ᐊᓂᔑᓂᓂᐃᐧ ᓇᑕᐃᐧᐦᐃᐁᐧᐃᐧᐣ ᐃᐧᒋᐦᐃᐁᐧᒪᑲᐣ ᑲᐃᐧᐳᓂᑐᐨ ᒪᐡᑭᑭᑫᐃᐧᐣ

ᕑᐃᐠ ᑲᕑᐃᐠ
ᐊᐧᐊᐧᑌ ᐊᒋᒧᐃᐧᓇᐣ
ᑭᐃᑭᑐ ᐊᓂᔑᓂᓂᐃᐧ ᒪᐡᑭᑭᐃᐧᓂᓂ ᑫᑯᓀᐣ ᐊᐣᒋᑯ ᑭᔭᐱᐨ ᒪᐡᑭᑭᐣ ᐁᐅᐣᒋ ᒪᒥᓂᑕᐧ ᐃᑭᐁᐧᓂᐊᐧᐠ ᑲᐊᐧᓂᔭᐸᒋᑐᐊᐧᐨ ᒪᐡᑭᑭᐣ.
“ᒥᔑᐣ ᐊᐃᐧᔭᐠ ᒥᓇᑲᓄᐊᐧᐠ ᒪᐡᑭᑭᓂ ᒣᑐᑐᐣ ᑲᐃᒋᑲᑌᐠ ᐃᐧᓴᑫᐣᑕᒧᒪᐡᑭᑭ ᐁᐅᐣᒋ ᑲᑫᐧᐃᒋᐦᐃᐣᑕᐧ ᒋᐅᒋ ᐊᓄᑲᑕᒧᐊᐧᐨ ᑲᑎᐯᓂᒥᑯᐊᐧᐨ ᒪᐡᑭᑭᑫᐃᐧᐣ,” ᑭᐃᑭᑐ ᕑᐊᓫᑊ ᒐᐧᐣᓴᐣ, ᐊᓂᔑᓂᓂᐃᐧ ᒪᐡᑭᑭᐃᐧᓂᓂ ᐊᐧᓂᓇᐊᐧᑲᐠ ᐁᑲᐯᔑᐨ. “ᓇᐣᑕ ᐱᑯ ᒥᑕᓱᔭᑭ ᓇᐣᑕ ᐊᐊᐧᔑᒣ ᐅᑕᐱᒥᐅᑕᐱᓇᓇᐊᐧ ᐃᐁᐧᓂ ᒪᐡᑭᑭᓂ. ᒥᑕᐡ ᐃᑯ ᐁᔑᓇᑲᐧᐠ ᑯᑕᑭᓂ ᐸᑲᐣ ᒪᐡᑭᑭᓂ ᐁᒥᐡᑲᐧᒋ ᑎᐯᓂᒥᑯᐊᐧᐨ.”
ᒐᐧᐣᓴᐣ ᑭᐃᑭᑐ ᒥᔑᐣ ᑲᑭᐱᐊᐧᐃᐧᒋᐦᐊᐨ ᒥᓇ ᑲᑭᑲᐡᑭᑐᐊᐧᐨ ᒋᓀᐱᒋ ᐳᓂᑐᐊᐧᐨ ᒪᐡᑭᑭᑫᐃᐧᓂᐠ ᐅᑭᔭᐸᒋᑐᐣ ᐊᓂᔑᓂᓂᐃᐧ ᓇᑕᐃᐧᐦᐃᐁᐧᐃᐧᓂ ᐁᐧᑎ ᐱᑲᑕᐧᑲᒥᑯ ᓇᑕᐃᐧᐦᐃᐁᐧᐃᐧᐣ ᑲᐱᒧᑐᐨ ᑕᓱᓂᐱᐣ ᐁᐧᑎ ᑭᒥᐊᐧᓂᓴᑲᐦᐃᑲᓂᐠ.
