ᑕᐣᑐᕑ ᐯ ᐸᑲᐧᐃᔑᐃᐧ ᐃᐡᑯᓄᐃᐧ ᐱᒧᒋᑫᐃᐧᐣ ᐅᑭᓇᑭᓇᓇᐊᐧ ᐊᓂᔑᓂᓂᐃᐧ ᑭᑭᓄᐦᐊᒪᑫᐃᐧ ᑫᑯᓇᐣ

ᑫᐧᐢᑐᓫᐃ ᒧᓫᐊᐣᐟ
ᐊᐧᐊᐧᑌ ᐊᒋᒧᐃᐧᐣ
ᐅᐣᑌᕑᐃᔪ ᐅᑭᒪᐅᐣ ᑲᐱᒥᑲᓇᐊᐧᐸᑕᐠ ᐃᐡᑯᓄᐱᒧᒋᑫᐃᐧᓂ ᐅᑲᒪᒋᑐᐣ ᓇᐊᐧᐨ ᑫᒥᓄᓭᓂᐠ ᑭᑭᓄᐦᐊᒪᑫᐃᐧᓂ ᒥᓇ ᑫᐃᐧᒋᐦᐃᑯᐊᐧᐨ ᐊᓂᔑᓂᓂᐃᐧ ᐅᑎᐡᑯᓂᐠ ᐅᑭᑭᓄᐦᐊᒪᑯᐃᐧᓂᐊᐧᐠ ᑲᑭᑭᓄᐦᐊᒪᐃᐧᐣᑕᐧ ᐸᑲᐧᐃᔑᐃᐧ ᐃᐡᑯᓄᐃᐧᓂᐠ ᐃᒪ ᑕᐣᑐᕑ ᐯ ᓄᑯᑦ ᑲᐊᐦᑭᐊᐧᓂᐠ.
ᐁᑲᐧ ᑕᐡ ᑲᐃᐡᑯᓄᐃᐧ ᐊᐱᑕᒪᑫᐊᐧᐨ ᐅᑐᒋᑲᓇᐊᐧᐸᑕᓇᐊᐧ 20 ᐃᐡᑯᓄᑲᒥᑯᐣ ᑲᑕᔑᐃᐡᑯᓄᐦᐃᑕᐧ ᓂᐢᑕᑦ ᑲᒪᒋᐃᐡᑯᓄᐊᐧᐨ ᐱᓂᐡ 6 ᑲᐊᑯᐡᑲᐊᐧᐨ, ᓂᐦᓯᐣ ᐃᐡᑯᓄᑲᒥᑯᐣ 7 ᐊᑯᓇᐠ 8 ᑲᐊᑯᐡᑲᐊᐧᐨ ᑲᐃᔑᐃᐡᑯᓄᐦᐃᑕᐧ ᐁᑲᐧ ᓂᔑᐣ ᐦᐊᔾ ᐢᑯᓫ.
“ᐁᑲᐧ ᐃᑭᐁᐧᓂᐊᐧᐠ ᐊᓂᔑᓂᓂᐃᐧ ᑭᑭᓄᐦᐊᒪᐧᐊᑲᓇᐠ, ᓂᑐᒋᑕᒪᐊᐧᒥᐣ ᒣᑲᐧᐨ ᐁᑲ ᑲᐃᐡᑯᓄᐦᐃᑕᐧ ᑲᐅᓇᑯᔑᓂᐠ ᐃᐡᑯᓄᐦᐊᐊᐧᐨ ᐱᒪᑎᓯᐃᐧ ᐃᐧᒋᐦᐃᑎᓱᐃᐧᓂ, ᐊᓂᔑᓂᓂᐊᐧᑎᐃᐧ ᑭᑭᓄᐦᐊᒪᑫᐃᐧᐣ ᒥᓇ ᑫᑭᐊᓄᒋᐃᐧᒋᐦᐃᑯᐊᐧᐨ ᒋᐱᒋᓂ ᑭᑫᑕᓱᐊᐧᐨ, ᑯᑕᑭᔭᐣ ᑫᑯᓇᐣ ᐃᔑᒋᑫᐦᐃᑯᐧᐃᓇᐣ ᒥᓇ ᐊᔕᒪᑲᓄᐊᐧᐠ ᐊᐊᐧᔑᔕᐠ,” ᑭᐃᑭᑐ ᐅᒧᕑ ᐱᓫᐊᔭᓫ, ᓫᐁᐠ ᐦᐁᓫᐊᐣ ᑲᐅᐣᒋᐨ ᒥᓇ ᑕᐣᑐᕑ ᐯ ᐸᑲᐧᐃᔑᐃᐧ ᐃᐡᑯᓄᐃᐧ ᐱᒧᒋᑫᐃᐧ ᐊᐱᑕᒪᑫᐃᐧᓂᐠ ᑲᓂᑲᓂᐡᑲᐠ ᐃᐡᑯᓄᐱᒧᒋᑫᐃᐧᓂᐠ.
