ᒪᒣᒋᑲᒋᑫᐃᐧᐣ ᐅᑲᐅᒋ ᐃᐧᒋᐦᐃᑯᓇᐊᐧ ᑲᑭᓂᐳᐃᐧᓭᐊᐧᐨ ᑭᐁᐧᑎᓄᐠ ᑲᐊᔭᐊᐧᐨ

ᒣᕑᐊᐣ ᒍᐣᐢ
ᑭᐸᑭᑎᓂᑲᑌᐠ ᐊᐧᐊᐧᑌ ᐊᒋᒧᐃᐧᓂᐠ

ᑲᑭᓂᐳᐃᐧᓭᐊᐧᐱᓀᐊᐧᐨ ᐊᐃᐧᔭᐠ ᐊᑲᐧᒋᐠ ᑭᒋᐅᑌᓇᐠ ᑲᑲᐯᔑᐊᐧᐨ ᑭᐁᐧᑎᓄᐠ ᓀᑲᐱᐦᐊᓄᐠ ᐅᐣᑌᕑᐃᔪ ᐃᓀᑫ ᐊᒥ ᐁᑲᐧ ᐊᔕ ᒋᐃᐧᒋᐦᐃᑕᐧ ᐅᑕᔑᑫᐃᐧᓂᐊᐧᐠ, ᒥᑫᐧᐨ ᑲᑭᒪᑕᓄᑲᑕᒧᐊᐧᐨ ᒪᒣᒋᑲᒋᑫᐃᐧᔭᓄᑭᐃᐧᐣ ᑲᑭᐅᒋᐸᑭᑎᓂᐨ ᔓᓂᔭᐣ ᑲᓇᑕ ᐅᑭᒪᐅᓂᐠ ᑲᐱᒧᑐᐨ ᒪᐡᑭᑭᐃᐧ ᐃᐧᒋᐦᐃᐁᐧᐃᐧᓂ.

ᑭᐁᐧᑎᓄᐠ ᓀᑲᐱᐦᐊᓄᐠ ᐅᐣᑌᕑᐃᔪ ᑲᐅᒋᐱᒧᒋᑲᑌᐠ ᓂᐳᐃᐧᓭᐊᐧᐱᓀᐃᐧ ᐊᓄᑭᑕᒪᑫᐃᐧᐣ ᑲᑕᑲᐧᐠ ᑕᐣᑐᕑ ᐯ ᑭᒋᒪᐡᑭᑭᐃᐧᑲᒥᑯᐠ ᑭᐸᑭᑎᓂᑲᓱ ᐊᐊᐧᔑᒣ $100,000 ᒋᐊᓄᑲᑌᐠ ᒪᓯᓇᑌᓯᒋᑫᐃᐧᓂᐠ ᐃᐧᒋᐦᐃᐁᐧᐃᐧᐣ: ᒋᒥᓇᐧᔑᒋᑲᑌᓂᐠ ᐅᐃᐧᒋᐦᐃᑯᐃᐧᓂᐊᐧ ᑲᑭᓂᐳᐃᐧᓭᐊᐧᐨ ᑭᐁᐧᑎᓄᐠ ᒥᓇ ᑲᓇᐃᐧᓇᑲᐧᑭᐣ ᑕᔑᑫᐃᐧᓇᐣ ᑲᐃᔑᑕᐊᐧᐨ, ᐁᑲᐧ ᑕᐅᒋ ᒪᒪᐊᐧᓄᑲᑌ ᐃᒪ ᑫᐅ ᑌᓫᐊ ᒪᐡᑭᑭ, ᑫᐅ ᑲᐃᔑᑕᐊᐧᐨ ᒥᓇ ᐅᑕᔑᑫᐃᐧᓂᐊᐧᐠ ᐃᐧᒋᐦᐃᑯᐃᐧᐣ, ᐅᐣᑌᕑᐃᔪ ᑌᓫᐊ ᒪᐡᑭᑭ ᒪᒪᐊᐧᓄᑭᐃᐧᐣ ᒥᓇ ᓭᐣᐟ ᒍᓴᑊ ᒪᒪᐊᐧᓄᑭᑕᒪᑫᐃᐧᐣ, ᐅᑯᐁᐧᓂᐊᐧᐠ ᑲᑭᓂᐳᐃᐧᓭᐊᐧᐨ ᑕᑭᐃᐧᒋᐦᐊᐊᐧᐠ ᑐᑲᐣ ᔐᔕᐃᐧᐱᓂᑯᐃᐧᐣ, ᓂᑕᐁᐧᐃᐧᐣ ᒥᓇ ᑯᑕᑭᔭᐣ ᐃᐧᒋᐦᐃᑯᐃᐧᓇᐣ ᑯᑕᐧᓱᐱᒥᑯᓇᑲ ᒥᓇ ᓂᐦᓱᐱᓯᑦ ᑲᐃᐡᑲᐧ ᐸᑭᑎᓂᑕᐧ ᐊᑯᐃᐧᓯᐃᐧᑲᒥᑯᐠ.

