ᕑᐃᐠ ᑫᕑᐃᐠ ᐊᐧᐊᐧᑌ ᐊᒋᒧᐃᐧᐣ

ᓂᐃᐧᔕᑊ ᐁᐧᐱᑫᐧ ᐅᑎᐢᑯᓂᐠ ᐅᑭᑌᐱᓇᓇᐊᐧ ᐱᐊᐧᐱᑯᑫᐃᐧᐣ ᐃᐡᑯᓄᐃᐧᑭᑭᓄᐊᒪᑫᐃᐧᐣ

Create: 12/01/2015 - 19:24

ᐊᐣᒋᓫᐃᐣ ᔑᐁᐧᐱᐠ ᐁᐧᐱᑫᐧ ᑕᔑᑫᐃᐧᓂᐠ ᑲᐅᒋᐨ ᒪᐊᐧᐨ ᐅᒥᓀᐣᑕᐣ ᐊᐦᐃᐠ ᐱᐊᐧᐱᑯᑫᐃᐧᓂᐠ ᐁᐃᐧᐦᐃᔑᒪᑕᓄᑭᐨ ᐊᐱ ᑭᔑᐡᑯᓄᐨ ᐁᑲᐧ ᒥᓇ ᒪᐊᐧᐨ ᐁᑭᓇᐦᐃᐨ ᑲᑭᑭᓄᐊᒪᐊᐧᑲᓄᐃᐧᐨ ᐃᐃᒪ ᐅᐡᑭ ᐱᒪᒋᐅᐁᐧᐣ ᐱᐊᐧᐱᑯᑫᐃᐧᐣ ᑭᑭᓄᐊᒪᑫᐃᐧᐣ ᑲᑭᐸᑭᑎᓂᑲᑌᐠ᙮
“ᒪᐊᐧᐨ ᒥᐡᑕᐦᐃ ᓂᑭᐦᐃᑭᐟ ᑲᑭᐃᐡᑯᓄᔭᐣ ᒥᐡᑯᐨ ᑲᐧᔭᐠ ᒋᑕᔑᑭᑫᐣᑕᓯᔭᐣ,” ᐃᑭᑐ ᔑᐁᐧᐱᐠ ᐁᑲᐧ ᒥᓇ ᒪᒪᑕᐃᐧᐱᐊᐧᐱᑯᐢ ᑭᒥᓇᑲᓄ ᐃᐃᐁᐧ ᒣᑲᐧᐨ ᑲᑭᑭᓇᐧᒋᐊᑲᓄᐊᐧᐨ ᑲᑭᑭᔑᐡᑯᓄᐊᐧᐨ ᐃᐃᒪ ᐁᐧᐱᑫᐧ ᑕᔑᑫᐃᐧᓂᐠ ᓂᔑᐣ ᒪᑯᐱᓯᑦ ᑲᐃᓇᑭᓯᐨ᙮ “ᔕᑯᐨ ᐱᓂᒪᑲᔭ ᓂᐃᐧᑭᔑᐡᑯᓄ ᐁᑲᐧ ᐊᐱᐣ ᐱᐊᐧᐱᑯᑫᐊᓄᑭᐃᐧᓂᐠ ᑫᐃᔑᓇᓇᑕᐊᐧᓄᑭᔭᐣ᙮ ᐊᒥᒪ ᑲᐃᐧᑕᓇᓄᑭᔭᐣ — ᐁᐅᒋ ᐱᔑᓇᑲᐧᐠ ᑲᔭ ᓂᑕᔑᑫᐃᐧᓂᐠ᙮”
ᔑᐁᐧᐱᐠ ᐃᐧᐣ ᐁᑕ ᑭᐯᔑᑯ ᐃᑫᐧᐃᐧ ᐅᐅᐁᐧ ᓂᔓᔕᑊ ᐱᒥᑯᓇᑲ ᑲᑭᐃᐡᑯᓄᐊᐧᐨ ᐁᑲᐧ ᒥᓇ ᑯᑕᑭᔭᐣ ᐃᑫᐧᐊᐧᐣ ᐅᐸᑯᓭᓂᒪᐣ ᑫᐃᐧᓇᐊᐧ
ᐱᐊᐧᐱᑯᑫᐃᐧᓂᐠ ᒋᑭᐊᓂᐦ ᑕᓇᓄᑭᐊᐧᐸᐣ᙮

