ᐊᐦᐱ ᑲᒪᒋᐢᑯᓂᐃᐧᐨ ᐦᐊ̇ᐢᑯᓫ, ᐁᑎᔦᐣ ᐁᐢᑫᐧᑲ ᐊᔕ ᐅᑭ ᑭᑫᐣᑕᓇᐸᐣ ᑎᐸᑯᓂᑫᐃᐧ ᐅᑕᔭᒥᑕᒪᑫ ᒋᐃᓇᓄᑭᐨ.
ᐁᐢᑫᐧᑲ, ᐃᒪ ᐅᐣᒋ ᑎᐯᐣᑕᑯᓯᐨ ᐱᐣᒋᑕᐊᐧᐱᐠ ᓴᑭᐣᐠ ᐊᓂᔑᓇᐯ ᐃᐢᑯᓂᑲᓂᐣᐠ (ᕑᐊᐧᑭ ᐯ) ᐅᐊᐧᐸᑕᐣ ᐅᐸᐊᐧᒧᐃᐧᐣ ᐁᐊᓂ ᐃᔑᓇᑲᐧᓂᐠ ᑲᐃᔑ ᒥᓴᐁᐧᐣᑕᐠ ᒋᐊᔭᒥᑕᒪᑫᐃᐧᓂᓂᐃᐧᐨ ᒋᐃᐧᑕᓄᑭᒪᒋᐣ ᐁᐦᐃᐠᓴᐣ ᒥᓇ ᑲᐃᐧᑕᓂᑭᒪᒋᐣ ᑎᐸᑯᓂᑫᐃᐧ ᒪᓯᓇᐦᐃᑫᐃᐧᑲᒥᐠ ᐃᒪ ᑕᐣᑐᕑ ᐯ. ᐊᔕ 2005 ᐅᑐᐣᒋ ᐊᓂᑲᑕᐣ ᐃᐁᐧᓂ ᑎᐸᑯᓂᑫᐃᐧᐣ ᑲᐊᓂᑲᑕᒧᐊᐧᐨ.
ᑲᑭ ᐅᓀᐣᑕᒪᐣ (ᑎᐸᑯᓂᑫᐃᐧᓂᐠ ᒋᐃᔑ ᐊᓂᑭᑕᒪᑫᐨ) ᒣᑲᐧᐨ ᐦᐊ̇ᐢᑯᓫ ᑲᐃᐢᑯᓄᐃᐧᔭᐸᐣ. ᒥᐱᑯ ᒧᔕᐠ ᑲᐃᓀᐣᑕᒪᐸᐣ ᐃᐁᐧ ᒋᐊᔭᒥᑕᒪᑫᐃᐧᓂᐃᐧᔭᐣ ᑎᐸᑯᓂᑫᐃᐧᓂᐠ ᒥᓇ ᑲᔦ ᒥᔑᐣ ᐊᐃᐧᔭᐠ ᓂᑭᐃᐧᑕᒪᐊᐧᐸᓂᐠ ᐅᑕᓇᐣᐠ. ᑎᐸᑯᓂᑫᐃᐧ ᐊᓂᑭᐃᐧᐣ ᒥᐱᑯ ᐃᒪ ᓂᑫ ᑲᐃᓀᓂᒧᔭᐣ, ᐁᐢᑫᐧᑲ ᐃᑭᑐ.
ᐁᐢᑫᐧᑲ ᑕᐣᑐᕑ ᐯ ᑭᑕᔑᐅᑦᐱᑭ ᐁᑲᐧ ᑲᔦ ᑲᐃᐢᑲᐧ ᑭᔑᐢᑯᓂᐃᐧᐨ ᐦᐊ̇ᐢᑯᓫ ᑲᐃᔑ ᑭᒋ̇ᐢᐸᐠ ᑭᑭᓄᐦᐊᒪᑫᐃᐧᓂᐣ ᑭᐃᔕ ᐁᐧᑎ ᐃᐣᐟᓯᕑ, ᐅᐣᑌᕑᐃᔪ ᑲᐃᔑᓂᑲᑌᐠ ᑕᐃᐧᐣ ᐊᒥᐦᐃᒪ ᑲᑭ ᑌᐯᓇᐠ ᒋᑭᔑᑐᐨ ᑲᑭᐃᐢᑯᓄᐃᐧᐣᑕᐠ ᐃᐁᐧᓂ ᑎᐸᑯᓂᐃᐧ ᑭᑭᓄᐦᐊᒪᑫᐃᐧᐣ.
