ᐱᒥᐊᔭᓂᑫ ᐊᓂᒥᐃᐁᐧᒪᑲᐣ ᐊᓂᔑᓂᓂ ᑲᑭᐱ ᑲᑲᐧᑕᑭᐦᐃᐨ ᒣᑲᐧᐨ ᐁᑲᓇᐁᐧᑕᑯᓯᐨ ᐃᐡᑯᓄᐃᐧᑲᒥᑯᐠ

“ᑲᐃᐧᐣ ᑭᑭᑫᐣᑕᓇᐊᐧ ᐊᓂᐣ ᑲᑭᑐᑕᐃᐧᐣᑕᐧ ᐊᐊᐧᔑᔕᐠ ᐃᒪ ᑲᑭᑲᓇᐁᐧᐣᑕᑯᓯᐊᐧᐨ,” ᑭᐃᑭᑐ ᒥᑕᐟ. “ᓂᓇᐃᐧᐣᐟ ᑕᐡ ᐃᒪ ᐣᑭᐊᔭᒥᐣ. ᐣᑭᐊᐧᐸᒪᒥᐣ ᐊᐊᐧᔑᔕᐠ ᑲᑭᑲᑲᐧᑕᑭᐦᐃᐣᑕᐧ.”
“ᒥᔑᐣ ᐊᐊᐧᔑᔕᐠ ᑲᐃᐧᐣ ᒋᑭᐅᐣᒋ ᑭᐁᐧᐊᐨ,” ᑭᐊᓂᐃᑭᑐ. “ᒥᑕᐡ ᐅᐁᐧ ᒥᓇᐊᐧ ᑯᑕᐠ ᑫᓇᑕᐁᐧᑕᑲᐧᐠ ᒋᔭᓂᒧᒋᑲᑌᐠ.”
ᒥᑕᐟ ᑭᐃᑭᑐ ᒪᐊᐧᐨ ᐃᑯ ᓇᑕᐁᐧᑕᑲᐧᐣ ᑌᐯᐧᐃᐧᓂᐠ ᒋᐃᓇᑐᑌᑭᐣ ᐅᓄᐁᐧᓂᐊᐧᐣ ᑐᑲᓂ ᐃᐡᑯᓄᑲᒥᑯᐣ ᒋᑭᑭᓄᐦᐊᒪᑯᓄᐊᐧᐠ ᐃᒪ ᑲᑭᓇ ᐃᐡᑯᓄᑲᒥᑯᐣ ᑲᐊᔭᑭᐣ ᒥᓯᐁᐧ ᑌᑎᐸᑲᒥᐠ ᑲᓇᑕ ᐊᐦᑭᐠ. ᒥᐦᐅᒪ ᑲᔦ ᑫᐅᒋ ᓂᓯᑕᐁᐧᑕᒧᐊᐧᐨ ᐁᐧᒥᑎᑯᔑᐊᐧᐠ ᐊᓂᐣ ᒥᓂᑯᐠ ᑫᐱᒪᓄᑲᑕᒧᐊᐧᐨ ᐊᓂᔑᓂᓂᐊᐧᐠ ᒋᑭᔭᓂᔕᐳᐡᑲᒧᐊᐧᐨ ᑲᑭᔭᐱᒋ ᑲᑲᐧᑕᑭᐦᐃᑕᐧ ᐃᒪ ᐃᐡᑯᓄᑲᒥᑯᐣ, ᑭᐃᑭᑐ.
“ᑭᔭᐱᐨ ᑕᐡ ᐱᒥᔭᒪᑲᐣ ᐅᐁᐧ, ᒥᓇ ᒥᐦᐅᐁᐧ ᑭᔭᐱᐨ ᑲᐱᒥᑲᒪᐠ ᐁᔭᓂᒧᑕᒪᐠ,” ᑭᐃᑭᑐ ᒥᑕᐟ. “ᑲᐃᐧᐣ ᑕᐡ ᒋᐁᐧᐣᑕᐠ ᒋᑭᒧᒋ ᑲᓯᐁᐧᐸᐦᐃᑲᑌᐠ. ᓂᐸᑯᓭᑕᐣ ᑲᔦ ᒥᓯᐁᐧ ᐅᒪ ᑲᓇᑕ ᒋᐅᒋ ᐃᐧᒋᑲᐸᐃᐧᑕᑯᔭᐠ ᒋᔭᓄᒋ ᑭᑫᐊᐧᐨ ᑭᐊᐧᑯᒪᑲᓂᓇᐣ ᐁᑲᐧ ᒥᓇ ᐁᐧᑎ ᐊᓂᓂᑲᐣ ᑫᔭᓂᐱᒪᑎᓯᐊᐧᐨ.”
ᑊᕑᐁᐣᐟ ᑫᓫᓱ, ᑲᓂᑲᓂᐡᑲᐠ ᓫᐁᐠᐦᐁᐟ ᑭᒋ ᑭᑭᓄᐦᐊᒪᑫᐃᐧᓂᐠ ᐊᓂᔑᓂᓂᐃᐧ ᑭᑫᐣᑕᒧᓂᐁᐧᐃᐧ ᐊᓄᑭᐃᐧᑲᒥᐠ, ᑭᐃᑭᑐ ᐅᐁᐧ ᑲᑭᐃᔑᒋᑲᓄᐊᐧᐠ ᑭᐅᒋ ᑕᐃᐧᓂᑲᑌ ᒋᐅᒋ ᓄᑕᒧᐊᐧᐨ ᐅᑎᐡᑯᓂᐠ ᑲᐃᓇᑐᑌᐠ ᐁᐧᐡᑲᐨ ᐊᓂᔑᓂᓂᐃᐧ ᐃᐡᑯᓄᐃᐧᐣ.
ᑫᓫᓱ ᑲᑭᐃᑭᑐᐨ ᐊᒥ ᑫᐃᐧᐣ ᐯᔑᑲᐧᐣ ᑲᑭᐃᑭᑐᐨ ᓂᑯᓫ ᒪᑫ ᑭᒋᓇᒣᑯᓯᐱᐠ ᑲᐅᒋᐨ ᐁᑲᐧ ᐃᐧᐣ ᐅᑐᒋ ᓂᑲᓂᐱᒧᑐᐣ ᐅᐁᐧᓂ ᓫᐁᐠᐦᐁᐟ ᐊᓂᔑᓂᓂᐃᐧ ᐅᑎᐡᑯᓂᐠ ᑲᐅᒋ ᒪᒪᐃᐧᓄᐊᐧᐨ.
“ᑭᒋᓀᑕᑲᐧᐣ ᐅᐁᐧ ᒋᔭᓂᒪᑕᓄᑲᑌᐠ ᑫᑭᐅᒋ ᑭᑫᐣᑕᒧᓂᑕᐧ ᐱᑯ ᐊᐃᐧᔭᐠ ᐊᓂᐣ ᐁᔑᐱᒥ ᒪᒋᑐᑕᑫᒪᑲᐠ ᐁᐧᐡᑲᐨ ᐃᐡᑯᓄᐃᐧᐣ,” ᑭᐃᑭᑐ ᒪᑫ. “ᑲᐃᐧᓂᐣ ᐃᑯ ᐁᑕ ᐊᓂᔑᓂᓂᐃᐧ ᐃᓯᓭᐃᐧᐣ ᐅᐁᐧ, ᒥᓯᐁᐧ ᐱᑯ ᐅᒪ ᑲᓇᑕ ᐊᐦᑭᐠ ᐅᑐᒋᐸᑭᑌᐡᑲᑯᓇᐊᐧ ᐊᐃᐧᔭᐠ.”