ᐊᐧᓭᔭ ᑲᐅᑭᐧᓄᐊᐧᐨ ᑲᐃᔑᓂᑲᓂᑎᓱᐊᐧᐨ ᑭᑭᓄᐦᐊᒪᐊᐧᑲᓇᐠ ᐃᓇᐱᐊᐧᐠ ᐃᐢᐱᒥᐣᐠ

ᕑᐃᐠ ᑫᕑᐃᐠ
ᐊᐧᐊᐧᑌ ᑎᐸᒋᒧᐃᐧᓇᐣ

ᑭᒋᓇᒣᑯᓯᑊ ᐃᓂᓂᐊᐧᐠ ᐅᕑᐊᔭᐣ ᒪᑫ ᐅᐱᒥᐸᓂᑕᐧᐣ ᓭᐢᓇ 152 ᑲᐃᔑᓂᑲᑌᐠ ᐱᒥᓭᐃᐧᓀᐢ ᐃᐁᐧ ᐊᐧᓭᔭ ᑲᐅᑭᐧᓄᐊᐧᐨ ᒥᓇ ᐊᐧᑲᐦᐃ ᐊᐧᓂᓇᐊᐧᑲᐣᐠ ᐊᓂᔑᓇᐯ ᐊᓄᑭᐃᐧᓇᐣ ᑲᐅᐣᒋᑕᒪᐃᐧᐣᑕᐧ ᐃᒪ ᑲᐅᐣᒋ ᐱᒥᑭᑭᓄᐦᐊᒧᐊᐧᑲᓂᐃᐧᐨ.

ᓄᑯᑦ ᓂᑐᐣᒋᐸᑭᒋ ᓂᔑᑕᓇᐃᐧᑎᐸᐦᐃᑲᓀᐢ ᐅᑕᓇᐣᐠ, ᒪᑫ ᐃᑭᑐ ᑭᔐᐸᐊᐧᑕᑭᓇᑦ ᐱᓯᑦ 28 ᑕᐁᐧ ᐦᐊᕑᑊ ᐱᒧᓭᐃᐧ ᑭᑭᓄᐦᐊᒪᑫᐃᐧᑲᒥᐠ ᐁᐧᑎ ᐢᑕᐣᐸᐠ ᒪᓂᑐᐸ. ᐊᒥᐦᐅᐁᐧ ᓂᔕᐧ ᐁᐸᐸᒪᑯᒋᓂᔭᐣ. ᓂᐸᑭᒋᐃᐧᓇᐣ, ᑭᒥᓄᓭ. ᑲᐃᐧᐣ ᐃᐧᑲ ᒪᔑ ᒋᒪᒋᓭᐠ ᓂᐸᑭᒋᐃᐧᓇᐣ.

ᒪᑫ ᐃᑭᑐ ᐃᐧᐣ ᒥᓇ ᓂᔭᓇᐣ ᑯᑕᑭᔭᐠ ᐱᒥᓭᐃᐧᓂᓂᐊᐧᐠ ᐅᑭ ᑭᔑᑐᓇᐊᐧ ᑲᑭᑭᓄᐦᐊᒪᐃᐧᐣᑕᐧ ᑲᐊᓂᐊᐃᔑᐁᐧᐸᐣᐠ ᐁᑲᐧ ᑕᐢ ᒥᓇᐊᐧ ᐊᓂ ᑭᑭᓄᐦᐊᒪᐊᐧᑲᓄᐊᐧᐠ ᐃᐁᐧ ᐊᓄᑭᐃᐧᒪᓯᓇᐦᐃᑲᓀᐢ ᑲᐊᓂᐃᔑᑭᔑᑲᐠ ᑲᐊᓂᐃᔑᐁᐧᐸᐠ.