ᐊᐦᐱ ᑲᑭ ᑭᔑᑐᐨ ᐅᓇᑯᓂᐃᐧ ᐃᐢᑯᓄᐃᐧᐣ ᐊᐊᐧᔑᒣ ᐃᐢᑯᓄᐃᐧ ᑎᐸᑯᓂᐃᐧ ᑭᑭᓄᐦᐊᒪᑫᐃᐧᓂᐠ ᐁᐧᑎ ᑐᕑᐊᐣᑐ ᔪᕑᐅᐠ ᑭᒋ ᑭᑭᓄᐦᐊᒪᑫᐃᐧᑲᒥᐠ ᐅᐢᑯᐟ ᐦᐊᓫ ᑎᐸᑯᓂᑫᐃᐧ ᑭᑭᓄᐦᐊᒪᑫᐃᐧᑲᒥᐠ ᐁᑲᐧ ᑕᐢ ᐅᑭ ᑭᔑᑐᐣ 2004 ᑲᔭᑭᐊᐧᐠ.
ᐁᐢᑫᐧᑲ ᑭᐃᑭᑐ ᐊᒥᐱᑯ ᒧᔕᐠ ᑲᑭ ᐃᓀᐣᑕᐠ ᐃᒪ ᐊᓂᔑᓇᐯᐃᐧ ᐃᓯᓭᐃᐧᓇᐣ ᑎᐸᑯᓂᑫᐃᐧᓂᐠ ᒋᐃᔑ ᐊᓂᑭᑕᒪᑫᐨ ᐁᑲᐧ ᑕᐢ ᑲᔦ ᐃᐁᐧᓂ ᑲᑭ ᐅᐣᒋ ᐅᑕᐱᓇᐣᐠ ᐅᐢᑯᐟ ᐦᐊᓫ ᑲᐧᔭᐠ ᐁᑭᑫᐣᑕᒧᐊᐧᐨ ᐊᓂᐣ ᐁᐃᓯᓭᐠ ᐅᓇᑯᓂᑫᐃᐧᐣ.
ᐃᐁᐧ ᐊᓂᔑᓇᐯ ᑎᐸᑯᓂᑫᐃᐧᐣ ᑲᑭ ᐃᔑ ᒪᒥᑎᓀᐣᑕᒪᐣ ᐊᒥᐦᐃᐁᐧ ᑲᑭ ᐃᔑᐃᐧᓂᑯᔭᐣ ᐃᒪ ᐅᐢᑯᐟ, ᑭᐃᑭᑐ.
ᐊᐦᐱ ᑲᑭ ᑌᐱᓇᐣᐠ ᑎᐸᑯᓂᑫᐃᐧᓂᐠ ᒋᐃᔑ ᐊᓂᑭᑕᒪᑫᐨ ᑭᐱᑭᐁᐧ ᐃᒪ ᑕᐣᑐᕑ ᐯ ᐁᑲᐧ ᑕᐢ ᐃᒪ ᑭᐊᓄᑭ ᐁᕑᐃᐠᓴᐣ ᒥᓇ ᑲᐃᐧᑕᓄᑭᒪᒋᐣ ᐅᑕᔭᒥᑕᒪᑫᐠ ᑲᑕᓇᓄᑭᐊᐧᐨ ᐁᑭ ᐅᐣᒋ ᐱᒥᑭᑭᓄᐦᐊᒪᑲᓂᐃᐧᐨ ᐊᓂᐣ ᐁᐃᓯᓭᓂᐠ ᑎᐸᑯᓂᑫᐃᐧᐣ ᐯᔑᑯᐊᐦᑭ ᒪᐧᔦ ᑭᐁᐧ ᐅᑕᐱᓇᑲᓂᐃᐧᐨ ᑎᐸᑯᓂᑫᐃᐧ ᐅᑕᔭᒥᑕᒪᑫ ᒋᐃᓇᐣᑭᓯᐨ.
