ᒉᕑᐃ ᒪᕑᑎᐣ ᑲᐧᔭᐠ ᑲᑫᐧᐃᐧᒋᐦᐃᑎᓱ ᑲᔓᑲᐊᐧᐱᓀᐨ

ᑲᑭᓇᑲᓇᒪᐢ ᐁᑲ ᒋᔓᑲᐊᐧᐱᓀᔭᐣ ᑲᐧᔭᐠ ᐃᓇᒋᑫᔭᐣ, ᒥᓇ ᑲᐧᔭᐠ ᑲᓇᐁᐧᓂᒥᑎᓱᔭᐣ

ᕑᐃᐠ ᑲᕑᐃᐠ
ᐊᐧᐊᐧᑌ ᐊᒋᒧᐃᐧᓇᐣ

ᒉᕑᐃ ᒪᕑᑎᐣ ᐅᑕᓂᒧᑕᐣ ᐊᔓᑲᐊᐧᐱᓀᐃᐧᐣ ᒋᐅᒋ ᑲᑭᑫᑕᒧᐊᐧᐨ ᐅᐡᑲᑎᓴᐠ.

ᓇᐱᐨ ᐊᓇᒪᐣ ᑲᔓᑲᐊᐧᐱᓀᓇᓄᐊᐧᐠ, ᐃᑭᑐ ᐊᓂᔑᓂᓂᐊᐧᑎᓯᐃᐧ ᑭᑭᓄᐦᐊᒪᑫᐃᐧᐣ ᑲᑭᑭᓄᐦᐊᒪᑫᐊᐧᐨ ᐁᐧᑎ ᑭᐱᐅᒋ ᒪᑕᑲᒥ ᐁᑲᐧ ᑕᐡ ᐊᔕ ᓂᐅᐊᐦᑭᐃᐧᐣ ᐅᒋᔓᑲᐊᐧᐱᓀ.

ᑕᓱᑭᔑᑲ ᓂᒪᒣᒋᑲᑐᐣ ᓂᓂᓯᑭᓯᑕᓇᐣ. ᑭᐡᐱᐣ ᔓᑲᐊᐧᐱᓀᔭᐣ, ᐅᒋᑕᐱᑯ ᑲᒪᒣᒋᑲᐦᐃᑎᐢ ᑕᓱᑭᔑᑲ, ᒥᓯᐁᐧ ᑲᐃᓂᑭᓂᔭᐣ.

ᐊᐧᐁᐧ ᒪᕑᑎᐣ, ᒣᑲᐧᐨ ᑲᐡᑲᑎᓄᐱᓯᑦ 5 ᑲᐃᓇᑭᓱᐨ ᐊᒥᔭᐱ ᑲᑭᔭᓂᒧᑕᑭᐸᐣ ᔓᑲᐊᐧᐱᓀᐃᐧᓂ ᒣᑲᐧᐨ ᔓᑲᐊᐧᐱᓀᐃᐧᐣ ᐊᓂᔑᓂᓂᐊᐧᐠ ᐅᑭᑫᑕᒧᐃᐧᓂᑯᐃᐧᓂᐊᐧ ᒥᓇ ᑫᑭᐅᒋᓇᑲᓂᑲᑌᐠ ᑭᔑᑲ ᐁᐧᑎ ᑕᐣᑐᕑ ᐯ, ᐅᑭᐊᐧᐃᐧᑕᐣ ᐁᑭᒥᓴᐁᐧᑕᐠ ᓂᔕᐧ ᐁᐃᐧᐸᑭᑕᐦᐊᒪᓱᐨ ᒣᑲᐧᐨ ᒪᑯᔐᑭᔑᑲ ᒪᑯᔐᓇᓄᐊᐧᓂᐠ ᐁᐧᐡᑲᐨ ᐊᑯ ᑲᑭᐱᓂᑕᑐᑕᑭᐸᐣ ᐁᒪᐧᔦ ᔓᑲᐊᐧᐱᓀᐨ.

ᐁᑲᐧ ᑕᐡ ᑭᐡᐱᐣ ᔓᑲᐊᐧᐱᓀᔭᐣ, ᑲᐃᐧᐣ ᐃᐁᐧ ᑲᑭᑐᑕᓯᐣ, ᐃᑭᑐ ᒪᕑᑎᐣ, ᐸᑭ ᐱᑯ ᐁᑕ ᑲᒥᒋᐣ ᐃᐧᔭᐢ, ᐁᑲᐧ ᒥᐡᑲᐧᐨ ᒥᐢᑕᐦᐃ ᑭᐢᑎᑲᓂᒥᒋᒪᐣ.

