ᔕᐸᐢᑯᓯᐊᐧᑲᐣᐠ ᐅᐡᑲᑎᓴᐠ ᑭᐸᑯᐡᑭᑫᐊᐧᐠ ᐁᐊᐧᐊᐧᓀᑕᒥᐦᐃᑯᐊᐧᐨ ᑲᓂᔑᐊᐧᓇᒋᒋᑲᑌᓂᐠ ᐅᑕᑭᒥᐊᐧ
ᐁᑲᐧ ᐃᐃᐁᐧ ᒣᑲᐧᐨ ᐅᐸᐅᐃᐧᐱᓯᑦ 22 ᑲᐃᓇᑭᓯᐨ ᑭᑭᐱᐡᑭᑲᓂᐊᐧᐣ ᒥᑲᓇᐠ ᐊᐦᐃ ᐅᑕ ᑲᑭᐅᒋᑐᒋᑲᑌᐠ ᑲᐧᔭᐠ ᒋᑲᓇᐁᐧᐣᒋᑲᑌᑭᐣ ᑲᑭᒋᓀᐣᑕᑲᐧᑭᐣ ᐃᐃᒪ ᐊᐦᑭᑲᐠ ᑲᐊᔭᒪᑲᑭᐣ ᐁᑲᐧ ᐃᐃᒪ ᑭᐢ ᓴᑲᐦᐃᑲᓂᐠ ᔕᐊᐧᓄᐣᐠ ᐊᓴᐸᐱᐡᑯᓯᐊᐧᑲᐣᐠ ᐃᔑᑕᑲᐧᐣ ᐊᒥᐅᐁᐧ ᑲᑭᑭᒋᑐᒋᑲᑌᐠ ᒣᑲᐧᐨ ᐊᓴᐸᐱᐡᑯᓯᐊᐧᑲᐣᐠ ᐅᐡᑲᑎᓯᐃᐧ ᒪᐊᐧᒋᐦᐃᑐᐃᐧᐣ ᑲᑭᑐᒋᑲᑌᐠ᙮
“ᐁᑲᐧ ᐅᐅᐁᐧ ᓴᑲᐦᐃᑲᐣ ᐱᑲᐧᑕᑭᐊᐧᐳ ᐃᐃᒪ ᑲᐊᔭᐠ ᐁᑲᐧ ᓇᐱᐨ ᐊᑲᓯᒋᐊᐧᐣ ᐊᐦᐃᐠ ᓴᑲᐦᐃᑲᓂᐠ ᑲᐃᔑᒋᐊᐧᐠ ᐁᑲᐧ ᒥᓇ ᒪᐊᐧᐨ ᐊᐧᔐᔭᑲᒥᐣ,” ᐃᑭᑐ ᐁᐟᒪᐣᐟ ᒐᐠ, ᐊᐦᐊᐧᐁᐧ ᐊᓴᐸᐱᐡᑯᓯᐊᐧᑲᐣᐠ ᐅᐡᑲᑎᐢ ᑲᑭᐃᐧᒋᐦᐃᐁᐧᐨ ᐁᑲᐧ ᑲᔭ ᐊᔕ ᒥᔑᓇᐧ ᐃᐧᒋᐦᐃᐁᐧ ᑲᐃᔑᑭᐸᑯᐡᑭᑲᓂᐊᐧᐠ ᐱᐅᑕᓇᐠ ᐁᑲᐧ ᓂᐡᑕᑦ ᑲᑭᐅᒋᒪᒋᐃᐧᒋᐦᐃᐁᐧᐨ ᓂᓴᐧᓱᔕᑊ ᑕᓴᑭᐃᐧᓀᐸᐣ᙮ “ᐁᑲᐧ ᑕᓱᓂᐱᐣ ᐃᐃᒪ ᓂᑎᔕᒥᐣ ᐁᑲᐧ ᓇᐱᐨ ᐊᐦᑯ ᒧᑕᔭᐱᑯᐣ ᐁᑲᐧ ᐁᐧᐱᓂᑫᐃᐧᓇᐣ ᒥᔑᓇᑎᓄᐣ᙮ ᐁᑲᐧ ᑲᐧᓂᐣ ᐊᐃᐧᔭᐠ ᒋᑭᒋᓀᐣᑕᒧᐊᐧᐨ ᐅᐅᐁᐧ ᓴᑲᐦᐃᑲᓂᓂ ᐁᑲᐧ ᓇᐱᐨ ᐅᐅᒪ ᒋᓀᐣᑕᑲᐧᐣ ᐁᐦᐊᐠ ᐅᑕ ᓂᑕᓂᔑᓂᓂᒥᓇᓇᐠ ᑫᑭᑕᔑᑫᐊᐧᐸᐣ ᐊᒥᐅᒪ ᑲᔭ ᑲᐅᑎᓇᒧᐊᐧᐸᐣ ᓂᐱᓂ᙮ ᐊᒥᐅᒪ ᑲᔭ ᑲᑭᐅᑎᓇᒧᐊᐧᐨ ᒪᐊᐧᐨ ᑲᒥᓇᐧᑲᒥᐠ ᓂᐱ᙮”
ᒐᐠ ᐃᑭᑐ ᒪᐊᐧᐨ ᐁᑭᐡᑲᔭᐊᐧᐠ ᐅᐅᐁᐧ ᓴᑲᐦᐃᑲᐣ ᐁᑲᐧ ᒥᓇ ᓇᐱᐨ ᐁᓇᒣᑲᐠ᙮ “ᒪᐊᐧᐨ ᑭᒋᓀᐣᑕᑯᓯ ᓇᒣ ᑲᐃᓇᑲᓄᐃᐧᐨ ᐃᐃᒪ ᑲᔭ ᓇᒣ ᐅᑌᐦᐃᑲᐠ ᓇᑲᐧᐣ ᐊᓂᐣ ᒪᔭᑦ ᐃᐁᓇᐧᓯᐨ ᐃᐃᒪ ᑭᑭᓇᐊᐧᒋᒋᑲᓂᐠ,” ᒐᐠ ᐃᑭᑐ᙮ “ᓇᑕᐁᐧᐣᑕᑲᐧᐣ ᐅᔕ ᑭᓄᔐ ᒋᑭᒋᓀᓂᒪᑲᓄᐃᐧᐨ ᑕᐱᓇᑲ ᐃᐧᐣ ᒪᐊᐧᐨ ᒐᐸᔑᐡ ᐊᐦᑭᓂ ᐅᑐᒋᐯᔕᐊᐧᐸᑕᐣ ᐊᐱᒋᐃᐧᐣ ᑭᓇᐃᐧᐟ᙮”
ᐁᑲᐧ ᑲᐧᓂᐣ ᒋᒪᓂᐠ ᑲᐸᐸᒥᔭᐊᐧᐨ ᒋᐅᒋᐊᒪᓂᓯᑕᑯᓯᐊᐧᐨ ᒣᑲᐧᐨ ᑲᑭᑭᐱᐡᑭᑲᓂᐊᐧᐠ ᒥᓇ ᑲᑭᒪᐊᐧᒋᐦᐃᑐᓇᓂᐊᐧᐠ ᐁᑲᐧ ᒐᐠ ᐃᑭᑐ ᐁᐦᐊᐟ ᐁᑕ ᐅᐸᐸᒪᑲᐧᔑᐁᐧᐠ ᑭᓇᑯᓯᐊᐧᐠ ᐁᑲᐧ ᓂᑭᐱᑭᐱᒋᐣᑕᑯᒥᐣ ᐃᐃᒪ ᑲᑭᐃᔑᒪᐊᐧᑐᐡᑲᔭᐠ᙮
ᐊᐧᓭᔭ ᐱᒧᒋᑫᐃᐧᐣ ᐅᑭᐅᓇᓴᐊᐧᐣ ᑫᓂᑲᓂᐱᒧᒋᑫᐧᓂᐨ
ᐊᐧᓭᔭ ᐱᒥᓭᐃᐧ ᐱᒧᒋᑫᐃᐧᐣ ᐅᑕᓄᑭ ᑕᐧᑦ ᒪᐧᕑᐃᐢ ᑭᐅᓇᑭᒪᑲᓄ ᐱᓇᒪ ᐃᐧᐣ ᒋᐊᐱᒋ ᓂᑲᓂᐅᑭᒪᐃᐧᐨ ᐃᒪ ᐊᐧᓭᔭ ᐱᒧᒋᑫᐃᐧᓂᐠ ᐯᑭᐡ ᑲᔦ ᒋᐱᒪᓄᑲᑕᑭᐣ ᒣᑲᐧᐨ ᐃᒪ ᑲᐱᒥ ᐊᓄᑭᐨ ᓂᑲᓂ ᑲᓇᐊᐧᐸᒋᑫᐃᐧᓂᐠ ᐊᐧᓭᔭ ᐱᒥᓭᐃᐧ ᐱᒧᒋᑫᐃᐧᓂᐠ.