ᓂᑎᓇᐁᐧᒪᑲᓇᐠ ᐅᒪ ᐊᔭᐊᐧᐠ ᒥᐃᐦᐁᐧ ᑲᑭ ᐅᐣᒋ̇ᓀᐣᑕᒪᐣ ᒋᐱᑭᐁᐧᔭᐣ, ᐁᐢᑫᐧᑲ ᑭᐃᑭᑐ. ᓂᒥᔓᑦ ᒥᓇ ᓄᑯᑦ ᓂᑭᐅᑦᐱᑭᐦᐃᑯᐠ ᑲᐱᐊᐊᐧᔑᔑᐃᐧᔭᐣ. ᒪᐊᐧᐨ ᓂᑭ ᐯᔓᐣᒋᐦᐊᐠ ᓄᑯᑦ ᒥᓇ ᓂᒥᔓᑦ ᐁᑲᐧ ᑕᐢ ᒪᐧᔦ ᒪᒋᐢᑯᓄᐃᐧᔭᐣ ᑎᐸᑯᓂᑫᐃᐧ ᑭᑭᓄᐦᐊᒪᑫᐃᐧᐣ ᓄᑯᑦ ᑭ ᐃᐢᑲᐧᐱᒪᑎᓯ, ᓂᒥᔓᑦ ᑕᐢ ᐃᐧᓀᐦᑕ ᐅᒪ ᑭᑲᐯᔑ. ᒥᐱᑯ ᒧᔕᐠ ᑲᑭ ᐃᓀᐣᑕᒪᐣ ᒣᑲᐧᐨ ᑲᐱᒥᐢᑯᓄᐃᐧᔭᐣ ᐁᐃᐧᐱᑭᐁᐧᔭᐣ ᒋᐱᑲᓇᐁᐧᓂᒪᐠ ᓂᒥᔓᑦ. ᐊᒥᐦᐃ ᑲᑭ ᐅᐣᒋ ᐱᑭᐁᐧᔭᐣ ᐃᐧᐣ ᐅᐣᒋ, ᑭᐃᑭᑐ.
ᐁᐢᑫᐧᑲ ᑲᐃᓇᓄᑭᐨ ᑎᐸᑯᓂᑫᐃᐧᓂᐠ ᐅᓴᑦ ᐱᑯ ᐁᐦᑕ ᐊᓂᔑᓇᐯᐊᐧᐣ ᐅᑕᓂᑲᐊᐧᐣ. ᒥᔑᐣ ᐅᐃᐧᒋᐦᐊᐣ ᐊᓂᔑᓇᐯ ᐃᐢᑯᓂᑲᓇᐣ ᒥᓇ ᐱᒥᐃᐧᒋᑫᐃᐧᓇᐣ ᑎᐸᑯᓂᑫᐃᐧᓂᐠ ᑲᐃᔑ ᒪᒋᓭᐊᐧᐨ ᒥᓇ ᑲᔦ ᐅᑕᓂᑲᑕᓇᐣ ᐊᓂᔑᓇᐯᐠ ᑲᑭ ᒪᑲᒥᐣᑕᐧᐸᐣ ᐅᑕᐦᑭᐊᐧ ᐁᑲᐧ ᑕᐢ ᑲᑲᑫᐧᑭᐁᐧᐅᑕᐱᓇᒧᐊᐧᐨ ᑐᑲᐣ ᑲᐱᐣᑎᑲᑌᓂᐠ ᐅᑕᐦᑭᐊᐧᐣ ᐁᑲ ᐅᓇᑯᓂᑫᐃᐧᐣ ᑲᐸᑭᑎᓇᐣᐠ. ᑕᑯ ᑲᔦ, ᐅᑐᐣᒋ ᐃᐧᒋᐦᐊᐣ ᐯᐸᑲᐣ ᐊᐃᐧᔭᐣ ᑲᑭ ᐃᐧᓴᑭᔑᓄᐊᐧᐨ ᐅᑕᐸᓂᐣᐠ ᐅᐣᒋ ᒥᓇ ᑲᔦ ᐅᑕᓂᑲᑕᓇᐣ ᐊᓂᐣᑕ ᐃᑫᐧᓂᐊᐧᐣ ᐊᓂᔑᓇᐯ ᐊᐊᐧᔑᔕᐠ ᑲᑭ ᐱᑲᑲᐧᑕᑭᐦᐊᑲᓄᐊᐧᐸᐣ ᑭᐁᐧᑎᐸᐦᐃᑫᐃᐧᓇᐣ.
ᐁᐢᑫᐧᑲ ᐃᑭᑐ ᑭᐢᐱᐣ ᐊᐃᐧᔭ ᒪᒥᑎᓀᐣᑕᒧᑫᐧᐣ ᑎᐸᑯᓂᑫᐃᐧᓂᐠ ᐁᐃᐧ ᐃᔑ ᐊᓄᑭᑕᒪᑫᐨ ᐊᒥᐱᑯ ᐁᐃᔑᓇᑲᐧᓂᐠ ᐃᒪ ᒋᐅᐣᒋ ᒪᒋᑐᐨ ᐦᐊ̇ᐢᑯᓫ ᑲᐃᒋᑲᑌᐠ ᑕᐱᓇᑲ ᒪᐧᔦ ᐃᐢᑯᓄᐃᐧᔭᐣ ᑲᑭᒋ̇ᐢᐸᐠ ᑭᑭᓄᐦᐊᒪᑫᐃᐧᐣ ᑲᐃᐧᐣ ᓇᐦᐱᐨ ᒥᐢᑕᐦᐃ ᑎᐸᐦᐃᑲᐣ ᑭᑕᔭᓯᐣ ᒋᑲᐧᔭᐣᒋᑕᒪᓯᔭᐣ ᑫᑯᓇᐣ.