ᐃᑭᑐ ᒪᕑᑎᐣ ᑲᐃᐧᐣ ᐃᐧᑲ ᒋᑭᐱᐅᒋᓂᑕᒥᒋᐨ ᒪᐡᑯᔑᐣ ᒣᑲᐧᐨ ᑲᐱᐅᐱᑭᐨ, ᐁᑲᐧ ᔕᑯᐨ ᑭᐡᐱᐣ ᐊᐃᐧᔭᐣ ᐁᑲᑫᐧᒋᒥᑯᐨ ᒋᐊᒪᐧᐨ ᐅᑲᓴᐣ, ᐊᒥᐦᐃᐁᐧ ᒪᐊᐧᐨ ᑲᑭᓴᑭᑐᐨ ᐁᐃᓇᒋᑫᐨ.

ᑌᐯᐧ ᐊᓂᒪᐣ ᑲᔓᑲᐃᐧᓇᓄᐊᐧᐠ, ᐃᑭᑐ ᒪᕑᑎᐣ. ᑕᓱᑭᔑᑲ ᐣᐱᒥᑲᓇᐁᐧᓂᒥᑯᐣ.

ᑕᓱᑭᔑᑲ ᒪᕑᑎᐣ ᐅᒪᒣᒋᑲᑐᐣ ᐊᓂᐣ ᐁᐱᒋᐡᑲᒪᑲᓂᐠ ᐅᔓᑲᒪᐣ ᐃᒪ ᐅᒥᐢᑭᐧᒥᐠ ᐊᐊᐧᔑᒣ ᐯᔑᑲᐧ ᑕᓱᑭᔑᑲ, ᒥᓇ ᐅᐱᒥᓂᔕᐦᐊᐣ ᑫᐃᓇᒋᑫᐨ ᐊᓂᐣ ᑲᔭᐱᑕᑯᐡᑲᒪᑲᓂᐠ ᐅᔓᑲᒪᐣ.

ᐊᑎᑲ ᒪᐊᐧᐨ ᐁᐃᐡᐱᓭᐠ 15.8 ᐊᐱᑕᐱᑭᓭ, ᐃᑭᑐ ᒪᕑᑎᐣ ᐁᔭᓂᒧᑕᐣ ᑲᔭᐱᒋᐡᑲᒪᑲᓂᐠ ᐅᔓᑲᒪᐣ ᐅᒥᐢᑭᐧᒥᐠ. ᐁᑲᐧ ᒥᓇ ᒪᐊᐧᐨ ᑲᑕᐸᓯᓭᐠ 3.8 ᐊᐱᑕᐱᑭᓭ.

ᓂᒪᐡᑭᑭᐃᐧᑫᑦ ᐣᑭᐊᔭᑲᐧᒥᒥᐠ ᐁᑲ ᐃᐧᑲ ᒋᑐᑕᒪᐣ ᒐᐸᔑᐡ 3 ᒋᐊᐱᑕᐱᑭᓭᐠ.

ᒪᕑᑎᐣ ᐃᑭᑐ ᓇᔑᓀ ᐸᑲᐸᑫᐧᐡᑲᒪᒋᐦᐅ ᐁᑲᐧ ᒥᓇ ᓇᔑᓀ ᐁᔕᔑᑭᐨ.

ᓇᐱᐨ ᐊᑯ ᐣᑕᓂᒥᐃᐧᑐ ᓂᔕᐧ ᓇᐣᑕ ᓂᐦᓴᐧ ᐁᐊᐧᓂᐡᑲᔭᐣ ᐯᔑᑲᐧ ᐁᑎᐱᑲᐠ ᐁᐊᑕᐃᐧᔑᑭᔭᐣ, ᐃᑭᑐ.

ᐃᑭᑐ ᒥᓇ ᐊᑎᐟ ᐊᐃᐧᔭᐠ ᑲᐃᐧᐣ ᒋᓂᓯᑕᐁᐧᑕᒧᐊᐧᐨ ᔓᑲᐊᐧᐱᓀᐃᐧᐣ ᑲᐃᒋᑲᑌᐠ, ᐁᐃᓀᑕᒧᐊᐧᐨ ᑭᐡᐱᐣ ᐁᑲ ᒥᐢᑕᐦᐃ ᔓᑲᐣ ᐊᐸᒋᐦᐊᐊᐧᐨ ᑲᐃᐧᐣ ᑕᔓᑲᐊᐧᐱᓀᓯᐊᐧᐠ.