ᐣᑲᔭᓂ ᑲᐧᔭᑕᒋᑫᑕᒪᐊᐧ ᑫᓂᔑᐱᒧᒋᑫᐨ ᐊᐁᐧᓀᐣ ᑫᔭᓂ ᐅᑕᐱᓇᑲᓄᑫᐧᐣ ᒪᔭᑦ ᐅᒪ ᑫᔭᓂᐅᑭᒪᐃᐧᐨ ᐊᐧᔭᓭ ᐱᒧᒋᑫᐃᐧᓂᐠ ᐁᐧᑎ ᐊᓂᓂᑲᐣ, ᑭᐃᑭᑐ ᒪᐧᕑᐃᐢ, ᐁᑲᐧ ᐊᔕ ᓂᔓᔕᐳᐊᐦᑭ ᐅᑐᐣᒋᐱᒥ ᐅᑭᒪᐃᐧᐡᑲᐣ ᐊᐧᓭᔭ ᐱᒥᓭᐃᐧ ᐱᒧᒋᑫᐃᐧᓂ.
ᐊᒋᓇ ᐱᑯ ᐁᑕ ᐅᒪ ᑲᑭᐅᓇᓯᑯᔭᐣ ᒋᐅᒋ ᑲᓇᐊᐧᐸᑕᒪᐣ … ᓇᐣᑕ ᐱᑯ ᐣᑯᑕᐧᓱᐱᓯᑦ ᑕᐃᓯᓭ.
ᐁᑲᐧ ᐃᑭᐁᐧᓂᐊᐧᐠ ᐊᐧᓭᔭ ᐱᒧᒋᑫᐃᐧᐣ ᐅᑕᐱᑕᒪᑫᐠ ᐅᑭᐅᓇᓴᐊᐧᐣ ᒪᐧᕑᐃᐢᐅᐣ ᐊᐱ ᐊᐧᐁᐧ ᐊᐧᓭᔭ ᐱᒧᒋᑫᐃᐧᓂᐠ ᑲᑭᐱᐅᑭᒪᐃᐧᐸᐣ ᑕᐧᑦ ᑲᒥᓇᐊᐧᑕᒥᐣ ᑲᑭᐅᐣᒋᐃᐡᑲᐧᑕᐨ ᐁᑲᐧ ᒥᓇ ᑲᑭᐅᐣᒋ ᓇᐱᐡᑲᒪᐊᐧᐨ ᒣᕑᐃᐁᓫᐊᐣ ᑕᐧᒪᐢ ᐅᑭᐸᑭᑎᓇᐣ ᐅᑕᓄᑭᐃᐧᐣ ᐃᒪ ᐊᐧᓭᔭ ᐱᒧᒋᑫᐃᐧᓂᐠ ᐯᔑᑯᔕᐳᔭᑭ ᑭᔭᓄᑭ.
ᐅᑕᐱᑕᒪᑫᐠ ᐅᑭᓇᓇᑯᒪᐊᐧᐣ ᑲᒥᓇᐊᐧᑕᒥᐣ ᒥᓇ ᑕᐧᒪᐢ ᑕᓱᔭᑭ ᒥᓂᑯᐠ ᑲᑭᐱᒥᐊᓄᑭᑕᒪᑫᐊᐧᐨ ᐃᒪ ᐱᒧᒋᑫᐃᐧᓂᐠ.
