ᕑᐃᐠ ᑲᕑᐃᐠ ᐊᐧᐊᐧᑌ ᐊᒋᒧᐃᐧᓇᐣ

ᐅᐡᑲᑎᓴᐠ ᐅᑭᐅᑕᐱᓇᓇᐊᐧ ᑲᑭᐸᑭᑎᓂᑲᑌᐠ ᐱᐊᐧᐱᑯᑫᐃᐧ ᑭᑭᓄᐦᐊᒪᑫᐃᐧ

ᐊᐱᑕ ᐊᐊᐧᔑᒣ ᑭᐊᐣᓭᐧᐃᐧᓄᐊᐧᐠ ᐅᐡᑲᑎᓴᐠ ᑲᑭᐅᑕᐱᓇᒧᐊᐧᐨ ᒥᓂᑯᐠ ᑲᑭᐃᓀᐣᒋᑲᑌᑭᐸᐣ ᒋᑕᓯᓄᐊᐧᐨ ᐃᐁᐧ ᐱᐊᐧᐱᑯᑫᐃᐧ ᑭᑭᓄᐦᐊᒪᑫᐃᐧ ᑲᐯᔑᐃᐧᓇᐣ ᐁᐧᑎ ᐁᐧᐱᑫᐧᐠ ᒥᓇ ᐊᑯᑭᐠ.
ᒪᒪᐤ 104 ᐅᐡᑲᑎᓴᐠ ᑭᐱᔕᐧᐊᐠ, ᐁᑲᐧ ᑕᐡ 60 ᐁᑕ ᓂᐣᑭᐃᓀᐣᑕᒥᓇᐸᐣ ᒋᐱᔕᐧᐊᐨ, ᐃᑭᑐ ᓫᐃᔭᐣ ᐦᐊᓫ, ᑲᔭᓂᑫᐅᑭᒪᐅᐨ ᐊᓄᑭᑕᒪᑫᐃᐧᓂᐠ ᐃᒪ ᓇᐧᕑᐊᐣᐟ ᐊᓄᑭᐃᐧᓂᐠ ᐃᒪ ᐱᐊᐧᐱᑯᐠ ᐁᑭᐱᐅᐣᒋ ᐱᒋᓂᔕᐦᐊᐠ ᐅᒪᓯᓇᐦᐃᑲᐣ. ᒪᐊᐧᐨ ᐃᑯ ᐅᑭ ᑭᒋᒥᓀᐧᑕᓇᐊᐧ ᑲᑭᓇ ᐊᐃᐧᔭᐠ ᑲᑭᐱᔕᐊᐧᐨ.
ᐁᐧᐱᑫᐧ ᐅᑭᒪᑲᐣ ᑲᓀᓂᔭᐢ ᐊᐧᐸᐢ ᐃᑭᑐ ᐅᐁᐧᓂ ᐱᐊᐧᐱᑯᑫᐃᐧ ᑭᑭᓄᐦᐊᒪᑫᐃᐧᓂ (ᑲᓇᓇᑕᐃᐧᔓᓂᔭᐊᐧᓯᓂᐁᐧᐊᐧᐨ ᒥᓇ ᐊᓄᑭᐃᐧᓇᐣ ᑲᐱᒧᑐᐊᐧᐨ ᑲᐃᐧᑕᓄᑭᒥᑐᐊᐧᐨ ᑲᓇᑕ ᐊᐦᑭᐠ) ᐃᐧᓇᐊᐧ ᑲᑭᐅᓇᑐᐊᐧᐨ ᑲᐯᔑᐃᐧᓇᐣ ᐅᐡᑲᑎᓴᐠ ᒋᐊᐣᑕᐃᐧ ᑕᔑ ᑭᑭᓄᐦᐊᒪᐃᐧᑕᐧ ᐱᐊᐧᐱᑯᑫᐃᐧ ᐊᓄᑭᐃᐧᓇᐣ ᑲᐃᔑᒋᑫᓇᓂᐧᐊᐠ ᐃᒪ ᒪᔭᑦ ᐱᐊᐧᐱᑯᑫᐃᐧᐣ ᑲᐃᐧᐃᔑ ᑲᑫᐧᒪᒋᒋᑲᑌᐠ.

