ᐅᑎᐢᑯᓄᐃᐁᐧ ᐃᐃᒪ ᑌᓂᐢ ᐱᕑᐊᐣᑭᓫᐊᐣ ᑲᐧᕑᐊᒥᑎ ᐃᐡᑯᓂᐃᐧᑲᒥᑯᐠ ᐊᔕ ᐃᐧᐊᓄᒪᒋᑭᑭᓄᐦᐊᒪᑫ ᐅᐅᐁᐧ ᑲᐃᐧᐊᓂ ᒪᒋᐡᑯᓄᓇᓂᐊᐧᐠ

Create: 12/01/2015 - 19:23

ᐁᑲᐧ ᑌᓂᐢ ᐱᕑᐊᐣᑭᓫᐊᐣ ᑲᐧᕑᐊᒥᑎ ᐊᓂᔑᓇᐯᐃᐧ ᐊᐃᐢᑯᓫ ᐃᐡᑯᓄᐃᐧᑲᒥᐠ ᐊᔕ ᒥᓇ ᑕᓂᒪᒋᐃᐡᑯᓄᓇᓂᐊᐧᐣ ᐁᑲᐧ ᐅᑎᐢᑯᓂᐠ ᐊᐦᐃᐠ ᐸᑯᔭᐣᑎ ᑕᐅᒋᑕᐸᓯᐊᐧᐠ ᐁᐦᐊᐣ ᑭᒋᐅᑌᓇᐃᐧ ᐸᐢ ᑲᐸᐸᒥᐱᓯᓂᐨ ᒋᐊᐸᒋᐦᐊᐊᐧᐨ᙮ “ᐁᑲᐧ ᒪᐊᐧᐨ ᒥᓀᐣᑕᑲᐧᐣ ᒥᓇ ᐱᑯ ᐁᑲᑫᐧᒋᑲᓂᑎᓇᓂᐊᐧᐠ ᐁᑲᐧ ᒥᓇ ᒪᐊᐧᐨ ᐅᒧᓀᐣᑕᓇᐊᐧ ᐅᐅᐁᐧ ᑲᑐᑕᒧᐊᐧᐨ,” ᐃᑭᑐ ᐅᑎᐢᑯᓄᐦᐃᐁᐧ ᑫᑎ ᓴᔾ᙮ “ᒥᓇ ᐱᑯ ᐅᑭᑫᐣᑕᓇᐊᐧ ᐊᓂᐣ ᑫᑐᑕᒧᐊᐧᐨ ᐸᐸᒥᔭᐊᐧᐨ
ᑭᒋᑕᐃᐧᓂᐠ ᐁᑲᐧ ᑲᔭ ᒪᐊᐧᐨ ᐅᐅᐁᐧ ᑭᒋᓀᐣᑕᑲᐧᐣ᙮”
ᓴᔾ ᐊᔕ ᒥᓇ ᓄᑌᐃᐡᑯᓄᐃᐁᐧ ᐊᒥᐁᐧ ᓂᓴᐧᓱᔭᑭ ᒋᐊᓂᐡᑯᓄᐃᐁᐧᐨ ᐃᐃᒪ ᑌᓂᐢ ᐱᕑᐊᐣᑭᓫᐊᐣ ᑲᐧᕑᐊᒥᑎ ᐊᓂᔑᓇᐯᐃᐧ ᐊᐃᐢᑯᓫ ᐃᐡᑯᓄᐃᐧᑲᒥᐠ ᒥᓇ ᐱᑯ ᒪᐊᐧᐨ ᐅᒧᓀᐣᑕᐣ ᒋᐊᐧᐸᒪᐨ ᐅᑕᓇᐠ ᑲᐊᐦᑭᐊᐧᓂᓂᐠ ᐅᑎᐢᑯᓂᐣ ᑲᑭᐃᐡᑯᓄᓂᐨ ᐁᑲᐧ ᑲᔭ ᑲᐅᐡᑭᒪᒋᐡᑯᓄᐃᐧᓂᐨ᙮ ᐁᑲᐧ ᒥᓇ ᐊᐦᐃ ᒋᓂᑕ ᒪᓯᓇᐦᐃᑫᐊᐧᐨ ᒥᓇ ᒋᓂᑕ ᐊᔭᒥᒋᑫᐊᐧᐨ ᐅᑎᐢᑯᓂᐠ ᐃᐧᐣ ᐅᑲᓂᑲᓂᑲᓇᐊᐧᐸᑕᐣ ᒥᐡᑯᐨ ᑭᑲᐧᔭᒋᐦᐊᔭᐊᐧᐨ ᐅᑎᐢᑯᓂᐣ ᐊᐦᐃᓂ ᐅᐣᑌᕑᐃᔪ ᓭᑲᐧᐣᐟᑌᕑᐃ ᐃᐡᑯᓄᐃᐧ ᑲᑫᐧᒋᐦᐃᐁᐧᐃᐧᐣ ᒋᑐᑕᒧᐊᐧᐨ᙮
“ᒪᐊᐧᐨ ᓂᑲᑲᑫᐧᐃᑭᐟ ᒋᑲᑫᐧᒧᓀᐣᑕᑯᑐᔭᐣ ᑲᑭᑭᓄᐦᐊᒪᑫᔭᐣ ᐁᑲᐧ ᒥᓇ ᒋᓂᑕ ᐊᔭᒥᒋᑫᐊᐧᐨ ᒥᓇ ᒋᓂᑕ ᒪᓯᓇᐦᐃᑫᐊᐧᐨ ᑕᓱᑭᔑᑲ ᓂᑲᑭᑭᓄᐦᐊᒪᐊᐧᐠ ᐁᐧᑎ ᒋᐊᓂ ᐃᐧᒋᐦᐃᑯᐊᐧᐨ ᐊᐱ ᑭᔑᑐᐊᐧᐨ ᐊᐃᐢᑯᕑ ᐃᐡᑯᓄᐃᐧᐣ,” ᓴᔾ ᐃᑭᑐ᙮ “ᑕᓱ ᐸᑫᐧᔑᑲᓂᑭᔑᑲ ᐸᐸᑲᐣ ᑫᑯᓇᐣ ᓂᑐᑕᒥᓇᐣ ᐅᐅᒪ ᒥᓯᐁᐧ ᐃᐡᑯᓄᐃᐧᑲᒥᑯᐠ ᑐᑲᐣ ᒪᓯᓇᐦᐃᑫᐃᐧᐣ, ᐊᑭᑕᓱᐃᐧᐣ ᓇᐣᑕ ᑲᐃᔑᐱᒪᑎᓯᓇᓂᐊᐧᐠ᙮”
ᐃᑭᑐᐃᐧᓇᐣ ᒪᒣᑕᐁᐧᐃᐧᐣ, ᐃᑭᑐᐃᐧᓇᐣ ᐊᑭᑕᓱᐃᐧ ᑲᑫᐧᒋᐦᐃᐁᐧᐃᐧᓇᐣ ᓇᐣᑕ ᐊᓂᔑᓇᐯᒧᐃᐧᐣ ᐱᐣᑯᑫᐃᐧᐣ ᓂᑐᑕᒥᓇᐣ ᑕᓱ ᐸᑫᐧᔑᑲᓂᔑᑭᑲ᙮ “ᐁᑲᐧ ᐊᔭᒥᒋᑫᐃᐧᐣ ᐊᐦᐃ ᐃᑭᑐᐃᐧᓇᐣ ᒣᑕᐁᐧᐃᐧᐣ ᓂᑐᑕᒥᐣ ᐁᑲᐧ ᐃᑫᐧᓂᐊᐧᐠ ᓂᑲᐣ ᑲᑭᔑᑐᐊᐧᐨ ᐸᑭᓇᑫᐊᐧᐠ,” ᓴᔾ ᐃᑭᑐ᙮ “ᐁᑲᐧ ᐊᑭᒋᑫᐃᐧᐣ ᐊᐦᐃ ᐃᑭᑐᐃᐧᓇᐣ ᑲᑫᐧᒋᐦᐃᐁᐧᐃᐧᐣ ᓂᑐᑕᒥᐣ ᐁᑲᐧ ᐅᑎᐢᑯᓂᐠ ᐅᑐᒋᐊᓂᒥᑐᓇᐊᐧ ᒋᐃᓀᐧᑐᐊᐧᐨ ᐃᑭᑐᐃᐧᓇᐣ᙮ ᐁᑲᐧ ᓇᓇᑲ ᐃᔑᑭᑭᓄᐦᐊᒪᑲᓂᐊᐧᐣ ᐃᔑᐱᒪᑎᓯᐃᐧᐣ ᑐᑲᐣ ᐊᓂᔑᓇᐯᐃᐧ ᐱᐣᑯᑫᐃᐧᐣ ᐊᐦᐃ ᑲᔭ ᓇᓇᑲ ᐃᑭᑐᐃᐧᓇᐣ ᓂᑕᐸᒋᑐᒥᓇᐣ ᐊᐦᐃᐣ ᐅᑕ ᒪᐊᐧᐨ ᑫᑭᑭᑫᐣᑕᒪᑭᐸᓂᐣ ᑲᐧᓂᐣ ᐁᑕ ᐅᑎᐢᑯᓂᐠ ᐁᐦᐊᐠ ᐅᔕ ᑲᔭ ᐊᓄᑭᓇᑲᓇᐠ ᑫᐃᐧᓇᐊᐧ ᒋᐅᒋᑭᑫᐣᑕᒧᐊᐧᐨ ᐃᔑᑭᔑᐁᐧᐃᐧᐣ᙮”
ᐁᑲᐧ ᓴᔾ ᐅᑐᒋᓂᓯᑕᐃᐧᓇᐣ ᒥᐡᑕᐦᐃ ᐁᐅᒋᐃᐧᒋᐦᐃᐁᐧᒪᑲᐠ ᐃᐃᒪ ᑌᓂᐢ ᐱᕑᐊᐣᑭᓫᐊᐣ ᑲᐧᕑᐊᒥᑎ ᐊᓂᔑᓇᐯᐃᐧ ᐊᐃᐢᑯᓫ ᐃᐡᑯᓄᐃᐧᑲᒥᐠ ᐊᑯᓇᐠ ᐊᐱᐣ 2007 ᑲᐊᐦᑭᐊᐧᐠ ᑲᑭᒪᒋᓭᑭᐸᐣ᙮
“ᐁᑲᐧ ᒥᓇ ᐊᓄᑭᓇᑲᓇᐠ ᒪᐊᐧᐨ ᐅᑭᑫᐣᑕᓇᐊᐧ ᐁᐃᔑᓭᓂᐠ ᐅᐅᒪ ᐁᑲᐧ ᒥᓇ ᑲᐧᔭᐠ ᓂᐃᐧᑕᓄᑭᒪᒥᓇᐠ ᐅᑎᐢᑯᓂᐠ ᐁᑲᐧ ᒥᓇ ᒪᐊᐧᐨ ᑲᐧᔭᐠ ᐃᔑᓭ ᐅᐅᒪ ᑲᑕᔑᐡᑯᓄᐊᐧᐨ,” ᓴᔾ ᐃᑭᑐ᙮ “ᒥᓇ ᐱᑯ ᑕᐱᐡᑯᐨ ᑲᐃᔑᑲᐯᔑᐊᐧᐨ ᒋᐃᓀᐣᑕᒧᐊᐧᐨ ᓂᑲᑫᐧᑐᑕᐊᐧᒥᓇᐠ ᐊᐦᐃ ᐅᔕ ᐱᑯ ᐅᐅᐁᐧ ᑯᑕᑭᓂ ᑲᐃᔑᐊᔭᐊᐧᐨ ᐃᔑᓭᓂᑐᐠ᙮”