ᓂᑕᔭᒥᐣ ᒋᑲᑫᐧᑕᓯᓇᐦᐃᑫᔭᐣᐠ ᐃᐁᐧ ᐅᐣᒋ ᑲᓇᓇᑕᐃᐧᑭᑫᐣᒋᑲᑌᐠ ᑲᐊᓂᐊᐃᔑᐁᐧᐸᐣᐠ ᐊᐧᐸᐣᐠ ᑭᔐᐸᔭᐠ ᐁᑲᐧ ᑕᐢ ᐃᐁᐧ ᑲᑭ ᐱᑭᑭᓄᐦᐊᒪᑯᔭᐣᐠ ᓂᑲ ᐅᐣᒋ ᑯᑕᑭᓭᓇᐦᐃᑫᒥᐣ, ᒪᑫ ᐃᑭᑐ. ᑲᐅᐢᑭᑭᔑᑲᐠ, ᑲᐊᐱᑕᐊᐧᐠ ᐁᑲᐧ ᑕᐢ ᑲᐸᑫᐧᔑᑲᓂᑭᔑᑲᐠ, ᐊᐃᓇᓀᐤ ᐁᑭᔐᐸᔭᐠ ᓂᑎᔑᐱᔕᒥᐣ. ᐁᑲᐧ ᑕᐢ ᒥᑕᓯ ᐊᐱᑕ ᒥᓇ ᐯᔑᑯᔕᑊ ᑲᐃᓯᓭᐠ ᓂᑭᔑᑐᒥᐣ ᐁᑲᐧ ᑕᐢ ᐊᒥᐦᐃᒪ ᑲᐊᓂᔑ ᐸᐸᒪᑯᒋᓂᔭᐣᐠ, ᑭᐢᐱᐣ ᑲᒥᓄᑭᔑᑲᐠ.

ᑲᓂᔑᑭᔑᑲᐠ ᒥᓇ ᑲᓂᐅᑭᔑᑲᐠ ᒧᑕᑲᒥᐠ ᓂᑕᔑᑭᑭᓄᐦᐊᒪᑯᒥᐣ ᑲᐃᐢᑲᐧᓇᐊᐧᑫᐧᐠ ᐁᑲᐧ ᑕᐢ ᐃᑫᐧᓂᐊᐧᐠ ᑲᑭᑭᓄᐦᐊᒪᐊᐧᑲᓄᐊᐧᐨ ᒋᐱᒥᓭᐃᐧᓂᓂᐃᐧᐊᐧᐨ ᐸᓂᒪ ᐃᐧᒪᐊᐧ ᐃᐧᐸᐨ ᑲᑭᑫᐸᔭᓂᐣᐠ ᒥᓇ ᑲᐃᐢᑲᐧᓇᐊᐧᑫᐧᓂᐣᐠ ᐸᐸᒪᑯᒋᓂᐊᐧᐠ.

ᒪᑫ ᐃᑭᑐ ᒧᔕᐠ ᓂᒥᓴᐁᐧᐣᑕᐣ ᐁᐃᐧ ᐱᒥᓭᐃᐧᓂᓂᐃᐧᔭᐣ ᑲᐃᐧᐢ ᑕᐢ ᐃᐧᑲ ᒋᑭᐅᐣᒋᓯᓭᐠ ᒋᑐᑕᒪᐣ ᐅᐁᐧ ᑲᐃᔑᒥᓴᐁᐧᐣᑕᒪᐸᐣ ᐁᑲ ᐃᐧᑲ ᐁᑭ ᐅᐣᒋ ᓂᑲᑌᐢᑲᔭᐣ ᓂᑎᐢᔭᓂᑲᓂᐣᐠ.

ᑲᐃᐧᐣ ᐸᑭᑎᓇᐣ ᑲᐃᔑᐸᑯᓭᐣᑕᒪᐣ, ᒪᐃᐧᑐᑕᒪᓂᐣ ᐃᔑᓂᑲᐣ, ᒪᑫ ᐃᑭᑐ, ᐅᑕᓇᐣᐠ ᓂᔓᐱᓯᑦ ᐅᑕᓇᐣᐠ ᑲᐃᐧᐣ ᒋᐅᐣᒋ ᑭᑫᐣᑕᐣᐠ ᒋᐃᐢᑯᓂᐃᐧᐨ ᐅᐁᐧ ᒋᐱᒥᓭᐃᐧᓂᓂᐃᐧᐨ. ᐃᓯᓭ ᒋᐊᐣᒋᓭᑭᐣ ᐊᓇᐱ ᐱᐦᑯ. ᐯᔑᑲᐧ ᐁᑭᔑᑲᐠ ᑲᐃᐧᐣ ᑭᑭᑫᐣᑕᓯᐣ ᐅᐣᑎᓀᑫ ᑫᐃᔑᒪᒐᔭᐣ, ᒥᓇᐊᐧ ᑕᐢ ᐁᐊᓂᑭᔑᑲᐠ ᑭᑭᑫᐣᑕᐣ ᐊᐣᑎ ᐊᐧᐃᔑᒪᒐᔭᐣ. ᐊᒥᐱᑯ ᐃᒪ ᐃᔑ ᐱᒧᓭᐣ ᑲᐃᐧ ᐃᔑ ᒪᒐᔭᐣ.

