ᑕᐣᑐᕑ ᐯ ᑫᐧᑭᐃᐧᐣ ᐅᐣᒋ ᐃᐧᒋᐦᐃᐁᐧᒪᑲᐣ ᑭᑫᐃᐧᓂᐠ

ᑯᒋᒋᐣᐠ ᐁᐅᐣᒋᐨ ᑌᕑᐃ ᐊᑕᑦ ᑫᐃᐧᐣ ᑭᐳᓂᒥᓂᑫᐧ ᐊᑯᓇᐠ ᐃᒪ ᑲᑭᐱᐣᑎᑫᐨ ᑫᐧᑭᐃᐧᐣ ᐃᐧᒋᐦᐃᐁᐧᐃᐧᓂᐠ.
“ᐊᒥ ᑲᑐᑕᒪᐣ ᒥᑕᓱᐱᐳᐣ ᓇᐣᑕ ᓂᔭᓄᔕᐳᐱᐳᐣ ᐱᑯ ᑫᑯᐣ ᐁᑭᒥᓂᑲᐧᑕᒪᐣ,” ᑭᐃᑭᑐ ᐊᑕᑦ. “ᐅᑎᑲᐧᓂᐱᐊᐧᔾ ᓯᓱᐸᒋᑲᐣ, ᑭᓯᓯᑯᓀᐁᐧᔭᐸᐊᐧᓱᐣ, ᑫᑯᓂᑯ, ᓂᑭᒥᓂᑲᐧᑕᐣ. ᐊᐱ ᑲᐱᐣᑎᑫᔭᐣ ᐅᒪ ᐃᐧᒋᐦᐃᐁᐧᐃᐧᓂᐠ, ᐣᑭᐃᐧᒋᐦᐃᑯᐣ ᒋᐳᓂᑐᔭᐣ ᑲᐧᐣᑕ ᑫᑯᓇᐣ ᑲᑭᒪᒥᓂᑲᐧᑕᒪᐣ. ᐣᑌᐱᓇᐧᐁᐢ ᑕᐡ ᐅᐁᐧ ᑲᑭᒥᑲᒪᐣ.”
ᒣᒣᑫᐧ ᒥᓇ ᐊᑕᑦ ᔕᔑᑭᑕᑯᓯᐊᐧᐠ ᑯᑕᑭᔭᐠ ᐊᐃᐧᔭᐠ ᑫᐃᐧᓇᐊᐧ ᐃᒪ ᒋᑭᐱᐣᑎᑫᐊᐧᐸᐣ ᑫᐧᑭᐃᐧᐣ ᐃᐧᒋᐦᐃᐁᐧᐃᐧᓂᐠ.
“ᔕᑯᐨ ᑭᓂᑯ ᐱᓇᒪ ᓂᑲᐣ ᑲᐅᓀᐣᑕᐣ ᑭᐡᐱᐣ ᐃᐧᐃᐧᒋᐦᐃᑯᓯᔭᐣ,” ᑭᐃᑭᑐ ᐊᑕᑦ. “ᐁᑲᐧ ᐊᐱᐣ ᐃᐡᑲᐧ ᑭᔑᑐᔭᐣ, ᑲᐃᐧᐣ ᓇᐣᑕ ᑲᐃᔑᐊᒋᔑᒥᑯᓯᐣ.”
ᐸᐧᕑᐟ ᐃᐧᓫᐃᔭᑦ ᐅᑭᒪᑲᐣ ᐱᑐᕑ ᑲᐧᓫᐃᐣᐢ ᐅᑭᓇᓇᑯᒪᐣ ᑲᑲᐯᔑᐦᐊᐊᐧᐨ ᑲᑫᐧᓇᐃᐧᔑᓂᐸᓂᐨ ᐃᒪ ᑕᐣᑐᕑ ᐯ ᒥᓇ ᑲᐊᐱᑕᒪᑫᐊᐧᐨ ᑲᑭᒪᒋᑐᐊᐧᐨ ᑫᐧᑭᐃᐧᐣ ᐃᐧᒋᐦᐃᐁᐧᐃᐧᐣ ᒋᑯᒋᒋᑲᑌᐠ.
