ᑯᒋᒋᐣᐠ ᐅᑲᑭᐱᐡᑲᓇᐊᐧ ᐅᑕᐸᓂᒥᑲᓇ 11 ᒋᑎᐸᐦᐃᑲᑫᐦᐃᑕᐧ ᑲᑭᓇ ᐊᐃᐧᔭᐠ ᐃᐧᔕᐳᐱᓱᐊᐧᐨ

ᐯᔑᑲᐧᐱᐠ ᐃᓇᑭᐣᑌ ᐯᔑᑲᐧ ᐁᐊᔓᐡᑲᓂᐊᐧᐠ
ᑌᐯᐧ ᐅᑭᐃᓯᓭᑐᓇᐊᐧ ᑲᑭᐃᑭᑐᐊᐧᐸᐣ ᑯᒋᒋᐣᐠ ᐃᐡᑯᓂᑲᐣ ᐊᓂᔑᓂᓂᐊᐧᐠ ᒋᑭᐸᑯᐡᑲᒧᐊᐧᐨ ᑲᐅᒋ ᐱᐣᑎᑫᑕᒧᐠ ᑕᔑᑫᐃᐧᐣ ᑭᒋᐅᑕᐸᓂᒥᑲᓇ 11 ᑲᐃᔑᐱᒪᒧᐠ ᒣᑲᐧᐨ 21 ᑲᐃᓇᑭᓱᐨ.
ᐅᑭᒪᑲᐣ ᒐᐠ ᒥᐠᐱᕑᓴᐣ ᐃᑭᑐ ᐅᐁᐧᓂ ᑕᐡ ᑲᑭᐅᒋᑐᑕᒧᐊᐧᐨ ᐁᐃᔑᐸᑯᓭᐣᑕᒧᐊᐧᐨ ᑕᐱᐡᑯᐨ ᑲᐅᐣᑕᑫᓭᑭᐣ ᐅᑭᒪᐅᓇᐣ ᐊᔕ ᓇᐣᑕ ᒋᑭᑲᑫᐧ ᑐᑕᒧᐊᐸᐧᐣ ᐊᔕ ᐁᐧᐡᑲᐨ ᑲᐅᒋᐱᐦᐅᐊᐧᐨ ᑯᒋᒋᐣᐠ ᐊᓂᔑᓂᓂᐊᐧᐠ ᒋᒥᓇᐧᑕᒪᐃᐧᑕᐧ ᑲᐱᒥᔭᓂᒥᓴᐦᐃᑯᐊᐧᐨ ᑲᑭᐃᐧᓂᒋᑲᑌᓂᑭᐸᐣ ᐅᑕᑭᒥᐊᐧ ᐁᑲᐧ ᒥᓇ ᑲᑭᐊᐣᒋᑯᓯᐦᐃᑕᐧᐸᐣ ᐊᓂᔑᓂᓂᐊᐧᐠ.
ᐣᑲᓄᓇᒥᐣ ᑲᐅᑭᒪᐅᐊᐧᐨ ᒋᐱᒥᓂᔕᐦᐊᒧᐊᐧᐨ ᐅᑲᓇᐊᐧᐸᒥᑯᐃᐧᓂᐊᐧ, ᐃᑭᑐ ᒥᐠᐱᕑᓴᐣ. ᐁᑲᐧ ᒥᓇ ᑭᐃᑭᑐ ᑯᒋᒋᐣᐠ ᐊᓂᔑᓂᓂᐊᐧᐠ ᑲᐃᐧᐣ ᐃᐧᑲ ᒋᑭᐅᒋ ᐃᐧᒋᐦᐃᑕᐧ ᓇᐣᑕ ᒥᓇ ᒋᑭᐅᒋ ᑭᐁᐧ ᑎᐸᐦᐊᒪᐃᑕᐧᐸᐣ ᐅᑕᐸᓂᒥᑲᓇᑫᐃᐧᐣ ᑲᑭᐅᔑᒋᑲᑌᑭᐸᐣ ᒪᔭᑦ ᐱᐣᒋ ᐣᑕᔑᑫᐃᐧᓇᓂᐠ.
ᓂᓇᐃᐧᐟ ᑕᐡ ᒪᔭᑦ ᐣᑎᐯᐣᑕᒥᐣ ᐊᐦᑭ ᑲᐃᔑᐊᔭᐠ ᐊᔓᑲᐣ ᑲᐅᒋᐊᔓᐱᓱᓇᓂᐊᐧᐠ ᒋᑎᐸᐦᐃᑫᐦᐃᑕᐧ ᑲᐱᐅᒋᐊᔓᐡᑲᐊᐧᐨ ᐣᑕᑲᑭᒥᓇᓂᐠ ᑲᑎᐯᐣᑕᒪᐠ, ᑭᐃᑭᑐ.
ᒥᑕᐡ ᑲᑭᐃᔑ ᐅᓀᒋᑲᑌᐠ ᒋᑭᐸᐦᐃᑲᑌᐠ ᐊᓂᐊᐱᑕᑭᔑᑲᐠ ᒪᑯᐱᓯᑦ 21 ᐃᓇᑭᓱᐨ, ᐁᑲᐧ ᐊᐱᐣ ᔕᑯᐨ ᑲᔭᓂ ᒪᒪᐃᐧᐡᑲᐊᐧᐨ ᐃᐡᑯᓂᑲᓂᐠ ᑲᐅᒋᑎᐯᐣᑕᑯᓯᐧᐊᐨ ᒥᓇ ᑲᐱᐃᐧᒋᑲᐸᐃᐧᑕᑫᐊᐧᐨ ᒥᐠᐱᕑᓴᐣ ᑭᐱᑕᑯᔑᐣ ᐃᐧᓀᑕ, ᑲᐃᐧᐣ ᐅᑐᒋᐱᑐᓯᐣ ᑲᐃᐧᑭᐸᐦᐃᑲᑫᐸᐣ.
ᐅᑭᐅᐣᑕᒥᐊᔭᒥᐦᐃᑯᐣ ᐅᑭᒪᐅᓇᐣ ᐁᑭᑲᑫᐧᔕᑯᓱᒥᑯᐨ ᐁᑲ ᐱᓇᒪ ᒋᑭᐸᐦᐃᑫᐨ ᐃᐁᐧ ᑲᑭᔐᐸᔭᓂᐠ.
ᑭᐃᑭᑐᐊᐧᐠ ᒋᒥᓂᑯᔭᐠ ᐸᐣᑭ ᔓᓂᔭᐣ, ᐁᑲᐧ ᔕᑯᐨ ᐃᐁᐧ ᐣᑭᐃᓇᐠ ᐁᓇᑕᐁᐧᑕᒪᐠ ᑕᓱᔭᑭ ᒋᐃᔑᐱᒥᑎᐸᐦᐊᒪᑯᔭᐠ, ᑲᐃᐧᐣ ᑕᐡ ᐃᐁᐧ ᒋᐃᐧᑐᑕᒧᐊᐧᐨ, ᐅᑭᐃᔑᐃᐧᐣᑕᒪᐊᐧᐣ ᐃᒪ ᑲᑭᐅᑯᑲᐸᐃᐧᐊᐧᐨ ᐊᓂᔑᓂᓂᐊᐧᐠ ᑲᑭᐱᐃᐧᒋᑲᐸᐃᐧᑕᑫᐊᐧᐨ. ᐣᑭᐃᑭᑐᒥᐣ ᑕᐡ ᓂᐃᐧᑭᐸᐦᐃᑫᒥᓇᐸᐣ, ᐁᑲᐧ ᑕᐡ ᐊᒥᐱᑯᐦᐃ ᑫᐃᔑᑭᐸᐦᐃᑫᔭᐠ. ᐊᒥᐁᑫᐧᓇᐠ ᐁᓯᓭᐠ ᑲᓇᑕ ᐅᑭᒪᐅᐣ ᐁᑭᐱᑲᓄᓂᑯᔭᐠ.
ᒥᑕᐡ ᑌᐯᐧ ᑲᑐᑕᒧᐊᐧᐨ ᓇᐊᐧᐨ ᐊᔕ ᑲᔭᓂ ᐅᓇᑯᔑᐠ, ᐅᑭᐱᒋᑕᐸᓇᐊᐧ ᐃᐁᐧᓂ ᒪᑲᑯᓂ ᐁᐧᑎ ᑲᐱᐃᓇᑕᒧᓂᐠ ᐊᔑᐨ ᐊᓂᔑᓂᓂᐊᐧᐠ ᓂᑲᐣ ᐁᑭᐱᒧᓭᐊᐧᐨ, ᐁᑲᐧ ᑭᐃᐧᒋᑕᐧᐊᐧᐠ ᐁᐊᑲᐧᓯᑐᐊᐧᐨ ᒪᑲᑯᓂ ᐃᒪ ᐁᑭᐃᔑᑭᐱᓯᐊᐧᐨ ᒥᑲᓇᐠ.