“ᐣᑕᔭᐊᐧᒥᓇᐠ ᑲᐊᓂᔑᓂᓂᐃᐧᐊᐧᐨ ᑲᐱᒥ ᑭᑭᓄᐡᑲᐊᐧᐊᐧᐨ ᐅᑎᐡᑯᓂᐣ ᐃᒪ ᐦᐊᔾ ᐣᑯᓫ ᐁᑲᐧ ᒥᓇ ᐃᒪ ᑲᔭᓂ ᒪᒪᑎᑐᐊᐧᐨ ᐅᑎᐡᑯᓂᐠ ᑲᑕᔑᐃᐡᑯᓄᐊᐧᐨ, ᐱᒥᐃᐧᒋᐦᐊᐊᐧᐠ ᑲᐊᓂᐊᐣᒋᐸᑭᑎᓂᑕᐧ ᑲᐊᑭᐊᐱᒋᐊᐧᐨ, ᑲᐊᓂᔑᓂᓂᐃᐧᐊᐧᐨ ᑲᐱᒥ ᑭᑭᓄᐡᑲᐊᐧᐊᐧᐨ ᐅᑎᐡᑯᓂᐣ ᐁᑲ ᒋᐳᓂᒋᑫᐊᐧᐨ ᒥᓇ ᓂᑲᓂᑕᒪᑫᐃᐧ ᑲᐡᑭᐦᐅᐃᐧᓇᐣ ᐁᑲᐧ ᒥᓇ ᐅᑐᒋ ᐱᒥᐊᓱᐡᑲᒪᐊᐧᐊᐧᐣ ᐅᑎᐡᑯᓂᐠ ᒥᓇ ᐅᐊᐧᑯᒪᑲᓂᐊᐧ ᑯᑕᑭᔭᐣ ᑲᐅᒋ ᐊᓂᑫ ᐊᓂᑭᑕᒪᑫᓂᐨ.” ᐃᑭᑐ. “ᒥᔑᓇᑐᐣ ᑲᔦ ᑲᐃᔑᒋᑫᓇᓂᐊᐧᐠ ᐊᓂᔑᓂᓂᐃᐧᔑᒋᑫᐃᐧ ᒪᐊᐧᑐᐡᑲᐃᐧᓇᐣ ᐁᐅᒋ ᒋᑫᑕᑯᒋᑲᑌᑭᐣ ᐃᐡᑯᓄᑲᒥᑯᐣ ᒥᓇ ᓂᐃᐧᒋᑕᐧᒥᐣ ᒣᑲᐧᐨ ᑲᐊᓂᔑᓇᐯᐃᐧᑭᔑᑲᐠ ᒪᐊᐧᐨ ᐅᐁᐧ ᓂᑲᐣ ᑲᑲᓇᐊᐧᐸᑕᒣᐠ ᐅᒪ ᐃᐡᑯᓄᐃᐧᓂᐠ.”