“ᐃᐁᐧᓂ ᑲᑭᐅᐣᒋ ᑐᑕᒧᐊᐧᐨ ᐁᐃᐧᐅᐣᒋ ᑲᑫᐧ ᐃᐧᒋᐦᐊᐊᐧᐨ ᒪᐊᐧᐨ ᑲᑯᐸᒋᓭᓂᐨ ᐸᐣᑭ ᒋᐃᐧᐅᐣᒋ ᐸᔭᑕᑭᓭᓂᐨ ᒥᓇ ᒋᔭᒥᓄᓭᓂᐨ,” ᑭᐃᑭᑐ ᑲᐧᓫᐃᐣᐢ, ᒥᓇ ᐅᑭᐅᐣᒋ ᐃᐧᐣᑕᐣ ᑲᑭᒪᒋᒋᑲᑌᐠ ᑫᐧᑭᐃᐧᐣ ᒋᑯᒋᒋᑲᑌᐠ ᐁᐃᐧᒋᐦᐃᑯᐊᐧᐨ ᐊᐃᐧᔭᐠ ᒋᑫᐧᑭᓇᒧᐊᐧᐨ ᐅᐱᒪᑎᓯᐃᐧᓂᐊᐧ ᒥᓇ ᒋᔭᓂ ᑲᐧᔭᑯᓭᑐᐊᐧᐨ ᐅᐱᒪᑎᓯᐃᐧᓂᐊᐧ. “ᑲᐃᐧᓂᐣ ᑕᑲᓇᐊᐧᐸᒋᑲᑌᓯᐣ ᐊᐣᑎ ᑲᑭᐱᐅᐣᒋᔭᐣ, ᐃᒪ ᐱᑯ ᑫᑭᐊᓄᒋ ᐃᐧᒋᐦᐃᑯᐊᐧᐨ ᐅᐱᒪᑎᓯᐃᐧᓂᐊᐧᐠ ᐅᓇᑕᐁᐧᐣᑕᓇᐊᐧ ᒋᐃᔑᐊᐧᐸᐣᑕᐦᐃᑕᐧ.”
ᐊᓇ ᑭᐳᐣ, ᑕᐣᑐᕑ ᐯ ᑲᐅᒋ ᐱᒥᓇᓇᑲᒋᐦᐊᐨ ᐊᓂᔑᓂᓂᐊᐧᐠ ᐃᒪ ᑲᐱᒥᐃᐧᒋᐦᐃᐧᑕ, ᑭᐃᑭᑐ ᑲᓂᑲ ᑫᐃᐧᐣ ᐅᒪᒪᒪᐣ ᑭᐊᔭᓂᐸᐣ ᐅᐁᐧᓂ ᑐᑲᐣ ᑫᐧᑭᐃᐧᐣ ᐃᐧᒋᐦᐃᐁᐧᐃᐧᓂ ᒣᑲᐧᐨ ᑲᐱᐅᐱᑭᐸᐣ.
“ᓂᒪᒪ ᑭᐱᑲᓇᐁᐧᐣᑕᑯᓯᐸᐣ ᐊᓂᔑᓂᓂᐃᐧ ᐊᐊᐧᔑᔕᐠ ᑲᑭᑕᔑ ᑲᓇᐁᐧᐣᑕᑯᓯᐊᐧᐨ ᐃᐡᑯᓄᑲᒥᑯᐠ ᒥᓇ ᑲᑭᐱᓇᓇᑭᐡᑲᑭᐣ ᒣᑲᐧᐨ ᐃᒪ ᑲᑭᐊᔭᐨ, ᑲᐃᐧᐣ ᐅᑐᐣᒋ ᑲᐡᑭᑐᓯᐣ ᐊᓂᐣ ᑫᑭᐃᔑᐃᐧᒋᐦᐃᑎᓱᐨ,” ᑭᐃᑭᑐ ᑭᐳᐣ. “ᒥᓂᑯᐠ ᑕᐡ ᑲᐅᐣᒋ ᐱᒪᑎᓯᔭᐣ ᐣᑭᐱ ᐊᐧᐊᐧᓀᐣᑕᐣ ᑲᐯᐦᐃ ᐁᑭᐱ ᑲᓇᐊᐧᐸᒪᐠ ᓂᒪᒪ ᐁᓄᒋᐦᐃᑯᐨ ᐅᒥᓂᑫᐧᐊᐧᐱᓀᐃᐧᐣ.”