ᑲᑭᓇ ᑕᐡ ᐊᐃᐧᔭ ᐃᐧᐊᔓᐱᓱᐨ ᐯᔑᑲᐧᐱᐠ ᑕᐃᓇᑭᐣᑕᒪᐊᐧᑲᓄᐃᐧ.
ᑕᓂᔭᐣ ᒧᓱ, ᑯᒋᒋᐣᐠ ᐊᓂᔑᓂᓂ ᐃᑭᑐ ᐅᑕᓇᐠ ᑲᐱᒥᑯᓇᑲᓂᐠ ᑭᐊᔭᑭᓀ ᒪᒥᑫᐧᐸᐣ ᒪᓯᓇᐦᐃᑲᓇᐣ ᐁᑎᐸᒋᒧᒪᑲᓂᐠ ᑲᑭᐱᐃᔑ ᐊᐧᐃᐧᓂᒋᑲᑌᑭᐣ ᑯᒋᒋᐣᐠ ᐊᐦᑭᐣ. ᐁᑲᐧ ᒥᓇ ᐃᐧᐣᒋᑫᒪᑲᐣ ᑫᑯᓀᐣ ᑲᐅᒋᐃᐧᑭᐸᑯᐡᑭᑫᐊᐧᐨ ᐁᓇᑕᐁᐧᐣᑕᒧᐊᐧᐨ ᒋᑎᐸᐦᐊᒪᐃᐧᑕᐧ ᑲᑭᐃᐧᓂᒋᑲᑌᓂᐠ ᐅᑕᑭᒥᐊᐧ ᐃᒪ ᐅᑎᐡᑯᓂᑲᓂᐊᐧ ᐁᑲᐧ ᒥᓇ ᒋᑎᐸᐦᐊᒪᐃᐧᑕᐧ ᑲᑭᐃᔑᑯᓯᐦᐃᐣᑕᐧᐸᐣ ᑲᑭᐃᔑᐃᐧᓂᒋᑲᑌᓂᐠ ᐊᐦᑭᑲᐠ.
ᐣᑕᔭ ᐅᒪ ᓄᑯᑦ ᑲᑭᔑᑲᐠ, ᐁᐃᐧᒪᓇᒋᑐᔭᐣ ᐣᑕᑭᑦ ᒥᓇ ᐣᑕᐊᐧᔑᔑᒪᐠ ᑲᐃᔑᑌᐸᑫᐣᑕᑯᓯᐊᐧᐨ ᒥᓇ ᐁᐧᑎ ᓂᑲᐣ ᑫᐊᓂ ᐊᓂᑫᐱᒪᑎᓯᐊᐧᐨ ᐣᑕᓂᔑᓂᓂᒪᐠ, ᐃᑭᑐ ᒪᐧᕑᓱ.
ᐅᐡᑲᐨ 2009 ᑲᐊᓂᐱᒥᓭᐠ, ᒣᑲᐧᐨ ᐁᐱᒥᓇᓇᑲᒋᒋᑲᑌᐠ ᐊᐦᑭ ᐃᒪ ᑯᒋᒋᐣᐠ, ᑭᒥᑭᑲᑌ ᒥᐢᑕᐦᐃ ᐁᐊᔭᐠ ᑲᐱᒋᐳᐃᐧᓂᐊᐧᐠ ᐊᔑᐡᑭᑲᐠ ᐯᔓᐨ ᑲᐃᔑᐸᑕᑭᑌᑭᐣ ᐊᐧᑲᐦᐃᑲᓇᐣ ᑲᐃᔑᑕᐊᐧᐨ ᐊᐃᐧᔭᐠ. ᐦᐊᕑᐃ ᐅᒥᑲᓇᑦ ᐃᔑᓂᑲᑌ ᐃᒪ ᑲᑭᐃᔑᓇᓇᑲᒋᒋᑲᑌᑭᐸᐣ. ᐁᑲᐧ ᐣᑭᐃᔑᒥᑭᑫᒥᐣ ᐅᐁᐧ ᑲᑭᓇᓇᑕᐃᐧᑭᑫᒋᑲᑌᐠ ᐊᐦᑭ, ᐃᒪ ᑲᑭᒥᑭᑲᑌᐠ ᐱᒋᐳᐃᐧᐣ ᑲᑕᑲᐧᐠ ᑭᐅᒋᒪᑲᐣ ᐁᑲ ᑲᐧᔭᐠ ᐁᑭᐅᒋ ᐁᐧᐱᓇᒧᑯᐸᓀᐣ ᐁᐧᐱᓂᑫᐊᐧᐳᐣ ᑲᑭᑎᐯᐣᑕᒧᑯᐸᓀᐣ ᐁᐧᐡᑲᐨ ᑕᐡᑭᐳᒋᑫᐃᐧᑲᒥᑯᓂ ᐃᒪ ᒪᔭᑦ ᐃᐡᑯᓂᑲᓂᐠ, ᔓᓂᔭᐃᐧᑭᒪ ᑲᑭᐅᑕᐱᓇᑭᐸᐣ ᒋᐃᔑᑕᐦᐃᑕᐧ ᐊᓂᔑᓂᓂᐊᐧᐠ ᒣᑲᐧᐨ 1900 ᑲᔭᓂᐅᐡᑭᓭᐠ.