ᑭᐃᑭᑐ ᒪᒣᒋᑲᒋᑫᐃᐧᐣ ᑲᑭᐃᔑᐃᐧᒋᑕᐧᐨ ᑭᕑᐢᑎ ᕑᐃᓂᑲ ᑕᐣᑐᕑ ᐯ ᑭᒋᒪᐡᑭᑭᐃᐧᑲᒥᑯᐠ ᑲᐃᔑᐊᓄᑭᐨ, ᑭᒪᑕᓄᑲᑌ ᐅᐁᐧ ᐊᐱ ᑲᑭᐃᐧᒋᑲᑌᑭᐸᐣ ᐁᓇᑕᐁᐧᑕᑲᐧᐠ ᐅᐁᐧ ᑐᑲᐣ ᐃᐧᒋᐦᐃᐁᐧᐃᐧᐣ ᐁᐧᑎ ᐊᓂᔑᓂᓂᐃᐧ ᑕᔑᑫᐃᐧᓇᐣ.

ᐃᐧᓇᐊᐧ ᐃᐧᐣ ᐅᑕᑯᓯᐠ ᑲᑲᐯᔑᐊᐧᐨ ᑕᐣᑐᕑ ᐯ, ᐊᔭᒪᑲᓂ ᑫᐃᔕᐊᐧᐨ ᑫᑕᔑᐱᒥ ᐃᐧᒋᐦᐃᑕᐧ. ᐁᑲᐧ ᐃᐧᐣ ᐊᑲᐧᒋᐠ ᑲᑕᔑᑫᐊᐧᐨ, ᓇᐱᐨ ᐸᑭ ᓇᐣᑕ ᑲᐃᐧᐣ ᐊᔭᑲᒪᐣ ᒋᐱᒥ ᐃᐧᒋᐦᐃᑕᐧ. ᐊᒥᐦᐅᐁᐧᓂ ᑲᑭᒋᓀᑕᒧᐊᐧᐨ ᑲᑭᓂᐳᐃᐧᓭᐊᐧᐨ ᒋᑲᑫᐧ ᑭᐁᐧᑲᐡᑭᑐᐊᐧᐨ ᑲᑭᐱᑐᑕᒧᐊᐧᐸᐣ ᒪᐧᔦ ᓂᐳᐃᐧᓭᐊᐧᐸᐣ. ᐁᑲᐧ ᐸᓂᒪ ᑲᐃᐡᑲᐧ ᐸᑭᑎᓂᑕᐧ ᐊᑯᓯᐃᐧᑲᒥᑯᐠ ᐊᒥ ᐊᐱᐣ ᑲᓇᑭᐡᑲᒧᐊᐧᐨ ᐅᐁᐧᓂ ᐅᑕᓂᒥᓭᐃᐧᓂᐊᐧ.