ᑭᒋᔭᐦᐊ ᑲᒪᒋᑐᑕᐊᐧᑲᓄᐃᐧᐨ ᒪᓯᓇᑌᓯᒋᑲᐣ ᑭᐸᑭᑎᓂᑲᑌ ᐃᐃᒪ ᐃᐧᑫᐧᑐᐣᐠ

Create: 12/01/2015 - 19:24

ᐃᔭᐱᒪᑐᐠ ᑲᐅᒋᐨ ᒪᓂ ᒐᑲᐱ ᐅᑭᐃᐧᑕᐣ ᐊᔕ ᒋᑭᑭᐱᑎᓂᑲᑌᑭᐸᐣ ᑭᒋᔭᐦᐊ ᑲᒪᒋᑐᑕᐊᐧᑲᓄᐃᐧᐨ ᐁᐦᐊᐠ ᐃᐧᑫᐧᑐᐣᐠ ᔑᒪᑲᓂᔑᐃᐧ ᐱᒧᒋᑫᐃᐧᐣ ᑲᑭᐸᑭᑎᓇᒧᐊᐧᐨ ᐅᐅᐁᐧᓂ ᑭᒋᔭᐦᐊ ᑲᒪᒋᑐᑕᐊᐧᑲᓄᐃᐧᐨ ᒪᓯᓇᑌᓯᒋᑲᐣ᙮
“ᑭᐡᐱᐣ ᐁᐊᐧᐸᑫᔭᐣ ᑫᑯᐣ ᐁᐃᓇᑲᒥᑲᐠ ᓇᐣᑕ ᐃᑭᑐᐣ,” ᐃᑭᑐ ᒐᑲᐱ ᐅᐅᐁᐧᓂ ᑲᑭᐃᓂᐁᐧᑐᐨ ᒪᓯᓇᑌᓯᒋᑲᓂ᙮ “ᑲᐧᓂᐣ ᔕᑫᐧᓂᒧᐣ᙮”
ᒐᑲᐱ ᐁᑲᐧ ᐃᐧᑫᐧᑐᐣᐠ ᔑᒪᑲᓂᐡ ᑕᔭᐣ ᒪᐠᓫᐊᓫᐃᐣ ᐅᑭᐸᑭᑎᓇᓇᐊᐧ ᐅᐅᐁᐧ ᒪᓯᓇᑌᓯᒋᑲᐣ ᒥᑲᐧᐨ ᓂᐃᐧᔕᐨ ᓂᑭᐱᓯᑦ ᑲᐃᓇᑭᔑᐨ ᐁᐃᐧᐃᐧᑕᒧᐊᐧᐨ ᐁᑕᑲᐧᐠ ᐅᐅᐃᐧ ᐃᔑᒋᑫᐃᐧᐣ ᒥᓇ ᐱᑯ ᒍᒋᑭᑫᐣᑕᒧᐊᐧᐨ ᐊᓂᔑᓇᐯᐠ᙮
“ᑭᐡᐱᐣ ᐁᑕ ᔑᒪᑲᓂᐡ ᐅᐅᐁᐧᓂ ᑲᓄᑕᐠ ᑲᐧᓂᐣ ᐊᑯ ᒥᔑᐣ ᐊᐃᐧᔭᐠ ᒋᐃᐧᓇᑐᑕᒧᐊᐧᐨ,” ᒐᑲᐱ ᐃᑭᑐ᙮ “ᐁᑲᐧᐃᐧᐣ ᑭᐡᐱᐣ ᐊᓂᔑᓇᐯ ᓇᐣᑕ ᑲᔭ ᑯᑕᐠ ᐊᐃᐧᔭ ᐅᐅᐁᐧᓂ ᐊᓂᒧᑕᐠ ᑫᒋᓇᐨ ᐸᑲᐣ ᐊᐃᐧᔭᐣ ᐅᑲᓇᑐᑕᑯᐊᐧᐣ,”