ᐊᔕ ᓂᔑᐣ ᑎᐯᐣᒋᑫᐃᐧᓇᐣ ᑭᓴᑭᑕᒧᐦᐊᐊᐧᐠ ᑲᑭᐃᔑᑕᐊᐧᐸᐣ ᐁᐧᓴ ᐃᒪ ᑲᐃᔑᐃᐧᓂᔭᓂᐠ ᐊᐦᑭᓂ, ᔕᑯᐨ ᐯᔑᐠ ᑎᐯᐣᒋᑫᐃᐧᐣ ᑭᑭᐁᐧᐱᐣᑎᑫᑯᓯᐊᐧᐠ ᐁᑲ ᐁᑕᐃᐧᓭᓭᓂᐠ ᑯᑕᑭᓂ ᐊᐧᑲᐦᐃᑲᓂᐠ ᑯᒋᒋᐣᐠ.
ᓂᓇᐃᐧᐟ ᐅᐁᐧ ᐣᑕᑭᒥᓇᐣ ᐁᑲᐧ ᐃᓯᓭ ᒋᓂᐸᐃᐧᑕᒪᐠ ᐁᑲ ᓄᓯᓯᓇᓂᐠ ᐁᑲ ᐅᐁᐧ ᒋᐃᐧᓯᓭᐊᐧᐨ ᓂᔑᑕᓇᐃᐧᕑᑭ ᓂᑲᐣ, ᐃᑭᑐ ᐦᐊᓫᐃ ᑯᑲᕑ ᑯᒋᒋᐣᐠ ᐊᓂᔑᓂᓂᑫᐧ.
ᑲᐃᐧᓂᐣ ᐃᑭᐁᐧᓂᐊᐧᐠ ᐸᐧᕑᐟ ᑊᕑᐊᐣᓯᐢ ᐅᑌᓇᐠ ᑲᑲᐯᔑᐊᐧᐨ ᑲᓄᑎᓇᑭᑕᐧ, ᐊᐧᐁᐧᔕ ᒪᔭᑦ ᑲᓄᑎᓇᔭᐠ ᐅᑭᒪᐅᐣ, ᑭᔭᓂᐃᑭᑐ. ᐊᓇᐃᐧᐣ ᐊᑎᐟ ᑲᑭᐱᔕᔕᐳᐱᓱᐊᐧᐨ ᐅᑭᓂᓯᑕᐁᐧᑕᓇᐊᐧ ᑫᑯᓀᐣ ᑲᐅᒋᑐᑕᒧᐊᐧᐨ ᐊᓂᔑᓂᓂᐊᐧᐠ, ᐊᓂᐟ ᒥᓇ ᑲᑭᔕᐳᐱᓱᐊᐧᐨ ᐅᑭᒪᒪᒋᓂᑲᓇᐊᐧᐣ ᐊᓂᔑᓂᓂᐊᐧᐣ ᒥᓇ ᑲᐃᐧᐣ ᒋᑭᐅᒋᐃᐧᑎᐸᐦᐃᑫᐊᐧᐨ. ᐁᑲᐧ ᒥᓇ ᑲᐊᓂᐱᒥ ᔕᐳᐱᓱᐊᐧᐨ ᑭᐊᓄᓇᐊᐧᐠ ᒪᓯᓇᐦᐃᑲᓂ ᒋᐃᔑᓂᔕᐦᐊᒧᐊᐧᐨ ᐅᑭᒪᐅᓂᐠ ᐁᐅᒋ ᑲᑫᐧᑌᐧᑕᒪᑫᐊᐧᐨ ᒋᐃᐧᒋᑲᐸᐃᐧᑕᐃᐧᑕᐧ
ᒥᐱᑯ ᑫᐃᔑ ᐱᒥᑎᐸᐦᐃᑫᐦᐃᑕᐧ ᐊᐃᐧᔭᐠ ᐃᐧᔕᐳᐱᓱᐊᐧᐨ ᐸᓂᒪ ᐱᑯ ᑯᒋᒋᐣᐠ ᐊᓂᔑᓂᓂᐊᐧᐠ ᐅᑕᓂᒥᓭᐃᐧᓂᐊᐧ ᑭᒥᓇᐧᑐᐨ ᔓᓂᔭᐃᐧᑭᒪ.