“ᑲᐃᐧᐣ ᐅᑐᒋᒥᓀᐧᑕᓯᓇᐊᐧ ᑯᑕᑭᓂ ᒪᐡᑭᑭᓂ ᑲᑭᒥᓂᑕᐧ ᐁᑲᑫᐧ ᐳᓂᑐᐊᐧᐨ ᐅᒪᐡᑭᑭᑫᐃᐧᓂᐊᐧ,” ᑭᐃᑭᑐ ᒐᐧᐣᓴᐣ. “ᑌᐯᐧ ᑕᐡ ᐃᑯ ᐅᑭᐅᐣᒋ ᐃᐧᒋᐦᐃᑯᓇᐊᐧ. ᐣᑭᑲᐧᔭᐣᒋᐊᔭᒥᐣ ᑲᔦ ᒪᑐᑐᓴᐧᐣ ᐁᑭᐱᐣᒋᐊᐧᐨ ᐊᐱᐱᑯ ᑲᑭᓇᑕᐁᐧᐣᑕᒧᐊᐧᐨ, ᒣᑲᐧᐨ ᐊᐱ ᑲᑭᒋᐊᐧᐊᐧᓀᐣᑕᒧᐊᐧᐨ.”
ᒐᐧᐣᓴᐣ ᑭᐃᑭᑐ ᐅᒪᑐᑐᓴᐧᐣ ᑲᐧᔭᐣᒋᔭᓂ ᑕᓱᑭᔑᑲ ᒋᐅᒋ ᐊᐸᒋᑐᐊᐧᐨ ᑲᑭᐱᐊᐧᐃᐧᒋᐦᐊᐧᐨ, ᐁᔭᓂ ᐃᐧᓴᑫᐣᑕᒧᐊᐧᐨ ᐊᐱ ᑲᔭᓂᒐᑭᒪᑲᓂᐠ ᒪᐡᑭᑭᓂ ᐅᐃᐧᔭᐃᐧᐊᐧᐠ, ᐁᔭᓂ ᐊᐧᐊᐧᓀᐣᑕᒧᐊᐧᐨ ᒥᓇ ᐁᔭᓂ ᓂᓂᐣᑭᓭᐊᐧᐨ.
“ᐊᐱ ᑕᐡ ᐅᐁᐧ ᑲᔭᓂᓇᒪᐣᒋᐦᐅᐊᐧᐨ, ᐊᓂᑲᐧᔭᐣᒋᐊᐧᐨ ᒋᐱᐣᒋᐊᐧᐨ ᒪᑐᑐᓴᐧᓂᐠ,” ᑭᐃᑭᑐ ᒐᐧᐣᓴᐣ. “ᒥᐦᐃᒪ ᐁᐅᐣᒋ ᐃᐧᒋᐦᐃᑯᐊᐧᐨ ᒋᓴᑭᑕᐯᐧᓱᐣᑕᒧᐊᐧᐨ ᒥᓇ ᒋᐅᒋ ᓴᑭᒋᐡᑲᒪᑲᓂᐠ ᐃᐁᐧᓂ ᑲᒪᐡᑭᑲᑯᐊᐧᐨ ᒪᐡᑭᑭᐣ ᐅᐃᐧᔭᐃᐧᓂᐊᐧᐣᐠ. ᒪᐊᐧᐨ ᑕᐡ ᐅᐁᐧ ᐃᐧᒋᐦᐃᐁᐧᒪᑲᐣ, ᐁᑲᐧ ᔕᑯᐨ ᐃᒪ ᑎᐸᒋᒧᐃᐧᓂᐠ ᑲᐃᐧᐣ ᒋᑭᐅᒋ ᑎᐸᑐᑌᐠ ᑭᐡᐱᐣ ᒋᑭᐊᐸᒋᒋᑲᑌᑭᐸᐣ ᐊᓂᔑᓂᓂᐃᐧ ᓇᑕᐃᐧᐦᐃᐁᐧᐃᐧᐣ ᒋᐅᒋ ᑲᑫᐧ ᐃᐧᒋᐦᐃᑕᐧ ᑲᑎᐯᓂᒥᑯᐊᐧᐨ ᒪᐡᑭᑭᐃᐧᓂ.”