ᓀᐢᑲᑕᐣᑲ ᐅᐃᐧᒋᐦᐃᑯᓂᐊᐧ ᐅᒋᐃᐧᒋᐦᐃᐁᐧᓭᓂ

Create: 12/01/2015 - 19:24

ᓀᐢᑲᐣᑕᑲ ᑕᔑᑫᐃᐧᐣ ᐅᑭᒪᑲᐣ ᐱᑕᐣ ᒧᓂᔭᐢ ᐃᑭᑐ ᐅᑕᔑᑫᐃᐧᐣ ᑭᒋᐃᐧᒋᐦᐃᐁᐧᐃᐧᐣ ᑲᑭᓇᑐᑕᒪᐊᐧᐨ ᒪᐊᐧᐨ ᐅᑐᒋᑭᒋᐃᐧᒋᐦᐃᑯᓇᐊᐧ ᐃᑫᐧᓂᐊᐧᐠ ᐅᑕ ᑲᔭ ᐅᐃᐧᒋᐦᐃᐁᐧᐠ ᑲᑭᐱᑭᐃᐧᑌᐊᐧᐨ ᐁᑲᐧ ᒥᓇ ᐅᑐᒋᐃᐧᒋᐦᐃᑯᓇᐊᐧ ᐅᐅᐁᐧ ᑲᐊᓂ ᒪᒋᓇᓇᑕᐁᐧᐣᒋᑲᓂᐊᐧᐠ᙮
“ᒪᐊᐧᐨ ᐱᑯ ᒥᐡᑕᐦᐃ ᐅᒋᓴᑲᑫᐣᑕᑲᐧᐣ ᓂᑕᔑᑫᐃᐧᓇᐣ,” ᒧᓂᔭᐢ ᐃᑭᑐ ᐅᑫᐧᓂᐊᐧᐣ ᐅᑕ ᐅᐃᐧᒋᐦᐃᐁᐧᐣ ᑲᒪᒥᐡᑯᒋᐱᑭᐃᐧᑌᓂᐨ ᐁᐡᑲᑦ ᑲᔭ ᓂᑯᑕᐧᓱ ᐅᑕᓄᑭᐣ ᑲᐱᐃᐧᒋᐦᐃᑯᐊᐧᐨ᙮ “ᓇᐣᑕ ᐱᑯ ᓴᑲᓱ ᐊᐃᐧᔭᐠ ᐃᐧᒋᐦᐃᐁᐧᐊᐧᐠ ᐁᑲᐧ ᒥᓇ ᐁᒪᒥᐡᑯᒋᐡᑲᐊᐧᐨ᙮”

ᓂᐦᓯᐣ ᑭᐅᒋᐃᐡᑲᐧᐱᒪᑎᓯᐊᐧᐠ ᑲᑭᓴᑭᑌᐠ ᐊᐧᑲᐦᐃᑲᐣ ᐃᐃᒪ ᐊᐧᓂᒪᐣ

Create: 12/01/2015 - 19:24

ᑲᐃᐧᒋᐦᐃᐁᐧᐊᐧᐨ ᑲᐊᓂᒥᓭᓂᐠ ᑭᐃᔕᐊᐧᐠ ᐃᐃᒪ ᐊᐧᓂᒪᐣ ᑕᔑᑫᐃᐧᓂᐠ ᐁᑭᑕᐃᐧ ᐃᐧᒋᑕᐧᐊᐧᐨ ᐊᐱᐣ ᑲᓄᒋᑲᑌᐠ ᓂᔑᐣ ᐃᑫᐧᓭᓴᐠ ᒥᓇ ᐅᐡᑭᓂᑭᑫᐧ ᑲᑭᐃᐡᑲᐧᐱᒪᑎᓯᐊᐧᐨ ᐃᐃᒪ ᑲᑭᐃᔑᓴᑭᑌᐠ ᐊᐧᑲᐦᐃᑲᐣ ᐃᐃᐁᐧ ᒣᑲᐧᐨ ᒪᑯᐱᓯᑦ ᐁᐃᓇᓀᐤ ᑲᐃᓇᑭᓯᐨ᙮
“ᓂᔑᑕᓇ ᐯᔑᑯᔕᑊ ᐁᑕᓴᑭᐃᐧᓀᐨ ᐅᐡᑲᑎᓯᐃᐧᑫᐧ ᒥᓇ ᓂᑯᑕᐧᓱ ᐁᑕᓴᐧᑭᐃᐧᓀᐨ ᐃᑫᐧᓭᐢ ᒥᓇ ᑯᑕᐠ ᐁᐯᔑᑯᔭᑭᐃᐧᓀᐨ ᐃᑫᐧᓭᐢ ᐅᑭᐊᐧᓂᑐᓇᐊᐧ ᐅᐱᒪᑎᓱᐃᐧᓂᐊᐧ ᐃᐃᒪ ᑲᑭᐃᔑᓴᑭᑌᐠ ᐊᐧᑲᐦᐃᑲᐣ” ᐃᑭᑐ ᐊᐧᓇᒪᐣ ᐅᑭᒪᑲᐣ ᕑᐊᐟ ᐃᐧᐣᓂᐱᑕᐧᐣᑲ᙮ “ᐅᐅᐁᐧ ᑕᔑᑫᐃᐧᐣ ᒥᓇ ᐱᑯ ᐅᓂᑲᓂᑕᒪᑫᐠ ᒪᐊᐧᐨ ᐅᑭᒋᐱᑫᐧᐣᑕᓇᐊᐧ ᒥᓇ ᐅᑭᑭᒥᐡᑲᑯᓇᐊᐧ ᐅᐅᐁᐧ ᐊᐱᐣ ᑲᑭᐅᒋᐊᐧᓂᔭᐊᐧᐨ ᐅᑐᐡᑲᑎᓯᒥᐊᐧᐣ᙮”