ᒪᑫ ᒥᓇ 31 ᑯᑕᑭᔭᐠ ᑭᑭᓄᐦᐊᒧᐊᐧᑲᓇᐠ ᐅᑭ ᒪᒋᑐᓇᐊᐧ ᐊᐁᐧ ᐊᐧᓭᔭ ᑲᐅᑭᐧᓂᐊᐧᐨ ᒥᓇ ᐊᐧᑲᐦᐃ ᐊᐧᓂᓇᐊᐧᑲᐣᐠ ᐊᓂᔑᓇᐯ ᐊᓄᑭᐃᐧᓇᐣ ᑲᐅᐣᒋᑕᒪᐃᐧᐣᑕᐧ ᑭᔐᐸᐊᐧᑕᑭᓇᐣ ᐱᓯᑦ 18 ᑲᐃᓇᑭᓱᐨ ᐁᑲᐧ ᑕᐢ ᐯᔑᑯᐊᐦᑭ ᐃᓯᓭᐠ ᑕᑭᔑᒋᑲᑌ.

ᐅᐁᐧ ᑲᐱᒥᓭᐃᐧ ᑭᑭᓄᐦᐊᒪᑫᔭᐣᐠ ᐃᐧᒋᐦᐃᐁᐧᓭ ᐁᐃᐧᐣᒋᑫᒪᑲᐠᐅᐁᐧ ᒪᔭᑦ ᒪᒋᒋᑫᐃᐧᐣ ᑲᐅᐣᒋ ᐊᓄᑭᒋᑲᑌᐠ, ᐃᑭᑐ ᐁᕑᐃᐣ ᐊᐣᑕᓴᐣ, ᐅᑕᓄᑭᐣ ᑲᐅᐣᒋᓇᓇᑲᒋᐦᐊᒋᐣ ᐃᒪ ᐊᐧᓭᔭ ᐱᒥᓭᐃᐧ ᐱᒧᐃᐧᒋᑫᐃᐧᐣ. ᓂᓇᐃᐧᐣᐟ ᑲᐅᐣᒋ ᑕᒪᐃᐧᐁᐧᐊᐧᐨ ᑭᑭᓄᐦᐊᒪᑫᐃᐧᐣ ᐃᒪ ᐱᒥᓭᐃᐧᑫᑯᓇᐣ ᐅᐣᒋ; ᓇᓇᑲ ᐅᐣᒋ ᒪᒋᓭᐊᐧᐣ ᑲᐅᐣᒋ ᒪᒋ ᑭᑭᓄᐦᐊᒪᑲᓂᐊᐧᐣᐠ ᐃᑫᐧᓂᐊᐧᐣ ᑲᔦ ᐊᔕ ᑲᑲᐧᔭᐣᒋ ᐱᒥᓭᐃᐧᓂᓂᐊᐧᐨ ᒥᓇ ᑲᔦ ᐱᒥᓭᐃᐧ ᐱᐊᐧᐱᑯᓇᐯᐠ.

ᐊᐣᑕᓴᐣ ᐃᑭᑐ ᐊᐧᓭᔭ ᒥᔑᐣᐊᐧ ᐁᓄᑌᓭᐊᐧᐨ ᐊᓂᔑᓇᐯ ᐅᑕᓄᑭᐠ ᐃᒪ ᐱᒥᓭᐃᐧᓂᓂᐊᐧᐠ ᒥᓇ ᐱᐊᐧᐱᑯᓇᐯᐠ ᐅᑕᓇᐣᐠ ᑲᐱᐊᐦᑭᐊᐧᐠ.