ᐁᑲᐧ ᒥᓇ ᑯᑕᐠ ᑫᑯᐣ ᑲᑭᐊᐣᒋᓭᐠ ᒪᔭᑦ ᑲᐅᐣᒋ ᓂᑲᓂᐡᑲᒪᑫᐨ ᐱᒧᒋᑫᐃᐧᓂᐠ, ᒪᐧᕑᐃᐢ ᑭᐃᑭᑐ ᐃᑭᐁᐧᓂᐊᐠ ᐅᑭᒪᑲᓇᐠ ᑲᐅᐣᒋ ᒪᒪᐃᐧ ᑎᐯᐣᑕᒧᐊᐧᐨ ᐊᐧᓭᔭ ᐱᒧᒋᑫᐃᐧᓂ ᐃᐧᓇᐊᐧ ᑭᐅᓇᑭᒥᑎᓱᐊᐧᐠ ᐊᒋᓇ ᐃᒪ ᒋᐃᔑᐊᐱᑕᒪᑫᐊᐧᐨ ᓇᐣᑕ ᐱᑯ ᐣᑯᑕᐧᓱᐱᓯᑦ ᒥᓂᑯᐠ ᐁᐃᐧᒪᒥᓇᐧᒋᑫᐊᐧᐨ ᐃᒪ ᐱᒧᒋᑫᐃᐧᓂᐠ.
ᐸᕑᐟ ᒥᑭᐢ, ᑲᓂᑲᓂᐊᐱᑕᒪᑫᐨ, ᐅᑭᐃᓇᒋᒪᐣ ᒪᐧᕑᐃᐢᐅᐣ ᑲᐧᔭᐠ ᐁᑭᑫᐣᑕᐠ ᒥᓇ ᑲᐧᔭᐠ ᐅᑭᐱᐊᐧᐃᐧᑕᓄᑭᒪᐣ ᐊᐧᓭᔭ ᐱᒧᒋᑫᐃᐧᓂᐠ ᑲᐸᐸᒥᓯᐊᐧᐨ ᐊᔕ 12 ᑕᓱᔭᑭ ᐃᒪ ᐊᐧᓭᔭ ᐱᒥᓭᐃᐧ ᐱᒧᒋᑫᐃᐧᓂᐠ.
ᑭᒋᐃᓇᑭᒥᑯᐃᐧ ᐸᑭᓇᑫᐃᐧᐣ ᐸᑭᑎᓂᑲᑌ ᑎᒥᐣᐢ ᐊᓂᔑᓇᐯᐃᐧᑲᒥᐠ
ᓂᑲᓂᒪᑲᐣ ᑎᒥᐣᐢ ᐊᓂᔑᓇᐯᐃᐧᑲᒥᐠ.
ᐁᑲᐧ ᒪᒪᐤ 119 ᑕᓯᓄᐣ ᐊᓂᔑᓇᐯᐃᐧᑲᒥᑯᐣ ᑌᑎᐸᑲᒥᐠ ᐅᒪ ᑲᓇᑕ ᐊᐦᑭᐠ, ᑎᒥᐣᐢ ᐊᓂᔑᓇᐯᐃᐧᑲᒥᐠ ᒪᐊᐧᐨ ᑭᐅᐣᒋᓂᑲᓂᒪᑲᐣ ᒥᓇ ᒥᐦᐃᒪ ᑲᐃᔑᐸᑭᑎᓂᑲᑌᐠ ᒥᓯᐁᐧᑲᒥᐠ ᑲᐅᒋ ᒪᒪᐊᐧᓄᑲᑌᑭᐣ ᐊᓂᔑᓇᐯᐃᐧᑲᒥᑯᐣ ᑭᑭᓇᐊᐧᒋᐦᐃᐁᐧᐃᐧᐣ ᒪᐊᐧᐨ ᑲᐧᔭᐠ ᐁᔑᓇᑲᐧᐠ ᐊᓄᑭᐃᐧᐣ.