ᐊᒥ ᐁᑲᐧ ᒋᐊᓂᔑ ᑲᑫᐧ ᓴᑲᑫᐣᑕᒧᐊᐧᐨ ᐊᐧᑯᒪᑲᓇᐠ

ᒐᐧᕑᑎᐣ ᐊᐧᐸᐢ ᑲᑭᐅᐣᒋᐨ ᐅᑕᔑᑫᐃᐧᓂᐠ ᐁᐧᐱᑫᐧᐠ ᑭᐃᔑᓇᐦᐃᓇᑲᓂᐃᐧ ᒣᑲᐧᐨ ᒪᑯᐱᓯᑦ 16 ᑲᐃᓇᑭᓱᓂᐨ.
“ᒥᐢᑕᐦᐃ ᑭᐊᔭᒪᑲᐣ ᒧᔑᐦᐅᐃᐧᐣ ᒣᑲᐧᐨ ᑲᐱᒥᓇᐦᐃᓂᑲᓂᐊᐧᐠ,” ᐃᑭᑐ ᑭᒋᐅᑭᒪᑲᐣ ᐢᑕᐣ ᐯᕑᑎ. “ᒪᐊᐧᐨ ᐃᑯ ᑭᑐᑭᐡᑲᑫᒪᑲᐣ. ᐃᑭᐁᐧᓂᐊᐧᐠ ᒪᐊᐧᐨ ᐅᑭ ᑭᒋᐊᓂᒥᐦᐃᑯᓇᐊᐧ ᑫᒋᐊᐧᐠ ᑲᑭᐊᐧᑯᒪᐊᐧᐨ, ᐅᓂᑭᐦᐃᑯᐣ, ᒥᓇ ᐃᐧᒋᓂᑕᐃᐧᓂᒪᑲᓇᐣ. ᒪᐊᐧᐨ ᐃᑯ ᐣᑌᐦᐃᐠ ᓂᑭᐅᒋᑐᑭᐡᑲᑯᐣ ᐊᓂᐡ ᐁᑭᑫᐣᑕᒪᐣ ᐊᓂᐣ ᐁᐃᓇᒪᐣᒋᐦᐅᐊᐧᐨ ᐊᐧᑯᒪᑲᓇᐠ ᐅᐁᐧᓂ ᐅᑎᓯᓭᐃᐧᓂᐊᐧ.”
ᐯᕑᑎ ᑫᐃᐧᐣ ᐅᑭᐊᐧᓂᐦᐊᐸᓂᐣ ᐅᑯᓯᓴᐣ ᓭᓯᑯᐨ ᐁᑭ ᐅᐣᒋᐊᐧᓂᐦᐊᐨ ᓇᐣᑕ ᓂᓴᐧᓱᔭᑭ ᐅᑕᓇᐠ.
“ᐣᑭᑫᐣᑕᐣ ᑕᐡ ᐊᓂᐣ ᐁᐱᒋᐊᑫᐧᐣᑕᑲᐧᓂᐠ ᒣᑲᐧᐨ ᑲᐱᒥᐃᐧᒋᐃᐧᑯᐊᐧᐨ,” ᐯᕑᑎ ᐃᑭᑐ.
ᐯᕑᑎ ᐃᑭᑐ ᐃᐁᐧ ᒥᑎᑯᐊᐧᐡ ᑲᑭᐃᔑᐱᓇᐦᐃᑲᑌᐠ ᒥᔭᐤ ᑲᐃᐧᐣ ᒋᐅᐣᒋ ᐸᑭᓂᑲᑌᐠ ᒥᓇ ᑲᐃᐧᐣ ᒋᐅᐣᒋ ᐸᑭᑎᓂᑲᑌᐠ ᒋᐊᐧᐸᐣᒋᑲᑌᐠ.

