ᐅᒪᐡᑭᑯᒧᐃᐧ ᒪᓯᓇᐦᐃᑲᐣ ᑭᐅᔑᒋᑲᑌ

ᒣᑲᐧᐨ ᒥᑭᓯᐃᐧᐱᓯᑦ 31 ᐁᐧᑎ ᒧᐢ ᐸᐠᑐᕑᐃ ᑭᐸᑭᑎᓂᑲᑌ ᐁᑭᑭᔑᒋᑲᑌ ᑲᑭᐅᔑᑐᐊᐧᐨ ᐅᒪᐡᑭᑯ ᒪᓯᓇᐦᐃᑲᐣ ᑲᒪᓯᓇᐦᐃᑲᑌᑭᐣ ᐃᑭᑐᐃᐧᓇᐣ.
ᐅᐁᐧ ᒪᓯᓇᐦᐃᑲᐣ ᑲᑭᐅᔑᑐᐨ ᒉᕑᐊᑎᐣ ᑯᐯᐣᑐᕑ, ᐁᑲᑫᐧᑭᐁᐧ ᑭᑫᐣᑕᐠ ᐅᑎᔑᑭᔐᐧᐃᐧᐣ ᑲᑭᐱᐊᐸᒋᑐᐸᐣ ᒣᑲᐧᐨ ᐁᐱᐊᐊᐧᔑᔑᐃᐧᐸᐣ.
“ᓂᑭ ᑭᑭᓄᐦᐊᒪᑯ ᐸᐸᑲᐣ ᐃᔑᑭᔐᐧᐃᐧᓇᐣ ᒣᑲᐧᐨ ᐦᐊᔾ ᐢᑯᓫ ᑲᐱᒥ ᑭᑭᓄᐦᐊᒪᑯᔭᐸᐣ ᒥᓇ ᑭᒋ ᐃᐡᑯᓄᐃᐧᓂᐠ ᒥᑕᐡ ᐃᒪ ᑲᑭᔭᓄᒋ ᑭᒋᓀᑕᒪᐣ ᓇᐱᐨ ᒪᐡᑭᑯᒧᐃᐧᐣ ᐁᒥᓄᑕᑲᐧᐠ ᒥᓇ ᐁᒪᐡᑲᐃᐧᑭᔐᐧᐃᐧᓂᐊᐧᐠ,” ᑭᐃᑭᑐ. “ᐊᑎᑲ ᐃᐁᐧ ᐯᔑᐠ ᐃᑭᑐᐃᐧᐣ, ᒥᐱᑯ ᐃᐁᐧ ᒥᓯᐁᐧ ᑫᑯᐣ ᐁᐅᒋᐊᓂᒧᑕᒪᐣ ᐃᐁᐧ ᐃᐧᐣ ᑲᐃᓯᓭᐠ ᐁᐧᒥᑎᑯᔑᒧᐃᐧᐣ ᒥᔑᐣ ᐃᑭᑐᐃᐧᓇᐣ ᐊᐸᒋᒋᑲᑌᐊᐧᐣ.”
ᐧᒐᓯᓫᐃᐣ ᒋᒍ ᑭᐃᓇᓯᓇᐦᐃᑫ ᐅᐁᐧ ᒪᓯᓇᐦᐃᑲᓂ ᐁᐅᒋ ᐃᐧᒋᐦᐃᑯᐨ ᒥᓇ ᐱᑯ ᑯᑕᑭᔭᐠ ᑲᐅᐡᑲᑎᓯᐊᐧᐨ ᐁᐅᒋ ᒋᑭᐡᑲᑯᐊᐧᐨ ᒋᑲᑫᐧ ᑭᑫᑕᒧᐊᐧᐨ ᐃᔑᑭᔐᐧᐃᐧᓂ ᑐᑲᐣ ᐅᑯᒪᐣ ᒐᓂᐢᑫᐧ ᑲᑭᐱᐊᐸᒋᑐᓂᐨ.
“ᓂᑲᓄᑫᐊᐧᐣ ᒪᐊᐧᐨ ᐁᑭᒥᓄᑕᐊᐧᑭᐸᐣ ᐁᑕᑎᐸᒋᒧᐨ ᐁᑲᐧ ᒥᓇ ᐁᐸᐸᑲᓂᐁᐧᐨ ᑲᔭᓂᐊᐃᑭᑐᐨ ᐃᐁᐧᓂ ᑲᔦ ᑲᐊᐧᐃᐧᔭᓴᒋᒧᐨ, ᒥᓇ ᑲᒐᒋᑲᒋᒧᐨ,” ᒋᒍ ᐅᑭᐃᓇᒋᒪᐣ ᒐᓂᐢᑭᐊᐧᐣ. “ᓄᑯᒥᑫ ᐣᑐᓯᓴᐠ ᐅᑭᐱᐸᐱᑌᐁᐧᔑᒪᐊᐧᐣ ᑲᑕᑎᐸᒋᒧᓂᐨ, ᐁᑲᐧ ᑕᐡ ᐅᐁᐧ ᒪᓯᓇᐦᐃᑲᐣ ᑲᑭᐅᔑᒋᑲᑌᐠ ᓂᑲᐅᒋ ᓄᑕᓇᐣ ᒥᓇ ᓇᐊᐧᐨ ᓂᑲᐅᒋ ᐸᔭᑌ ᓂᓯᑐᑕᓇᐣ.”