ᑲᐧᓂᐣ ᔓᑲ ᑲᑐᑕᐠ, ᐃᑭᑐ , ᐃᒪᔕ ᑫᑯᓇᐣ ᑲᔑᐊᐧᑭᐣ. ᑫᑲᐟ ᑲᑭᓇ ᑲᔑᐊᐧᑭᐣ ᒥᒋᒪᐣ ᔓᑲᐃᐧᑕᒪᑲᓄᐣ.

ᐃᑭᑐ ᒪᕑᑎᐣ ᐃᐁᐧ ᑲᔦ ᐯᑭᐡ ᑲᐅᒋᐊᓂᒥᓭᐊᐧᐨ ᐊᐃᐧᔭᐠ ᑲᐅᑎᓇᒧᐊᐧᐨ ᑲᒋᒥᐊᐧᐨ ᓄᑯᑦ ᑲᑭᔑᑲᓂᐠ.

ᑲᐃᐧᐣ ᓄᑯᑦ ᑭᑭᑎᑲᑕᓯᒥᐣ, ᐃᑭᑐ, ᑭᐱᑐᑕᒧᐸᓂᐠ ᐅᐊᐧᑯᒪᑲᓇᐣ ᐁᑭ ᑭᑎᑲᑕᒧᐊᐧᐨ ᒥᔑᐣ ᑭᑎᑲᓂᒥᒋᒪᐣ. ᐁᑲᐧ ᒥᓇ ᑲᐃᐧᐣ ᑭᓇᓯᑭᑫᑕᒪᓱᓯᒥᐣ ᑭᓄᔐᐠ.

ᓄᑯᑦ ᐸᑲᓂᓭ ᑲᑕᔑᐱᒪᑎᓯᔭᐠ, ᓄᑯᑦ ᐸᑲᓂᓭ ᑲᐃᔑᐱᒪᑎᓯᔭᐠ, ᒥᓇ ᓄᑯᑦ ᐸᑲᓂᓭ ᑲᐃᓇᒋᑫᔭᐠ.

ᒪᕑᑎᐣ ᐃᑭᑐ ᐊᓂᔑᓇᐯ ᐃᐧᐣ ᑲᐃᔑᑲᓇᐊᐧᐸᑕᐠ ᐅᑕᑭᑦ ᐊᔑᐨ ᒥᓇ ᐱᓯᒧᑎᐸᐸᒋᑫᐃᐧᐣ ᓂᐦᓱᔕᐸᐧ ᒥᓯᐁᐧᓯ ᑎᐱᑲᓂᐱᓯᑦ. ᐁᑲᐧ ᐸᐯᔑᐠ ᐁᐅᒋ ᑭᑭᓇᐊᐧᒋᐃᐧᒋᑫᒪᑲᐠ ᐊᓂᐣ ᐊᓂᔑᓂᓂ ᑫᑭᔭᓂᐃᔑᒋᑫᐸᐣ ᒣᑲᐧᐨ ᑲᔭᓂᐱᒥᓭᓂᐠ ᐃᐁᐧ ᐯᔑᑯᔭᑭ.

ᐣᑭᓂᓯᑕᐁᐧᑕᒥᐣ ᐱᒪᑎᓯᐃᐧᐣ ᐁᑭᔭᓂ ᐊᔭᑲᐃᐧ ᐱᒥ ᑭᓂᑲᐧᓂᐡᑲᒪᑲᐠ, ᐃᑭᑐ ᒪᕑᑎᐣ, ᐃᐁᐧᓂ ᑲᑭᐃᐧᑕᒪᑫᐨ ᐊᓂᔑᓇᐯᐠ ᑲᑭᐱᒥᓂᔕᐦᐊᒧᐊᐧᐨ ᑎᐱᑲᓂᐱᓯᒧ ᑎᐸᐸᒋᑫᐃᐧᐣ, ᐁᑭᐃᔑᑯᓯᐊᐧᐨ ᐯᔓᐨ ᐸᐃᐧᑎᑯᐠ ᐊᐱ ᑲᔭᓂ ᐊᑎᑲᒣᑯᑲᓂᐠ ᐁᑲᐧ ᒥᓇ ᑲᑭᐃᔑ ᒧᓱᑲᓂᐠ ᒣᑲᐧᐨ ᑲᐱᐳᓂᐠ.