ᑭᓂᓯᑕᐃᐧᓂᑲᑌ ᑲᑭᐃᔑᐱᒥᐃᐧᒋᑲᑌᐠ ᐅᑭᒪᐃᐧᑲᓇᐊᐧᐸᒋᑫᐃᐧ ᐊᓄᑭᐃᐧᓂᐠ, ᓂᑲᓂᑕᒪᑫᐃᐧᓂᐠ, ᐊᓄᑭᐃᐧᓇᐣ, ᒥᓯᐁᐧ ᑲᐃᔑᐱᒥᐃᐧᒋᑲᓂᐊᐧᐠ, ᐅᑕᓄᑭᐠ ᐁᓇᐦᐁᐣᑕᒧᐊᐧᐨ, ᐊᓂᔑᓂᓂᐊᐧᐣ ᐁᐱᒥᐃᐧᒋᐦᐊᐊᐧᐨ ᒥᓇ ᓂᑲᐣ ᐁᓂᐅᓇᒋᑫᐊᐧᐨ ᐊᓂᐣ ᑫᓂᓇᓄᑭᐊᐧᐨ, ᑎᒥᐣᐢ ᐊᓂᔑᓇᐯᐃᐧᑲᒥᑯᐠ ᑲᐱᒧᑐᐊᐧᐨ ᑭᒥᓇᑲᓄᐊᐧᐠ ᑭᑭᓇᐊᐧᒋᐦᐅᐃᐧᓂ ᒣᑲᐧᐨ ᓂᒥᑕᓇ ᓂᐅᔕᐸᐧ ᑕᓱᔭᑭ ᒪᐊᐧᒋᐦᐃᑐᐃᐧᐣ ᑲᑭᑐᒋᑲᑌᐠ ᐁᐧᑎ ᓭᐢᑲᒋᐊᐧᐣ ᐅᑌᓇᐠ ᒍᓫᐊᔾ ᐱᓯᑦ.
ᑎᒥᐣᐢ ᐊᓂᔑᓇᐯᐃᐧᑲᒥᐠ ᑲᐅᑭᒪᐃᐧᐨ ᐯᕑᐊᓂᑲ ᓂᑯᓫᓴᐣ, ᑭᐃᑭᑐ ᐃᐧᓇᐊᐧ ᐃᒪ ᑲᐊᓄᑭᐊᐧᐨ ᑲᑭᐅᐣᒋ ᐃᓯᓭᐠ ᐅᐁᐧ ᒋᒥᓄᓭᐠ ᑲᐃᔑᐱᒧᒋᑲᑌᐠ ᐊᓄᑭᐃᐧᐣ. ᑭᐃᑭᑐ ᒥᓇ ᐊᓄᑭᓇᑲᓇᐠ ᐅᓇᓇᑐᓇᓇᐊᐧ ᑫᐃᔑᒥᓄᓭᑭᐣ ᑫᑯᓇᐣ ᑲᐱᒥᐃᐧᒋᐦᐃᐁᐧᐊᐧᐨ ᐅᑕᓄᑭᐃᐧᓂᐊᐧᐠ ᒥᓇ ᑲᐅᐣᒋ ᐊᐧᐃᐧᒋᐦᐊᐊᐧᐨ ᐅᑌᓇᐠ ᑲᑲᐯᔑᐊᐧᐨ ᐊᓂᔑᓂᓂᐊᐧᐠ ᑫᐃᔑᐃᐧᒋᐦᐃᑎᓱᐊᐧᐨ.
ᒥᑕᐡ ᐅᐁᐧ ᑲᑭᐅᐣᒋ ᒥᓂᑯᔭᐣᐠ ᑭᑭᓇᐊᐧᒋᐦᐃᑯᐃᐧᐣ ᒥᓂᑯᐠ ᐃᐁᐧ ᑲᑭᐱᐊᓄᑲᑕᒪᐠ ᐁᐧᑎ ᒥᔑᓄᐊᐦᑭ ᐅᑕᓇᐠ ᒥᓇ ᐱᑯ ᐅᑕᓇᐠ ᑲᐊᐦᑭᐊᐧᐠ. ᑭᐃᑭᑐ ᐃᒪ ᑲᐊᓄᑭᐊᐧᐨ ᒪᐊᐧᐨ ᑭᒥᓀᐧᑕᒧᐠ ᒥᓇ ᑭᓇᓇᑯᒧᐊᐧᐠ ᑲᑭᒥᓂᑕᐧ ᑭᑭᓇᐊᐧᒋᐦᐃᑯᐃᐧᓂ.