ᐱᒥᐊᓄᑲᑌ ᓇᑕᐃᐧᐦᐃᐁᐧᐃᐧᐣ ᒋᔭᓄᒥᓄᔭᐨ ᐊᓂᔑᓇᐯ

ᑲᑭᔕᐳᐡᑲᒧᐊᐧᐨ ᐁᐧᐡᑲᐨ ᑲᑭᐱᑲᓇᐁᐧᐣᑕᑯᓯᐊᐧᐨ ᑭᑭᓄᐦᐊᒪᑎᐃᐧᑲᒥᑯᐠ ᐊᓂᔑᓂᓂᐃᐧ ᐊᐊᐧᔑᔕᐠ ᑭᑕᐃᐧᓇᒪᐊᐧᐊᐧᐠ ᒋᐃᐧᐣᑕᒧᐊᐧᐨ ᐅᑎᐸᒋᒧᐃᐧᓂᐊᐧ ᒣᑲᐧᐨ
ᐊᓂᔑᓇᐯ ᐊᐢᑭ ᐁᐧᐡᑲᐨ ᑲᑭᐱᑲᓇᐁᐧᐣᑕᑯᓯᐊᐧᐨ ᑭᑭᓄᐦᐊᒪᑎᐃᐧᑲᒥᑯᐠ ᐊᓂᔑᓂᓂᐃᐧ ᐊᐊᐧᔑᔕᐠ ᒪᐊᐧᒋᐦᐃᑐᐃᐧᐣ ᒣᑲᐧᐨ ᓴᑭᐸᑲᐃᐧᐱᓯᑦ 11-12 ᐁᐧᑎ ᑕᐣᑐᕑ ᐯ.
ᕑᐊᓂ ᒧᓂᔭᐢ ᓀᐡᑲᐣᑕᑲᐣᐠ ᑲᐅᐣᒋᐨ ᐊᒥᐦᐊᐁᐧ ᐯᔑᐠ ᑲᑭᔕᐳᐡᑲᐠ. ᐁᐧᑎ ᑕᐡ ᓭᐣᐟ ᒍᓴᑊ ᐊᓂᔑᓇᐯ ᑭᑭᓄᐦᐊᒪᑎᐃᐧᑲᒥᑯᐠ (ᐸᐧᕑᐟ ᐃᐧᓫᔭᑦ ᐊᓂᔑᓇᐯ ᑭᑭᓄᐦᐊᒪᑎᐃᐧᑲᒥᐠ) ᐃᒪ ᑕᐣᑐᕑ ᐯ ᒣᑲᐧᐨ 1962 ᐊᑯᓇᐠ 1968 ᑭᐱᒥ ᑭᑭᓄᐦᐊᒪᐊᐧᑲᓂᐃᐧᑯᐸᐣ.
ᕑᐊᓂ ᐃᓇᒋᒧ ᒥᔑᐣ ᑫᑯᓇᐣ ᐁᑭᐊᐧᐸᐣᑕᐠ ᐁᐃᔑᐁᐧᐸᓂᐠ ᒣᑲᐧᐨ ᑲᑭᑲᓇᐁᐧᐣᑕᑯᓯᐨ ᑭᑭᓄᐦᐊᒪᑎᐃᐧᑲᒥᑯᐠ.
“ᒥᔑᐣ ᐊᐊᐧᔑᔕᐠ ᐣᑭᐊᐧᐸᒪᐠ ᐁᒪᐃᐧᐊᐧᐨ,” ᑭᐃᓇᒋᒧ. “ᐊᒥ ᑫᓂᐣ, ᓂᐣᑭᒪᐤ, ᐁᐃᐧᑭᐁᐧᔭᐣ, ᐁᑲᐡᑫᓂᒪᑲᐧ ᓂᐊᐧᑯᒪᑲᓇᐠ.”