ᐊᔭᐊᐧᐠ ᑲᔦ ᐊᓂᔑᓂᓂᐃᐧ ᑭᑭᓄᐡᑲᒪᑫᐃᐧ ᐊᐱᑕᒪᑫᐠ. ᐁᑲᐧ ᐅᑭᐅᓇᑐᓇᐊᐧ ᑲᐃᔑᑲᑭᑫᐣᑕᒧᐊᐧᐨ ᑫᐃᔑᓇᑲᐧᐠ ᐃᐧᒋᐦᐃᐁᐧᐃᐧᐣ ᐁᑲᐧ ᒥᓇ ᐅᒥᓴᐁᐧᐣᑕᓇᐊᐧ ᒋᐊᔭᐊᐧᐨ ᐅᑭᒋᐦᐊᐃᐧ ᐊᐱᑕᒪᑫᐠ ᑫᑭᐅᐣᒋᐱᒥ ᑲᐣᒋᓂᔕᐊᐧᐊᐧᐨ ᐅᑎᐡᑯᓂᐣ ᐁᑲ ᒋᐳᓂᐃᐡᑯᓄᐊᐧᐨ, ᒋᑕᑎᐸᒋᒧᑕᑫᐊᐧᐨ, ᐁᑲᐧ ᒥᓇ ᐃᓇᓂᒧᐁᐧᐃᐧᐣ ᒋᑭᑭᓄᐦᐊᒪᑫᐊᐧᐸᐣ ᒥᓇ ᐱᑯ ᒋᑭᐊᐧᐃᐧᐣᑕᒪᑫᐊᐧᐨ ᐊᓂᔑᓂᓂᐊᐧᐠ ᑲᐃᔑᑲᓇᐊᐧᐸᒥᑕᐧ ᐅᓇᑯᓂᑫᐃᐧᓂᐠ.
“ᓂᐱᒥ ᐸᑭᑎᓇᒥᐣ ᐊᓂᔑᓂᓂᐃᐧ ᑭᑭᓄᐦᐊᒪᑫᐃᐧᓇᐣ ᒥᓇ ᐃᔑᑭᔐᐧᐃᐧᓇᐣ, ᔕᑯᐨ ᑭᔭᐱᐨ ᓂᐃᐧᓇᐣᑭᑐᒥᐣ,” ᑭᐃᑭᑐ. “ᐅᑕᓇᐠ ᑲᐊᐦᑭᐊᐧᐠ ᓂᑭ ᓇᓇᑲᒋᑐᒥᐣ ᐊᑎᐟ ᐃᐡᑯᓄᑲᒥᑯᐣ, ᑲᑭᐃᓀᐣᑕᒪᐣᐠ ᐊᓂᔑᓂᓂᐃᐧᑭᔐᐧᐃᐧ ᑭᑭᓄᐦᐊᒪᑫᐃᐧᐣ ᒋᑭᐃᔑᐸᑭᑎᓂᑲᑌᑭᐸᐣ ᐁᑲᐧ ᓂᑭᐃᐧᑕᒪᑯᒥᐣ ᑲᑭᐃᓀᑕᒧᐊᐧᐨ, ᑭᐃᑭᑐᐊᐧᐨ ᑎᐯᐣᒋᑫᐃᐧᓇᐣ ᐁᓇᑕᐁᐧᐣᑕᒧᐊᐧᐨ ᐊᓂᔑᓂᓂᐃᐧᑭᔐᐧᐃᐧᐣ ᒋᑭᐊᔭᑭᐸᐣ ᐃᐡᑯᓄᑲᒥᑯᐠ.”
ᐯᔑᐠ ᐃᐁᐧ ᑎᐯᐣᒋᑫᐃᐧᐣ ᐯᓫᐁᑎᔦ ᐃᔑᐃᐡᑫᐧᓂᑲᓱᐊᐧᐠ. ᐦᐁᕑᐁᐣ ᐯᓫᐁᑎᔦ ᐱᒥᐃᐡᑯᓄᐃᐧ ᐁᐅᑕᐱᓇᐠ ᐊᓂᔑᓂᓂᐊᐧᐠ ᑲᑭᐱᐃᓇᑎᓯᐊᐧᐨ ᑭᑭᓄᐦᐊᒪᑫᐃᐧᐣ, ᐁᑲᐧ ᒥᓇ ᐅᐱᒥ ᓂᑲᓂᐱᒧᑐᐣ ᐊᓂᔑᓂᓂᐊᐧᐠ ᑲᐃᐡᑯᓄᐊᐧᐨ ᓫᐁᐠᐦᐁᐟ ᔪᓂᐯᕑᓯᑎ, ᐊᐧᐃᐧᒋᑕᐧ ᐸᐧᕑᐟ ᐃᐧᓫᐃᔭᑦ ᐃᐡᑯᓂᑲᓂᐠ, ᒥᓇ ᐅᓂᑭᐃᑯᒪᐃᐧ, ᐯᑭᐡ ᐁᐱᒥ ᑭᑭᓄᐦᐊᒪᐊᐧᐨ ᐊᐃᓇᓀᐤ ᐁᑕᓱᐊᐦᑭᐃᐧᓀᓂᐠ ᐅᑕᓂᓴᐣ ᐊᓂᔑᓂᓂᐊᐧᑎᓯᐃᐧᓂ.
