂᐱ ᑲᐃᓇᔑᑲᐃᐧᐠ ᐊᐦᐃᐠ ᐅᑕ ᑭᑕᑭᒥᓇᐠ ᑲᐊᔭᒪᑲᑭᐣ,” ᐸᐧᑐᓫ ᐃᑭᑐ᙮ “ᐊᒥᐅᔕ ᐅᐅᐁᐧ ᑭᓇᐃᐧᐟ ᑫᑲᑫᐧ ᒪᓇᒋᑐᔭᐠ ᐃᐃᒪ ᑭᑕᑭᒥᓇᐠ᙮ ᑭᐡᐱᐣ ᐸᑭᑎᓇᒪᐠ ᒪᒋᒋᑫᐃᐧᓇᐣ ᒋᐊᔭᒪᑲᑭᐣ ᐊᒥᐁᐧ ᐱᑯ ᐊᐱᐣ ᒋᓂᔓᓇᑕᐠ ᓂᐱ ᐁᑲᐧ ᐊᑎᐊᐱᐣ ᑫᐅᑎᓇᒪᐠ ᑲᐸᔦᑲᑲᒥᐠ