ᑭᐳᐣ ᑭᐃᑭᑐ ᐅᐁᐧ ᑫᐧᑭᐃᐧᐣ ᐃᐧᒋᐦᐃᐁᐧᐃᐧᐣ ᑲᑯᒋᒋᑲᑌᐠ ᓂᓯᑕᐃᐧᓂᑫᒪᑲᐣ ᑲᐃᔑᓇᑲᐧᓂᐠ ᐅᐱᒪᑎᓯᐃᐧᐣ ᑲᑭᓇ ᐊᐃᐧᔭ ᒥᓇ ᑲᓇᐁᐧᐣᑕᑯᓯᐊᐧᐠ ᑲᐃᓯᓭᓂᐠ ᐃᑯ ᐅᐱᒪᑎᐢ ᒋᐃᔑᐃᐧᒋᐦᐊᑲᓄᐨ.
“ᐊᓂᐡ ᑲᐃᐧᐣ ᐣᑭᑫᐣᑕᒥᐣ ᐊᐣᑎ ᑲᐱᐃᔑᐃᐧᓂᑯᐊᐧᐨ ᐅᑎᓯᓭᐃᐧᓂᐊᐧ ᐅᑯᐁᐧᓂᐊᐧᐠ ᐊᐃᐧᔭᐠ ᑲᐱᐱᒪᑎᓯᐊᐧᐨ, ᑲᐃᐧᐣ ᐣᑭᑫᐣᑕᒥᐣ ᐊᐣᑎ ᑲᑭᐱᔑ ᐱᒧᓭᐊᐧᐨ ᒥᓇ ᑫᑯᓀᐣ ᑐᑲᐣ ᐊᓂᒥᓭᐃᐧᓇᐣ ᑲᑭᐱᒥᐃᐧᓂᑯᐊᐧᐨ ᐅᐱᒪᑎᓯᐃᐧᓂᐊᐧᐠ,” ᑭᐃᑭᑐ ᑭᐳᐣ. “ᑲᐃᐧᓂᐣ ᐃᑯ ᐁᑕ ᐃᐁᐧᓂ ᑲᑎᐯᓂᒥᑯᐊᐧᐨ; ᐃᐁᐧᓴ ᑲᔦ ᒋᓂᓯᑕᐁᐧᐣᑕᒧᐊᐧᐨ ᐁᐱᒪᑎᓯᐊᐧᐨ.”
ᑫᐧᑭᐃᐧᐣ ᐃᐧᒋᐦᐃᐁᐧᐃᐧᑲᒥᐠ ᑭᒪᒋᒋᑲᑌ ᒋᐃᐧᒋᐦᐃᐣᑕᐧ ᐊᐃᐧᔭᐠ ᒋᐱᐣᑎᑲᓂᑕᐧ ᑲᐃᔑᐸᔭᑕᑭᔭᓂᐠ ᒋᐃᔑᓂᐸᐊᐧᐨ ᒥᓇ ᑲᐧᔭᐠ ᒋᐃᐧᓯᓂᐊᐧᐨ ᒥᓇ ᒪᐡᑭᑭᐃᐧ ᐃᐧᒋᐦᐃᐁᐧᐃᐧᓂ ᒋᒥᓂᑕᐧ ᐃᒪ ᑲᑭᐅᐣᒋ ᐸᑭᑎᓂᐨ ᔓᓂᔭ ᐅᐣᑌᕑᐃᔪ ᐟᕑᐃᓫᐃᔭᑦ ᐸᑭᑎᓂᑫᐃᐧᓂᐠ, ᐁᑲ ᑲᐅᑲᐯᔑᐃᐧᓂᐊᐧᐨ ᑲᒪᒪᐊᐧᓄᑲᑕᒧᐊᐧᐨ ᐃᐧᒋᐦᐃᐁᐧᐃᐧᐣ ᐁᑲᐧ ᒥᓇ ᑕᐣᑐᕑ ᐯ ᐅᑌᓇᐠ. ᐁᑲᐧ ᐃᒪ ᑲᐱᐣᑎᑲᓂᑕᐧ ᐃᐧᒋᐦᐃᐁᐧᐃᐧᑲᒥᑯᐠ ᐃᐧᐣᑕᒪᐊᐧᐊᐧᐠ ᒋᑲᑫᐧ ᑲᐡᑭᑐᐊᐧᐨ ᒋᐊᓂᑐᒋᑫᑕᒪᓱᐊᐧᐨ ᑫᑯᓇᐣ ᑐᑲᐣ ᒋᐊᓂᑲᓯᓂᑫᐊᐧᐨ, ᒋᐃᐧᒋᑕᐧᐊᐧᐨ ᑲᑭᔑᑌᐳᓇᓂᐊᐧᐠ ᒥᓇ ᑯᑕᑭᔭᐣ ᑫᑯᓇᐣ ᑲᐃᔑᒋᑲᓄᐊᐧᐠ.