ᐊᓴᐸᐱᐡᑯᓯᐊᐧᑲᐣᐠ ᐃᑫᐧ ᑭᒥᓇᑲᓄᐃᐧ ᑭᑭᓇᐊᐧᒋᐦᐃᐁᐧᐃᐧᐣ ᐅᑕᓄᑭᑕᒪᑫᐃᐧᓂᐠ ᐅᒋ

Create: 12/01/2015 - 19:23

ᐊᓴᐸᐱᐡᑯᓯᐊᐧᑲᐣᐠ ᑲᐅᒋᐨ ᒍᑎ ᑕ ᓭᓫᐸ ᑭᑭᐦᑭᓇᐊᐧᒋᐦᐃᐊᑲᓄᐃᐧ ᐊᐦᐃ ᐁᑭᒥᓇᑯᓄᐃᐧᐨ ᒉᕑᒪᐣ ᐅᐃᐧᒋᐦᐃᐁᐧᐃᐧ ᑭᑭᓇᐊᐧᒋᐦᐃᐁᐧᐃᐧᐣ ᐊᐦᐃ ᐅᑕ ᒪᐊᐧᐨ ᒥᐡᑕᐦᐃ ᑲᐊᐧᐃᐧᒋᑕᐧᐨ ᐃᐃᒪ ᐅᑕᔑᑫᐃᐧᓂᐠ ᑲᑭᐅᒋᒥᓇᑲᓇᐃᐧᐨ᙮
“ᒪᒪᑲᑌᓂᑕᑲᐧᐣ ᐅᐅᐁᐧ ᓂᑭᑭᓇᐊᐧᒋᐦᐃᑯᐃᐧᐣ ᐊᐦᐃᐠ ᐊᑲᒪᑭᐠ ᒉᕑᒪᓂ ᑲᐃᒋᑲᑌᐠ ᑲᑭᐅᒋᒥᓂᑯᔭᐣ,” ᑕ ᓭᓫᐸ ᑭᐃᑭᑐ ᐃᐃᐁᐧ ᒣᑲᐧᐨ ᓴᑭᐸᑲᐃᐧᐱᓯᑦ ᓂᑯᑕᐧᓱ ᑲᑭᐃᓇᑭᓯᓂᐨ ᐊᐦᐃ ᑲᔭ ᐃᐃᐁᐧ ᒣᑲᐧᐨ ᓂᔑᑕᓇ ᓂᔓᔕᑊ ᑲᑭᑕᐃᐧᐃᐡᑲᐧᑭᐃᐧᑌᐨ ᐃᐃᒪ ᒉᕑᒪᓂ ᐊᑭᑲᐠ᙮ “ᐁᑲᐧ ᐅᐅᐁᐧ ᑲᑕᓯᐊᐧᐨ ᐊᐧᐃᐧᔭᐠ ᑲᐧᓂᐣ ᐃᐧᑲ ᓂᑐᒋᓀᐣᑕᓯᐣ ᐅᐅᐁᐧ ᒋᒥᓂᑯᔭᐣ᙮”
ᒉᕑᒪᐣ ᒣᓂᓇᐦᐃᐟ ᑭᑭᓇᐊᐧᒋᐦᐃᐁᐧᐃᐧᐣ ᐅᑕᐱᑕᒪᑫᐠ ᐅᑭᒥᓇᐊᐧᐣ ᑕ ᓭᓫᐸ ᐊᐦᐃ ᒪᐃᑯ ᓴᐟᑌᓫᐁᕑ ᑭᑭᓇᐊᐧᒋᐦᐃᐁᐧᐃᐧᐣ ᑕᐱᐡᑯᐨ ᑲᑭᓂᑲᓂᑕᒪᑫᐨ ᒣᑲᐧᐨ ᑭᓇᐁᐧᐢ ᐊᓴᐸᐱᐡᑯᓯᐊᐧᑲᐣᐠ ᑕᔑᑫᐃᐧᐣ ᑲᑭᑭᐸᑲᐧᐃᐦᑫᐡᑲᒥᐊᐧᐨ ᒪᓇᑎᑫᐧᐃᐧᐣ ᐁᑲᐧ ᐃᐃᐁᐧ ᒣᑲᐧᐨ ᒪᑯᐱᓯᑦ ᓂᔑᑕᓇ ᑲᐃᓇᑭᓯᐨ ᑲᑭᑭᐦᑭᓇᐊᐧᒋᐦᐃᐊᑲᓄᐃᐧᐨ ᐃᐃᒪ ᐱᓂᑎᐠ ᐊᐧᑲᐦᐃᑲᓂᐠ ᓭᐣᐟ ᐱᑕᐣ ᑲᐃᒋᑲᑌᐠ ᒋᑭᐨ ᐯᕑᐊᐯᕑᐠ ᒉᕑᒪᓂ᙮