ᐅᑭᒪᑲᐣ ᓯᓫᐃᔭ ᐃᒐᑦ ᑭᐁᐧ ᐅᑭᒪᑲᓂᐃᐧ ᑭᓄᑲᒥᐣᐠ
ᐅᑭᒪᑲᐣ ᓯᓫᐃᔭ ᐃᒐᑦ ᓂᐊᐧ ᑭᐁᐧ ᐅᑭᒪᑲᓂᐃᐧ ᒥᓇᐊᐧ ᓂᔓᐊᐦᑭ ᑕᐱᒥᓭᓂ ᒋᓂᑲᓂᑕᒪᑫᐨ ᐁᑲᐧ ᐅᑭᐸᑭᓇᐊᐧᐣ ᑲᑭᑯᒋᐸᑐᓂᐨ ᒍᐊᐣ ᑐᐁᐧᑭᔑᐠ ᐱᐣᒋᐁᐧᐱᓂᑫᐃᐧᓇᐣ ᑲᑭᐊᐣᒋᑲᑌᑭᐣ ᑭᐃᓯᓭᐊᐧᐣ 194 ᐁᑲᐧ ᒥᓇ 60 ᒣᑲᐧᐨ ᑲᑭᐅᑭᒪᑲᓂᑲᓂᐊᐧᐠ ᒥᓇ ᐅᓇᔓᐊᐧᓂᑲᓂᐊᐧᐠ ᑭᓄᑲᒥᐠ ᒣᑲᐧᐨ ᐅᐸᐅᐃᐧᐱᓯᑦ 21.
ᑯᑕᐧᓱ ᐅᐡᑭ ᐅᓇᔓᐁᐧᐃᐧᓂᓂᐊᐧᐠ ᐅᑯᐁᐧᓂᐊᐧᐠ: ᑫᐸᓂᔦ ᐃᒐᑦ, ᔐᕑᐃ ᑌᓫᐊᕑ, ᒪᐧᕑᐃᐢ ᐊᐧᐳᐢ, ᑌᐱᐢ ᒐᕑᐃᐢ, ᑫᓫᐃ ᐸᐧᕑᑎᔦ ᒥᓇ ᐁᐱᕑᐅ ᑕᐧᕑ. ᑲᒪᐧᔦ ᐅᑭᒪᑲᓂᐃᐧᐸᐣ ᓯᓫᐃᔭ ᐸᐸᑲᐣ ᑭᐊᔭᓄᑭ ᐃᒪ ᐃᓀᑫ ᒪᐡᑭᑭᐃᐧ ᐊᓄᑭᑕᒪᑫᐃᐧᓂᐠ, ᐸᐣᐟ ᐊᓄᑭᐃᐧᓂᐠ ᒥᓇ ᑭᐅᓇᔓᐁᐧᐃᐧᑫᐧᐃᐧ.
ᐃᒪ ᑭᓄᑲᒥᐣᐠ ᐅᐱᒥᐊᓄᑲᑕᓇᐊᐧ ᐊᑎᐟ ᔓᓂᔭᐃᐧ ᒪᒋᑕᐃᐧᓂᑫᐃᐧᓇᐣ ᐅᐁᐧ ᒣᑲᐧᐨ. ᐅᐁᐧᓂ ᑕᐡ ᒥᓇᐊᐧ ᑲᑭ ᑭᐁᐧᐅᐡᑭᓭᓂᐠ ᓂᑲᓂᑕᒪᑫᐃᐧᐣ ᐅᑭᒪᑲᐣ ᐃᒐᑦ ᐅᑲᐊᓂ ᓇᓇᑲᒋᑐᐣ ᑫᑯᓇᐣ ᐅᑕᔑᑫᐃᐧᓂᐠ ᑫᑯᓇᐣ ᑲᓇᓄᑌᓭᑭᐣ ᑐᑲᐣ ᐊᐧᑲᐦᐃᑲᓇᐣ ᑫᓂᔑᑕᐦᐃᑕᐧ ᑲᐅᐡᑲᑎᓯᐊᐧᐨ ᑲᐊᓂᐅᐱᑭᐦᐊᐊᐧᓱᐊᐧᐨ ᐁᑲᐧ ᒥᓇ ᑲᐯᔑᑯᐅᐱᑭᐦᐊᐊᐧᐨ ᐅᓂᒐᓂᓯᐊᐧᐣ ᐅᓂᑭᐦᐃᑯᒪᑲᐠ ᒋᐅᐣᑎᓇᒪᐃᐧᑕᐧ ᐊᐧᑲᐦᐃᑲᓇᐣ.
I am the product, evolution of many thousands of years as are you.
I am the product, evolution of many thousands of years as are you. I grew up on the land in the remote far north of Ontario following in the footsteps of my...
One of the most beautiful serene places I’ve ever visited was on the banks of the Opinagau River in northern Ontario, just near the corner of land where...