ᐃᒪ ᑭᑕ ᐃᔑ ᐅᓀᐣᑕᐣ ᓂᐢᑕᑦ ᒪᒋ̇ᐢᑯᓄᐃᐧᔭᐣ (ᑲᑭᒋ̇ᐢᐸᐠ ᑭᑭᓄᐦᐊᒪᑫᐃᐧᐣ) ᒋᐅᓇᑕᒪᓯᔭᐣ ᑲᐃᐧ ᑐᑕᒪᐣ ᑕᐱᓇᑲ ᑭᑭᓇᐊᐧᒋᐱᐦᐃᑯᐃᐧᐣ ᑲᑲᑫᐧ ᐊᐧᐸᐣᑕᐦᐃᐁᐧ ᑲᐧᔭᐠ ᐁᑲᐢᑭᑐᔭᐣ ᑲᐃᐢᑯᓄᐃᐧᔭᐣ ᐁᑲᐧ ᑕᐢ ᑲᔦ ᒪᐊᐧᐨ ᑲᐧᔭᐠ ᑲᑲᑫᐧ ᑐᑕᐣ ᑲᑭᑭᓄᐦᐊᒪᑯᔭᐣ. ᒪᐊᐧᐨ ᑲᑭᒋᓴᓇᑫᐣᑕᑲᐧᐠ ᑭᑭᓄᐦᐊᒪᑫᐃᐧᐣ ᒪᐃᐧᓀᐢᑲᑎ̇ᒪᑲᓄᐣ ᓄᑯᑦ ᑲᑭᔑᑲᐠ ᒥᓇ ᑲᔦ ᒥᔑᓄᐊᐧᐠ ᐊᐃᐧᔭᐠ ᐃᐧᑭᑭᓄᐦᐊᒪᑯᐃᐧᓯᐊᐧᐨ ᑎᐸᑯᓂᑫᐃᐧ ᑭᑭᓄᐦᐊᒪᑫᐃᐧᐣ, ᒪᐊᐧᐨ ᑕᐢ ᐊᓂᒥᓭ ᐊᐃᐧᔭ ᒋᑭ ᐱᐣᑎᑫᐨ ᐅᒪ ᑭᑭᓄᐦᐊᒪᑫᐃᐧᓂᐠ, ᑭᐃᑭᑐ.
ᐊᒥᐦᐃ ᑲᔦ ᑲᑭ ᐃᑭᑐᐨ ᐃᐧᐸᐨ ᒋᑲᑫᐧ ᐱᐣᑎᑫᓯᓇᐦᐊᑎᓯᔭᐣ ᑲᐃᐧ ᐃᐢᑯᓄᐃᐧᔭᐣ ᐁᑲᐧ ᑕᐢ ᑲᔦ ᑯᑕᑭᔭᐣ ᑫᑯᓇᐣ ᐊᔭᐊᐧᐣ ᑫᑭ ᐃᔑ ᒧᐦᒋ ᐊᓂᑭᑕᒪᑫᔭᐸᐣ ᒪᐧᔦ ᒪᒋ ᑭᑭᓄᐦᐊᒪᑯᓯᔭᐣ, ᑭᑕᓂᑭᐃᐧᐣ ᑲᐃᔑᑲᐢᑯᐦᐅᔭᐣ ᒥᓇ ᒋᐅᑕᐱᓇᒪᐣ ᑎᐸᑯᓂᑫᐃᐧ ᑭᑭᐦᐊᒪᑫᐃᐧᐣ ᑲᑫᐧᑕᓯᓇᐦᐃᑫᐃᐧᐣ, ᒥᓇ ᐅᑫᐧᓂᐊᐧᐣ ᑲᐃᓯᓭᐠ ᐃᐧᐸᐨ ᓇᐊᐧᐨ ᒋᐊᓂᑲᑕᒪᓂᐣ, ᑭᐃᑭᑐ.