ᒪᒣᒋᑲᒋᑫᐃᐧᓂᐠ ᐃᐧᑕᓄᑭᒪᑲᐣ ᒥᓇ ᓂᐳᐃᐧᓭᐃᐧᐣ ᑲᔭᓄᑲᑕᐠ ᐁᐢᒥ ᑊᕑᐁᐣᐨ ᐃᑭᑐ, ᑲᐃᐧᐣ ᐅᑭᑫᑕᓯᓇᐊᐧ ᐊᓂᐣ ᐊᐱᐣ ᑫᑐᑕᒧᐊᐧᐨ ᑲᑭᐱᑐᑕᒧᐊᐧᐸᐣ ᐅᑕᔑᑫᐃᐧᓂᐊᐧᐠ ᒥᓇ ᐱᑯ ᑲᐃᔑᑲᐯᔑᐊᐧᐨ. ᐊᒥ ᐁᑐᒋᑫᒪᑲᐠ ᓂᐳᐃᐧᓭᐃᐧᐣ ᓇᐱᐨ ᑭᒋᑭᓇᐧᑲᐡ ᐁᐱᒥᓭᐠ ᒋᑭ ᑭᐁᐧᒥᓄᔭᐊᐧᐨ. ᒥᑕᐡ ᐁᓇᐧᑌᐠ ᐅᐁᐧ ᒪᒣᒋᑲᒋᑫᐃᐧᐣ ᒋᑲᑫᐧᐃᐧᒋᐦᐃᑕᐧ ᒋᔭᓂᒥᓄᔭᐊᐧᐨ ᑲᑭᐃᔑ ᒪᑭᐦᐃᑯᐊᐧᐨ ᓂᐳᐃᐧᓭᐃᐧᓂ.

ᐁᑲᐧ ᒣᑲᐧᐨ ᓄᑯᑦ ᐣᑯᒋᑐᒥᐣ ᓂᐃᐧᐣ ᑲᐃᔑᑕᐊᐧᐨ ᒪᓯᓇᑌᓯᒋᑲᓇᐣ ᐁᑭᔭᒋᑲᑌᑭᐣ ᐁᐅᒋᐊᓄᑲᑌᑭᐣ ᑫᐅ ᑌᓫᐊ ᒪᐡᑭᑭ ᒥᓇ ᔓᓂᔭᐣ ᑭᐸᑭᑎᓇ, ᐃᑭᑐ ᕑᐃᓂᑲ. ᒥᑕᐡ ᐅᒪ ᐁᐅᒋ ᑲᑭᐅᑲᒪᐊᐧᔭᑭᑕᐧ ᐅᑕᑯᓯᐠ ᑫᒋᐊᐧᐠ ᑲᐃᔑᑲᐯᔑᐊᐧᐨ. ᐁᑲ ᑲᔦ ᑲᑕᐨ ᒋᓇᑲᑕᒧᐊᐧᐨ ᐅᑕᔑᑫᐃᐧᓂᐊᐧ ᐁᑲᐧ ᒥᓇ ᐊᑎᐟ ᑲᐃᔑᑲᐯᔑᐊᐧᐨ ᑲᐃᔑᐸᔭᑕᑲᐱᐊᐧᐨ ᒥᓇ ᐁᑲ ᐃᐧᓂᑯ ᐁᐁᐧᑕᓂᐠ ᒋᑭᐸᐸᒥᐸᓂᐦᐅᐊᐧᐨ.

ᐅᐁᐧ ᑲᑭᒪᑕᓄᑲᑌᐠ ᐅᒋᐃᐧᒋᒋᑲᑌ ᑲᐃᐧᑕᓄᑭᒥᑐᐊᐧᐨ ᑫᐅ ᑲᐯᔑᐃᐧᐣ ᒥᓇ ᑕᔑᑫᐃᐧᐣ ᐃᐧᒋᐦᐃᑯᐃᐧᐣ ᒥᓇ ᑫᐅ ᑌᓫᐊ ᒪᐡᑭᑭ ᒋᐅᒋ ᐊᓱᐡᑭᑲᑌᐠ ᑫᒋᐊᐧᐠ ᑕᔑᑫᐃᐧᓂᐠ ᑫᒐᑲᑌᓯᒋᑫᐊᐧᐨ, ᒋᐅᓇᑐᐊᐧᐨ ᑭᐅᑫᐃᐧᓇᐣ ᒥᓇ ᒋᐅᓇᑐᐊᐧᐨ ᐃᐧᒋᐦᐃᑯᐃᐧᓇᐣ ᑲᑭᐃᐧᑕᒧᐊᐧᐨ ᑭᒋᒪᐡᑭᑭᐃᐧᓂᓂᐊᐧᐠ ᐁᓇᑕᐁᐧᑕᑲᐧᑭᐣ.