ᑲᐸᐸᒥᓯᑲᐣᑕᒧᐊᐧᐨ ᐃᐧᑲᐧᓯᑲᒪᐣᐠ ᑲᐊᔭᐠ ᐱᐊᐧᐱᑯᑲᐣ ᑭᒪᐊᐧᒋᐦᐃᑐᐊᐧᐠ

ᐃᐧᑲᓯᑲᒪᐣᐠ ᑲᐊᔭᐠ ᐱᐊᐧᐱᑯᑲᐣ ᐃᓇᒧᒋᑫᐃᐧᐣ ᒥᐦᐅᐁᐧ ᒪᔭᑦ ᑲᑭᐊᓂᒧᑕᒪᑎᓇᓄᐊᐧᐠ ᒣᑲᐧᐨ ᑲᑭᒪᐊᐧᒋᐦᐃᑎᓇᓄᐊᐧᐠ ᓴᑭᐸᑲᐃᐧᐱᓯᑦ 22-23 ᑕᐣᑐᕑ ᐯ ᐅᑌᓇᐠ.
“ᑭᐱᔕᐊᐧᐠ ᑲᐅᑭᒪᐃᐧᐊᐧᐨ ᐠᓫᐃᑊᐢ ᐱᐊᐧᐱᑯᑲᐣ ᐱᒧᒋᑫᐃᐧᐣ, ᑲᓂᑲᓂᐡᑲᐠ ᓇᐧᕑᐊᐣᐟ ᐱᐊᐧᐱᑯᑫᐃᐧ ᐊᓄᑭᐃᐧᐣ ᐁᑲᐧ ᒥᓇ KWG ᐱᐊᐧᐱᑯᐃᐧ ᐊᓄᑭᐃᐧᐣ ᐸᐸᑲᐣ ᐁᑭᐃᔑᓂᑲᑕᒧᐊᐧᐨ ᐊᓂᐣ ᑲᐃᔑᒥᓴᐁᐧᐣᑕᒧᐊᐧᐨ ᑲᐃᐧᐃᔑᒪᒋᐊᐧᐨ ᐃᓇᒧᒋᑫᐃᐧᓂ,” ᑭᐃᑭᑐ ᒪᔾᑯ ᐠᕑᐊᐳ, ᐅᑭᒪᐅᐣ ᑭᐁᑎᓄᐠ ᐊᓄᑭᐃᐧᐣ, ᐱᐊᐧᐱᑯᑲᐣ ᒥᓇ ᒪᓇᑎᑫᐃᐧᐣ. “ᑲᔭᐠ ᑭᐃᓯᓭ, ᒥᓇ ᒥᓄᐃᐧᒋᐃᐧᑎᐃᐧᓂᐠ ᑭᐃᔑᑲᓇᐊᐧᐸᒥᑎᓇᓄᐊᐧᐣ ᑲᐱᒥ ᒪᐊᐧᒋᐦᐃᑎᓇᓄᐊᐧᐠ, ᐊᓇᐃᐧᐣ ᐸᐸᑲᐣ ᑭᐃᓯᓭᐊᐧᐣ ᐃᓀᐣᑕᒧᐃᐧᓇᐣ. ᔕᑯᐨ ᐃᑯ ᐅᑭᓂᓯᑕᐁᐧᐣᑕᓇᐊᐧ ᐅᐣᒋᑕᐱ ᐱᑯ ᐁᑭᐃᓯᓭᓂᐠ ᒋᒪᒪᐃᐧᐡᑲᐊᐧᐨ ᒋᔭᓂᒧᑕᒪᑎᐊᐧᐨ ᐅᐁᐧᓂ ᐅᒋ. ᒥᐦᐅᐁᐧ ᑫᑭᑕᐸᑕᐠ ᐊᐱ ᐊᐱᐣ ᑭᑭᔑ ᐅᓀᐣᒋᑲᑌᑭᐣ ᑫᑯᓇᐣ.”

