ᐃᑭᐁᐧᓂᐊᐧᐠ ᓂᐦᓯᐣ ᐅᐡᑲᑎᓴᐠ

ᐃᑭᐁᐧᓂᐊᐧᐠ ᓂᐦᓯᐣ ᐅᐡᑲᑎᓴᐠ, ᑲᑭᓇ ᑭᐱᒪᑫᐧᐸᐦᐃᑫᐊᐧᐠ ᐸᐸᑲᐣ ᑕᔑᑫᐃᐧᓇᐣ ᑌᑎᐸᐦᐃ ᑭᐁᐧᑎᓄᐠ ᐅᐣᑌᕑᐃᔪ, ᑭᐊᐱᒋᔑᓄᐠ ᐁᑭ ᓇᐊᐧᑯᐡᑲᐊᐧᐊᐧᐨ ᑲᑌᓴᑯᓂᑲᓱᐨ ᐅᑕᐸᓇᐣ ᐠᕑᐁᐠ ᓇᐱᑲᐧᐣ ᑲᐱᒥᐱᓱᐊᐧᑫᐸᐣ, ᒥᓯᐁᐧ ᑭᑭᑫᓂᒪᑲᓄ ᑲᐃᔑ ᐊᓂᔑᓂᓂᐃᐧ ᓂᒥᓇᓂᐊᐧᓂᐠ, ᐁᑲᐧ ᐃᒪ ᐅᑕᐸᓂᒥᑲᓇᐠ 627 ᐯᔓᐨ ᐱᐠ ᕑᐃᐳᕑ ᑲᑭᐃᔑ ᓴᑲᑯᐡᑯᑕᑎᐊᐧᐨ.
ᓂᐦᓯ ᐸᐧᕑᐟ ᑊᕑᐊᐣᓯᐢ ᓫᐁᑯᕑᐢ ᐅᑕᓄᑭᐠ ᒥᓇ ᓂᐃᐧᐣ ᐅᐱᒪᑫᐧᐸᐦᐃᑫᐠ ᑭᐃᔕᐊᐧᐠ ᑲᑭᐃᔑ ᓇᐦᐃᓂᑲᓄᐊᐧᓂᐠ ᐁᑲᐧ ᐊᔑᐨ ᐢᐟᕑᐊᐟᒪᐣ.
ᐱᐠ ᕑᐃᐳᕑ ᐅᑭᒪᑲᐣ ᕑᐊᔾ ᒥᔕᓄ ᑭᐃᑭᑐ ᑲᑭᐊᐧᐸᒪᐨ ᐅᐱᒪᑫᐧᐸᐦᐃᑫᐠ ᑲᑭᐃᐡᐸᑯᓇᒧᐊᐧᐨ ᐅᒥᑎᑯᒥᐊᐧ ᒣᑲᐧᐨ ᐃᑭᐁᐧᓂᐊᐧᐠ ᑲᑭᐊᓂ ᓴᑭᒋᑐᐊᐧᐨ ᓂᐦᓯᐣ ᒥᑎᑯᐊᐧᔕᐣ ᐃᒪ ᐱᒪᑕᐦᐁᐃᐧᑲᒥᑯᐠ ᑲᐃᐧᐣ ᐅᑭ ᑭᑫᐣᑕᓯᐣ ᑫᐃᔑᓂᑲᑕᐠ ᑲᑭᐃᓀᐣᑕᐠ. ᑲᐃᐧᐣ ᐣᑭᑫᐣᑕᓯᐣ ᐊᓂᐣ ᑫᑭᐃᔑᓂᑲᑕᒪᐸᐣ ᑲᑭᐃᓇᒪᐣᒋᐦᐅᔭᐣ ᓂᒧᔑᐦᐅᐃᐧᓂᐠ,” ᑭᐃᑭᑐ ᒥᔑᓇ. “ᑕᐱᐡᑯᐨ ᐁᑲ ᑲᑌᐯᐧᐃᐧᓂᐊᐧᐠ, ᒪᐊᐧᐨ ᑫᑯᐣ ᑲᑭᒋᒥᓇᐧᔑᐠ, ᒪᓀᐣᑕᒧᐃᐧᐣ. ᑫᑲᐟ ᑭᐃᓀᐣᑕᑲᐧᐣ ᐁᑲ ᐁᑌᐯᐧᐃᐧᓂᐊᐧᐠ ᑲᑭᐱ ᐃᐧᒋᐃᐧᑯᔭᑭᑕᐧ ᒥᔑᐣ ᐊᐃᐧᔭᐠ ᑫᐃᐧᓇᐊᐧ ᑲᑭ ᑭᑫᓂᒪᐊᐧᐨ ᐅᑯᐁᐧᓂᐊᐧᐠ ᑲᑭᒥᓄᓇᑯᓯᐊᐧᐨ ᐅᐡᑲᑎᓴᐠ.”