ᐊᑎᑲ ᐅᐁᐧ ᐁᔑᐃᐧᒋᐦᐃᑯᐊᐧᐨ ᐊᐃᐧᔭᐠ, ᑊᕑᐁᐣᐨ ᐅᑭᔭᓂᒧᒪᐣ ᐯᔑᐠ ᓇᐯᐊᐧᐣ ᓄᐱᒪᑲᒥᐠ ᑕᔑᑫᐃᐧᓂᐠ ᐁᐅᒋᓂᐨ ᐁᑲ ᑲᐧᔭᐠ ᐁᑭᐃᓇᐱᐨ. ᐁᑲᐧ ᑕᐡ ᑲᐊᐧᐃᐧᒋᐦᐊᐨ ᑲᑭᓂᐳᐃᐧᓭᓂᐨ ᑭᐃᔑᑭᑐ ᒪᐡᑭᑭᐃᐧᑲᒥᑯᐠ ᐁᑲᐧ ᐅᑭᓇᓇᑕᐃᐧᑭᑫᑕᓇᐊᐧ ᑭᐡᐱᐣ ᑕᑲᐧᓄᑫᐧᐣ ᑲᐅᒋᒪᒥᐡᑲᐧᒋ ᒥᑭᐊᐧᓄᐊᐧᐠ ᐊᐸᒋᒋᑲᓇᐣ ᓇᐣᑕ ᒥᓇ ᔓᓂᔭ ᐊᔭᑫᐧᐣ ᒋᐅᒋ ᐊᑕᐊᐧᑌᑭᐣ ᑌᓴᐳᐃᐧᓇᐣ.

ᐁᐧᐡᑲᐨ ᑲᑭ ᓂᐳᐃᐧᓭᐸᐣ ᐁᑲᐧ ᑕᐡ ᑭᐃᓀᓂᒪᑲᓄ ᐁᑲ ᓇᐣᑕ ᐊᐊᐧᔑᒣ ᐁᔑᐊᔭᓂᒥᓭᐨ, ᐃᑭᑐ ᕑᐃᓂᑲ. ᒥᑕᐡ ᐁᓇᓄᑭᒪᑲᐠ ᐅᐁᐧ ᒪᒣᒋᑲᒋᑫᐃᐧᐣ ᐁᐅᒋ ᓇᓇᑐᓂᑲᑌᑭᐣ ᑫᑯᓇᐣ ᑲᐃᔑᐱᒥ ᐊᔭᓂᒥᓭᑭᐣ. ᓂᔕᐧᔦᐠ ᑕᐡ ᐃᓇᓄᑭᒪᑲᐣ ᐅᐁᐧ, ᑕᐱᐡᑯᐨ ᐁᐅᒋ ᐊᓄᑲᓂᑕᐧ ᑲᑭᐅᐡᑭ ᓂᐳᐃᐧᓭᐊᐧᐨ ᐁᑲᐧ ᒥᓇ ᐁᐧᐡᑲᐨ ᑲᑭᓂᐳᐃᐧᓭᐊᐧᐨ.

ᑊᕑᐁᐣᐨ ᐃᑭᑐ ᑫᐅ ᑌᓫᐊ ᒪᐡᑭᑭ ᐱᒧᒋᑫᐃᐧᓂᐠ ᒥᑐᓂ ᐱᑯ ᒥᐢᑕᐦᐃ ᐅᒪ ᐁᐅᒋᐃᐧᒋᒋᑲᑌᐠ.

ᐅᑐᒋᐃᐧᒋᑐᓇᐊᐧ ᒥᓯᐁᐧ ᑕᔑᑫᐃᐧᓂᐠ ᒋᐅᒋ ᒪᒪᐃᐧ ᐊᓄᑲᒋᑲᑌᐠ. ᑲᐃᐧᐣ ᑕᑭᑲᐡᑭᒋᑲᑌᐸᐣ ᐁᑲ ᐃᐧᒋᑐᐊᐧᐸᐣ ᐅᐁᐧᓂ.

