view counter

ᐊᐧᐱᑭᑲ ᑭᒥᓇᐊᐧᐠ ᐱᒪᑯᐁᐧᐸᐦᐃᑫᐃᐧ ᐊᐸᒋᒋᑲᓇᐣ

Friday September 2, 2011

ᔑᑲᑯ ᑊᓫᐊᐠᐦᐊᐠᐢ ᑲᐃᔑᐱᒪᑯᐁᐧᐸᐦᐃᑫᐨ ᐢᑎᑊ ᒪᐧᐣᑕᑕᐧᕑ ᓄᑯᒥᑫ ᑭᑭᐅᑫᐸᐣ ᐊᐧᐱᑭᑲᐠ ᐁᑭᐊᐣᑕᐃᐧ ᑎᐸᒋᒧᐨ ᐁᐃᐧᐸᑭᑎᓂᐨ ᓂᔭᓄᒥᑕᓇ ᐅᐡᑭ ᐱᒪᑯᐁᐧᐸᐦᐃᑫᐃᐧ ᐊᐸᒋᒋᑲᓇᐣ ᑫᐊᐸᒋᑐᐊᐧᐨ ᐃᒪ ᐃᐡᑯᓂᑲᓂᐠ ᐅᐡᑲᑎᓴᐠ ᑲᑲᐯᔑᐊᐧᐨ.
“ᑭᒥᓀᐧᐣᑕᑲᐧᐣ ᑲᑭᐱᔕᐨ - ᐁᑲᐧ ᑲᔦ ᐣᑭᒥᓂᐠ ᐅᒪᓯᓇᐦᐅᑎᓱᐃᐧᐣ,” ᐃᑭᑐ ᑲᐧᕑᑎᐣ ᒪᑫ, ᑲᐅᐡᑲᑎᓯᐃᐧ ᐊᓄᑭᑕᒪᑫᐨ ᐃᒪ ᐊᐧᐱᑭᑲᐠ.
ᑭᐃᑭᑐ ᐊᐧᐁᐧ ᒪᐧᐣᑕᑕᐧᕑ ᐅᑭᐱ ᑭᐅᑲᒪᐊᐧᐣ ᐅᐡᑲᑎᓴᐦᐃ ᐅᒪ ᐃᐡᑯᓂᑲᓂᐠ ᑲᐊᔭᐊᐧᐨ, ᑭᒪᓯᓇᐦᐅᑎᓱ ᐅᐃᐧᓱᐃᐧᐣ ᒥᓇ ᐅᑭᐊᐧᐃᐧᒋ ᒐᑲᑌᔑᒥᑯᐣ.
ᐃᒪ ᐅᒋ ᐸᑭᑭᓂᑲᓂᐠ 1

“ᐯᔑᑲᐧᔦᐠ ᐃᑯ ᐁᑕ ᐁᑲ ᑲᑭᐅᐣᒋ ᑐᑕᒪᐊᐧᔭᐣᐠ ᒋᑕᔐᐧᑭᓯᑕᒪᐊᐧᑲᓄᐨ ᑲᒥᐢᑫᐧᑲᐠ ᐊᐱᔑᒧᓂᑭᐣ ᑲᑐᑕᐊᐧᑲᓄᐨ ᐊᐃᐧᔭ ᑲᑭᒋᓀᐣᑕᑯᓯᐨ,” ᒪᑫ ᐃᑭᑐ.
ᐁᑲᐧ ᐅᓄᐁᐧᓂᐊᐧᐣ ᐱᒪᑫᐧᐸᐦᐃᑫᐃᐧ ᐊᐸᒋᒋᑲᓇᐣ ᑭᐅᐣᒋ ᐸᑭᑎᓂᑲᑌᐊᐧᐣ ᑲᑭᐅᐣᒋ ᐸᑭᑎᓇᑲᓄᐨ ᔓᓂᔭ ᒋᐅᐣᒋ ᑎᐸᐦᐃᑲᑌᑭᐣ ᐃᒪ ᑭᒋᐱᒪᑫᐧᐸᐦᐃᑫᐃᐧᓂᐠ ᑲᐅᐣᒋ ᐃᐧᑕᓄᑭᒥᑐᐊᐧᐨ.