ᐊᓴᐸᐱᐡᑯᓯᐊᐧᑲᐣᐠ ᐃᑫᐧ ᑭᒥᓇᑲᓄᐃᐧ ᑭᑭᓇᐊᐧᒋᐦᐃᐁᐧᐃᐧᐣ ᐅᑕᓄᑭᑕᒪᑫᐃᐧᓂᐠ ᐅᒋ

Create: 12/01/2015 - 19:23

ᐊᓴᐸᐱᐡᑯᓯᐊᐧᑲᐣᐠ ᑲᐅᒋᐨ ᒍᑎ ᑕ ᓭᓫᐸ ᑭᑭᐦᑭᓇᐊᐧᒋᐦᐃᐊᑲᓄᐃᐧ ᐊᐦᐃ ᐁᑭᒥᓇᑯᓄᐃᐧᐨ ᒉᕑᒪᐣ ᐅᐃᐧᒋᐦᐃᐁᐧᐃᐧ ᑭᑭᓇᐊᐧᒋᐦᐃᐁᐧᐃᐧᐣ ᐊᐦᐃ ᐅᑕ ᒪᐊᐧᐨ ᒥᐡᑕᐦᐃ ᑲᐊᐧᐃᐧᒋᑕᐧᐨ ᐃᐃᒪ ᐅᑕᔑᑫᐃᐧᓂᐠ ᑲᑭᐅᒋᒥᓇᑲᓇᐃᐧᐨ᙮
“ᒪᒪᑲᑌᓂᑕᑲᐧᐣ ᐅᐅᐁᐧ ᓂᑭᑭᓇᐊᐧᒋᐦᐃᑯᐃᐧᐣ ᐊᐦᐃᐠ ᐊᑲᒪᑭᐠ ᒉᕑᒪᓂ ᑲᐃᒋᑲᑌᐠ ᑲᑭᐅᒋᒥᓂᑯᔭᐣ,” ᑕ ᓭᓫᐸ ᑭᐃᑭᑐ ᐃᐃᐁᐧ ᒣᑲᐧᐨ ᓴᑭᐸᑲᐃᐧᐱᓯᑦ ᓂᑯᑕᐧᓱ ᑲᑭᐃᓇᑭᓯᓂᐨ ᐊᐦᐃ ᑲᔭ ᐃᐃᐁᐧ ᒣᑲᐧᐨ ᓂᔑᑕᓇ ᓂᔓᔕᑊ ᑲᑭᑕᐃᐧᐃᐡᑲᐧᑭᐃᐧᑌᐨ ᐃᐃᒪ ᒉᕑᒪᓂ ᐊᑭᑲᐠ᙮ “ᐁᑲᐧ ᐅᐅᐁᐧ ᑲᑕᓯᐊᐧᐨ ᐊᐧᐃᐧᔭᐠ ᑲᐧᓂᐣ ᐃᐧᑲ ᓂᑐᒋᓀᐣᑕᓯᐣ ᐅᐅᐁᐧ ᒋᒥᓂᑯᔭᐣ᙮”

ᐅᑎᐢᑯᓄᐃᐁᐧ ᐃᐃᒪ ᑌᓂᐢ ᐱᕑᐊᐣᑭᓫᐊᐣ ᑲᐧᕑᐊᒥᑎ ᐃᐡᑯᓂᐃᐧᑲᒥᑯᐠ ᐊᔕ ᐃᐧᐊᓄᒪᒋᑭᑭᓄᐦᐊᒪᑫ ᐅᐅᐁᐧ ᑲᐃᐧᐊᓂ ᒪᒋᐡᑯᓄᓇᓂᐊᐧᐠ