ᐦᐁᑐᕑ ᑯᓫᓴᐣ, ᑲᐅᒋ ᓂᑲᓂ ᑲᓇᐊᐧᐸᑕᐠ ᑫᐅ ᑌᓫᐊ ᒪᐡᑭᑭ, ᐃᑭᑐ ᐅᐁᐧ ᐊᓄᑭᐃᐧᐣ ᒥᐢᑕᐦᐃ ᐅᒋᐊᒋᐃᐧᓭ ᑲᐱᐦᐊᓇᓄᐊᐧᐠ. ᐊᑎᑲ ᐃᒪ ᒥᓄᔭᐃᐧᐣ ᐊᑯᓯᐃᐧᑲᒥᑯᐠ ᐊᐧᓂᓇᐊᐧᑲᐠ ᔐᔕᐃᐧᐱᓂᐁᐧᐃᐧᑲᒥᑯᐠ ᐯᔑᑲᐧ 350 ᐊᐃᐧᔭᐠ ᑭᒪᓯᓇᐦᐃᑲᓱᐊᐧᐠ ᐁᐱᐦᐅᐊᐧᐨ, ᒥᓇ ᑲᐃᐧᐣ ᒋᑭᐅᒋ ᐃᓯᓭᓂᐠ ᒋᐱᒥ ᐃᐧᒋᐦᐃᑕᐧ.

ᐁᑲᐧ ᑕᐡ ᐅᐁᐧ ᓄᑯᑦ ᑲᐊᔭᐠ, ᓂᑲᐣ ᐃᔑᐅᓇᒋᑲᑌᓂ ᒋᔭᓂᐊᐧᐸᒥᑕᐧ. ᓇᐣᑕ ᐱᑯ ᐅᓴᑦ ᑯᑕᐧᓱᐱᒥᑯᓇᑲ ᐁᑕ ᐱᐦᐅᐊᐧᐠ. ᑭᐡᐱᐣ ᑕᐡ ᐊᓂᔑᐱᒥᐡᑲᒪᑲᑭᐸᐣ ᐊᒥᐦᐃᒪ ᐃᐧᐸᐨ ᑫᑭᔭᓄᒋᐃᐧᒋᐦᐊᑭᑕᐧᐸᐣ ᒥᓇ ᒋᔭᓂᑭᐁᐧ ᒥᓄᔭᐊᐧᐨ ᐅᐱᒪᑎᓯᐃᐧᓂᐊᐧᐠ.

ᐁᑲᐧ ᒥᓇ ᐃᑭᑐ ᐃᒪ ᐃᔑ ᐃᐧᒋᐦᐃᐁᐧᒪᑲᐣ ᐁᐅᒋ ᐊᒋᐃᐧᓭᐠ ᓇᐱᐨ ᑲᔭᑭᑌᐠ ᐅᑕᑯᓯᐠ ᐅᑕᔑᑫᐃᐧᓂᐊᐧᐠ ᑲᐅᒋᒪᒋᐃᐧᓂᑕᐧ ᐊᑯᓯᐃᐧᑲᒥᑯᐠ ᑲᐃᔑᐃᐧᓂᑕᐧ, ᐁᑲᐧ ᒥᓇ ᐊᔑᐨ ᑯᑕᑭᔭᐣ ᐊᓂᒥᓭᐃᐧᓇᐣ ᑐᑲᐣ ᑲᒪᒋᑭᔑᑲᓂᐠ.

ᐊᒥᐦᐃᒪ ᑲᔦ ᐁᑲ ᓇᐱᐨ ᒋᐅᒋᐊᓂᒣᑕᐠ ᐅᑕᑯᓯ ᐁᑲ ᑲᒪᒐᐨ. ᑫᐧᑫᐧᑭᑌ ᑕᐡ ᐃᑯ ᐃᔑᓇᐦᐃᓭ.