ᒐᐧᐣᓴᐧᐣ ᐅᓇᑕᐁᐧᐣᑕᐣ ᒋᑭᑫᐣᑕᒧᐊᐧᐨ ᐊᐃᐧᔭᐠ ᑯᑕᑭᔭᐣ ᑫᑯᓇᐣ ᐁᑕᑲᐧᑭᐣ ᑫᑭᐅᐣᒋ ᒥᓄᔭᐸᐣ ᑲᐃᐧᐳᓂᑐᐨ ᑲᐊᐧᓂᔭᐸᒋᑐᐨ ᒪᐡᑭᑭᐣ ᐊᐱᐨ ᐃᐧᐣ ᐊᐣᒋᑯ ᑯᑕᑭᔭᐣ ᒪᐡᑭᑭᐣ ᑲᑲᑫᐧ ᓇᑕᐃᐧᐳᐊᐧᑲᓄᐊᐧᐠ.
“ᐣᑭᐊᔭᒥᐦᐊᐸᓂᐠ ᑯᑕᑭᔭᐠ ᑲᐱᒧᑐᐊᐧᐨ ᒪᑐᑐᐸᓴᐧᐣ ᐅᒪ ᑕᔑᑫᐃᐧᓂᐠ ᐊᒥ ᑫᐃᐧᓇᐊᐧ ᐯᔑᑲᐧᐣ ᐁᐃᓀᐣᑕᒧᐊᐧᐨ,” ᑭᐃᑭᑐ ᒐᐧᐣᓴᐣ. “ᑲᐃᐣ ᑕᐡ ᑫᑯᐣ ᒋᑕᑲᐧᐠ ᐊᐣᑎ ᑫᑭᐅᐣᒋ ᐱᒧᒋᑲᑌᑭᐸᐣ ᐅᐁᐧ ᑐᑲᐣ ᑫᑭᐅᐣᒋ ᐃᐧᒋᐦᐃᑕᐧᐸᐣ ᐊᓂᔑᓂᓂᐃᐧ ᒪᐡᑭᑭᐃᐧ ᐃᐧᒋᐦᐃᐁᐧᐃᐧᓂᐠ, ᒥᑕᐡ ᐁᔑᓇᑭᐡᑲᒧᐊᐧᐨ ᐊᓂᔑᓂᓂᐃᐧ ᒪᐡᑭᑭᐃᐧᓂᓂᐊᐧᐠ ᐃᐧᓇᐊᐧ ᐱᑯ ᐁᓂᔑᑫ ᓇᓇᑐᓇᒧᐊᐧᐨ ᐊᐣᑎ ᑫᑭᐅᐣᒋ ᑲᑫᐧᐃᐧᒋᐦᐊᐊᐧᐸᐣ ᑐᑲᐣ ᑲᐃᐧᒪᑐᑐᓴᐧᓂᑫᐊᐧᐨ. ᐃᐧᓇᐊᐧ ᐱᑯ ᑲᔦ ᐅᒣᑎᓂᑫᐃᐧᓂᐊᐧ ᐅᑕᐸᒋᑐᓇᐊᐧ ᑲᐃᐧ ᑲᑫᐧᐃᒋᐦᐊᐊᐧᐨ ᑲᓇᑕᐁᐧᐣᑕᒧᐊᐧᐨ ᐅᐁᐧ ᑐᑲᐣ ᐃᐧᒋᐦᐃᑯᐃᐧᐣ.”
ᒐᐧᐣᓴᐣ ᐃᑭᑐ ᒪᑐᑐᓴᐧᐣ ᑲᐃᔑᒋᑲᓄᐊᐧᐠ ᐃᒪ ᐱᑯ ᓇᐣᑕ ᐯᔑᑯᐊᐧᑲᓭ ᐊᑯᓇᐠ ᓂᔓᐊᐧᑫᓯ ᐱᒥᑐᒋᑲᑌ, ᒥᓇ ᐊᓂᓂᑯ ᑕᓯᐣ ᑲᐃᐧᐱᐣᒋᐊᐧᐨ ᒥᐦᐃᒪ ᒥᓂᑯᐠ ᐁᐱᒥᑭᑲᑌᐠ.