Create: 12/01/2015 - 19:23

ᐁᑲᐧ ᑌᓂᐢ ᐱᕑᐊᐣᑭᓫᐊᐣ ᑲᐧᕑᐊᒥᑎ ᐊᓂᔑᓇᐯᐃᐧ ᐊᐃᐢᑯᓫ ᐃᐡᑯᓄᐃᐧᑲᒥᐠ ᐊᔕ ᒥᓇ ᑕᓂᒪᒋᐃᐡᑯᓄᓇᓂᐊᐧᐣ ᐁᑲᐧ ᐅᑎᐢᑯᓂᐠ ᐊᐦᐃᐠ ᐸᑯᔭᐣᑎ ᑕᐅᒋᑕᐸᓯᐊᐧᐠ ᐁᐦᐊᐣ ᑭᒋᐅᑌᓇᐃᐧ ᐸᐢ ᑲᐸᐸᒥᐱᓯᓂᐨ ᒋᐊᐸᒋᐦᐊᐊᐧᐨ᙮ “ᐁᑲᐧ ᒪᐊᐧᐨ ᒥᓀᐣᑕᑲᐧᐣ ᒥᓇ ᐱᑯ ᐁᑲᑫᐧᒋᑲᓂᑎᓇᓂᐊᐧᐠ ᐁᑲᐧ ᒥᓇ ᒪᐊᐧᐨ ᐅᒧᓀᐣᑕᓇᐊᐧ ᐅᐅᐁᐧ ᑲᑐᑕᒧᐊᐧᐨ,” ᐃᑭᑐ ᐅᑎᐢᑯᓄᐦᐃᐁᐧ ᑫᑎ ᓴᔾ᙮ “ᒥᓇ ᐱᑯ ᐅᑭᑫᐣᑕᓇᐊᐧ ᐊᓂᐣ ᑫᑐᑕᒧᐊᐧᐨ ᐸᐸᒥᔭᐊᐧᐨ
ᑭᒋᑕᐃᐧᓂᐠ ᐁᑲᐧ ᑲᔭ ᒪᐊᐧᐨ ᐅᐅᐁᐧ ᑭᒋᓀᐣᑕᑲᐧᐣ᙮”

ᑭᑭᐱᐡᑭᑲᓂᐊᐧᐣ ᐃᐃᐁᐧ ᒣᑲᐧᐨ ᐊᓴᐸᐱᐡᑯᓯᐊᐧᑲᐣᐠᐅᐡᑲᑎᓴᐠ ᑲᑭᒪᐊᐧᑐᐡᑲᐊᐧᐨ

Create: 12/01/2015 - 19:23

ᐁᑲᐧ ᐃᐃᐁᐧ ᒣᑲᐧᐨ ᐅᐸᐅᐃᐧᐱᓯᑦ 22 ᑲᐃᓇᑭᓯᐨ ᑭᑭᐱᐡᑭᑲᓂᐊᐧᐣ ᒥᑲᓇᐠ ᐊᐦᐃ ᐅᑕ ᑲᑭᐅᒋᑐᒋᑲᑌᐠ ᑲᐧᔭᐠ ᒋᑲᓇᐁᐧᐣᒋᑲᑌᑭᐣ ᑲᑭᒋᓀᐣᑕᑲᐧᑭᐣ ᐃᐃᒪ ᐊᐦᑭᑲᐠ ᑲᐊᔭᒪᑲᑭᐣ ᐁᑲᐧ ᐃᐃᒪ ᑭᐢ ᓴᑲᐦᐃᑲᓂᐠ ᔕᐊᐧᓄᐣᐠ ᐊᓴᐸᐱᐡᑯᓯᐊᐧᑲᐣᐠ ᐃᔑᑕᑲᐧᐣ ᐊᒥᐅᐁᐧ ᑲᑭᑭᒋᑐᒋᑲᑌᐠ ᒣᑲᐧᐨ ᐊᓴᐸᐱᐡᑯᓯᐊᐧᑲᐣᐠ ᐅᐡᑲᑎᓯᐃᐧ ᒪᐊᐧᒋᐦᐃᑐᐃᐧᐣ ᑲᑭᑐᒋᑲᑌᐠ᙮

Subscribe to RSS - ᕑᐃᐠ ᑫᕑᐃᐠ ᐊᐧᐊᐧᑌ ᐊᒋᒧᐃᐧᐣ