ᐃᐁᐧ ᑕᐢ ᑲᐃᔑ ᐸᑯᓭᐣᑕᒪᐣᐠ ᒋᐃᓯᓭᐊᐧᐨ ᐱᒥᓭᐃᐧᓂᓂᐊᐧᐠ ᒋᐅᐣᒋ ᐃᐧᒋᐦᐃᑯᐊᐧᐨ ᐊᐦᐱ ᓇᓇᐣᑕᐊᐧᓄᑭᐊᐧᐠ ᐃᐧᓇᐣᒋᓇᒧᐊᐧᐨ ᐅᑎᐸᐦᐃᓇᓂᐊᐧ ᓇᐱᒥᓭᐊᐧᐨ ᐱᓂᐢ ᐊᐦᐸᐣ ᒋᐊᓂ ᐱᒥᓭᐊᐧᐨ ᐃᒪ ᐊᐧᓭᔭ, ᐃᑭᑐ ᑕᐃᑕᐢ ᓭᑦᐳᓫ, ᐊᐧᑲᐦᐃ ᐊᐧᓂᓇᐊᐧᑲᐣᐠ ᐊᓂᔑᓇᐯ ᐊᓄᑭᐃᐧᓇᐣ ᑲᐅᐣᒋᑕᒪᐃᐧᐣᑕᐧ ᐅᑕᓄᑭᑕᒪᑫᐃᐧᓂᓂ ᑲᐅᐣᒋ ᓇᓇᑲᒋᑐᐨ ᐱᒧᓭᐃᐧ ᑭᑭᓄᐦᐊᒪᑫᐃᐧᓂ, ᐃᑭᑐ ᑲᔦ ᒪᐊᐧᐨ

ᑲᐅᑭᐧᓄᐊᐧᐨ ᐅᑕᓂᑭᑫᐣᑕᓇᐊᐧ ᐱᒥᓭᐃᐧ ᐊᓄᑭᐃᐧᓇᐣ

ᐁᐃᐢᐱᓭᐠ ᑲᐊᔭᐣᒋᓭᐠ ᐊᓄᑭᐃᐧᓇᐣ ᐃᒪ ᐅᐱᒥᓭᐠ ᑲᐃᔑ ᐊᓄᑭᐊᐧᐨ. ᐅᓇᐣᑕᐁᐧᓂᒪᐊᐧᐣ ᐊᓂᔑᓇᐯᐣ ᒋᐅᓄᑭᐊᐧᐨ ᐅᒪ ᒪᒋᑕᐃᐧᓂᐣᐠ.

ᐊᐣᑕᓴᐣ ᐃᑭᑐ ᐊᐧᓭᔭ ᐅᓇᐣᑕᐁᐧᓂᒪᐣ ᐸᐢᑲ ᑲᐊᓂᒪᒋ ᐱᒥᓭᐊᐧᐨ ᐱᒥᓭᐃᐧᓂᓂᐊᐧᐠ ᒋᐊᔭᐊᐧᐨ 1,000 ᑎᐸᐦᐃᑲᐣ ᐊᔕ ᑲᐅᐣᒋ ᐱᒥᓭᐊᐧᐨ.

ᐱᐠ ᓯᐱ ᒍ ᒧᓯᐢ ᐃᑭᑐ ᐁᐸᑯᓭᓂᒧᐨ ᐃᒪ ᒋᑭ ᐊᓂᔑ ᐃᐧᒋᑕᐧᐨ ᐊᐧᓭᔭ ᐅᐱᒥᐃᐧᒋᑫᐃᐧᓂᐣᐠ.

ᒪᐊᐧᐨ ᒥᓄᐧᔑᐣ ᐊᓂᔑᓇᐯᐠ ᑫᐃᐧᓇᐊᐧ ᐃᒪ ᒋᑕᑭᐧᐊᐧᐨ, ᐃᑭᑐ ᒧᓯᐢ, ᒣᑲᐧᐨ ᑲᐱᒥ ᑭᑭᓄᐦᐊᒪᐊᐧᑲᓂᐃᐧᐨ ᐃᒪ ᐊᐧᓭᔭ ᑲᐅᐣᒋ ᐱᒥ ᔓᓂᔭᑫᒪᑲᐠ ᑲᐃᔑᐊᓄᑭᐨ ᐁᐧᑎ ᐊᐧᓭᔭ ᑲᐅᑭᐧᐃᓂᐊᐧᐨ ᒪᓯᓇᐦᐃᑫᐃᐧᑲᒥᐠ ᐸᕑᐟ ᐃᐧᓫᐃᔭᑦ ᑕᔑᑫᐃᐧᓂᐣᐠ. ᑲᑭᓇ ᑲᐃᔑ ᑕᓴᐧᔦᑯᓇᑲᐧᑭᐣ ᐊᓄᑭᐃᐧᓇᐣ ᐃᒪ ᒪᒋᑕᐃᐧᓂᐣᐠ ᑭᑕ ᐃᔑ ᑕᓇᓄᑭ, ᒥᐢᑕᐦᐃ ᑲᔦ ᑲᐅᐣᒋ ᐃᐧᒋᑲᐸᐃᐧᑕᑯ ᐃᒪ. ᐊᒥ ᑲᐅᐣᒋᓯᓭᐠ ᒋᑲᐢᑭᒋᑲᑌᐠ ᒋᐱᒥᐃᐧᒋᑲᑌᐠ ᐅᐁᐧ ᑭᑭᓄᐦᐊᒪᑫᐃᐧᐣ.

