Syllabics

ᓂᐦᓴᐧ ᐊᔕ ᐸᑭᑎᓂᑲᑌ ᐅᒪᐊᐧᒋᐦᐃᑯᐃᐧᓂᐊᐧ ᓂᔕᐧ ᐯᔑᑯᔭᑭ ᑲᒪᐊᐧᒋᐦᐃᑕᐧ ᐅᑯᐁᐧᓂᐊᐧᐠ ᒪᑕᐊᐧ ᑲᐅᒋᑎᐯᐣᑕᑯᓯᐊᐧᐨ ᐊᓂᔑᓂᓂᐊᐧᐠ ᑲᑭᑭᓄᐦᐊᒪᑫᐊᐧᐨ ᐁᑲᐧ ᑕᐡ ᐊᓂᐣ ᒪᐊᐧᐨ ᑫᑭᐃᔑᒥᓄᓭᑭᐸᐣ ᑲᐱᒥ ᑭᑭᓄᐦᐊᒪᑲᓄᐊᐧᐠ, ᒥᐦᐅᐁᐧᓂ ᒪᔭᑦ ᑲᑭᐱᒥᔭᓂᒧᑕᒧᐊᐧᐨ.

ᐊᐧᒐᐢᑭᑯᓂᒥᐠ ᐃᐧᐸᐨ ᑲᑭ ᑭᔑᑐᐊᐧᐸᐣ ᓂᓯᐣ ᐊᐧᑲᐦᐃᑲᓇᐣ ᑭᒥᑲᐃᐧᐣᒋᑲᑌᐊᐧᐣ ᐅᑕᓄᑭᐃᐧᓂᐊᐧ ᒣᑲᐧᐨ 8 ᑕᓯ ᐊᐦᑭ ᐊᓂᔑᓇᐯ ᑭᐁᐧᑎᓄᐃᐧ ᐊᐧᑲᐦᐃᑲᓂᐃᐧ ᒪᐊᐧᒋᐦᐃᑎᐃᐧᐣ 2010 ᑭᔐᐱᓯᑦ 23 ᐊᑯᓇᐠ 25 ᑲᐃᓇᑭᓯᐠ ᐁᐧᑎ ᑕᐣᑐᕑ ᐯ.

ᐁᐧᐱᑫᐧᐠ ᒥᓇ ᐊᑯᑭᐠ ᐊᓂᔑᓂᓂᐊᐧᐠ ᐃᐧᓇᐊᐧ ᐅᐁᐧᓂ ᑯᐳᕑ ᓴᑲᐃᑲᓂᐠ ᑭᐸᑯᐡᑭᑫᐃᐧᐣ ᑲᓂᑲᓂᐡᑲᒧᐊᐧᐨ.

ᑭᐧᓀᐡ ᑭᐱᒥ ᓇᓇᑲᑕᐁᐧᒋᑲᑌ ᐊᓂᐣ ᑫᑭᐃᔑᓂᑲᑌᑭᐸᐣ, ᐊᒥ ᑕᐡ ᑲᑭᐃᔑ ᐅᓀᑕᑲᐧᐠ ᒋᐃᔑᓂᑲᑌᐠ ᒉᓂᒪᔭ ᒪᑫ ᑲᐯᔑᐃᐧᑲᒥᐠ ᐃᐁᐧ ᐊᐧᓂᓇᐊᐧᑲᐠ ᒪᐡᑭᑭᐃᐧᑭᒪᐃᐧᓂᐠ ᑲᐅᒋᐱᒧᒋᑲᑌᐠ ᐅᐡᑭ ᐅᑕᑯᓯᐃᐧᑲᐯᔑᐃᐧᑲᒥᐠ.

ᐊᓂᔑᓇᐯ ᐊᐢᑭ ᐅᐡᑲᑎᓴᐠ ᐅᑭᐊᐃᐡᐯᐧᐱᐡᑲᓇᐊᐧ ᐳᑕᒋᔭᓯᒋᑲᓇᐣ ᐁᑲ ᒋᐸᐣᑭᓯᓂᑭᐣ ᒧᒋᓴᑲᐠ ᒣᑲᐧᐨ ᐅᐡᑲᑎᓴᐠ ᑲᑭᒪᐊᐧᒋᐦᐃᑕᐧ ᐊᓂᔑᓂᓂᐃᐧ ᑭᑭᓄᐦᐊᒪᑫᐃᐧᓇᐣ ᑲᑭ ᑭᑭᓄᐦᐊᒪᐃᐧᑕᐧ ᐃᐁᐧᓂ ᐅᒋ ᒪᓀᐣᒋᑫᐃᐧᐣ ᐁᑲᐧ ᒥᓇ ᐊᓂᐣ ᑫᐃᔑ ᑌᐱᐊᐱᑌᓂᒥᑎᓱᐸᐣ ᐊᐃᐧᔭ.