ᒥᔕᓄ ᑭᐃᑭᑐ ᒥᑐᓂ ᑭᒋᑯᐡᑫᐧᐣᑕᒧᐃᐧᐣ ᐅᑭᓇᑭᐡᑲᓇᐊᐧ ᐃᒪ ᐅᑎᐡᑯᓂᑲᓂᐠ, ᐁᑲᐧ ᔕᑯᐨ ᐊᐱ ᑲᑭᐊᐧᐸᐣᑕᐠ ᐃᓂᐁᐧᓂᐊᐧᐣ ᐃᐡᑯᑌᐣ ᑲᑭᓴᑲᐦᐃᑲᑌᓂᑭᐣ ᐅᑕᔑᑫᐃᐧᓂᐠ, ᐅᑭ ᑭᑫᐣᑕᐣ ᒪᐣᑐᐣ ᐁᑭᐃᐧᒋᐃᐧᑯᐊᐧᐨ ᐅᑕᔑᑫᐃᐧᓂᐊᐧᐠ.
“ᐊᔕ ᐯᔑᑯᐊᐦᑭ ᒥᓇ ᐊᐱᑕ ᐣᑐᒋᐱᒥ ᐊᔭᑲᐃᐧ ᓇᓇᐦᐃᓂᑫᒥᐣ, ᐁᑲᐧ ᐅᐁᐧ ᓄᑯᑦ ᑲᑭᐃᔑᓇᑭᐡᑲᒪᐣᐠ, ᒥᐦᐅᐁᐧ ᒪᐊᐧᐨ ᑲᑭ ᑯᐡᑫᐧᐣᑕᒥᐦᐃᑯᔭᐣᐠ ᐁᑲᐧ ᐃᐧᐣ ᑯᑕᑭᔭᐣ ᐅᑕᓇᐠ ᑲᑭᐱ ᐃᐡᑲᐧᐱᒪᑎᓯᐊᐧᐨ ᓂᔭᑲᓇ ᓂᑭᐊᓂ ᑭᑫᐣᑕᒥᐣ ᒋᐊᓂ ᐳᓂᐱᒪᑎᓯᐊᐧᐨ,” ᑭᐃᑭᑐ ᒥᔑᓄ. “ᑭᐡᐱᐣ ᓂᐃᐧᐣ ᐅᐡᑲᑎᓴᐠ ᓭᓯᑯᐨ ᐁᐅᐣᒋ ᐃᐡᑲᐧᐱᒪᑎᓯᐊᐧᐨ, ᑲᐃᐧᐣ ᐃᐧᑌᐯᐧᐊᐧᑫᐣᑕᑲᐧᓯᓄᐣ.”
ᒥᔕᓄ ᑭᐃᑭᑐ ᑲᑭᐃᐡᑲᐧᐱᒪᑎᓯᐊᐧᐨ ᓂᐦᓯᐣ ᐅᐱᒪᑫᐧᐸᐦᐃᑫᐠ ᑲᔦ ᐃᒪ ᑌᑎᐸᐦᐃ ᑲᐊᔭᑭᐣ ᑕᔑᑫᐃᐧᓇᐣ ᐅᑭᐅᐣᒋ ᑐᑭᓂᑯᓇᐊᐧ, ᑲᐃᐧᐣ ᐃᑯ ᐁᑕ ᐃᒪ ᐱᐠ ᕑᐃᐳᕑ ᐃᐡᑯᓂᑲᓂᐠ 800 ᐊᓂᔑᓂᓂᐊᐧᐠ ᑲᐃᔑ ᑲᐯᔑᐊᐧᐨ.