“ᒥᑐᓂ ᑭᒋᑭᔑᑌ ᐃᒪ ᐱᐣᒋᒪᑐᑐᓴᐧᓂᐠ,” ᐃᑭᑐ ᒐᐧᐣᓴᐣ. “ᑭᐣ ᑕᐡ ᐃᑯ ᒋᑲᑫᐧᒋᐦᐃᑎᓱᔭᐣ ᑭᔭᐃᐧᐣᐠ ᒋᑲᑫᐧᑭᔑᑐᔭᐣ ᒥᓇ ᐃᒪ ᑲᐸᐡᑭᓀᔭᐸᑌᐠ ᒋᐅᒋ ᐃᐧᒋᐦᐃᑯᔭᐣ. ᒥᐢᑕᐦᐃ ᑭᐱᐊᓄᑲᑌ ᐅᐁᐧ ᐁᑭᓇᓇᑕᐃᐧ ᑭᑫᐣᒋᑲᑌᐠ ᐊᓂᐣ ᐁᔑ ᐃᐧᒋᐦᐃᐁᐧᒪᑲᐠ ᑲᐸᐡᑭᓀᔭᐸᑌᐠ.”
ᒐᐧᐣᓴᐣ ᐃᑭᑐ ᐃᒪ ᐱᑯ ᓇᐣᑕ ᓂᐅᑭᔑᑲ ᐊᑯᓇᐠ ᓂᔭᓄᑭᔑᑲ ᐱᒋᓇᐠ ᐊᐱᐣ ᑲᔭᓂ ᓇᑲᓂᐁᐧᒪᑲᐠ ᑲᒥᔕᒥᐡᑲᑫᒪᑲᐠ ᑲᒪᓇᒪᐣᒋᐦᐅᓇᓄᐊᐧᐠ ᐃᒪ ᑲᑕᓇᓄᑲᑕᐠ ᐱᑲᐧᑕᑲᒥᑯ ᓇᑕᐃᐧᐦᐃᐁᐧᐃᐧᐣ.
“ᐣᑕᔭᒥᐣ ᐃᑯ ᐅᐁᐧ ᐃᐧᒋᐦᐃᐁᐧᐃᐧᐣ ᑭᐡᐱᐣ ᑭᔭᐱᐨ ᐊᐊᐧᔑᒣ ᐃᐧᒋᐦᐃᑯᐃᐧᐣ ᓇᑕᐁᐧᐣᑕᒧᐊᐧᐨ ᐊᐃᐧᔭᐠ ᑐᑲᐣ ᐃᐧᐊᔭᒥᐦᐊᐊᐧᐨ ᐊᐃᐧᔭᐣ,” ᐃᑭᑐ ᒐᐧᐣᓴᐣ. “ᓇᐣᑕ ᒥᓇᐊᐧ ᑭᐡᐱᐣ ᐃᐧᐱᐣᒋᐊᐧᐨ ᒪᑐᑐᓴᐧᓂᐠ, ᒥᐦᐅᐁᐧ ᐁᐃᔑᑲᐧᔭᐣᒋᑕᒪᐊᐧᑭᑕᐧ.”
ᐊᓇᐃᐧᐣ 15-20 ᐊᐃᐧᔭᐠ ᐃᔕᐊᐧᐠ ᐃᐁᐧ ᐯᔑᑲᐧ ᑲᐱᒥᐅᓇᑌᐠ ᐱᑲᐧᑕᑲᒥᑯ ᓇᑕᐃᐧᐦᐃᐁᐧᐃᐧᐣ, ᐯᔑᑯᐱᒥᑯᓇᑲ ᐅᐱᒪᓄᑕᑲᐣ ᐯᔑᑲᐧ ᐯᔑᑯᐱᓯᑦ ᒣᑲᐧᐨ ᑲᓂᐱᓂᐠ, ᒐᐧᐣᓴᐣ ᑭᐃᑭᑐ ᐃᑭᐁᐧᓂᐊᐧᐠ ᐃᑯ ᑲᓂᑕᐱᔕᐊᐧᐨ ᐸᑲᐣ ᑫᑯᐣ ᑲᐅᐣᒋᐱᔕᐊᐧᐨ ᐊᐱᐨ ᐃᐧᐣ ᒪᐡᑭᑭᑫᐃᐧᐣ ᑲᑲᑫᐧ ᐳᓂᑐᐊᐧᐨ.