ᑯᒋᒋᐣᐠ ᐊᓂᔑᓂᓂᐊᐧᐠ ᐁᑲ ᑲᐃᔑᓇᐦᐃᓭᐊᐧᐨ.
ᐊᔕ ᒥᔑᓄᔭᑭ ᐣᑐᒋᐱᐦᐊᒥᐣ ᐅᑭᒪᐅᐣ ᒋᑎᐸᐦᐊᒪᑯᔭᐠ ᓂᓇᐃᐧᐟ ᑲᐊᓂᔑᓂᓂᐃᐧᔭᐠ ᐁᑲᐧ ᒥᑕᐡ ᐃᑯ ᐁᑕ ᐁᔑᓇᑲᐧᐠ ᒋᑭᐅᑦᐱᑲᐸᐃᐧᑕᒪᐠ ᒋᐅᒋ ᐱᓯᐢᑫᓂᒥᑯᔭᐠ. ᐊᔕ ᐱᑯ ᓂᑭᓇᐃᐧᐱᐦᐅᒥᐣ ᒥᓇ ᑲᐃᐧᐣ ᐊᐊᐧᔑᒣ ᐣᑲᐸᑭᑎᓇᒥᐣ ᒋᒧᒋᐊᐃᑐᑕᑯᔭᐠ, ᐃᑭᑐ ᓂᐠᑭ ᐱᕑᐅ ᑯᒋᒋᐣᐠ ᐊᓂᔑᓂᓂᑫᐧ.
ᑲᐧᔭᐠ ᐃᑯ ᐣᑎᓇᑎᓯᒥᐣ ᑫᓂᓇᐃᐧᐟ. ᓂᒧᒋᑎᐦᐃᑫᐦᐃᐁᐧᒥᐣ, ᑲᐃᐧᓂᐣ ᓂᑭᐱᐡᑭᑫᓯᒥᐣ. ᓴᑲᒪᐨ ᐃᑯ ᐣᑐᑕᒥᐣ, ᑲᐃᐧᐣ ᑲᔦ ᐊᐃᐧᔭᐠ ᐣᑐᒋᑲᑫᐧ ᐊᐧᓂᑐᑕᐊᐧᓯᒥᐣ, ᐃᑭᑐ ᐱᕑᐅ.
ᐅᐁᐧᓂ ᑕᐡ ᑲᑭᑐᑕᒧᐊᐧᐨ ᐅᐣᒋᐊᓄᑭᓭᓂ. ᐊᒥ ᐁᑭᑐᐨ ᑯᒋᒋᐣᐠ ᐅᓇᔓᐁᐧᐃᐧᑫᐧ ᑯᐢᑎᐣ ᒐᐧᕑᑌᐣ, ᔓᓂᔭᐃᐧᑭᒪ ᒐᐠ ᐢᑕᕑᐊᓫ, ᑭᐃᑭᑐ ᐁᐃᐧᑭᐅᑫᐨ ᐊᓂᐸᐱᒥᑯᓇᑲᓂᐠ ᐁᐃᐧᑲᑫᐧ ᒪᒥᓇᐧᑐᐨ ᐅᐁᐧᓂ ᐁᑲ ᑲᐃᔑᓇᐦᐃᓭᐊᐧᐨ ᐊᓂᔑᓂᓂᐊᐧᐠ. ᐁᑲᐧ ᒣᑲᐧᐨ ᒪᑯᐱᓯᑦ 25 ᑲᐃᓇᑭᓱᐨ, ᑭᔭᐱᐨ ᐅᑭᑎᐸᐦᐃᑫᐦᐊᐊᐧᐣ ᑲᐸᐱᒥᐱᓱᐊᐧᐨ ᒥᑲᓇᐠ.