ᐅᐁᐧ ᑭᑭᓄᐦᐊᒪᑫᐃᐧᐣ ᒥᐱᑯ ᐊᑫᐧᓇᐠ ᐁᑐᒋᑲᑌᐠ. ᒥᐦᐃᒪ ᐁᐅᐣᒋ ᐃᐧᒋᐦᐃᐁᐧᓭᐠ ᒋᐃᐧᒋᐦᐊᑲᓄᐊᐧᐨ ᐊᐃᐧᔭᐠ ᐅᒪ ᑲᐃᔑ ᒪᑕᓄᑭᐊᐧᐨ ᒪᒋᑕᐃᐧᓂᐣᐠ.

ᓀᐣᑲᐃᐧᓴᑲᐦᐃᑲᓂᐣᐠ ᕑᐊᐧ̇ᐃᐟ ᒥᑭᐢ ᒣᑲᐧᐨ ᐱᒥ ᑭᑭᓄᐦᐊᒪᑯᓯ ᐃᒪ ᐳᓯᑕᓯᓇᐣ ᑲᐃᐧᐃᔑ ᐊᓄᑭᓇᓂᐊᐧᐣᐠ ᐁᐧᑎ ᑕᐢᑐᕑ ᐯ.

ᓄᑯᑦ ᑲᑭᔑᑲᐠ ᒪᐊᐧᐨ ᒋᑭ ᑕᐦᑲᔭ, ᒥᑭᐢ ᐃᑭᑐ, ᐊᔕ ᐁᑭ ᐊᓄᑭᐸᐣ ᐅᑕᓇᐣᐠ ᐅᒪ ᐳᓯᑕᓯᓇᐣ ᑲᐃᔑ ᐊᓂᑲᑌᑭᐣ. ᑭᐢᐱᐣ ᐁᑲ ᐁᑭᔕᐊᐧᐱᓯᔭᐣ, ᓇᐊᐧᐨ ᒥᓄᐧᔑᐣ ᐁᑲ ᐊᑲᐧᒋᐣᐠ ᒋᑕᔑᐃᐧᑐᔭᐣ.

ᒥᑭᐣ ᐃᑭᑐ ᑕᓱᑭᔑᐠ ᑫᑯᓇᐣ ᐁᐱᒥᑭᑫᐣᑕᑭᐣ; ᐅᐁᐧ ᒪᒋᑕᐃᐧᐣ ᒥᓇ ᐅᐁᐧ ᑭᑭᓄᐦᐊᒪᑫᐃᐧᐣ ᐅᐃᐧᒋᐦᐃᑯᐣ ᒋᐱᒥ ᑭᑫᐣᑕᑭᐣ ᑫᑯᓇᐣ, ᒋᑭᑫᐣᑕᑭᐣ ᓇᓇᑲ ᑫᑯᓇᐣ ᑲᐃᓯᓭᑭᐣ ᐱᒥᔭᐃᐧᓂᐣᐠ ᐊᐃᐧᔭ ᑲᐃᐧ ᐃᔑ ᐊᓄᑭᐨ ᒥᓇ ᑲᔦ ᑯᑕᑭᔭᐠ ᐊᐃᐧᔭᐣ ᒋᓂᐦᑕ ᐃᐧᑕᓄᑭᒪᐨ.

ᐅᑲᓄᑭᐠ ᐅᒪ ᑲᐊᓄᑭᐊᐧᐨ, ᐅᐁᐧ ᒪᒋᑕᐃᐧᐣ ᐃᐧᓇᐊᐧ ᑲᐊᔑᐦᐊᐧᐨ ᐅᑕᓄᑭᑕᒪᔑᐣ ᑲᐧᔭᐠ ᒋᓂᐦᑕᐊᐧᓄᑭᓂᐣᐨ, ᒥᑭᐢ ᐃᑭᑐ. ᓂᓇᓇᑯᑦ ᐅᒪ ᑫᓂᐣ ᒋᐃᔑ ᐃᐧᒋᑕᐧᔭᐣ ᐅᒪ ᐱᒥᓭᐃᐧ ᐊᓄᑭᐃᐧᓂᐣᐠ.