“ᐊᐱ ᒪᐊᐧᐨ ᓂᐢᑕᑦ ᑲᑭᔭᓂ ᐸᐱᔕᐊᐧᐸᐣ ᑲᑎᐯᓂᒥᑯᐊᐧᐨ ᒪᐡᑭᑭᐣ ᐅᐠᓯᑯᑎᐣ, ᒥᐊᐱ ᑲᑭᐸᑲᓇᑐᔭᐣᐠ ᓂᐃᐧᒋᐦᐃᐁᐧᐃᐧᓂᓇᐣ ᐁᑲᐧ ᑕᓱᑭᔑᑲ ᐣᑭᔭᓂ ᐸᑭᑎᓇᒥᐣ ᒪᑐᑐᓴᐧᐣ,”ᐃᑭᑐ ᒐᐧᐣᓴᐣ.
ᒐᐧᐣᓴᐣ ᑭᐃᑭᑐ ᐃᓂᐁᐧᓂᐊᐧᐣ ᑲᐱᒥᐃᐧᒋᐦᐊᐨ ᐸᐸᑲᐣ ᐊᓂᓀᐣᑕᒧᐊᐧᐠ ᐊᐱ ᑲᐃᐡᑲᐧ ᑭᔑᑐᐊᐧᐨ ᐅᓇᑕᐃᐧᐦᐅᐃᐧᓂᐊᐧ ᐅᒪ ᐱᑲᐧᑕᑲᒥᑯ ᓇᑕᐃᐧᐦᐃᐁᐧᐃᐧᓂᐠ.
“ᒥᔑᓇᐧᔦᐠ ᐸᐸᑲᐣ ᑫᑯᓇᐣ ᐅᑕᓄᐣᒋ ᑲᑭᑫᐣᑕᓇᐊᐧ ᑫᐃᔑᑲᓇᐊᐧᐸᐣᑕᒧᐊᐧᐨ ᐱᒪᑎᓯᐃᐧᓂᐠ ᐃᓀᑫ,” ᑭᐃᑭᑐ ᒐᐧᐣᓴᐣ. “ᒥᔑᐣ ᐅᒪ ᑲᑭᐃᐧᒋᐦᐃᑕᐧ ᓂᐱᐃᐧᐣᑕᒪᑯᒥᐣ ᐁᑭᐃᐧᒋᐦᐃᑯᐊᐧᐨ.”
ᒐᐧᐣᓴᐣ ᑭᐃᑭᑐ ᐅᒪ ᐱᑲᐧᑕᑲᒥᑯ ᓇᑕᐃᐧᐦᐃᐁᐧᐃᐧᓂᐠ ᐸᑭᑎᓂᑲᑌᐊᐧᐣ ᐊᓂᔑᓂᓂᐃᐧ ᑭᑭᓄᐦᐊᒪᑫᐃᐧᓇᐣ ᒥᓇ ᐱᑯ ᑯᑕᑭᔭᐣ ᓇᑕᐃᐧᐦᐅᐃᐧ ᐃᔑᒋᑫᐃᐧᓇᐣ ᐯᑭᐡ ᑲᔦ ᒪᑐᑐᓴᐧᓂᐠ.