ᓇᑕᐁᐧᐣᑕᑲᐧᐣ ᒋᐊᔭᐠ ᐃᐡᑯᓂᑲᓂᐠ ᐳᓂᐃᐧᑲᒥᑯᐠ ᐱᒥᓭᐃᐧᑲᒥᑯᐠ ᐊᐸᒋᒋᑲᐣ ᑲᐃᐧᐣᒋᑫᒪᑲᐠ ᑲᐱᐳᓂᒪᑲᐠ ᐱᒥᓭᐃᐧᐣ

ᕑᐃᐠ ᑲᕑᐃᐠ
ᐊᐧᐊᐧᑌ ᐊᒋᒧᐃᐧᓇᐣ
ᐁᑲ ᑲᑕᑲᐧᐠ ᐱᒥᓭᐃᐧᑲᒥᑯᐠ ᐊᐸᒋᒋᑲᐣ ᑲᐅᒋᐃᐧᐣᒋᑫᒪᑲᐠ ᑲᐱᐳᓂᒪᑲᐠ ᐱᒥᓭᐃᐧᐣ ᐃᒪ ᒣᒣᑫᐧᔑᐃᐧᓴᑲᐃᑲᓂᐠ ᒥᐦᐅᐁᐧ ᒪᐊᐧᐨ ᑭᒋᑫᑯᐣ ᑲᑭᐃᐧᐣᒋᑲᑌᐠ ᑲᐸᐸᔐᐣᑕᑲᐧᐠ ᒋᑭᑲᑫᐧᐊᔭᑭᐸᐣ ᓄᑯᒥᑫ ᑲᑭᐊᔭᑭᓀ ᑭᐅᑫᐊᐧᐸᐣ ᐅᑎᐸᒋᒧᐠ ᐃᒪ ᓂᔭᓇᐣ ᐊᓂᔑᓇᐯ ᐊᐢᑭ ᐃᐡᑯᓂᑲᓇᐣ.
“ᒪᐊᐧᐨ ᐃᑯ ᓂᓇᑕᐁᐧᐣᑕᐣ ᐅᐁᐧ ᐊᐸᒋᒋᑲᐣ ᒋᐊᔭᒪᐠ ᓂᐱᒥᓭᐃᐧᑲᒥᑯᓇᐣ” ᑭᐃᑭᑐ ᒣᒣᑫᐧᔑᐃᐧᓴᑲᐃᑲᓂ ᐅᑭᒪᑲᐣ ᕑᐃᑕ ᑕᐧᑦᓴᐣ ᒣᑲᐧᐨ ᒉᐣᐁᐧᕑᐃ ᐱᓯᑦ 18 ᑲᐃᓇᑭᓱᓂᐨ ᑲᑭᐊᔭᒥᐦᐊᐨ ᒥᓯᐁᐧᑲᒥᐠ ᒥᓇ ᐅᒪ ᐯᔓᐨ ᑌᑎᐸᐦᐃ ᑲᐃᔑᐸᑭᑎᓇᒧᐊᐧᐨ ᑎᐸᒋᒧᐃᐧᓇᐣ ᑲᑭᐱ ᐱᔕᐊᐧᐨ ᐃᒪ ᑲᑭᐃᔑᐸᐣᑭᓯᓂᐠ ᑭᐢᑐᐣ ᐁᕑ ᐱᒥᓭᐃᐧᓂ ᒣᑲᐧᐨ ᐁᑲᑫᐧᐳᓂᒪᑲᑭᐸᐣ ᐃᐁᐧ ᐱᒥᓭᐃᐧᐣ ᑲᑭᓄᐣᑌᐸᐣᑭᓯᐠ ᒉᐣᐁᐧᕑᐃ ᐱᓯᑦ 10 ᐁᑲᐧ ᑲᔦ ᒪᐊᐧᐨ ᑭ ᑭᒋᓱᑭᐸᐧᓂᓄᐁᐧᐸᐣ ᐃᐁᐧ ᐊᐱ. “ᑲᓂᑲ ᐊᐱ ᑫᐃᓯᓭᑫᐧᐣ, ᐸᓂᒪ ᑲᓇᐱᑯ ᑭᒋᒪᒋᓭᐃᐧᐣ ᐁᓇᑭᐡᑭᒪᐠ ᑫᑲᐱ ᓂᑲᐱᓯᐢᑫᓂᒥᑯᐣ. ᒥᑐᓂ ᐱᑯ ᐊᐧᐊᐧᓀᐣᑕᑲᐧᐣ.”