ᓴᔾ ᐃᑭᑐ ᐅᐅᐁᐧ ᑌᓂᐢ ᐱᕑᐊᐣᑭᓫᐊᐣ ᑲᐧᕑᐊᒥᑎ ᐊᓂᔑᓇᐯᐃᐧ ᐊᐃᐢᑯᓫ ᐃᐡᑯᓄᐃᐧᑲᒥᐠ ᒥᓇ ᑲᐧᔭᐠ ᐅᐃᐧᒋᔭᐊᐧᐣ ᐅᑎᐢᑯᓂᐣ ᐊᑯᓇᐠ ᐱᑯ ᐊᐱᐣ ᓂᐡᑕᑦ ᑲᑭᒪᒋᐢᑯᓄᐦᐃᐁᐧᐸᐣ᙮
“ᒥᓇ ᓂᓂᓯᑕᐁᐧᐣᑕᒥᐣ ᑫᑯᓀᓇᐣ ᑲᐊᓂᒥᐦᐃᑯᐊᐧᐨ ᐊᐱᐣ ᐅᑌᓇᐠ ᑲᐱᔕᐊᐧᐨ,” ᓴᔾ ᐃᑭᑐ᙮ “ᓇᓇᑲ ᐱᑯ ᑫᑯᓇᐣ ᓂᑎᔑᐊᐧᐃᐧᒋᐦᐊᒥᓇᐠ ᒥᐡᑯᐨ ᒋᑕᔑᓇᓇᒪᔦᐣᑕᒧᐊᐧᐨ ᐅᑌᓇᐠ ᑲᐃᔑᑲᐯᔑᐊᐧᐨ᙮”
ᐁᑲᐧ ᒥᓇ ᑌᓂᐢ ᐱᕑᐊᐣᑭᓫᐊᐣ ᑲᐧᕑᐊᒥᑎ ᐊᓂᔑᓇᐯᐃᐧ ᐊᐃᐢᑯᓫ ᐃᐡᑯᓄᐃᐧᑲᒥᐠ ᐅᓇᑐᒪᐣ ᐊᐃᐧᔭᐣ ᐅᑌᓇᐠ ᑲᑲᐯᔑᓂᐨ ᒋᐱᑭᐃᐧᑌᓂᐨ ᒥᓇ ᒋᐊᓂᑭᑫᐣᓂᒪᐊᐧᐨ ᐅᑎᐢᑯᓂᐣ᙮ “ᒥᓇ ᐱᑯ ᒋᐊᓂ ᑭᑫᓂᒥᑯᔭᐠ ᓂᑐᑕᒥᐣ ᐅᐅᒪ ᑭᒋᑕᐃᐧᓂᐠ ᐃᐧᑫᐧᑐᐣᐠ (ᑕᐣᑕᐯ) ᑲᐃᒋᑲᑌᐠ,” ᓴᔾ ᐃᑭᑐ᙮ “ᒥᓇ ᐱᑯ ᐅᐅᒪ ᑭᒋᑕᐃᐧᓂᐠ ᑲᑲᐯᔑᐊᐧᐨ ᐊᐃᐧᔭᐠ ᓂᓇᑐᒪᒥᓇᐠ ᒋᐱᔕᐊᐧᐨ ᐅᐅᒪ ᐃᐡᑯᓄᐃᐧᑲᒥᑯᐠ᙮ ᐃᔑᓭᓂ ᐅᔕ ᒋᑲᑫᐧᑭᑫᓂᒪᐊᐧᐨ ᐅᑎᐢᑯᓂᐣ ᒥᓇ ᐱᑯ ᒋᐊᐧᐸᒪᐊᐧᐨ ᑲᐧᔭᐠ ᐁᐃᔑᒋᑫᓂᐨ ᐁᑲᐧ ᒥᓇ ᐊᐊᐧᔑᒣ ᐁᐱᐃᐡᑯᓄᓂᐨ᙮”