ᐊᐸᒋᒋᑲᓇᐣ ᐅᑲᐅᐣᒋ ᐃᐧᒋᐦᐃᑯᓇᐊᐧ ᐊᐊᐧᔑᔕᐠ ᒥᓇ ᐅᐡᑲᑎᓴᐠ ᐃᒪ ᑲᐃᔑᑕᑭᐧᐊᐧᐨ ᒣᑕᐁᐧᐦᐃᑯᐃᐧᓂᐠ ᑫᑭᐅᐣᒋ ᑲᐡᑭᐦᐅᐊᐧᐨ ᒋᓂᑕ ᐱᒪᑯᐁᐧᐸᐦᐃᑫᐊᐧᐨ ᑐᑲᐣ ᑲᐃᔑᓂᑲᑌᐠ PLAY (ᐁᐃᐧᒋᐦᐃᑕᐧ ᒋᑲᐡᑭᐦᐅᐊᐧᐨ ᐊᓂᔑᓂᓂᐃᐧ ᐅᐡᑲᑎᓴᐠ) ᐃᐧᒋᐦᐃᐁᐧᐃᐧᐣ. ᐅᐁᐧ ᑕᐡ ᑲᐃᔑᐱᒥᐃᐧᒋᐦᐃᐣᑕᐧ ᒥᓯᐁᐧᑲᒥᐠ ᐅᐣᒋ ᐃᐧᒋᐦᐊᐊᐧᐠ ᐅᐡᑲᑎᓴᐠ ᐃᒪ ᐃᓀᑫ ᒣᑕᐁᐧ ᐃᔑᒋᑫᐃᐧᓂᐠ ᒥᓇ ᑯᑕᑭᔭᐣ ᓇᓇᑲᐤ ᒣᑕᐁᐧᐃᐧᓇᐣ ᑫᐅᐣᒋ ᑲᐡᑭᑐᐊᐧᐨ ᐊᐊᐧᔑᔕᐠ ᑫᑯᓇᐣ ᑲᐃᔑ ᐱᒥᑭᑭᓄᐦᐊᒪᐃᐧᐣᑕᐧ.
“ᐁᑭᐊᐧᐸᐣᑕᒪᐸᐣ ᐊᓂᐣ ᐁᔑᐃᐧᒋᐦᐃᑯᐊᐧᐨ ᐅᐁᐧᓂ ᑲᐃᔑᐱᒥᐃᐧᒋᐦᐃᐣᑕᐧ ᐁᐧᑎ ᑕᐣᓴᐣᔭ, ᐊᒥ ᑕᐡ ᐁᔑᐊᔕᐧᐸᐣᑕᒪᐣ ᐯᔑᑲᐧᐣ ᑫᐃᐧᓇᐊᐧ ᐅᒪ ᑲᓇᑕ ᐊᐦᑭᐠ ᒋᐃᔑ ᐃᐧᒋᐦᐃᑯᐊᐧᐨ,” ᑭᐃᑭᑐ ᒪᐧᐣᑕᑕᐧᕑ, 2007 ᑲᔭᑭᐊᐧᓂᐠ ᐊᔕ ᐅᑐᐣᒋ ᐱᒥᓂᑲᓂᐡᑲᐣ ᐅᐁᐧᓂ ᐃᐧᒋᐦᐃᐁᐧᐃᐧᓂ. “ᐅᐁᐧ ᑕᐡ ᓇᐱᐨ ᒥᐢᑕᐦᐃ ᑲᐃᐧᒋᐦᐃᐁᐧᐊᐧᐨ ᑭᒋᐱᐸᑫᐧᐸᐦᐃᑫᐃᐧᓂᐠ, ᐣᑌᐯᐧᑕᐣ ᒋᐅᐣᒋ ᓇᑯᑕᒪᐊᐧᔭᐠ ᐃᒪ ᐃᓀᑫ ᐱᒪᑯᐁᐧᐸᐦᐃᑫᐃᐧᓂᐠ ᑫᑭᔭᓄᒋ ᑲᐡᑭᐦᐅᐊᐧᐸᐣ ᑎᐱᓇᐁᐧ ᐅᐱᒪᑎᓯᐃᐧᓂᐊᐧ ᑫᐊᓂᔑ ᐃᐧᒋᐦᐃᑎᐊᓱᐊᐧᐨ ᒥᓇ ᒋᐊᐯᓂᒧᐊᐧᐨ, ᐁᑲᐧ ᐯᑭᐡ ᒋᐅᐣᑎᓂᑫᑕᒪᐃᐧᐣᑕᐧ ᐱᒪᑯᐁᐧᐸᐦᐃᑫᐃᐧ ᐊᐸᒋᒋᑲᓇᐣ ᐅᑯᐁᐧᓂᐊᐧᐠ ᐊᐊᐧᔑᔕᐠ ᒥᓇ ᐅᐡᑲᑎᓴᐠ ᐁᑲ ᓇᐣᑕ ᑲᑭᐅᐣᑎᓇᒪᓱᐊᐧᐨ.”
ᒪᑫ ᑫᐃᐧᐣ ᐅᑕᔕᐧᐸᐣᑕᐣ ᒋᔭᓂᒪᒋᓭᓂᐠ ᐅᐁᐧᓂ ᐱᒪᑯᐁᐧᐸᐦᐃᑫᐃᐧᓂ ᐊᓂᒪᑕᑭᓱᐨ ᐅᐱᒪᐊᒧᐃᐧᐱᓯᑦ ᒋᒪᒋᑕᐦᐃᐣᑕᐧ ᐅᐡᑲᑎᓴᐠ ᒥᓇ ᐱᑯ ᑲᐅᐣᒋ ᐱᒥ ᑭᑭᓄᐃᐧᓇᐊᐧᐨ.
ᐊᐊᐧᔑᔕᐠ ᒥᓇ ᐅᐡᑲᑎᓴᐠ ᑕᒥᓇᐊᐧᐠ ᒋᐊᐸᒋᑐᐊᐧᐨ ᐱᒪᑯᐁᐧᐸᐦᐃᑫᐃᐧ ᐊᐸᒋᒋᑲᓇᐣ ᑲᑭᐸᑭᑎᓂᑲᑌᓂᑭᐣ, ᒥᓇ ᑕᑭᑭᓄᐦᐊᒪᐊᐧᑲᓄᐊᐧᐠ ᒋᔭᓂ ᓂᑕᐱᒪᑯᐁᐧᐸᐦᐃᑫᐊᐧᐨ, ᐁᑲᐧ ᒥᓇ ᑯᑕᑭᔭᐣ ᑭᑭᓄᐦᐊᒪᑫᐃᐧᓇᐣ ᑫᐃᔑ ᑲᓇᐊᐧᐸᒥᑎᓱᐊᐧᐨ ᐅᐱᒪᑎᓯᐃᐧᓂᐊᐧᐠ, ᐁᑲᐧ ᑲᔦ ᐃᑭᐁᐧᓂᐊᐧᐠ ᑫᐅᒋ ᐱᒥ ᑭᑭᓄᐊᒪᑫᐊᐧᐨ ᑕᑭᑭᓄᐦᐊᒪᐊᐧᐊᐧᐠ ᑭᐡᐱᐣ ᑭᔑᑐᐊᐧᐨ ᑕᒥᓇᐊᐧᐠ ᐱᒪᑯᐁᐧᐸᐦᐃᑫᐃᐧᐣ ᑲᓇᑕ ᑭᑭᓇᐊᐧᒋᐦᐃᑯᐃᐧᐣ.