ᐊᒥ ᑲᔦ ᐁᔑᐊᐧᐸᒪᑲᐧ ᐊᔕ ᐸᑲᐣ ᐁᓂᔑᔭᐊᐧᐨ ᒥᑕᓱᑭᔑᑲ ᑲᐃᐡᑲᐧ ᐊᐧᐸᒥᑕᐧ. ᒥᑐᓂ ᑕᐡ ᒋᑫᑕᑲᐧᐣ. ᒥᐦᐃᒪ ᐁᐅᒋ ᑭᑫᑕᒪᐠ ᐁᔭᓄᑭᒪᑲᐠ ᑲᐃᔑᑲᑫᐧ ᐃᐧᒋᐦᐃᑕᐧ ᐅᑕᑯᓯᐠ.

ᐁᑲᐧ ᐃᐁᐧ ᐯᔑᑲᐧᔦᐠ ᑲᐃᐧᑕᓄᑭᒥᑎᓇᓄᐊᐧᐠ ᐁᐅᒋ ᐸᑭᑎᓂᑲᑌᐠ ᑭᔭᐱᐨ ᐊᐊᐧᔑᒣ ᒋᐸᑭᑎᓂᑲᑌᐠ ᑭᑭᓄᐦᐊᒪᑫᐃᐧᐣ ᑲᐯᔑᐃᐧᓂᐠ ᒥᓇ ᑕᔑᑫᐃᐧᓂᐠ ᐸᒥᐦᐃᐁᐧᐃᐧᔭᓄᑭᑕᒪᑫᐃᐧᐣ ᐃᒪ ᑕᔑᑫᐃᐧᓇᐣ ᑲᐊᔭᑭᐣ. ᐊᔕ ᓂᔑᐣ ᑭᑭᓄᐦᐊᒪᑫᐃᐧᓇᐣ ᐣᑭᐸᑭᑎᓇᒥᓇᐸᐣ ᐃᒪ 15 ᑕᔑᑫᐃᐧᓇᐣ ᒪᓯᓇᑌᓯᒋᑫ ᐃᐧᒋᐦᐃᐁᐧᐃᐧᓂᐠ.

ᐅᑭᓇᑕᐁᐧᑕᓇᐊᐧ ᓂᐳᐃᐧᓭᐃᐧᐣ ᑲᐅᒋᐊᓄᑲᑌᐠ ᑲᓂᑲᓂᐡᑲᒧᐊᐧᐨ ᑫᒋᓇᐨ ᐅᑕᓄᑭᑕᒪᑫᐠ ᒋᑭᑭᓇᐊᐧᒋᒋᑲᓱᐊᐧᐨ ᒋᔭᓂᐱᒥᐡᑲᒪᑲᐠ ᐊᓄᑭᑕᒪᑫᐃᐧᐣ. ᐁᑲᐧ ᒥᓇ ᑯᑕᑭᔭᐣ ᑭᑭᓄᐦᐊᒪᑫᐃᐧᓇᐣ ᑭ ᑭᑭᓄᐦᐊᒪᑫ ᐁᐢᒥ ᒥᓇ ᑲᐅᒋᐃᐧᑕᓄᑭᒥᑯᐨ, ᒥᓇ ᑭᐅᒋᑎᐸᐦᐊᒪᐊᐧᐊᐧᐠ ᑲᐅᒋᐱᒧᒋᑲᑌᑭᐣ ᐊᑯᓯᐃᐧ ᐊᓄᑭᑕᒪᑫᐃᐧᓇᐣ, ᔕᑯᐨ ᐁᐢᒥ ᒥᓇ ᑲᐃᐧᑕᓄᑭᒥᑯᐨ ᐃᐧᓇᐊᐧ ᐱᑯ ᑭᐸᑭᑎᓂᑎᓱᐊᐧᐠ ᐅᐁᐧ ᒋᑐᑕᒧᐊᐧᐨ. ᑌᐯᐧ ᒥᓇᐧᔑᐣ ᐃᐁᐧ ᑲᑭᑐᑕᒧᐊᐧᐨ. ᑭᒥᓀᐧᑕᑲᐧᐣ ᒥᓇ ᑭᐅᒋ ᓇᐣᑫᑕᑲᐧᐣ. ᑌᐯᐧ ᐱᑯ ᐅᑭᒋᓀᑕᓇᐊᐧ ᑲᐃᓇᓄᑭᑕᒪᑫᐊᐧᐨ. ᒥᓇ ᑲᑭᓇ ᐊᐃᐧᔭᐠ ᑭᐅᒋᐅᑯ ᑭᑭᓄᐦᐊᒪᐊᐧᑲᓄᐊᐧᐠ ᒥᓇ ᑲᑭᓇ ᐅᑭᒥᓀᐧᑕᓇᐊᐧ.