“ᓂᐃᐧᑭᑭᓇᐊᐧᒋᐦᐃᐊᒥᐣ ᒍᑎ ᑕ ᓭᓫᐸ ᐁᑲ ᑭᒋᒥᑲᓱᐃᐧᐣ ᑲᑭᐅᒋᐊᐸᒋᑐᐊᐧᐨ ᐁᑲᐧ ᒥᓇ ᐅᑕᑭᐊᐧ ᐁᑲ ᒋᓂᔓᓇᒋᒋᑲᑌᓂᐠ ᒥᓇ ᐱᑯ ᑲᐃᐧᑲᓇᐃᐧᓂᑕᒥᐊᐧᐨ ᐅᑕᓂᔑᓇᐯᐃᐧᐱᒪᑎᓱᓂᐊᐧ,” ᐃᑭᑐ ᓫᐊᐃᐧᐣᐢ ᑎᓴᐣ ᐸᐣ ᐁᐨ ᐃᐃᒪ ᒉᕑᒪᐣ ᒣᓂᓇᐦᐃᐟ ᑭᑭᓇᐊᐧᒋᐦᐃᐁᐧᐃᐧᐣ ᑲᐃᔑᐊᐱᑕᒪᑫᐨ᙮
ᒪᐃᑯ ᓴᐟᑌᓫᐁᕑ ᒪᐧᐣᐠ ᑭᐊᔭ ᐊᐱᐣ ᑲᐃᐡᑲᐧᓇᑲᑕᐠ ᐸᑲᐧᐃᔑᐃᐧᐊᔦᒪᐁᐃᐧᑲᒥᑯᓂ ᐃᐃᐁᐧ ᒣᑲᐧᐨ ᐸᐧᑕᐢᑕᐣᐟ ᑲᒪᒋᒋᑲᑌᐠ ᐁᑲᐧ ᑲᔭ ᐁᑭᓂᑲᓂᐡᑲᐠ ᐊᓇᐸᐱᑕᐢᐟ ᐊᐧᑲᐃᐧᐁᐧᐣ᙮ ᐁᑲᐧ ᑭᓂᓴᑲᓄᑭᐸᐣ ᐃᐃᐁᐧ ᒣᑲᐧᐨ 1572 ᑲᐊᑭᐊᐧᐠ᙮
“ᓂᑭᒥᓂᑯ ᐅᐅᐁᐧ ᑭᑭᓇᐊᐧᒋᐦᐃᐁᐧᐃᐧᐣ ᒥᐡᑯᐨ ᐊᓴᐸᐱᐡᑯᓯᐊᐧᑲᐣᐠ ᑕᔑᑫᐃᐧᐣ ᑲᐧᔭᐠ ᒥᓇ ᓴᑲᒪᐨ ᑲᑭᒥᑲᑕᐠ ᐅᑕᑭ ᒥᓇ ᓂᐱᒪᑎᓱᐃᐧᓂᓇᐣ,” ᑕ ᓭᓫᐸ ᐃᑭᑐ᙮ “ᑲᐧᓂᐣ ᐃᐧᑲ ᒪᓀᐣᒋᑫᐃᐧᐣ ᒋᐊᐸᒋᑐᔭᐠ᙮”
ᑕ ᓭᓫᐸ ᐃᑭᑐ ᐊᐧᐃᐧᔭᐠ ᐅᑭᑯᐡᑯᑕᓇᐊᐧ ᐊᐦᑭ ᑲᓂᔓᓇᒋᒋᑌᐠ ᐅᐅᒪ ᑲᓇᑕ ᐃᐃᐁᐧ ᒣᑲᐧᐨ ᓂᔑᑕᓇ ᓂᔓᔕᐱᑭᔑᑲ ᑲᑭᑭᐃᐧᑌᐨ ᐊᑲᒥᑭᒋᑲᒥᐠ᙮
“ᐅᑭᐃᓀᐣᑕᓇᐊᐧ ᑲᔭ ᑲᑕᓇ ᒪᐊᐧᐨ ᑲᐧᔭᐠ ᐁᑲᓇᐁᐧᓂᑕᐠ ᐅᑕᑭᑦ ᒥᓇ ᑲᐧᔭᐠ ᐁᑐᑕᐊᐧᐨ ᐊᐧᐃᐧᔭᐣ,” ᑕ ᓭᓫᐸ ᐃᑭᑐ᙮ “ᐊᐱ ᑲᐃᐧᑕᒪᐊᐧᑲᐧ ᐊᓂᔑᓇᐯᐠ ᐁᑲ ᑲᐧᔭᐠ ᑲᑐᑕᐊᐧᑲᓄᐊᐧᐨ ᒥᓇ ᐱᑯ ᐱᒋᐳᐃᐧᓇᐣ ᑲᐅᒋᐅᔑᐅᒪᑲᑭᐣ ᐃᐃᒪ ᐊᐸᑲᒥᓂᑲᐣ ᑲᒧᓇᐦᐃᑲᑌᐠ ᓇᐣᑕ ᒪᓇᑎᑫᐧᐃᐧᐣ ᒪᐊᐧᐨ ᐱᑯ ᑭᒋᑭᓂᑕᒧᐊᐧᐠ᙮ ᐁᑲᐧ ᐊᐱᐣ ᐃᑭᑐᐊᐧᐠ ᒪᐊᐧᐨ ᐃᓴᐣ ᐁᒪᔭᑭᓭᐠ ᐃᐃᒪ ᑲᓇᑕ᙮ ᒪᐊᐧᐨ ᐅᒋᓀᐣᑕᓇᐊᐧ ᐊᐱᐣ ᑌᐯᐧᐃᐧᐣ ᑲᑭᓄᑕᒧᐊᐧᐨ᙮”
ᐊᓴᐸᐱᐡᑯᓯᐊᐧᑲᐣᐠ ᐅᑭᒪᑲᐣ ᓴᐃᒪᐣ ᐳᐸᐢᑌᕑ ᑫᐃᐧᐣ ᑲᐊᔭᒥ ᒣᑲᐧᐨ ᑲᑭᑭᓇᐊᐧᒋᐦᐃᐁᐧᓇᓂᐊᐧᓂᓂᐠ ᐁᐦᐊᐠ ᑲᔭ ᓇᓇᑐᐠ ᐅᑭᒪᐠ ᐃᐃᒪ ᒉᕑᒪᓂ ᑲᐅᒋᐊᐧᐨ ᑭᐊᔭᐊᐧᐠ᙮
ᑕ ᓭᓫᐸ ᑭᑭᐡᑯᓇᑲᓄᐃᐧ ᐊᐱ ᑲᐊᐧᐸᑕᐠ ᐊᓂᐣ ᐊᐦᑭ ᐁᐃᔑᓇᑲᐧᐠ ᐃᐃᒪ ᒉᕑᒪᓂ ᒣᑲᐧᐨ ᑲᑭᑭᐃᐧᑌᐨ ᐁᑲᐧ ᓇᐣᑕ 84 ᒥᓂᔭᐣ ᐊᐧᐃᐧᔭᐠ ᐊᔭᐊᐧᐠ ᐃᐃᒪ ᒉᕑᒪᓂ ᐁᑲᐧ ᐅᐣᑌᕑᐃᔪ ᑭᔭᐱᐨ ᐅᒋᒥᔕ᙮
“ᒪᒪᑲᐨ ᐅᔕ ᑭᔭᐱᐨ ᑲᑭᒋᓄᐱᒥᐊᐧᐠ ᒥᓴᐊᐧᐨ ᐊᓇ ᒥᔑᓂᓇᓂᐊᐧᐠ” ᑕ ᓭᓫᐸ ᐃᑭᑐ᙮ “ᐅᓴᒥᒥᔑᓂᐊᐧᐠ ᓂᑭᓀᐣᑕᐣ ᐁᑲᐧ ᐊᐱ ᑲᐊᐧᐸᑕᒪᐣ ᒪᐊᐧᐨ ᑲᐧᔭᐠ ᐅᑐᑕᓇᐊᐧ ᐅᑕᑭᒥᐊᐧ ᐁᑲᐧ ᒥᓇ ᑲᐧᔭᐠ ᐊᐧᐃᐧᔭᐠ ᐁᐃᐧᒋᐊᒥᑎᐊᐧᐨ᙮”