ᒪᑫ ᒥᑐᓂ ᐱᑯ ᐅᒥᓀᐧᐣᑕᐣ ᑲᑭᐸᑭᑎᓂᑲᑌᑭᐣ ᐱᒪᑯᐁᐧᐸᐦᐃᑫᐃᐧ ᐊᐸᒋᒋᑲᓇᐣ. ᑭᐃᑭᑐ ᒪᐊᐧᐨ ᒥᐢᑕᐦᐃ ᐃᓇᑭᐣᑌᐊᐧᐣ ᐃᒪ ᐊᐧᐱᑭᑲᐠ, ᐊᑎᑲ ᐱᒪᑯᐁᐧᐸᐦᐃᑫᐃᐧ ᒥᐣᒋᑲᐊᐧᓇᐠ $200 ᐃᑯ ᐃᓇᑭᓱᐊᐧᐠ.
“ᒪᐊᐧᐨ ᒥᔑᓄᐊᐧᐠ ᐊᐧᐱᑭᑲ ᐊᐊᐧᔑᔕᐠ ᒥᓇ ᐅᐡᑲᑎᓴᐠ ᑲᒥᓴᐁᐧᐣᑕᒧᐊᐧᐨ ᐁᐃᐧᑕᑭᐧᐊᐧᐨ ᐱᒪᑯᐁᐧᐸᐦᐃᑫᐃᐧ ᑭᑭᓄᐦᐊᒪᑫᐃᐧᓂᐠ ᑲᐃᐧᐣ ᑕᐡ ᐁᑭᐃᓯᓭᓂᐠ ᐁᑲ ᑲᐊᔭᐊᐧᐨ ᐊᐸᒋᒋᑲᓇᐣ” ᑭᐃᑭᑐ ᒍᓫᐃᔭ ᐸᐧᕑᑐᕑ, ᑲᐊᓂᑫ ᐅᑭᒪᐃᐨ, ᑭᑭᓄᐦᐊᒪᑫᐃᐧᓂᐠ ᒥᓇ ᐊᓂᔑᓂᓂᐃᐧ ᒪᒋᑕᐦᐃᑯᐃᐧᓂᐠ ᒋᒣᑕᐁᐧᐦᐃᐣᑕᐧ. “ᐅᐁᐧ ᐸᑭᑎᓂᑫᐃᐧᐣ ᐅᑲᐃᔑᐃᐧᒋᐦᐃᑯᓇᐊᐧ ᒥᓇ ᐅᑲᐅᐣᒋ ᒋᑫᐣᑕᓇᐊᐧ ᒋᔭᓂ ᐱᒪᑕᐦᐁᐊᐧᐨ ᒥᓇ ᒋᐊᐧᐊᐧᑲᐃᐧᐊᐧᐨ. ᐅᐁᐧᓂ ᑲᔦ ᒥᓂᑯᐠ ᑲᑭᐱᐸᑭᑎᓂᑫᐊᐨ ᑭᓇᑲᐧᐡ ᐅᑲᐅᐣᒋ ᐱᒥᐊᐸᒋᑐᓇᐊᐧ ᐁᑲᐧ ᑕᐡ ᒪᐊᐧᐨ ᓂᓇᓇᑯᒧᒥᐣ.”
ᐊᔕ ᐊᐊᐧᔑᒣ ᐯᔑᑯᔕᐳᔭᑭ, ᐅᑯᐁᐧᓂᐊᐧᐠ ᐅᑭᒋᐱᒪᑫᐧᐸᐦᐃᑫᐠ ᑭᐱᐸᑭᑎᓂᑫᐊᐧᐠ ᐊᐊᐧᔑᒣ $20 ᒥᓫᐃᔭᐣ ᑕᓴᐧᐱᐠ ᒋᐅᐣᒋ ᐃᐧᒋᐦᐃᐣᑕᐧ ᑲᐃᐧᒪᒋᑕᐊᐧᐨ ᐱᒪᑫᐧᐦᐃᑫᐃᐧᐣ ᐅᑕᔑᑫᐃᐧᓂᐊᐧᐠ ᒥᓯᐁᐧᑲᒥᐠ ᑐᑲᐣ ᐊᐢᐟᕑᐃᓫᐃᔭ, ᔕᐊᐧᓄᐠ ᒪᑲᑌᐃᐧᔭᐢ ᐊᐦᑭᐠ, ᐃᕑᐅᑊ, ᒪᓫᐁᔕ ᒥᓇ ᑭᐁᐧᑎᓄᐠ ᐊᒣᕑᐃᑲ.