ᑲᑭᐱᒧᓭᐊᐧᐨ $78,000 ᑭᔓᓂᔭᑫᐊᐧᐠ ᒋᐅᔑᒋᑲᑌᐠ ᐃᐧᒋᐦᐃᐁᐧᐃᐧᑲᒥᐠ

ᕑᐃᐠ ᑲᕑᐃᐠ
ᐊᐧᐊᐧᑌ ᐊᒋᒧᐃᐧᓇᐣ
ᐅᑭᐢᑭᒪᓂᓯᐊᐧᐳ ᐅᓇᔓᐁᐧᐃᐧᓂᓂ ᐃᐧᓂᔭᑦ ᒥᑭᓇᐠ ᐁᑲᐧ ᐯᔑᐠ ᐅᐡᑲᑎᐢ ᑊᕑᐊᔭᐣ ᓯᓇᐊᐧᑊ $78,000 ᑭᔓᓂᔭᑫᐊᐧᐠ ᑲᑭᐱᒧᓭᐊᐧᐨ 500 ᑭᓫᐊᒥᑐᕑᐢ ᐊᐧᓂᓇᐊᐧᑲᐠ ᑲᑭᐃᓇᐦᐊᑐᐊᐧᐨ ᐃᐁᐧᓂ ᐅᐣᒋ ᑲᐸᑯᓭᐣᑕᑲᐧᐠ ᒋᐅᔑᒋᑲᑌᓂᐠ ᐃᐧᒋᐦᐃᐁᐧᐃᐧᑲᒥᑯᓂ.
“ᒪᐊᐧᐨ ᐃᑯ ᑭᑭᒋᒪᒪᒋᑭᔑᑲ ᒣᑲᐧᐨ ᐃᐁᐧ ᐊᐱ, ᑭᒪᒥᑯᒥᐃᐧᐱᓴᐦᐊᐣ, ᒥᑕᐡ ᑲᑭᐅᐣᒋᐸᐧᑕᐃᐧᓭᐠ ᒋᑭᔑᑐᔭᐠ ᑲᑭᐱᒧᓭᔭᐠ,” ᐃᑭᑐ ᒥᑭᓇᐠ, ᐃᐧᐣ ᐅᐁᐧᓂ ᐅᑭᔭᓂ ᒪᒥᑐᓀᑕᓇᐸᐣ ᒋᑭᐃᔑᒋᑫᐸᐣ ᐅᑕᓇᐠ ᑕᑲᐧᑯᐠ ᐊᐧᑌᐸᑲᐃᐧᐱᓯᒧᐣ 2011 ᐊᐱ ᐃᒪ ᐅᑕᔑᑫᐃᐧᓂᐠ ᑲᑭᐊᐧᓂᐦᐊᐊᐧᐸᐣ ᓂᔑᐣ ᐅᑕᓂᔑᓂᓂᒥᐊᐧ ᒪᐡᑭᑭᑫᐃᐧᐣ ᑲᑭᐅᐣᑕᐱᓇᓂᑯᐊᐧᐨ. “(ᑲᐃᐧᐣ ᑲᓇᑫ ᓂᐦᓱᑯᐣ ᒋᐅᒋᐱᒥᓭᐠ ᐊᐱᐣ ᑲᑭᓂᐣᑭᑌᐠ ᐱᐳᓂᒥᑲᓇ. ᒪᐊᐧᐨ ᑭᔭᓂᒪᐣ ᐃᒪ ᒋᐱᒧᓭᓇᓂᐊᐧᐠ).”
ᐃᐧᐸᐨ ᐃᑯ ᑭᔭᓂᐃᓯᓭᓂ ᒥᑭᓇᐠ ᑲᑭᔭᓂᐱᑫᐧᐱᐡᑲᐠ ᐅᒪᑭᓯᓇᐣ ᐃᒪ ᐱᐳᓂᒥᑲᓇᐠ.

ᐊᐧᐃᔦᑲᒪ ᐅᑭᒪᑲᐣ ᐸᑯᓭᐣᑕᑦ ᒥᓇᐊᐧ ᒋᑕᑲᐧᐠ ᐸᑭᑕᐦᐁᐧᐃᐧᐣ

ᐊᐧᐃᐧᔦᑲᒪ ᐅᑭᒪᑲᐣ ᐱᔦᕑ ᒪᐧᕑᓱ ᑭᑲᑫᐧᑌᐧᐸᐣ ᑭᐡᐱᐣ ᒥᓇᐧᐊ ᒋᑭᐊᔭᒪᑲᑭᐸᐣ ᐸᑭᑕᐦᐁᐃᐧᐣ ᐃᒪ ᐅᑎᐡᑯᓂᑲᓂᐠ.
“ᑭᔭᐱᐨ ᐃᑐᐠ ᑭᓄᔐᑐᐠ,” ᑭᐃᑭᑐ ᒪᐧᕑᓱ, ᒥᐊᑯ ᐁᔑᒋᑫᐸᐣ ᑲᐯᐱᒥᑯᓇᑲ ᐁᐸᑭᑕᐦᐁᐸᐣ ᐊᑯᓇᐠ ᒣᑲᐧᐨ 1980 ᑲᐱᒥᔭᑭᐊᐧᓂᐠ. “ᒪᐊᐧᐨ ᓂᒥᓴᐁᐧᐣᑕᒥᐣ ᒥᓇᐊᐧ ᐅᐁᐧ ᒋᑭᒪᒋᒋᑲᑌᑭᐸᐣ ᑫᐃᐧᓇᐊᐧ ᑭᑐᐡᑲᑎᓯᒥᓇᓂᐠ ᐅᐁᐧᓂ ᒋᑭᐃᔑᒋᑫᐊᐧᐸᐣ.”
ᒪᐧᕑᓱ ᑭᐃᑭᑐ ᐅᐁᐧ ᐸᑭᑕᐦᐁᐃᐧᐣ ᑭᐳᓂᒋᑲᑌᐸᐣ ᐅᑕᔑᑫᐃᐧᓂᐠ ᒣᑲᐧᐨ ᐊᐱ 198- ᑲᐱᑭᔭᑭᐊᐧᓂᐠ ᐁᑲ ᐊᐱᐣ ᐊᐊᐧᔑᒣ ᑲᑭᐸᑭᑎᓇᑲᓄᐸᐣ ᔓᓂᔭ ᑫᐅᐣᒋ ᑎᐸᐦᐃᑲᑌᑭᐣ ᐸᑭᑕᐦᐁᐃᐧ ᐊᐸᒋᒋᑲᐣ ᒥᓇ ᐳᓯᑕᓱᐃᐧᐣ ᑲᐃᓇᑭᐣᑌᐠ ᐁᑲᐧ ᒥᓇ ᐁᑲ ᑲᑭᐅᐣᒋ ᓇᐱᐨ ᒥᐢᑕᐦᐃ ᐃᓇᑭᓱᐨ ᑭᓄᔐ.