“ᐊᑎᐟ ᐊᐃᐧᔭᐠ ᒥᓂᑎᑯᐠ ᐃᔕᐊᐧᐠ ᐁᓇᑕᐃᐧ ᓂᔑᑫᔭᐊᐧᐨ,” ᐃᑭᑐ ᒐᐧᐣᓴᐣ. “ᒧᔑᐦᐅᐃᐧᓇᐣ ᑕᑲᐧᓄᐣ, ᐁᑲᐧ ᑕᐡ ᐃᐧᐣᑕᒪᐊᐧᑲᓄᐊᐧᐠ ᑫᐃᔑ ᐱᒥᔭᓄᑲᓂᑎᓱᐊᐧᐨ. ᐣᑕᔭᐊᐧᒥᐣ ᑲᔦ ᑫᐅᒋ ᒪᒥᓄᒥᑕᐧ ᒥᓇ ᐱᑯ ᑯᑕᑭᔭᐣ ᐸᐸᑲᐣ ᓇᓇᑲᐤ ᐃᐧᒋᐦᐃᐁᐧᐃᐧᓇᐣ, ᑐᑲᐣ ᐁᐱᒥᓯᑐᓇᑲᓄᐨ ᑭᐡᐱᐣ ᑲᓇᑕᐁᐧᐣᑕᐠ ᒋᐱᒥ ᐧᐃᑕᐱᒥᑯᐨ ᐊᐃᐧᔭᐣ.”
ᒐᐧᐣᓴᐣ ᒥᓇ ᑭᐃᑭᑐ ᐅᒪ ᑲᐱᔕᐊᐧᐨ ᐃᐧᒋᐦᐃᐁᐧᐃᐧᓂᐠ ᐃᐧᓇᐊᐧ ᐱᑯ ᐅᑐᓀᐣᑕᓇᐊᐧ ᑫᔭᓂᔑ ᐱᒥᑭᑫᐊᐧᐨ ᐁᑲᐧ ᒥᓇ ᒥᔑᐣ ᐃᐧᒋᑕᐧᐊᐧᐠ ᑲᑭᔑᑌᐳᓇᓂᐊᐧᐠ ᑭᔐᐸᓀᑫᐧᐃᐧᐣ, ᐊᐱᑕᑭᔑᑲᓀᑫᐧᐃᐧᐣ ᒥᓇ ᐅᓇᑯᔑᓀᑫᐧᐃᐧᐣ.
“ᐁᑲᐧ ᒥᓇ ᑯᑕᑭᔭᐠ ᐊᔭᐊᐧᐠ ᑲᐯᐦᐃ ᑲᔭᓄᑭᐊᐧᐨ ᐁᒪᓂᓭᐊᐧᐨ ᒋᐳᑕᐊᐧᑌᐠ ᒪᑐᑐᓴᐧᐣ, ᐊᓯᓂᐠ ᑲᓇᓇᓯᑲᐃᐧᐣᑕᐧ ᒥᓇ ᐁᑲᓯᓂᑫᐊᐧᐨ ᐃᒪ ᑌᑎᐸᐦᐃ,” ᐃᑭᑐ ᒐᐧᐣᓴᐣ. “ᑲᑭᓇ ᐱᑯ ᐊᐃᐧᔭ ᐃᐧᒋᐦᐃᐁᐧ.”
ᐁᑲᐧ ᐅᐁᐧ ᑫᐅᐡᑭᓭᐠ ᐱᑲᐧᑕᑲᒥᑯᐃᐧ ᓇᑕᐃᐧᐦᐃᐁᐧᐃᐧᐣ ᓄᑯᑦ ᒪᑯᐱᓯᑦ 27 ᐃᓇᑭᓱᐨ.
ᐊᓇᐃᐧᐣ ᑭᐃᑭᑐ ᒐᐧᐣᓴᐣ ᐅᐁᐧᓂ ᑲᐱᒧᑐᐨ ᐅᐃᐧᒋᐦᐃᐁᐧᐃᐧᐣ ᐁᐃᐧᒋᐦᐃᐁᐧᒪᑲᓂᐠ ᑐᑲᐣ ᐃᑯ ᑯᑕᑭᔭᐣ ᑲᐃᔑ ᐃᐧᒋᐦᐃᐁᐧᒪᑲᑭᐣ ᑲᐃᐧᒋᐦᐃᑕᐧ ᑲᑲᑫᐧᐳᓂᑐᐊᐧᐨ ᑲᐊᐧᓂᔭᐸᒋᑐᐊᐧᐨ ᒪᐡᑭᑭᐣ, ᔕᑯᐨ ᐅᑭᑫᐣᑕᐣ ᐊᑎᐟ ᑲᑭᐱᐃᐧᒋᐦᐊᐨ ᒥᓇᐊᐧ ᐊᐱᐣ ᐁᑭᔭᓂ ᑭᐁᐧᒪᐡᑭᑭᐊᐧᐨ ᐣᑯᑕᐧᓱᐱᓯᑦ ᑲᑭᐃᐡᑲᐧ ᐃᔕᐊᐧᐸᐣ ᒐᐧᐣᓴᐣ ᐅᐃᐧᒋᐦᐃᐁᐧᐃᐧᓂᐠ.