ᒥᑕᐡ ᐁᑐᑕᐠ ᒋᑭᒋᓀᑕᒥᓂᐨ ᑲᐊᓂᔑᓂᓂᐊᐧᑎᓯᐃᐧᓂᐊᐧ ᐯᓫᐁᑎᔦ ᐅᐱᒥ ᑭᑭᓄᐦᐊᒪᐊᐧᐣ ᐅᑕᓂᓴᐣ ᐊᐦᑭᑲᐠ ᑫᑯᓇᐣ, ᐊᓂᔑᓂᓂᐃᐧ ᐃᔑᒋᑫᐃᐧᓇᐣ ᒥᓇ ᐅᑎᔑᐊᐧᐃᐧᒋᐊᐧᐣ ᐅᐊᐧᑯᒪᑲᓇᐣ ᑫᑯᓇᐣ ᑲᐃᔑᒪᒪᐃᐧ ᐃᔑᒋᑲᓄᐊᐧᐠ ᑕᔑᑫᐃᐧᓂᐠ ᑭᔭᑦ ᐃᑯ ᐱᐣᒋ ᓇᐣᑕ ᐊᐧᑲᒋᐠ ᐃᐡᑯᓂᑲᓂᐠ ᐁᓇᓇᑕᐃᐧ ᓂᓯᑕᐁᐧᐣᑕᒧᐊᐧᐨ ᑲᒥᔑᓀᐧᑲᐠ ᐅᑕᑲᓀᓯᐃᐧᓇᐣ. ᐯᓫᐁᑎᔦ ᑭᐃᑭᑐ ᐅᑕᓂᓴᐣ ᑲᑕᔑ ᐃᐡᑯᓄᓂᐨ ᐅᓇᐦᐊᐸᑕᐣ ᒥᓂᑯᐠ ᑲᐸᑭᑎᓂᑲᑌᓂᐠ ᐊᓂᔑᓂᓂᐃᐧ ᑭᑭᓄᐦᐊᒪᑫᐃᐧᓇᐣ.
“ᒥᐦᐃᒪ ᐁᐅᒋᔭᐣ ᒪᐊᐧᐨ ᐁᒪᐡᑲᐊᐧᑎᓯᐊᐧᐨ ᓂᐊᐧᑯᒪᑲᓂᐠ ᐁᑭᒋᓀᑕᒧᐊᐧᐨ ᑲᔭᐡ ᐊᓂᔑᓂᓂ ᑲᑭᐱᔑᐱᒪᑎᓯᐨ,” ᑭᐃᑭᑐ. “ᐁᑲᐧ ᒥᓇ ᐃᒪ ᑭᑭᓄᐦᐊᒪᑫᐃᐧᓂᐠ, ᓂᑭᑲᑫᐧ ᑫᒋᓇᐁᐧᐣᑕᐣ ᓂᑕᓂᐢ ᒋᑭᑭᓄᐦᐊᒪᐊᐧᑲᓄᐨ ᐊᓂᔑᓂᓂᐃᐧᐊᐧᑎᓯᐃᐧᓂ ᐃᐡᑯᓄᑲᒥᑯᐠ ᒥᓇ ᐱᑯ ᑲᐃᔑᑲᐯᔑᐨ.” ᐁᑲᐧ ᒥᓇ ᑲᑫᐧᑐᑕᑦ ᑕᓱᑭᔑᑲ ᐁᐱᒥ ᑭᑭᓄᐦᐊᒪᐊᐧᐨ ᐅᑕᓂᓴᐣ ᒥᓇ ᐅᑌᐯᐧᑕᐣ ᒥᐦᐃᒪ ᑫᓄᐣᒋ ᐃᐧᒋᐦᐊᐨ ᒋᑭᐊᓂ ᑲᐡᑭᑐᓂᐨ ᒋᓂᑲᓂᑕᒪᑫᓂᐨ ᐧᐁᑎ ᐊᓂᓂᑲᐣ.