ᑕ ᓭᓫᐸ ᐃᑭᑐ ᒪᐊᐧᐨ ᐁᓴᑯ ᓄᐱᒥᐊᐧᐠ ᐃᐃᒪ ᒉᕑᒪᓂ ᐊᐱᒋᐃᐧᐣ ᐅᐅᒪ ᓂᑕᔑᑫᐃᐧᓂᓇᐣ᙮
“ᐯᔑᑲᐧᐊᐧᑲᓭ ᓇᐱᒥᐠ ᓂᑲᑭᐃᐱᐢ ᐁᑲ ᐊᐃᐧᔭ ᒋᐊᐧᐸᒪᐠ ᐁᑲᐧ ᑲᔭ ᒋᑲᑎᑯᓂᔭᐣ ᓇᐣᑕ ᐁᑕ ᐁᐡᑲᑦ ᐯᔑᐠ ᐊᐃᐧᔭ ᓂᑲᐊᐧᐸᒪ ᐃᐃᒪ ᑲᐃᔕᔭᐣ,” ᐃᑭᑐ ᑕ ᓭᓫᐸ᙮
“ᐁᑲᐧ ᐃᐧᓇᐊᐧ ᐊᐣᑎᐱᑯ ᑲᐃᔕᔭᐣ ᐃᐃᒪ ᓄᐱᒥᐠ ᐁᑲᐧ ᐊᓂ ᐊᐱᑕᐊᐧᑲᓭᐠ ᐊᐃᐧᔭ ᑲᐊᐧᐸᒪ ᒋᐱᒪᑕᐦᐁᐁᐧᐱᐡᑭᑫᐨ ᓂᐣᑕ ᑲᔭ ᒋᐱᒧᓭᐨ ᑲᐧᓂᐣ ᐃᐧᑲ ᒋᐊᐣᓯᑌᐣᑲᐧᐠ᙮”
ᒉᕑᒪᐣ ᐅᑕᐱᑕᒪᑫᐠ ᓂᐡᑕᑦ ᐅᑭᐅᒋᑭᑫᐣᑕᓇᐊᐧ ᐅᐅᐁᐧ ᐊᓴᐸᐱᐡᑯᓯᐊᐧᑲᐣᐠ ᐅᑕᓂᒥᓭᐃᐧᓂᐊᐧ ᒣᑲᐧᐨ ᒪᐊᐧᒋᐦᐃᑐᐃᐧᐣ ᑲᑭᐅᓇᑌᐠ ᐁᐦᐊ ᐅᑕ ᐅᐅᐁᐧ ᑕᔑᑫᐃᐧᐣ ᑲᑭᐅᓇᑐᐨ ᒥᓇ ᑲᔭ ᑭᐃᐡᑎᐣ ᐱᐢᒣᑫᕑ ᐅᑕᓄᑭᑕᒪᑫᐠ ᑲᑭᐃᐧᒋᑕᐧᐊᐧᐨ᙮
“ᒍᑎ ᐅᑭᑌᐱᓇᐣ ᐅᐅᐁᐧᓂ ᒋᒥᓇᑲᓄᐃᐧᐨ ᒥᓇ ᐱᑯ ᒥᐡᑕᐦᐃ ᐁᐸᑭᑎᓂᑎᓱᐨ ᐁᑲᓇᐁᐧᐣᑕᐠ ᐅᑎᔑᐱᒪᑎᓯᐃᐧᐣ ᒥᓇ ᒪᐊᐧᐨ ᐁᐃᑭᑐᐨ ᑲᐧᔭᐠ ᒋᑲᓇᐁᐧᐣᒋᑲᑌᐠ ᐊᐦᑭ᙮” ᐃᑭᑐ ᓫᐅᓯᐅᓫ ᒪᐠᑫᐣᓯ ᑫᐃᐧᐣ ᑲᐊᐱᑕᒪᑫᐨ ᐃᑫᐧᐊᐧᐠ ᐅᑕᐱᑕᒪᑫᐠ ᐃᐃᒪ ᐊᓴᐸᐱᐡᑯᓯᐊᐧᑲᐣᐠ᙮ “ᐅᐅᐁᐧᓂ ᒍᑎ ᒥᐡᑕᐦᐃ ᑲᐊᓄᑭᑕᒪᑫᐨ ᒪᐊᐧᐨ ᐅᒐᒋᑫᐣᑕᐣ ᑲᐧᔭᐠ ᒋᑲᓇᐁᐧᐣᒋᑲᑌᐠ ᐅᑕᑭᒥᐊᐧ ᐃᐃᒪ ᐊᓴᐸᐱᐡᑯᓯᐊᐧᑲᐣᐠ ᒥᓇ ᐱᑯ ᐊᓂᔑᓇᐯᐠ ᐃᐃᒪ ᑲᑲᐯᔑᐊᐧᐨ᙮”