ᐁᐢᑫᐧᑲ ᐃᑭᑐ ᐃᒪ ᑎᐸᑯᓂᑫᐃᐧᓂᐠ ᐊᐃᐧᔭ ᑲᐃᐧ ᐃᔑ ᐊᓄᑭᐨ ᒪᐊᐧᐨ ᑲᐧᔭᐠ ᑲᐃᔑ ᐅᓀᐣᑕᒪᐣ ᒋᐃᓇᓄᑭᔭᐣ ᑕᐱᓇᑲ ᑲᐃᐧᐣ ᑲᑭᓇ ᐊᐃᐧᔭᐠ ᑭᐃᓯᓭᓯᐣ ᐅᓇᑯᓂᑫᐃᐧ ᐅᑕᔭᒥᑕᒪᑫ ᒋᐃᓇᓄᑭᐨ. ᒥᔑᐣ ᐊᐃᐧᔭᐠ ᑲᑭᔑᑭᑭᓄᐦᐊᒪᐊᐧᑲᓄᐊᐧᐨ ᑎᐸᑯᓂᑫᐃᐧ ᑭᑭᓄᐦᐊᒪᑫᐃᐧᐣ ᑲᐃᐧᐣ ᐃᒪ ᒋᐃᔑ ᒪᑕᓄᑭᐊᐧᐨ, ᐃᑭᑐ. ᒪᐊᐧᐨ ᒥᔑᓇᑎᓄᐣ ᐊᓂᑭᐃᐧᓇᐣ, ᐁᑲᐧ ᑲᔦ ᒥᔑᐣ ᐊᓂᔑᓇᐯ ᒪᒋᑕᐃᐧᓇᐣ ᐅᓇᐣᑕᐁᐧᐣᑕᓇᐊᐧ ᐊᐃᐧᔭᐣ ᒋᐃᔑ ᑭᑫᐣᑕᒪᐃᐧᓂᐨ ᐃᒪ ᒋᑭᐃᔑ ᐊᓂᑭᑕᒪᑫᓂᐨ ᑭᒋᐊᓂᑭᐃᐧᓂᐠ ᒥᓇ ᑲᔦ ᒥᔑᐣ ᐅᑕᔭᒥᑕᒪᑫᐠ ᐃᓇᓄᑭᐊᐧᐨ.
ᐁᑲᐧ ᑕᐢ ᑲᔦ, ᐃᒪ ᑕᔑᑫᐃᐧᓂᐠ ᐁᐅᐣᒋ ᑲᓇᐊᐧᐸᐣᒋᑲᑌᐠ ᓇᐦᐱᐨ ᒥᔑᓇᑎᓄᐣ ᐊᓂᑭᐃᐧᓇᐣ ᑫᑭ ᐅᐣᒋ ᐃᐧᒋᐦᐃᑎᓯᐊᐧᐸᐣ ᐊᐃᐧᔭᐠ ᐊᔕ ᑲᑭ ᐱᑭᑭᓄᐦᐊᒪᑯᓯᐊᐧᐨ ᑎᐸᑯᓂᑫᐃᐧᓂᐠ ᐅᐁᐧᓂ ᒋᑭ ᐃᔑ ᐊᓂᑭᐊᐧᐸᐣ.
ᐁᐢᑫᐧᑲ ᐃᑭᑐ ᒪᐊᐧᐨ ᑲᒥᓄᐧᐁᐣᑕᒥᐦᐃᑯᐨ ᐃᐁᐧ ᑎᐸᑯᓂᑫᐃᐧ ᐅᑲᑭᑐᑕᒪᑫ ᑲᐃᓇᓄᑭᐨ ᐃᐁᐧ ᐁᑭᑫᐣᑕᐣᐠ ᐊᐃᐧᔭᐣ ᐁᐅᐣᒋ ᐃᐧᒋᐦᐊᐨ, ᐃᑫᐧᓂᐊᐧᐠ ᒪᐊᐧᐨ ᐊᓂᔑᓇᐯ ᓇᓇᑲ ᑲᐃᔑ ᒪᒋᓭᓂᐨ. ᒪᐊᐧᐨ ᓂᑐᐣᒋ ᒥᓄᐧᐁᐧᓂᑦ ᐁᑭᑫᐣᑕᒪᐣ ᐊᐃᐧᔭ ᐁᐃᐧᒋᐦᐊᐠ ᑕᐱᓇᑲ ᒥᔑᓄᐊᐧ ᐃᓯᓭ ᐁᔭᓂᒥᓭᑭᐣ ᑫᑯᓇᐣ ᐁᑲ ᑲᑭᐯᔑᑯ ᐊᓂᑲᑌᑭᐣ, ᑭᐃᑭᑐ.
There have been so many changes over the past couple of decades for Indigenous First Nations and I am amazed at how life has changed for many peopl
There have been so many changes over the past couple of decades for Indigenous First Nations and I am amazed at how life has changed for many people. Most...
Extreme cold weather is part of life every winter on the James Bay coast. The cold was normal for my parents who were both born on the land during a time...