ᐅᐁᐧ ᒣᑕᐁᐧᐃᐧᐣ ᒥᓇ ᐅᐣᑌᕑᐃᔪ ᐅᑭᒪᐅᐣ ᓄᑯᒥᑫ ᐅᑭᐸᑭᑎᓇᓇᐊᐧᐸᐣ ᐅᐡᑲᑎᓯᐃᐧ ᓂᑲᓂᑕᒪᑫᐃᐧ ᐃᐧᒋᐦᐃᐁᐧᐃᐧᓂᐠ ᒋᐃᔑᑭᑭᓂᑲᑌᐠ ᐅᒪ PLAY ᐃᐧᒋᐦᐃᐁᐧᐃᐧᓂᐠ ᒋᓇᐣᑭᓂᑲᑌᐠ ᑭᔭᐱᐨ 30 ᐃᐡᑯᓂᑲᓇᐣ ᒥᓇᐊᐧ ᑫᔭᓂᐊᐦᑭᐊᐧᐠ ᒋᐃᔑᐸᑭᑎᓂᐨ $1 ᒥᓫᐃᔭᐣ ᑕᓴᐧᐱᐠ ᐅᑭᒪᐅᓂ ᔓᓂᔭ.
ᐅᐡᑲᐱᓯᐃᐧ ᓂᑲᓂᑕᒪᑫᐃᐧ ᐱᒧᒋᑫᐃᐧ ᑭᑭᓄᐦᐊᒪᑫᐃᐧ ᒪᐊᐧᒋᐦᐃᐁᐧᐃᐧᓇᐣ ᑭᑯᒋᒋᑲᑌᐸᓂᐣ ᐁᐧᑎ ᒧᐢ ᑯᕑᐃ ᐃᐡᑯᓂᑲᓂᐠ ᐅᑕᓇᐠ ᑲᑭᔭᑭᐊᐧᐠ, ᐁᑲ ᑭᐸᑭᑎᓂᑲᑌᐊᐧᐣ ᑭᑭᓄᐦᐊᒪᑫᐃᐧᓇᐣ ᐊᓂᐣ ᑫᐃᔑ ᒋᑭᐡᑲᒪᐃᐧᐣᑕᐧ ᐅᐡᑲᑎᓴᐠ ᒋᑐᑕᒧᐊᐧᐨ ᑲᐅᐣᑕᑲᓀᓯᐊᐧᐨ ᐃᔑᒋᑫᐃᐧᓇᐣ ᒥᓇ ᒣᑕᐁᐧᐃᐧᓇᐣ, ᑫᐃᔑᑭᑫᐣᑕᒧᐊᐧᐨ ᒋᒥᓄᐃᐧᒋᐊᐧᐊᐧᐨ ᑭᒋᐦᐊᐣ ᒥᓇ ᐱᑯ ᑕᔑᑫᐃᐧᓂᐠ ᑲᑲᐯᔑᓂᐨ, ᐁᑲᐧ ᒥᓇ ᑲᐅᓇᒋᑲᑌᑭᐣ ᐃᔑᒋᑫᐃᐧᓇᐣ ᑫᐅᐣᒋ ᒪᒥᓄᓂᑲᑌᑭᐣ ᑫᑯᓇᐣ ᑲᐃᔑᐊᓂᒥᓭᐊᐧᐨ.


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.