ᐊᓂᔑᓇᐯ ᐊᐢᑭ ᓂᑲᓂᑕᒪᑫᐃᐧᓂᐠ ᐅᑲᑫᐧᒋᒪᐣ ᐊᓯᓂᑫᐃᐧᐱᒧᒋᑫᐃᐧᓇᐣ ᐱᓇᒪ ᓂᑲᐣ ᒋᑭ ᑲᑫᐧᒋᒪᐊᐧᐸᐣ ᐊᓂᔑᓂᓂᐊᐧᐣ ᐃᒪ ᐯᔓᐨ ᐅᑕᔑᑫᐃᐧᓂᐊᐧᐠ ᑲᐃᐧᐱᐃᔑ ᓇᓇᑕᐊᐧᓯᓂᐁᐧᐊᐧᐨ ᐁᒪᐧᔦ ᐃᒪ ᐃᐧᐱᔑ ᑎᐸᐦᐊᑲᑕᒧᐊᐧᐨ.

ᐊᐧᓭᔭ ᐱᒥᓭᐃᐧᐣ ᐅᑲᐸᑭᑎᓇᐣ 20-25 ᐅᑕᓄᑭᐣ ᑭᔐᐱᓯᑦ (Feb.) 1 ᒪᑕᐣᑭᓯᐨ. ᐃᑫᐧᓂᐊᐧᐠ ᑕᐢ ᑫᐸᑭᑎᓂᐣᑕᐧ ᐅᑕᓄᑭᐠ, ᐊᐦᐊᐁᐧ ᑲᐅᑭᒪᐃᐧᐨ ᒥᓇ ᑲᐊᓂ ᐊᓂᑫᐢᑲᐊᐧᐨ ᐅᑭᒪᐣ ᑕᐧᑦ ᒪᐧᕑᐃᐢ ᑲᑭᐃᐧᐣᑕᒧᐊᐧᐨ ᑲᐃᐧᐸᑭᑎᓂᐣᑕᐧ ᐅᑕᓄᑭᐠ, ᑕᓂᓯᓂᑲᑌᓂᐊᐧᐣ ᐅᑎᐸᐦᐃᑲᓂᐊᐧ ᑲᐃᔑᐊᔭᓄᑭᐊᐧᐨ ᓂᐅᑭᔑᐠ ᐁᐦᑕ ᒋᐊᓄᑭᐊᐧᐨ ᐃᐁᐧ ᓂᔭᓄᑭᓯᐠ ᑲᐃᔑᐊᔭᓄᑭᐊᐧᐸᐣ ᐅᑕᓇᐣᐠ.

ᐊᔕ ᑭᔕᐳᓭ ᑎᐸᑯᓂᑫᐃᐧᓂᐠ ᒋᐱᑎᑫᐃᐧᒋᑲᑌᓂᐠ ᐅᒪᒥᔑᑫᒧᐃᐧᐣ ᑭᓄᑲᒥᐠ #58 ᐁᐅᒋᑎᐯᐣᑕᑯᓯᐨ ᐃᑫᐧ ᑕᔭᐣ ᑯᕑᐊᐣᐟ ᐁᐃᔑᓂᑲᓱᐨ.

ᒉᒥ ᒪᐧᓇᐢᐟᕑᐃᐢᑭ ᐢᐱᕑᐃᐟ ᑎᐸᒋᒧᒪᓯᓇᐦᐃᑲᐣ ᑲᐃᔑᔭᓄᑭᐨ ᒪᐊᐧᐨ ᓂᐢᑕᑦ ᑭᐅᒋᒪᑕᓄᑭᐸᐣ ᐊᐧᐊᐧᑌ ᐱᒧᒋᑫᐃᐧᓂᐠ.

ᒥᑐᓂ ᐱᑯ ᑯᒐᓂᒥᓭ ᐅᒪ ᒪᐊᐧᒋᐦᐃᑐᐃᐧᑲᒥᑯᐠ, ᐃᑭᑐ ᐊᐣᒋ ᐦᐁᐟᕑᐃᐠ, ᑲᔭᓂᑫᐅᑭᒪᐅᐨ ᐃᐧᒋᐦᐃᐁᐧᐃᐧᑲᒥᑯ ᒪᐊᐧᒋᐦᐃᑐᐃᐧᑲᒥᑯᐠ ᐃᒪ ᓯᑦᓯᐣ ᒥᑲᓇᐠ ᑲᑕᑲᐧᐠ ᐁᐧᑎ ᑕᐣᑐᕑ ᐯ ᐅᑌᓇᐠ.