ᐱᔓᓴᐃᑲᓂ ᐅᐡᑲᑎᓴᐠ ᐅᒧᑲᐊᐧᑕᓇᐊᐧ ᐊᐣᑎ ᑫᑭᔭᓄᒋᒥᓄᓭᐊᐧᐨ ᐊᓂᓂᑲᐣ

ᐱᔓᓴᑲᐃᑲᓂ ᐅᐡᑲᑎᓴᐠ ᒪᐡᑯᐨ ᐃᐧᓇᐊᐧ ᐅᑲᑭᔭᓂ ᑲᐡᑭᑐᓇᐊᐧ ᒋᑭᐃᐧᒋᑐᐊᐧᐨ ᒋᒥᓄᔭᒪᑲᐠ ᒥᓇ ᐁᑲ ᒋᑭᑭᒪᑲᑭᐣ ᑲᐊᐧᓂᔭᐸᒋᒋᑲᑌᑭᐣ ᒪᐡᑭᑭᐣ ᐁᐧᑎ ᐊᓂᓂᑲᐣ ᑫᔭᓂᐱᒪᑎᓯᐊᐧᐨ.
“ᐃᓯᓭ ᒋᓇᓇᑲᑕᐁᐧᓂᒪᑲᐧ ᐣᑕᐊᐧᔑᔑᒪᐠ ᐁᐧᑎ ᓂᑲᐣ,” ᑭᐃᑭᑐ ᓴᒥᓱ ᐁᐧᐢᓫᐃ, 37 ᑕᓱᔭᑭᐃᐧᓀ ᐱᔓᓴᑲᐃᑲᓂ ᐁᐅᒋᐨ ᐁᑲᐧ ᐅᑕᓇᐠ ᑲᔭᑭᐊᐧᓂᐠ ᑲᑭᔭᓂ ᒪᐡᑭᑭᑫᐨ. “ᐁᑲᓄᑫᔭᐣ ᐁᒪᐃᐧᔭᐣ ᑲᐊᐊᐧᔑᔑᐃᐧᔭᐣ ᓂᓂᑭᐦᐃᑯᐠ ᒋᑭᐁᐧᐃᐧᓂᔑᐊᐧᐨ.”
ᐁᐧᐢᓫᐃ ᐅᑎᐯᓂᒥᑯᐣ ᒪᐡᑭᑭᐣ ᐁᑲᐧ ᐊᐱᐣ ᐱᓂᐡ ᐁᑭᔭᓂ ᒪᑲᒪᑲᓄᐨ ᓂᔑᐣ ᐁᔭᑲᔐᔑᓂᐨ ᐅᑕᐊᐧᔑᔑᒪᐣ.
ᑫᐃᐧᐣ ᐁᐧᐢᓫᐃ ᑭᐅᑕᐱᓇᑲᓄᐸᐣ ᒣᑲᐧᐨ ᑲᐱᐊᐊᐧᔑᔑᐃᐧᐨ ᐁᑲᐧ ᓄᑯᑦ ᐁᓂᔓᔭᑭᐃᐧᓀᓂᐨ ᐅᑕᓂᓭᓴᐣ ᒥᓇ ᐁᓂᑯᑕᐧᓱᐱᓯᒣᓂᐨ ᐅᑯᓯᓭᓴᐣ ᓄᑯᒥᑫ ᑭᐅᑕᐱᓂᒪᐊᐧᐣ.