ᒪᐠᑫᐣᓯ ᐃᑭᑐ ᐅᐅᐁᐧ ᑕᔑᑫᐃᐧᐣ ᒪᐊᐧᐨ ᐱᑯ ᐃᑭᑐ ᐁᐃᐧᑲᓇᐁᐧᐣᑕᐠ ᐅᑕᑭᑦ ᒥᓇ ᐱᑯ ᒪᐊᐧᐨ ᐁᐃᐧᓂᑲᓂᑲᓄᐃᐧᑕᐠ ᑫᑯᓇᐣ ᐃᐃᒪ ᑲᐃᔑᓇᓇᑕᐁᐧᐣᒋᑫᐊᐧᐨ ᒥᓇ ᑲᐃᔑᐅᑕᑭᒥᐊᐧᐨ᙮
“ᐊᓴᐸᐱᐡᑯᓯᐊᐧᑲᐣᐠ ᒣᑲᐧᐨ ᐅᐱᒪᓂᑲᑕᐣ ᐅᓇᑯᓇᑫᐃᐧᐣ ᐊᔕ ᑲᑭᓂᓱᑕᐃᐧᓂᑲᑌᑲᐧᐸᓂᐣ ᐃᐃᒪ ᑭᐅᒋᓇᑯᓂᑫᐃᐧᑲᒥᑯᐠ ᐅᐅᐁᐧ ᑐᑲᐣ ᑲᐊᐧᑎᐣ ᐅᓇᒋᑫᐃᐧᐣ ᐃᐃᐁᐧ ᒪᔭᑦ ᑲᐃᒋᑲᑌᐠ ᐅᐊᐧᓂᐦᐃᑫᐠ ᐅᑐᓇᑯᓂᑫᐃᐧᓂᐊᐧ ᐊᒥᐁᐧ ᐅᒪ ᐁᐧᒋᐱᒥᓭᑭᐣ ᑫᑯᓇᐣ ᑲᑭᒥᓂᑯᔭᐠ ᐃᐃᒪ ᑭᑕᑭᓇᐣ ᒥᓇ ᐱᑯ ᑲᓇᓇᑕᐁᐧᐣᒋᑫᓇᓂᐊᐧᐠ ᐁᑲᐧ ᑲᐊᐧᓂᐦᐃᑫᓇᓂᐊᐧᐠ.” ᒪᐠᑫᐣᓯ ᐃᑭᑐ᙮ “ᐅᐅᐁᐧ ᑭᐊᐧᑎᐣ ᐅᓇᒋᑫᐃᐧᐣ ᐅᐣᑌᕑᐃᔪ ᐅᑕᐸᒋᑐᐣ ᐁᐅᒋ ᐊᔭᒥᔭᐨ ᒥᓇ ᐁᐅᒋ ᐃᐧᑕᓄᑭᒪᐨ ᓂᑕᓂᔑᓇᐯᒥᓇᓇᐣ᙮”
ᑕ ᓭᓫᐸ ᐃᑭᑐ ᐊᐃᐧᔭᐠ ᑲᑲᐯᔑᐊᐧᐨ ᐃᐃᒪ ᒉᕑᒪᓂ ᒪᐊᐧᐨ “ᓂᑭᐊᐧᐃᐧᒋᐦᐃᑯᒥᐣ ᒥᓇ ᓂᑭᐅᑐᑌᒥᑯᒥᐣ᙮”
“ᑲᐧᓂᐣ ᒥᔑᐣ ᒍᒋᑭᑫᓂᒪᐊᐧᐨ ᐊᓂᐣ ᒪᔭᑦ ᐁᐃᔑᓇᑯᓯᓂᐨ ᐊᓂᔑᓇᐯᐣ,” ᑕ ᓭᓫᐸ ᐃᑭᑐ᙮ “ᒪᐊᐧᐨ ᑲᐧᔭᐠ ᓂᑭᑐᑕᑯᒥᓇᐠ ᐁᑲᐧ ᑲᐧᓂᐣ ᒥᓇ ᒍᒋᒪᔭᑫᓂᒥᑯᔭᐠ᙮”