“ᐊᔕ ᒥᓇᐊᐧ ᑭᑕᓂ ᑭᐁᐧᑌᐱᓇᒥᐣ ᐊᓂᔑᓂᓂᐊᐧᑎᓯᐃᐧᐣ ᒋᑭᑭᐱᒪᑎᓯᑲᑕᒪᐠ. ᑲᐃᐧᐣ ᐁᑲᐧ ᐁᑕ ᑕᐃᓯᓭ ᒋᒧᒋ ᑲᓄᑫᒥᑯᔭᐠ. ᒪᐊᐧᐨ ᑕᐡ ᓂᑭᒋᓀᑕᒥᐣ ᐊᓂᔑᓂᓂᐊᐧᑎᓯᐃᐧᐣ,” ᑭᐃᑭᑐ.
ᑲᐃᐡᑯᓄᐃᐧ ᐊᐱᑕᒪᑫᐃᐧᑭᒪᐃᐧᐊᐧᐨ ᑭᐃᑭᑐᐊᐧᐠ ᐅᐱᒥ ᓇᓇᑲᒋᑐᓇᐊᐧ ᐁᑲ ᒋᓄᑌᓭᐃᐧᓇᑲᐧᓂᐠ ᑲᐱᒥ ᑭᑭᓄᐦᐊᒪᑯ ᐊᓄᑭᑕᒪᐃᐧᑕᐧ ᐊᓂᔑᓂᓂᐃᐧ ᐅᑎᐡᑯᓂᐠ. ᐁᑲᐧ ᒥᓇ ᑕᐊᓂ ᐊᑕᐁᐧᐊᐧᐠ ᑫᐃᐧᒋᐦᐃᑯᐊᐧᐨ ᒥᓇ ᓂᔓᐧᔦᐠ ᑲᐃᔑᑭᔐᐧᒪᑲᑭᐣ ᐃᐡᑯᓄ ᒪᓯᓇᐦᐃᓇᐣ ᒥᓇ ᑕᓇᐣᑭᐸᑭᑎᓂᑲᑌ ᐃᔑᑭᔐᐧᐃᐧ ᑭᑭᓄᐦᐊᒪᑫᐃᐧᐣ.
“ᐣᑲᑐᑕᒥᐣ ᐁᑲᐧ ᒋᓇᓇᑐᓇᐊᐧᑭᑕᐧ ᑭᔭᐱᐨ ᑲᓇᑕᐁᐧᑕᑯᓯᐊᐧᐨ ᑲᓇᑲᒋᑐᐊᐧᐨ ᐃᐡᑯᓄᐃᐧ ᐊᓄᑭᐃᐧᓂ ᒋᑭᑭᓄᐦᐊᒪᑫᐊᐧᐨ ᐊᓂᔑᓂᓂᐃᐧᑭᔐᐧᐃᓂ,” ᐯᓫᐊᔭᓫ ᑭᐃᑭᑐ. “ᒥᐦᐅᐁᐧ ᒣᑲᐧᐨ ᐁᐊᓄᑲᑕᒪᐠ ᒥᓇ ᐣᑕᓄᑭᐦᐊᒥᐣ ᑲᐊᓂᔑᓂᓂᐃᐧ ᑭᑭᓄᐦᐊᒪᑫᐊᐧᐨ. ᐅᑯᐁᐧᓂᐊᐧᐠ ᑲᐊᔭᐊᐧᑭᑕᐧ ᐊᓂᔑᓂᓂᐃᐧᑭᔐᐧᐃ ᑭᑭᓄᐦᐊᒪᑫᐠ ᓂᑕᐊᓂᔑᓂᓂᒧᐊᐧᐨ ᒥᑕᐡ ᐅᐁᐧ ᑲᔦ ᒪᐊᐧᐨ ᑲᑭᒋᓀᑕᒪᐠ.”
“ᑲᐯᐦᐃ ᐱᑯ ᓂᓇᓇᑐᒥᐣ ᐊᐊᐧᔑᒣ ᑫᐃᔑᒥᓄᓭᐠ ᒥᓇ ᑫᐃᔑᐃᐧᒋᐦᐃᑯᐊᐧᐨ ᐅᑭᑭᓄᐦᐊᑯᐃᐧᓂᐊᐧ ᐊᓂᔑᓂᓂᐃᐧ ᐅᑎᐡᑯᓂᐠ.”