ᑭᒋᒪᐡᑭᑭᐃᐧᓂᓂ ᑭᐃᑭᑐ ᒋᒪᒪᐃᐧ ᐊᓄᑲᑌᐠ ᓇᓇᑕᐃᐧᑭᑫᐣᒋᑫᐃᐧᐣ ᑲᑭᐊᐧᐊᐧᓂᐦᐃᑕᐧᐸᐣ ᐅᐡᑲᑎᓴᐠ

ᕑᐃᐠ ᑲᕑᐃᐠ
ᐊᐧᐊᐧᑌ ᐊᒋᒧᐃᐧᓇᐣ
ᑭᐸᑭᑎᓂᑲᑌ ᑎᐸᒋᒧᐃᐧᐣ ᒋᒪᑕᓄᑲᑌᐠ ᒋᒪᒪᐊᐧᓄᑲᑌᐠ ᓇᓇᑕᐃᐧᑭᑫᐣᒋᑫᐃᐧᐣ ᐅᑯᐁᐧᓂᐊᐧᐠ ᓂᓴᐧᓱ ᐊᓂᔑᓇᐯ ᐊᐢᑭ ᐅᐡᑲᑎᓴᐠ ᑲᑭᐊᐧᓂᑐᐊᐧᐨ ᐅᐱᒪᑎᓯᐃᐧᓂᐊᐧ ᒣᑲᐧᐨ ᐁᐃᐡᑯᓄᐊᐧᐸᐣ ᐦᐊᔾ ᐢᑯᓫ ᐁᐧᑎ ᑕᐣᑐᕑ ᐯ ᐅᑌᓇᐠ.

ᐁᕑᐅᓫᐊᐣᐟ ᐊᓂᔑᓂᓂᐊᐧᐠ ᑲᑭ ᑭᑎᑫᐊᐨᐧ ᑭᒥᓄ ᓂᑕᐃᐧᑭᒪᑲᓂᐊᐧᐣ ᑲᑭ ᑭᑎᑲᑕᒧᐊᐧᐨ

ᒪᕑᐠ ᐯᓫ ᐃᔑᓂᑲᓱ ᐁᕑᐅᓫᐊᐣᐟ ᐁᑲᐯᔑᐨ ᑲᐧᔭᐠ ᐃᑯ ᑭᒥᓄ ᓂᑕᐃᐧᑭᐊᐧᐣ ᑲᑭ ᑭᑎᑲᓇᐨ ᓇᓇᑲᐤ ᑭᑎᑲᓂᒥᒋᒪᐣ ᓂᔑᐣ ᑭᑎᑲᓂᐊᐧᑲᐦᐃᑲᓇᐣ ᑲᑭᐅᐣᒋ ᐅᔑᑐᐨ ᑫᑌ ᓇᐸᑭᓴᑲᐧᑎᑯᐣ ᒥᓇ ᑯᑕᑭᔭᐣ ᐊᐧᑲᐦᐃᑫᐃᐧ ᐊᐸᒋᒋᑲᓇᐣ ᑲᑭᐁᐧᐱᓂᑲᑌᓂᑭᐣ.
“ᐊᔕ ᑫᑲᐟ ᐊᓂᐊᑎᓱᐊᐧᐠ ᒥᑕᓱᒥᑕᓇ ᑭᒋᐅᑭᓂᐠ ᑲᑭ ᑭᑎᑲᓇᑲᐧ,” ᐃᑭᑐ ᐁᕑᐅᓫᐊᐣᐟ ᐃᐡᑯᓂᑲᓂᐠ ᔓᓂᔭᐃᐧᑲᓇᐊᐧᐸᒋᑫᐃᐧ ᐊᓄᑭᐃᐧᓂᐠ ᑲᐃᔑᐊᓄᑭᑕᒪᑫᐨ. “ᐣᑭ ᑭᑎᑲᓇᐠ ᒋᓫᐊ ᐯᐳᕑᐢ, ᐦᐊᓫᐃᐱᓄᐢ, ᑊᕑᐊᑯᓫᐃ, ᐅᑲᑕᑲᐧᐠ, ᐅᔕᐊᐧᐡᑯᐊᐣᒋᒥᓇᐠ. ᐱᑯ ᑫᑯᓇᐣ ᐣᑭ ᑭᑎᑲᑕᓇᐣ. ᒪᐊᐧᐨ ᐃᑯ ᑲᐧᔭᐠ ᑭᐃᔑᓇᑲᐧᓄᐣ ᑲᔭᓂ ᐊᑎᑌᑭᐣ.”

Pages

Subscribe to RSS - ᕑᐃᐠ ᑲᕑᐃᐠ ᐊᐧᐊᐧᑌ ᐊᒋᒧᐃᐧᓇᐣ