“ᐊᓂᐡ ᐁᑲ ᑫᑯᐣ ᐁᑕᑲᐧᓂᐠ ᑫᑭᐅᒋ ᐱᒥᐃᐧᒋᐦᐃᑕᐧ ᐅᑕᔑᑫᐃᐧᓂᐠ,” ᑭᐃᑭᑐ ᒐᐧᐣᓴᐣ.
ᒐᐧᐣᓴᐣ ᑕᐡ ᐅᒪᒥᑐᓀᐣᑕᐣ ᐁᐃᐧᐅᓇᑐᐣ ᒪᑐᑐᓴᐧᓂ ᐃᒪ ᐊᐧᓂᓇᐊᐧᑲᐠ ᒋᐅᒋ ᐱᒥᐃᐧᒋᐦᐃᑕᐧ ᑲᐯᐱᐳᐣ ᐅᑯᐁᐧᓂᐊᐧᐠ ᑲᑭᐃᐡᑲᐧ ᐃᐧᒋᐦᐃᑕᐧ.
“ᑭᐡᐱᐣ ᐊᓄᑲᓇᑕᐧ ᐅᐁᐧ ᑐᑲᐣ ᑲᐃᔑᔭᓂᒥᓭᐊᐧᐨ, ᐃᓯᓭᐸᐣ ᒋᐸᑭᑎᓂᑎᓱᔭᐣ ᑕᓱᑭᔑᑲ ᒋᐱᒥᐃᐧᑐᔭᐣ ᒪᑐᑐᓴᐧᐣ ᑕᓱᑭᔑᑲ,” ᑭᐃᑭᑐ ᒐᐧᐣᓴᐣ. “ᒥᐢᑕᐦᐃ ᓇᑕᐁᐧᐣᑕᑲᐧᐣ ᐊᓄᑭᐃᐧ ᐃᐧᒋᐦᐃᐁᐧᐃᐧᐣ ᒥᓇ ᒥᔑᓄ ᑎᐸᐦᐃᑲᐣ ᒥᓇ ᑭᒋᐊᓄᑭᐃᐧᓂᐊᐧᐣ, ᐁᑲᐧ ᑕᐡ ᐃᐧᐣ ᐁᐧᑎ ᓂᓇᐃᐧᐟ ᐱᑲᐧᑕᑲᒥᑯᐠ ᐅᐁᐧ ᑲᑕᔑᐃᔑᒋᑫᔭᐣᐠ, ᒥᔑᐣ ᐣᑕᔭᐊᐧᒥᐣ ᑲᐃᐧᒋᐦᐃᑯᔭᐣᐠ.”
ᒐᐧᐣᓴᐣ ᐅᒥᓴᐁᐧᐣᑕᐣ ᒋᔭᓂᑕᑲᐧᓂᐠ ᐃᐧᒋᐦᐃᐁᐧᐃᐧᑲᒥᑯᓂ ᐅᒪ ᐊᐧᓂᓇᐊᐧᑲᐠ ᒋᐃᔑᑲᐯᔑᐦᐃᐣᑕᐧ ᒥᓇ ᒋᑕᔑ ᓇᑕᐃᐧᐦᐃᐣᑕᐧ ᐊᐃᐧᔭᐠ ᐃᒪ ᐃᓀᑫ ᐊᓂᔑᓂᓂᐃᐧ ᓇᑕᐃᐧᐦᐃᐁᐧᐃᐧᓂᐠ.