ᐊᒥᐦᐅᐁᐧ ᒪᐊᐧᐨ ᐁᒥᔕᐠ ᒣᑲᐧᐨ ᑲᐱᒪᓄᑲᑕᒪᐣ. ᓂᐃᐧᐣ ᑕᔑᑫᐃᐧᓇᐣ ᐣᑭᐅᒋᒪᐦᒋᑐᒥᐣ. ᑭᐡᐱᐣ ᐃᔑᐅᓇᑐᔭᐠ ᐃᓂᐁᐧᓂᐊᐧᐣ ᓂᐃᐧᐣ ᒪᓯᓇᑌᓯᒋᑲᓇᐣ ᒋᑭᐃᔑᓂᔕᐦᐃᑲᑌᑲᐧᐸᐣ ᐯᔑᐠ ᐃᒪ 26 ᑲᑕᓯᑭᐣ ᑕᔑᑫᐃᐧᓇᐣ, ᐱᓂᐡ ᑕᑭᑲᐡᑭᒋᑲᑌ ᒋᑌᐱᓂᑲᑌᑭᐣ 26 ᑕᔑᑫᐃᐧᓇᐣ.

ᐁᑲᐧ ᔕᑯᐨ ᑭᐅᓇᒋᑲᑌ ᒥᓂᑯᐠ ᐁᑕ ᑫᐱᒪᓄᑲᑌᐠ ᑲᒧᒋᑯᒋᒋᑲᑌᐠ ᐊᓄᑭᐃᐧᐣ. ᐣᑭᑲᑫᐧᑌᐧᒥᐣ ᒋᑭᓇᐣᑭᓂᑲᑌᑭᐸᐣ. ᑲᐃᐧᐣ ᑕᓴᐧ ᐊᔭᓯᐣ ᔓᓂᔭᐣ ᒋᑭᑌᐱᓭᐨ ᐅᒪ ᐊᑯᓯᐃᐧ ᐊᓄᑭᐃᐧᓂᐠ.

ᐊᒥᐦᐅᐁᐧᓂ ᐊᔕ ᓂᐊᐧ ᒪᒣᒋᑲᒋᑫᐃᐧᐣ ᑲᑐᑕᒧᐊᐧᐨ ᕑᐃᓂᑲ ᒥᓇ ᑊᕑᐁᐣᐨ.

ᒥᑕᐡ ᐅᐁᐧ ᒪᐊᐧᐨ ᒥᐢᑕᐦᐃ ᑲᐃᓀᑕᑲᐧᐠ ᑲᐅᐡᑭ ᒪᑕᓄᑲᑌᐠ, ᐃᑭᑐ ᕑᐃᓂᑲ. ᒥᔑᓇᑐᐣ ᑯᑕᑭᔭᐣ ᑕᔑᑫᐃᐧᓇᐣ ᑭᐁᐧᑎᓄᐠ ᑫᐅᒋ ᐃᐧᒋᒋᑌᑭᐣ ᐅᐁᐧ ᑌᓫᐊ ᒪᐡᑭᑭ ᑲᐃᔑᐱᒧᒋᑲᑌᐠ. ᐣᑕᐸᒋᑐᒥᐣ ᐅᐁᐧ ᐊᓄᑭᐃᐧᐣ ᒋᐅᒋ ᒪᑕᓄᑲᑌᐠ ᐊᐊᐧᔑᒣ ᒋᐅᒋ ᐃᐧᒋᐦᐃᑕᐧ ᑐᑲᐣ ᑲᑭᐃᐡᑲᐧ ᒪᒋᔓᑕᐧ, ᑲᐅᑲᓇᐱᓀᐊᐧᐨ ᒥᓇ ᑯᑕᑭᔭᐣ ᐸᑲᐣ ᑲᐃᓇᐱᓀᐊᐧᐨ.