ᑭᓇᐃᐧᐟ ᐅᐁᐧ ᑭᑕᑭᒥᓇᐣ, ᒪᐣᑐ ᑭᑭᐸᑭᑎᓂᑯᒥᐣ ᐅᒪ. 5,000 ᓇᐣᑕ 10,000 ᑕᓱᔭᑭᐃᐧᐣ ᐊᔕ ᑭᑭᐱᐅᒋ ᐱᒪᒋᐦᐅᐊᐧᑫᒥᐣ ᐅᒪ ᐊᐦᑭᐠ ᑲᐊᔭᒪᑲᑭᐣ ᐊᐃᐧᔭᔑᔑᒥᒋᒪᐣ, ᒥᓂᔕᐣ ᒥᓇ ᑭᑎᑲᓂᒥᒋᒪᐣ.

ᒪᕑᑎᐣ ᐅᑭᐊᔭᑭᓀ ᐊᐧᐃᐧᑕᓇᐣ ᑭᒋᐃᓇᐱᓀᐃᐧᐣ ᑲᐅᒋᑲᒋᑎᓂᐁᐧᒪᑲᑭᐣ ᑲᔓᑲᐊᐧᐱᓀᓇᓄᐊᐧᐠ ᑐᑲᐣ ᐅᑎᑎᑯᓯᐊᐧᐱᓀᐃᐧᐣ, ᐅᑌᐦᐊᐃᐧᐱᓀᐃᐣ, ᓂᐳᐃᐧᓭᐃᐧᐣ, ᑲᐅᒋᔑᑭᓇᓄᐊᐧᐠ ᐃᔑᐊᑯᓯᓇᓄᐊᐧᐣ ᒥᓇ ᑲᐅᒋᐊᐧᐱᓇᓄᐊᐧᐠ ᐅᒋᐊᑯᓯᓇᓄᐊᐧᐣ.

ᐊᒥᐦᐅᐁᐧ ᒪᐊᐧᐨ ᑲᑐᑕᒪᐣ, ᐁᑲ ᒋᔭᓂᐊᐧᐱᔭᐣ, ᐃᑭᑐ ᒪᕑᑎᐣ.

ᐃᑭᑐ ᒥᓇ ᒋᑭᔕᔑᑭᒥᑕᐧᐸᐣ ᐅᐡᑲᑎᓴᐠ ᒋᑲᑫᐧᒥᒋᐊᐧᐨ ᒥᒋᒪᐣ ᐱᑲᐧᑕᑭᐠ ᑲᐅᒋᒪᑲᑭᐣ, ᒥᓇ ᐁᑲ ᓇᐱᐨ ᒋᔭᐸᒋᑐᐊᐧᐨ ᐯᐸᓄᐠ ᑲᐱᑌᓂᑭᐣ ᐸᓂᐢᑫᐧ ᑲᔑᐃᐧᒋᑲᑌᑭᐣ ᒥᓇ ᑲᑭᓯᓭᑲᐧᑌᑭᐣ ᐸᓂᐢᑫᐧ ᑲᐱᒥᑌᐊᐧᑭᐣ.

ᒋᑭᑭᓄᐦᐊᒪᐊᐧᑭᑕᐧ ᑭᑕᐊᐧᔑᔑᒥᓇᓂᐠ ᒥᓇ ᑯᓯᓯᓇᓂᐠ ᐁᑲ ᑫᐃᐧᓇᐊᐧ ᒋᑭᔓᑲᐊᐧᐱᓀᐊᐧᐸᐣ, ᐃᑭᑐ ᒪᕑᑎᐣ, ᐁᑲᐧ ᒥᓇ ᐃᑭᑐ ᐃᒪ ᓇᐣᑕ 75 ᐱᕑᓭᐣᐟ ᒥᓂᑯᐠ ᐊᓂᔑᓂᓂᐊᐧᐠ ᐊᐊᐧᔑᒣ 35 ᑲᑕᓱᔭᑭᐃᐧᓀᐊᐧᐨ ᔓᑲᐊᐧᐱᓀᐊᐧᐠ ᓇᐣᑕ ᑕᔭᓂ ᔓᑲᐊᐧᐱᓀᐊᐧᐠ ᑭᐡᐱᐣ ᐁᑲ ᑲᑫᐧᐸᑲᓀᓭᑐᐊᐧᐨ ᑲᐃᔑᐱᒧᑐᐊᐧᐨ ᐅᐱᒪᑎᓯᐃᐧᓂᐊᐧ ᒥᓇ ᑲᐃᓇᒋᑫᐊᐧᐨ. ᔓᑲᐊᐧᐱᓀᐃᐧᐣ ᑲᐡᑭᒋᑲᑌ ᒋᑭᓇᑲᓇᒪᓱᓇᓄᐊᐧᐠ.