“ᒥᑐᓂ ᑭᐊᓂᒪᐣ, ᔕᑯᐨ ᑭᒪᒪᑲᑌᐣᑕᑲᐧᐣ ᑲᑭᐃᔑ ᐊᐧᐸᐣᑕᒪᐣ ᑲᑭᐱ ᐊᐧᐸᐣᑕᐦᐃᐁᐧᐊᐧᐨ ᐅᑕᓱᐡᑲᒪᑫᐃᐧᓂᐊᐧ ᐃᐧ ᐊᔭᒥᐦᐃᐁᐧᐃ ᐱᒧᒋᑫᐃᐧᓇᐣ ᒥᓇ ᐱᑯ ᐊᓂᔑᓂᓂᐃᐧ ᐱᒧᒋᑫᐃᐧᓇᐣ,” ᑭᐃᑭᑐ ᒥᔕᓄ. “ᑭᓴᑲᐦᐃᑲᑌᐊᐧᐣ ᐃᐡᑯᑌ ᒋᐅᒋ ᒪᒐᐊᐧᐨ ᑲᑭᐃᐡᑲᐧᐱᒪᑎᓯᐊᐧᐨ ᐁᐧᑎ ᐃᓀᑫ ᓀᐣᑲᐱᐦᐊᓄᐠ ᐁᑲᐧ ᓂᐦᓱᑯᐣ ᑭᐱᐢᑲᓀ ᐃᐁᐧ ᐃᐡᑯᑌ. ᐁᑲᐧ ᐊᐱ ᓂᐦᓱᑯᐣ ᑲᐃᓯᓭᓂᐠ ᐁᐧᑎ ᐃᓀᑫ ᐊᐧᐸᓄᐠ ᐅᑭᐃᓇᑫᓯᑐᓇᐊᐧ ᒥᓇᐊᐧ ᒋᐱᑭᐁᐧᐡᑲᐊᐧᐨ. ᐊᒥ ᐁᑲᐧ ᐊᐱᐣ ᐁᑭᐅᒋᒋᓭᓂᐠ ᒋᓇᐦᐃᓂᑕᐧ ᐃᒪ ᒋᐸᐦᐃᑲᒥᑯᐠ.”
ᒥᔕᓄ ᑭᐃᑭᑐ ᐃᒪ ᐅᑕᔑᑫᐃᐧᓂᐠ ᓴᑫᐣ ᐃᑯ ᑲᐧᔭᐠ ᐊᓂ ᐱᒥ ᒥᓄᔭᐊᐧᐠ, ᐁᑲᐧ ᐃᔑᒋᑫᐦᐊᑲᓄᓱᐧᐠ ᐁᐅᑲᐧᐱᐦᐃᐣᑕᐧ ᒋᐊᓂᒧᑕᒧᐊᐧᐨ ᒥᓇ ᑯᑕᑭᔭᐣ ᐃᐧᒋᐦᐃᑯᐃᐧᓇᐣ ᐃᑭᐁᐧᓂᐊᐧᐠ ᑲᑭᐊᐧᓂᐦᐊᐊᐧᐨ ᑲᑭᓴᑭᐦᐊᐊᐧᐨ.
“ᒪᐊᐧᐨ ᒥᓇᐧᔑᐣ ᐅᐁᐧ ᑲᑐᒋᑲᑌᐠ ᐅᒪ ᐊᓂᔑᓇᐯᐃᐧᐊᐦᑭᐣᐠ,” ᑭᐃᑭᑐ ᒥᔕᓄ. “ᑲᐃᐧᐣ ᓂᐸᑭᑎᓇᓯᒥᐣ ᒋᓂᔑᑫ ᒥᐣᒋᓇᐁᐧᓯᐊᐧᐨ.”
ᒥᔕᓄ ᐃᑭᑐ ᐅᐁᐧ ᑲᐃᔑᒋᑲᓄᐊᐧᐠ ᓇᐣᑕ ᐱᑯ ᓂᔓᐱᒥᑯᓇᑲ ᐅᐱᒥᑐᑕᓇᐊᐧ.